ရေꩻမဉ်ႏတန်သွီႏသန်

အဝ်ႏ ဝီခီပီးဒီးယား ကို

"အရေꩻမဉ်ႏတန် သွီႏသန်သွော့ဝင်ꩻ ခွန်တွမ်ႏနင်ꩻ" နီမဉ်ႏထောင်ထွား တိရစ္ဆာန်ႏလောကနောဝ်ꩻ ယူးလဲ့အောဝ်ႏတွမ်ႏဝင်ꩻခွိုꩻ၊ ဝါးလဲ့အောဝ်ႏတွမ်ႏဝင်ꩻမျိုꩻ၊ တခွိုꩻတွမ်ႏတမျိုꩻ၊ တမျိုꩻတွမ်ႏတမျိုꩻ ဖေႏကရော်ꩻမွိုန်းဝင်ꩻနောဝ်ꩻ ကထွာအမွိုးအဖါ အွဉ်ငါသားဖုံႏ အွဉ်ဝင်ꩻထိန်ꩻသိမ်ꩻ အွဉ်ႏကုဲင်သေꩻခါꩻဖေႏ အမွီႏတဲင် မဲဉ်မော့ꩻအယပ်ꩻအခုဲင်ႏနုဲင်းမုဲင်ꩻမော့ꩻ၊ ခေတ်မဲဉ်ပြောင်ꩻပြောင်ꩻ၊ ရာႏသီႏဥတုမဲဉ်ဖေါက်ဖေါက် ယူးဝါးကစ တိရစ္ဆာန်ႏလောက သတ္တဝါႏဖုံႏနောဝ်ꩻ တယ်ႏကမ္ဘာႏဦꩻ ပွိုင်းလဲင်ႏခါကာႏ ဗꩻတွိုႏစွဉ်ႏဒျာႏယိုခါ တိရစ္ဆာန်ႏနုဲင်းနုဲင်းဝင်ꩻရိုꩻကီလဲ့ အမျိုꩻတွမ်ႏအမျိုꩻ၊ အခွိုꩻတွမ်ႏအခွိုꩻ တရော်ꩻတောဝ်းဝင်ꩻ တခံႏတောဝ်းအကုဲင် တခံႏတောဝ်းအပြုဲင် တခံႏတောဝ်း အခွိုꩻမျိုꩻထိုꩻမားနောဝ်ꩻသွူ။ ယူႏဝါးတိရစ္ဆာန်ႏအချင်ꩻချင်ꩻ ရက်လွဝင်ꩻ ထီႏချာခွိုꩻနုဲင်းယိုနောဝ်ꩻ နီလိုꩻသီးအတာႏ ထွာအီငါႏသတိꩻ၊ လꩻအီငါႏသွဉ်ခန်ꩻ နီလိုꩻသီး အောဝ်ႏလိုႏထွားနုဲင်းငါႏဝင်ꩻသွူ။ နီလိုꩻမျိုꩻ နီခမ်းထီ ကပြုဲင်လီထိုꩻဗာႏ ပွိုင်းလဲင်ႏခါ မဉ်ႏထွားချာသမဲင်ꩻနောဝ်ꩻ ကွပ်ပွိုးထိန်ꩻသိမ်ꩻတောဝ်း ခွိုꩻမျိုꩻ၊ ထွားဗွော့ꩻနမ်းအကျိုꩻတွော့ꩻ နီလိုꩻမျိုꩻ နီကံႏကျံႏမာႏလဲ့ အောဝ်ႏဆွော့ꩻဆွော့ꩻနောဝ်ꩻ ပနဲဉ်ႏ၊ အောဝ်ႏပူႏပူႏနောဝ်ꩻ ဖြဲမ်ႏ၊ အောဝ်ႏအမဲဉ်ႏနောဝ်ꩻမာႏ၊ ခံႏဗာႏဝင်ꩻတိတ်ꩻနျꩻ ဗꩻတွိုႏစွဉ်ႏယိုခါ နီအောဝ်ႏလိုႏသေချာလဲဉ်းနီနမ်း၊ နီအောဝ်ႏလိုႏရက်ချာငါႏလဲဉ်း နီစွိုးခွိုꩻ နီလိုꩻမျိုꩻနောဝ်ꩻသွူ။ လွောင်ႏဗူႏမုꩻ ကအောဝ်ႏဒါႏလိုꩻမျိုꩻနောဝ်ꩻ ခံႏစာꩻဗာႏ ဒီမိုကရေစီအရသာႏ၊ အရေꩻမဉ်ႏကီꩻ သွီႏကထီꩻဒါႏလိုꩻမျိုꩻနောဝ်ꩻ လꩻဗာႏဒီမိုကရေစီ အခွင်ꩻအရေꩻနောဝ်ꩻသွူ။ ထွားသွော့ ယိုခါ လိုꩻမျိုꩻတဲ့အာ၊ သꩻရက်ခွိုꩻလဲ့ ကအောဝ်ႏဒါႏလိုꩻမျိုꩻနောဝ်ꩻ တမျိုꩻအချင်ꩻအချင်ꩻ နာႏဝင်ꩻငေါဝ်း၊ အချင်ꩻချင်ꩻ ဖေႏဝင်ꩻမဲတဲင် ဝင်ꩻအုပ်ဗာႏစွဉ်ႏခမ်းထီ၊ ဝင်ꩻခံႏစာꩻဗာႏတွမ်ႏ ဒီမိုကရေစီအရသာႏ၊ နီခွိုꩻတာႏအကျိုꩻစီꩻပွာꩻ ဝင်ꩻတလွဉ်မာꩻဖေႏတောဝ်းကရိုꩻနောဝ်ꩻ နီနမ်းနီသေချာတဲင် တမာဝင်ꩻတွော့ꩻ ထွိုင်ႏခန်းလုဲင်းခွိုꩻပအိုဝ်ႏ သေနာႏဗဲင်းခန်းဝင်ꩻ ခွန်နင်ꩻသီးဖုံႏဟွေး။ နီလိုꩻမျိုꩻ နီရပ်ရာႏ နီကအောဝ်ႏအုံသော့ꩻဒါႏ နီဒေႏသယို လွိုင်ႏကွိုန်ꩻထင်ႏထိုရေꩻတာႏနောဝ်ꩻ ကွီအစိုႏရထျꩻ ဒင်ႏပျꩻလွတ်တောႏမꩻ ဝင်ꩻဖေႏ၊ ဝင်ꩻကဖေႏဗာႏနုဲင်းနောဝ်ꩻလဲ့ လိုꩻကခံႏယပ်ꩻဖေႏဒါႏ နီစွိုꩻတာႏ၊ နီလိုꩻတန်အောဝ်ႏသော့ꩻ ခမ်းပေါင်ꩻဗူႏ လွတ်တောႏကိုမꩻလꩻ၊ နီလိုꩻတန် ဖေႏကထွာလွတ်တောႏနောဝ်ꩻ နီသော့ꩻဖေႏဗာႏအမဲ၊ စွဲကမ်းကိုဗာႏ၊ ဖေႏအာႏဗာႏတွမ်ႏ ခမ်းသားရဲင်ꩻအာႏ ဗွိုန်ပီ ၂၀၁၀-၂၀၁၅-လွိုက်ရွေꩻပွယ်ꩻအတွိုင်ꩻနောဝ်ꩻသွူ။ စူꩻနီထာꩻကျွိုက် လွိုက်ကားကထွာ မဉ်ႏမာꩻနုဲင်းနောဝ်ꩻနောဝ်ꩻ လိုꩻကောကွီဖေႏဒါႏ ပအိုဝ်ႏတာႏအခွင်ꩻအရေꩻအဲဉ်ထောဝ်း၊ ပါသော့ꩻတောဝ်း လွတ်တောႏကိုတဲင် ခမ်းထီမဲဉ်ပြောင်ꩻပြောင်ꩻ၊ နီလိုꩻမျိုꩻယို တပြောင်ꩻတောဝ်း၊ တဖြောဝ်းဒျာႏစွူစွူ၊ ထွာဒါႏနုဲင်းနောဝ်ꩻသွူတကာႏတောဝ်း ပအိုဝ်ႏနမ်းပဲင်ႏအုပ်ချွုတ်ခွင်ꩻလꩻဒေႏသလဲ့ ထွာထိုꩻဒါႏဝင်ꩻလိုꩻမျိုꩻ ခင်ႏလမ်းအုံနောဝ်ꩻသွူ။ ဒီမိုကရေစီခေတ်ယို ယူႏခူခူ ထွားစဲင်းစဲင်း၊ သေနာႏဗဲင်း စွိုးခွိုꩻလိုꩻမျိုꩻရေꩻ၊ လွူꩻထွားဗဲင်း ခမ်းထီနဲင်ႏငံႏရေꩻ စွိုးခွိုꩻထာꩻမာꩻကရိုꩻနောဝ်ꩻ အပြောင်ꩻအလုဲင်ႏ တအောဝ်ႏတောဝ်း၊ ပေါႏနိလိုꩻမျိုꩻအောဝ်ႏနေကနောဝ်ꩻ နီလိုꩻမျိုꩻထင်ႏထိုရေꩻတာႏ၊ လိုꩻတွိုင်ꩻစွုမ်ႏဖြာꩻ ထေင်းထမ်ႏဗာႏစွိုးခွိုꩻထာꩻမာꩻ၊ ကျိုꩻစာꩻဗာႏလိုꩻမျိုꩻတာႏနောဝ်ꩻသွူ။ နဲင်ႏငံႏရေꩻကရိုꩻနောဝ်ꩻ ဗွိုန်ပီတောဝ်းစွိုးခွိုꩻရေꩻ၊ အခိန်ႏတရွေꩻတောဝ်း အပြောင်ꩻဒါႏ အကုဲင်ဒါႏ အပြုဲင်ဒါႏ နီအောဝ်ႏလိုႏသေနာႏခါꩻနုဲင်းနောဝ်ꩻ၊ တပြုဲင်ပြင်ꩻတောဝ်းဒါႏ စွိုးခွိုꩻထာꩻမာꩻယို အခိုနွောင်ꩻရာꩻထူႏ အမူႏနွောင်ꩻရာꩻ သွဉ်ဗာႏပိုလီꩻ အရေꩻမဉ်ႏကီꩻ နီခွိုꩻတာႏ သွီႏထီꩻဗာႏသꩻဗွိုန်ဗာႏ ငါယိုတလဲင်ႏ ကအီႏလွဉ်ထဲင်းဒါႏမဲပွယ်ꩻ နီပအိုဝ်ႏဖေႏကလွယ်ꩻမွိုန်းနောဝ်ꩻ စွဲကိုဗာႏ ပင်ႏရောင်ဗာႏ နီလမ်းနီခမ်း ဖေႏကထွာစွူစွူဒျာႏ နီပိုလီꩻတာႏ နီစွိုးခွိုꩻတာႏနောဝ်ꩻသွူ။ အတိတ်ကာႏလကို ကထဲ့သွုမ်ꩻဖိုလဲဉ်းဒါႏ နီအခွင်ꩻအရေꩻဖုံႏနောဝ်ꩻ ယိုမာꩻငါ ထူႏခန်းသွော့သတိꩻတလဲင်ႏတစိꩻစိꩻတွော့ꩻ အနာႏဂတ်ကို ဖေႏကထဲ့သွုမ်ꩻထဲင်းမွိုန်းနောဝ်ꩻ အစွိုꩻယိန်းအာ ကယိန်းထွာခွိုꩻအာႏ အစွိုꩻမဲဉ်အာအာ ဖေႏကထွာပအိုဝ်ႏတာႏ အဓိဋ္ဌာန်ႏသေꩻခါꩻဒျာႏ နုဲင်းနောဝ်ꩻတဲင် လွောင်ႏဗူႏစွီႏစူ ထောင်ငါသွိုညီꩻခန်းဝင်ꩻ နီပအိုဝ်ႏဘဝ နီပအိုဝ်ႏဒေႏသ လွိုင်ႏကွိုန်ꩻထင်ႏထိုရေꩻ ကောဝ်ႏထွန်ႏထျꩻကရိုꩻနောဝ်ꩻ လောဝ်းဟွိုန်တမာဗာႏ ထွားလိတ်သား ဗွေႏ/ခွန်/နင်ꩻ ခမ်းသားမွိုးဖါသီးဖုံႏသွူ။[၁][၂]

အာႏကွိုꩻ[မွဉ်းဖျင် | မွဉ်းဖျင်အရွီးခိုႏ]

  1. အယ်ဒီတာ
  2. မောင်းမွူးခံꩻ အမုဲင်-၆၆