ရုက်ဖဲ့ꩻဆဲင်ႏရာꩻ

"ရုက်ဖဲ့ꩻဆဲင်ႏရာꩻ ပြွူႏဖြိုလွေꩻအတွိုင်ꩻ အထီသွီႏဖဲ့ꩻဆဲင်ႏရာꩻ ဖေႏကပြွူႏဖြိုထင်ႏထိုလွဉ်နဝ်ꩻ အဝ်ႏလိုႏခုမ်မာꩻလွေꩻပါ" လိုꩻမျိုꩻတမျိုꩻ ခမ်းထီတဖြိုင်ႏယို ရုက်ဖဲ့ꩻတဲ့နဝ်ꩻ၊ အထီအသွီႏဖဲ့ꩻတဲ့နဝ်ꩻ ဖေႏကပြွူႏဖြိုထင်ႏထိုလို့လို့ နီဖဲ့ꩻနီခဝ် နီစွိုးနီမျိုꩻနဝ်ꩻ အဝ်ႏလိုႏငါႏနဝ်ꩻသွူ၊ ခမ်းထီတဖြိုင်ႏယို တိုꩻတက်ထင်ႏထို ပြွူႏဖြိုလုမ်ꩻဗော့ꩻ ရုက်ဖဲ့ꩻဆဲင်ႏရာꩻနဝ်ꩻ တလꩻတဝ်းအတွိုင်ꩻ ခမ်းထီကို ကအဝ်ႏဒါႏ ခမ်းသားတဖြာꩻစီႏ အထီအသွီႏဖေႏကပြွူႏဖြိုထင်ႏထိုလွဉ်နဝ်ꩻ အွဉ်ႏအရေꩻ ခုမ်မာꩻလွေꩻထွာထွာပါဗာႏမꩻ လꩻနဝ်ꩻသွူ။ ကမ္ဘာႏလောင်းခမ်းထီတွိုင်ꩻတဲ့နဝ်ꩻ၊ မြန်မာခမ်းထီတဲ့နဝ်ꩻ၊ မြန်မာခမ်းထီကို ကအဝ်ႏအိုင်သော့ꩻဒါႏ ပအိုဝ်ႏလိုꩻမျိုꩻသီးတဲ့နဝ်ꩻ ရုက်ဖဲ့ꩻတောမ်ႏအထီအသွီႏဖဲ့ꩻ နီစွိုးနီမျိုꩻယို အဝ်ႏလိုႏပင်ႏထိုနုဲင်းနုဲင်းငါႏဝင်ꩻနဝ်ꩻသွူ၊ ကမ္ဘာႏအရန်း၊ မြန်မာခမ်းထီအရန်းနဝ်ꩻ ရုက်ဖဲ့ꩻယင်၊ အထီအသွီႏဖဲ့ꩻယင် ဝင်ꩻပင်ႏထိုပီပီတဲင် အဝ်ႏထင်ႏထိုနုဲင်းနုဲင်း နီမျိုꩻလို့နဝ်ꩻသွူ။ နုဲင်းယိုခါ မိဉ်ႏထွားချာ နုဲင်းပအိုဝ်ႏဒေႏသကိုယို ရုက်ဖဲ့ꩻဆဲင်ႏရာꩻကထွာ တထာတဖူꩻ၊ လိုꩻအိုင်အဝ်ႏမု ရပ်ဝေင်ꩻ လမ်းပါႏဖိုင်ႏယို အင်းတူႏအင်းတန်ႏ ပြွူႏဖြိုလွဉ်လဲဉ်းလဲ့ အဝ်ႏကုဲင်ဒါႏ ပအိုဝ်ႏဒေႏသကိုကအဝ်ႏ ပအိုဝ်ႏခမ်းသားသီး အထီအသွီႏဖဲ့ꩻဆဲင်ႏရာꩻယို အဝ်ႏလိုႏပင်ႏထိုထဲင်းနေဒွုန်းကနဝ်ꩻသွူ။ ပအိုဝ်ႏခမ်းသား တဖြာꩻစီႏအထီအသွီႏဖဲ့ꩻဆဲင်ႏရာꩻ နုဲင်းကထွာ သွဉ်လိတ်ကျောင်ꩻပညာႏ၊ နမ်းခံႏပညာႏ၊ လမ်းကိုပညာႏ၊ လွူးနမ်းပညာႏ၊ သေနာႏလွောက်ꩻနာႏဥပဒေႏ၊ လွောက်ꩻနာႏလိုꩻမုရေꩻစီꩻကန်ꩻနုဲင်းစားယိုဖိုင်ႏနဝ်ꩻ အထျꩻအဝ်ႏဒျာႏ ခမ်းသားတဖြာꩻစီႏအလောင်းနဝ်ꩻသွူႏ ပအိုဝ်ႏခမ်းသားတွိုင်ꩻစုမ်ႏဖြာꩻယို ဖေႏကသွဉ်ထူႏဗာႏလို့ သွဉ်လိတ်ကျောင်ꩻ၊ ဖေႏကသွဉ်ထူႏဗာႏလို့ပညာႏနဝ်ꩻ အရေꩻတန်ငါႏသွူ၊ မိဉ်ႏသွဉ်ထူႏဗာႏလို့လိတ်၊ မိဉ်ႏသွဉ်ထူႏဗာႏလို့ပညာႏနဝ်ꩻမꩻ နမ်းလောင်းနမ်းကို နမ်းခံႏပညာႏ အီႏဗွေအီႏအဝ်ႏနဝ်ꩻသွူ။ နမ်းလောင်းနမ်းကို နမ်းခံႏပညာႏယို မိဉ်ႏအဝ်ႏမိဉ်ႏဗွေနဝ်ꩻမꩻ လွူးနမ်းတာႏ လမ်းကိုပညာႏ၊ လွူးနမ်းပညာႏ အီႏအဝ်ႏနဝ်ꩻသွူ၊ မိဉ်ႏဒါႏ လမ်းကိုပညာႏဖိုင်ႏ၊ လွူးနမ်းပညာႏဖိုင်ႏနဝ်ꩻမꩻ လွူးနမ်းတဲ့ အီႏဒါႏအီႏသာႏယာႏနွောင်ꩻနဝ်ꩻသွူ။ လွူးနမ်းဒါႏ လွူးနမ်းသာႏယာႏကရိုꩻနဝ်ꩻ ထိုမ်ႏနူႏနူႏနဲစ်နဲစ်ဗာႏ အံႏနူႏနူႏနဲစ်နဲစ်ဗာႏ၊ ထိုမ်ႏတတာႏ အံႏတတာႏ နန်းဗာႏ၊ ထိုမ်ႏအံႏတာႏ အွꩻတာႏ လိုမ်းလုမ်ꩻနမ်းတာႏ အလွန်းအလွိုအဝ်ႏတဝ်း၊ လမ်းနားဟွိုန်ꩻအတာႏဆွာꩻတာႏ အဝ်ႏတဝ်း၊ ပိုပညာႏရေꩻတာႏ စွဲးကမ်းထွဉ်ႏသွဉ်အီအဝ်ႏတဝ်းနုဲင်းနဝ်ꩻဖိုင်ႏ တမွေးတဝ်းသွူ။ တောမ်ႏလွူးနမ်းပညာႏ တစွိုးတမျိုꩻတဲင် စီꩻကန်ꩻမဲန်ႏမဲန်ႏခုမ်မာꩻ၊ စီꩻကန်ꩻမဲန်ႏမဲန်ႏထေစာ၊ စီꩻကန်ꩻမဲန်ႏမဲန်ႏ သုင်ꩻစုဲင်ႏရွဉ်ထွူ အံႏတာႏအွꩻတာႏတဲ့ အဝ်ႏ၊ အတာႏဆွာꩻတာႏ ရွဉ်လွန်းလွိုတဲ့အွဉ်ႏ၊ စွဲးကမ်းထွဉ်ႏသွဉ်အီ ပိုပညာႏရေꩻတဲ့နွောင်ꩻ-စတဲင် တောမ်ႏထာꩻစီႏမံႏ ထာꩻစီႏရင်ꩻဟဝ်ဟဝ်တွော့ꩻ လွူးချာနီနမ်းဖဝ (မွေးတဝ်းလဲ့) အိုပ်ထိန်ꩻလွူးကုန်ꩻနွောင်ꩻချာ နီလမ်းနားဟွိုန်ꩻနွောင်ꩻနဝ်ꩻသွူ၊ ထာꩻမာꩻ စီꩻပွါꩻရွဉ်နွို့ကရိုꩻလဲ့ အဝ်ႏတခါႏ၊ အဲဉ်ထဝ်းတခါႏ မွေးတဝ်း၊ နွို့ဆေ့ꩻဆေ့ꩻတဲ့နဝ်ꩻ၊ နွို့အာအာတဲ့နဝ်ꩻ အဓိကနဝ်ꩻ နွို့ပေႏပေႏတွော့ꩻ နွို့ပုင်ႏသေႏ နွို့မဲန်ႏမဲန်ႏနဝ်ꩻသွူ။ ကောပ်သွဉ်ဗာႏပညာႏတဲင် အခေႏခံႏပညာႏ နမ်းလောင်းပညာႏအဝ်ႏနဝ်ꩻမꩻ ကထွာယင်းဒါႏ ဥပဒေႏတဖွောင်ꩻဖိုင်ႏယိုလဲ့ သေနာႏနဝ်ꩻသွူ။မိဉ်ႏသေနာႏ ဥပဒေႏတဖွေါင်ꩻနဝ်ꩻတဲင် ထာꩻမာꩻမျိုꩻမုဲင်ꩻနဝ်ꩻ လွစ်ကင်ꩻတောမ်ႏဥပဒေႏတွော့ꩻ ခုမ်မာꩻလꩻ၊ ထိုမ်ႏအီနမ်းအကျိုꩻစီꩻပွါꩻလꩻနဝ်ꩻ သေထွေꩻလွေꩻအီနဝ်ꩻသွူ၊ သေနာႏဥပဒေႏတဲင် ရပ်ရာႏဒိုင်ဆောင်ႏကို တဖြာꩻတောမ်ႏတဖြာꩻ လိန်ႏလဲဉ်လွဝင်ꩻ တခြိုꩻဥစ္စာႏဖိုင်ႏ၊ အံႏပွေႏထူႏသိမ်ꩻပျင်ႏခြေင်လွဝင်ꩻ ဟံႏယာႏသွို့ꩻခြံဖိုင်ႏ၊ အံႏနွောင်ꩻစောက်ကာꩻလွဝင်ꩻဖိုင်ႏတဲ့ ထွာဆေ့ꩻအီနွောင်ꩻနဝ်ꩻသွူ။ ကောပ်သွဉ်ဗာႏပညာႏ ကောပ်ဒါႏပညာႏ ကောပ်ပညာႏနမ်းလောင်းအဝ်ႏတဲင် ကထွာဒါႏ တဖြာꩻတောမ်ႏတဖြာꩻယို ထာꩻသညင်ꩻ၊ ထာꩻစာႏနာႏ၊ ထာꩻသယ်ꩻခံႏ၊ ထာꩻဆင်ႏချင်ႏ၊ ထာꩻဝွေႏဖန်ႏ၊ ထာꩻယူႏထာꩻရိတ်ခေႏဖိုင်ႏယို အဝ်ႏလွဉ်အီနဝ်ꩻသွူ။ တဖူꩻလောင်း ဝေင်ꩻကိုနုဲင်ႏတအီႏထာꩻစျꩻဖိုင်ႏအစ နုဲင်ႏလꩻနုဲင်ႏလꩻတဝ်း၊ အိုမ်ပြူးသားယို လာꩻတငီႏတငါ ပြူးထီဖိုင်ႏ လာꩻသင်ꩻ လာꩻသင်ꩻတဝ်း၊ နုဲင်းပအိုဝ်ႏဒေႏသကို ကထွာအာဒါႏ ကူꩻတခွန်ꩻဗွီဒီယိုခွေႏဖိုင်ႏ၊ ကူꩻသင်ꩻ ကူꩻသင်ꩻတဝ်းယိုဖိုင်ႏနဝ်ꩻ မာꩻသင်ꩻ မာꩻသင်ꩻတဝ်း၊ မိဉ်ႏသေနာႏ မိဉ်ႏလွောက်ꩻနာႏဥပဒေႏစီꩻကန်ꩻ၊ လိုꩻမုရေꩻစီꩻကန်ꩻနဝ်ꩻ တထွာဗာႏတဝ်းနဝ်ꩻသွူ။ နဝ်ꩻမꩻ နုဲင်းယိုခါ ပအိုဝ်ႏဒေႏသကို ထာꩻမာꩻတလွစ်ကင်ꩻတဝ်း တောမ်ႏဥပဒေႏဖိုင်ႏ၊ နုဲင်းကထွာဒါႏ ယာမဖေင်ꩻဖင်ꩻ တသီႏဖြိုင်ႏဖိုင်ႏယို ကဖြေꩻစာသားတဲ့ အဝ်ႏဖြေꩻစာဒျာႏ၊ ကသုင်ꩻအံႏသားတဲ့ အဝ်ႏသုင်ꩻအံႏဒျာႏ၊ ကလွူးအီနမ်း ကထိုမ်ႏအီစီꩻပွါꩻသားတဲ့ ထိုမ်ႏဒျာႏနဝ်ꩻသွူ၊ ကောပ်သေနာႏ ဥပဒေႏအာႏပေႏတဲင် တဖြာꩻတောမ်ႏတဖြာꩻ ထူႏသိမ်ꩻခြေင်ဒျာႏလွဝင်ꩻ ဟံႏယာႏဖိုင်ႏ၊ နုဲင်ႏတငီႏတငါ ထာꩻအီႏထာꩻစျꩻဖိုင်ႏ၊ လာꩻတဗော့ꩻတငီႏတငါပြူးထီဖိုင်ႏ၊ ကူꩻတခွန်ꩻဗွီဒီယိုခွေႏပုင်ႏဗွိုန်ဖိုင်ႏ-စတဲင်ယိုစားကထွာအာဗာႏနဝ်ꩻ ပအိုဝ်ႏလိုꩻမျိုꩻကိုယို ဆဲင်ႏတောမ်ႏအထီအသွီႏ ပြွူႏဖြိုရေꩻယို အဝ်ႏလိုႏပင်ႏထိုထဲင်း အာနေဒွုန်းကကရိုꩻနဝ်ꩻ ခမ်းသားငေါဝ်းအယ်ဒီတာစွိုꩻ တဲမ်းဖြုဲင်ꩻလွေꩻနယ်ဗာႏနဝ်ꩻသွူ။