ရူးပိတ္တာႏ
"ရူးပိတ္တာႏ"
၇၁။ ဂါႏထာႏပြန်ႏပအိုဝ်ႏခြေင်ခြေင် ဖိုးနဲဉ်းထီ ကဆေ့ꩻလင်ꩻစစနဝ်ꩻ တနွုမ်ꩻဆျာႏတဝ်း တလဲင်ႏချင်ꩻ၊ နုဲင်းနဝ်ꩻနေနေ ကမာꩻဒါႏ အကုသိုလ်ႏထာꩻမာꩻနဝ်ꩻတဲ့ အကျိုꩻတဖေႏထွူစွဉ်ႏတဝ်းဒျာႏရင်ꩻ၊ ဖါႏကအဝ်ႏဒို့ꩻခါꩻဒါႏ မေႏအူတနျာႏနျာႏနောဝ်ꩻ ကယမ်းဗာႏသား မေႏခိုးလျားစွဉ်ႏ၊ နုဲင်းနဝ်ꩻနေနေ ပေါႏအကုသိုလ်ႏ အကျိုꩻဖေႏသွူနဝ်ꩻတဲတဲ့ အဝ်ႏခိုးထောင်လွေꩻသေႏသေႏစွဉ်ႏ ကမာꩻအကုသိုလ်ႏသား လိုꩻမွိုက်စားယိုသွူ။
"လꩻဗဟုသုတ၊ လꩻအီသတိꩻနုဲင်းယို" ဟော်ꩻထွားသွဉ်ဗာႏ ရူးပိတ္တာႏဝတ္ထုယိုတဲင်-
၁။ ပေါႏပဲစ်မာႏသံဃာႏနဝ်ꩻ တိရစ္ဆာန်ႏတဲ့ယဝ်း၊ လိုꩻတဲ့ယဝ်း ထဲ့ဗာႏ အဝီစိငါးရုဲင်ꩻအကျောင်ꩻ၊
၂။ အကုသိုလ်ႏနဝ်ꩻ အကျိုꩻတဖေႏထွူတဝ်းစွဉ်ႏတဲ့ ပေါႏအကျိုꩻဖေႏသွူနဝ်ꩻ အကျိုꩻဖေႏတသေႏတနား ဒုက္ခခိုးလျားစွဉ်ႏ တဘဝလုမ်းအကျောင်ꩻ-စတဲင်နုဲင်းနဝ်ꩻ သေထွꩻ လꩻအီသတိꩻအာတန်သွူ။
"သဋ္ဌိကူဋပိတ္တာႏ"
၇၂။ ဂါႏထာႏပြန်ႏပအိုဝ်ႏခြေင်ခြေင်- လိုꩻမွိုက်သီး အထာꩻဒါႏနဝ်ꩻ ထွာအီဒျာႏ ထာꩻအကျိုꩻတအဲဉ်ထဝ်းဖဲ့ꩻလွဉ်းလွဉ်း၊ လိုꩻမွိုက်ကဒါႏလွဉ် အထာꩻဒါႏ၊ ကထွာလွဉ်အတခြိုꩻ၊ ကလꩻထိုꩻအာႏဏာႏနဝ်ꩻ ယားကုဲင်ထိုꩻဒျာႏ ကုသိုလ်ႏတာႏ၊ မာꩻဟူႏထိုꩻဒျာႏ အထာꩻဒါႏပညာႏ ကတူႏယိုသွူ။
"လꩻဗဟုသုတ၊ လꩻအီသတိꩻနုဲင်းယို" ဟော်ꩻထွားသွဉ်ဗာႏ သဋ္ဌိကူဋပိတ္တာႏဝတ္ထုယိုတဲင်-
၁။ ထာꩻဒါႏကရိုꩻနဝ်ꩻ သွုံꩻမဲဉ်ႏမဲဉ်ႏအခင်ႏလမ်းမꩻ လꩻအီတခြိုꩻ၊ လꩻအီတံꩻခိုꩻ အာႏဏာႏအကျောင်ꩻ၊
၂။ လိုꩻမွိုက်တခြိုꩻ၊ အာႏဏာႏမျိုꩻနောဝ်ꩻ ထွာနီလိုꩻဒုက္ခအကျောင်ꩻ၊
၃။ မဉ်ႏသွုံꩻမာႏထိုꩻ တံꩻခိုꩻအာႏဏာႏနဝ်ꩻ မော့ꩻတောဒါႏ ထာꩻဒုက္ခအကျောင်ꩻ၊
၄။ ပေါႏပဲစ်မာႏ ပစ္စေကဗုဒ္ဓါႏ (ရဟန္တာႏ)သီးနဝ်ꩻ လင်ꩻထဲ့ဗာႏ အဝီစိငါးရုဲင်ꩻ၊ ခံႏဆုဲင်ꩻဗာႏဒုက္ခ၊ ညငါႏမရေႏမရာႏအကျောင်ꩻ-စတဲင်နုဲင်းနဝ်ꩻ သေထွꩻ လꩻအီသတိꩻအာတန်သွူ။[၁][၂][၃]