ရာႏဇဂျိုဟ်ႏသဌေꩻ
"ရာႏဇဂျိုဟ်ႏသဌေꩻဝတ္ထု"(လွမ်ꩻလာꩻသဌေꩻ ကတူႏဆာ၊ ဖြဲ့ꩻထန်ႏထိုꩻဗာႏသေ့ꩻနီဗာႏ)
မော့ꩻနဝ်ꩻခါ ဝေင်ꩻရာႏဇဂျိုဟ်ႏကို သဌေꩻတန်တဖြာꩻနဝ်ꩻ ကတူႏဆာထာꩻ လꩻနွုတ်ꩻနေင်ႏလဲဉ်း၊ "ပါꩻရိုꩻဆရာႏယိုဟောဝ်တဲ့ပင်ꩻ-ဝင်ꩻရိုꩻဆရာႏသူꩻဟောဝ်တဲ့ဟဲ့ꩻ"၊ ဆရာႏကားမုဲင်ꩻဖြာꩻဖြာꩻလဲဉ်း ဟောဝ်တဝ်း၊ လွမ်ꩻလာꩻကားမုဲင်ꩻလဲင်ႏလဲင်ႏတဲ့ ရေꩻတဝ်း၊ အရွဉ်အဝ်ႏအာငါႏမꩻ အဝ်ႏပါꩻကလꩻခြေင်သဲင်ꩻလွုမ်ꩻ။ ဆရာႏတန် ယင်ဟန်ႏနဝ်ꩻရိုꩻ- "သဌေꩻတန်ရောႏဂါႏနဝ်ꩻ လွမ်ꩻလာꩻတလꩻတဝ်းဒွုမ်၊ အုံဗာႏထဲင်း ငတ်ꩻနီꩻလွုမ်ꩻသီ၊ ယင်ဟန်ႏသားနဝ်ꩻရိုꩻ အုံဗာႏထဲင်း နွုတ်ꩻနီꩻလွုမ်ꩻသီ"ဆရာႏတန်ဖုံႏ အွဉ်ႏစွꩻစူလို့နုဲင်းနဝ်ꩻတဲင် လိုꩻဖြားလိုꩻတန်ဖုံႏနဝ်ꩻ လွေꩻထေ့ခွန်ဗိမ္ဗိသာရ၊ ထွဉ်ႏခွန်ဗိမ္ဗိသာရမိန်းလင်ꩻဖေႏ ဆရာႏဇီဝက ဖေႏနေးဆရာႏဇီဝက ကလွေꩻလွမ်ꩻလာꩻမွိုင်မွိုင်ဖေႏ ဝွေꩻသီးရာႏဇဂျိုဟ်ႏသဌေꩻနောဝ်ꩻသွူ။ ဆရာႏဇီဝကရိုꩻ- "သဌေꩻတန်ဟွေး- သဌေꩻရောႏဂါႏယိုနဝ်ꩻ ခံႏဒုက္ခညလဲဉ်း ပဉ်နွုတ်ꩻနေင်ႏလဲဉ်း၊ မဉ်ႏဗေင်ႏတခေင်ႏစေႏသေႏသေႏ နွုတ်ꩻလာငါနဝ်ꩻ ခွေလွမ်ꩻလာဖေႏ ဟောဝ်ဗာႏအမဲဉ်ႏ" "တောငါ ဟောဝ်ဒါႏငါ နွုတ်ꩻလာတဲ့ယဝ်း ခံႏဗင်ႏတခေင်ႏစေႏဖေႏဒျာႏ ဆရာႏ" ဆရာႏဇီဝက ဖြဲ့ꩻရီးကတူႏပီ၊ နဝ်ꩻထွူမꩻ အွော့ꩻတငက် ကတူႏကြောက်ꩻ၊ တွမ်ႏကိမ်ꩻပေႏနဝ်ꩻ ပီꩻထန်ႏသေ့ꩻပေႏတဗာႏ၊ သေ့ꩻတန်တဗာႏ၊ ဆꩻဟောဝ်ချာယင်း ကတူႏပီ၊ နွုတ်ꩻနီꩻအကို ဗေင်ႏစွူစွူဗာႏ၊ ရုဲင်ꩻတသွိုးထာꩻလꩻတဝ်း။ ဗေင်ႏတခင်ႏစေႏ နွုတ်ꩻနီꩻထင်ႏဗွေတဲင် သဌေꩻရိုꩻ"ဒါႏယာႏဒွုမ်"တဲင် ဖေႏဗေင်ႏတခေင်ႏထွေတောနွုတ်ꩻနီꩻ၊ ဗေင်ႏတခေင်ႏထွေ နွုတ်ꩻနီꩻဗွေတဲင် သဌေꩻရိုꩻ"ဒါႏယာႏဒွုမ်"တွော့ꩻ ဖေႏဗင်ႏတအာနေးတောနွုတ်ꩻနီꩻ၊ ဗေင်ႏတအာနွုတ်ꩻနီထင်ႏဗွေနဝ်ꩻခါ သဌေꩻရိုꩻ "ဒါႏယာႏဒွုမ်"တဲ့။ ဆရာႏဇီဝကရိုꩻ- "သဌေꩻ ယူႏချာဟုဲင်း၊ ခါးလားကလွမ်ꩻလာခါနဝ်ꩻ အာႏမခံႏပဉ် တဖဲ့ꩻနွုတ်ꩻလာမွေးတဝ်းနဲ့၊ လꩻကွို့ꩻနွုတ်ꩻနီꩻဒျာႏ ဖေႏချာႏထွေ၊ ဖေႏချာႏတအာလဲဉ်းသွူနဝ်ꩻဟွေး" "အစနဝ်ꩻ မဉ်ဟောဝ်တဲင် အာႏမခံႏလဲဉ်နေးဒျာႏ၊ ဒါႏယာႏဒွုမ်မွေးမွေးစွဉ်ႏ ဆရာႏ" တွိုႏနဝ်ꩻခါ ဆရာႏငပယွုမ်းထာꩻ ရီနုဲင်းယို- "အီႏည နီဆီပုဲင်တနီꩻလွုမ်ꩻ၊ ခွေအဝ်ႏသေဒျာႏ၊ ငမ်းသဌေꩻအုံနွောင်ꩻတဝ်းတဲင် စွော်စွော်ဒေါ့ꩻအာ နွုတ်ꩻလာနုဲင်းနဝ်ꩻဒျာႏ၊ ထွိုင်ႏဟုဲင်း၊ လꩻလဲဉ်း၊ ဟောဝ်လဲဉ်း" သဌေꩻတဲ့ သꩻရောင်းသꩻရေꩻ အွဉ်ႏဟွာႏဆရာႏစူ တသိန်ꩻပဉ်နောဝ်ꩻသွူ။ (ဝိနယ၊ မဟာဝဂ္ဂပါဠိတောႏ၊ စီဝရက္ခန္ဓက)[၁][၂]