ရောင်ထာꩻ-ဗွေႏဘုရာꩻကျွိုက်တဝ်း

"နာဂိတသုတ် (ရောင်ထာꩻ-ဗွေႏဘုရာꩻကျွိုက်တောဝ်း)" အွိုးခꩻတလဲင်ႏ- နီဗွေႏဘုရာꩻတွမ်ႏသံဃာႏ ကျွꩻလွေꩻတဖူꩻ ကောသလခမ်းကို ဖျော်လွေꩻ 'ဣစ္ဆာနင်္ဂလ'ပုဏ္ဏာꩻသီးဒုံ၊ အုံဣစ္ဆာနင်္ဂလ တခြာကိုနောဝ်ꩻသွူ။ ဒုံသားခွန်နင်ꩻ ဟွူန်သတင်ꩻတဲင် လွဉ်ဝုဲင်ႏလွ၊ လွဉ်ကေႏညိုႏလွေ ဗွေႏဘုရာꩻဖုံႏ၊ နုဲင်းမွူးရောဝ်ꩻနဝ်ꩻ ထင်ႏပသာသွမ်ꩻ၊ ပါတွမ်ႏအံႏခရာႏ အွꩻခရာႏဖုံႏ လိုꩻတဲ့သမ်းအာ၊ သꩻတဲ့သမ်းရေꩻ၊ သမ်းတသေတောဝ်း ဗွေႏဘုရာꩻထာꩻကျွိုက်၊ လွိုက်ဒါႏတဝ်း ဗွေႏစောဝ်းဘုရာꩻ ထာꩻလိုႏတွော့ꩻ မွူးရောဝ်ꩻခိုႏ ထင်ႏရောင်စောဝ်းထာꩻ၊ ဒေါ့ꩻသန်ထာꩻ တခါꩻငွါ၊ အထန်ႏဖဲ့ꩻနောဝ်ꩻ သင်ႏစွဉ်ႏအောႏအောႏအာႏအာႏနောဝ်ꩻသွူ။ အတွင်ꩻနဝ်ꩻနဝ်ꩻ ဗွေႏနာဂိတ အဝ်မာꩻဖေႏ ဗွေႏဘုရာꩻဝွတ်ပတ်၊ ဗွေႏဘုရာꩻရီ နာဂိတ- "နုဲင်းစွဉ်ႏစံႏငါးသား (ထပေႏသား) ရီမ်လို့ဝင်ꩻထပေႏ၊ မလဲင်ꩻရောင်ငါႏထာꩻသူꩻ၊ မဒေါ့ꩻသန်ငါႏထာꩻသူꩻ၊ ပါꩻမုဲင်ꩻဖုံႏဟောင်း" "ဩဗွေႏ ဘုရာꩻမျတ်ဗွေႏဩ- ဗွေႏဘုရာꩻတွမ်ႏသံဃာႏ ဖျော်လွဉ်ဝွေꩻသီးရပ်ရာႏတဲင် သꩻရေꩻငါႏ၊ မရေႏမရာႏတွော့ꩻ ထင်ႏပသာသွမ်ꩻ၊ အီႏကပ်သွမ်ꩻ၊ အီႏကပ်လူႏ ထာꩻအံႏထာꩻအွꩻ၊ အသꩻရေꩻငါႏဖုံႏမꩻ အဒေါ့ꩻသန်ထာꩻ၊ အရောင်ထာꩻနုဲင်းနဝ်ꩻဒျာႏ ဗွေႏဩ" "နာဂိတဟွေး- ဘုရာꩻခွေယိုနဝ်ꩻ တွမ်ႏလိုꩻအာ၊ ဗွုက်ဗွုက်ဗွုင်းဗွုင်း၊ တွမ်ႏထာꩻကျောႏ ဗွုက်ဗွုက်ဗွုင်းဗွုင်းနောဝ်ꩻ ခွေမဉ်သွုပ်ခံႏတဝ်း၊ လွစ်ထန်ႏလꩻ လွစ်ထန်ႏလꩻ ကာႏမဂွုဏ်ႏတဲင် ချမ်ꩻသာႏ (နေက္ခမ္မသုခ)၊ အုံယေန်ယေန်တေ့ꩻတေ့ꩻဗာႏထာꩻတွော့ꩻ ချမ်ꩻသာႏ(ပဝိဝေကသုခ)၊ ကိလေႏသာႏငိမ်ꩻဖေ့တဲင်တွော့ꩻ ချမ်ꩻသာႏ(ဥပသမသုခ)၊ သေချမ်ꩻသာအစဲစ်အမဲဉ်ႏတဲင် ချမ်ꩻသာႏ(သမ္မောဓသုခ)။ "ချမ်ꩻသာႏယိုလစ်ꩻမျိုꩻ လိုႏတွိုင်ꩻတလꩻတဝ်း" လိုꩻစားနဝ်ꩻမꩻ မဉ်လꩻလိုꩻအာ၊ မဉ်ကျောႏဗွုက်ဗွုက်ဗွုင်းဗွုင်းထာꩻ၊ ခွေဘုရာꩻယိုနဝ်ꩻ ချမ်ꩻသာႏနဝ်ꩻလစ်ꩻမျိုꩻ လိုႏမုဲင်ꩻခါလꩻတဲင် မဉ်အုံခွꩻ၊ မဉ်အုံချမ်ꩻသာႏဒျာႏထာꩻ၊ လိုꩻအာနုဲင်းယိုနဝ်ꩻ ခွေမဉ်အုံထေ့ꩻတဝ်း၊ ကျောႏဗွုက်ဗွုက်ဗွုင်းဗွုင်းနုဲင်းယိုနဝ်ꩻ ခွေလိုႏတဝ်း" "ဩဗွေႏ ဘုရာꩻမျတ်ဗွေႏဩ- ကွပ်စွဉ်ႏတကာႏဖုံႏ သꩻရေꩻဒျာႏ ထꩻလူႏလွုမ်ꩻ၊ တယူႏတဝ်းအလင်၊ ရောင်ရင်ထာꩻနုဲင်းယိုနောဝ်ꩻ သယ်ꩻခံႏဖေႏသွော့ ဗွေႏဩ၊ အခိန်ႏယိုနဝ်ꩻ အခိန်ႏသယ်ꩻခံႏဖေႏ ဗွေႏဩ" "နာဂိတဟွေး- သာႏသနာႏကိုယို ရဟန်ꩻယပါꩻပါꩻနဝ်ꩻ အုံဒျာႏကျောင်ꩻပေႏတခြာကို တပါꩻဒျာႏ၊ တထိုမ်ႏရွမ်တောဝ်း ပစ္စေꩻလစ်ꩻပါꩻ၊ အားထွုတ်ဒျာႏတရာꩻ၊ နဝ်ꩻနဝ်ꩻ ခွေနစ်သက်မွေးစွဉ်ႏထာꩻ၊ အုံဒုံကို၊ အုံဝေင်ꩻကို စုရွမ်မွိုင်းဒျာႏ ပစ္စေꩻလစ်ꩻပါꩻ၊ အားထွုတ်တဝ်းတရာꩻနဝ်ꩻ ခွေနစ်သက်တဝ်း။ ဘုရာꩻခွေယိုနဝ်ꩻ နစ်သက်ဒျာႏ အုံတပါꩻလွုမ်ꩻ၊ ခွေကျွꩻလွေꩻထာꩻနုဲင်းယို တပါꩻပါꩻမဉ်ႏပါꩻတဝ်းနောဝ်ꩻယိန်းဟောဝ်၊ ခွေမဉ်ႏစွဉ်ꩻ ခွဉ်ႏပေႏခွဉ်ႏတန်တဲ့ ထွားငါထွားချာဗာႏဒွုမ်ပါꩻ၊ ချမ်ꩻသာႏမွေးစွဉ်ႏထာꩻ"ဗွေႏဘုရာꩻ မိန်းတွိုႏစွဉ်ႏ တကာႏနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ ဆက္ကနိပါတ်၊ နာဂိတသုတ်)