ရွဉ်သားတွမ်ႏလိုꩻသေ

"ရွဉ်သားတွမ်ႏလိုꩻသေလိုꩻဒါႏ လိုႏဆွန်ꩻငါႏလဲဉ်းဝင်ꩻစူ" နီပအိုဝ်ႏဒေႏသရပ်ရာႏကိုတဲ့နောဝ်ꩻ၊ မန်းခမ်းထီကိုယိုတဲ့နောဝ်ꩻ ပွိုးစွဉ်ႏခေတ်အဆက်ဆက်ကို ခံႏလွဉ်ဗာႏအာငါႏ ဝင်ꩻပေ့ꩻမဲ့နားတဲင် နီလိုꩻချင်ꩻချင်ꩻ ခမ်းရင်ꩻသားချာချာငါငါဖုံႏယို တသေငါꩻလူႏလုဲင်ႏဒွုမ်ဝင်ꩻ "ခွေနောဝ်ꩻ လိုꩻမျိုꩻယို၊ လိုꩻမျိုꩻနောဝ်ꩻဒျာႏ၊ ဘာႏသာႏယို ဘာႏသာႏနောဝ်ꩻဒျာႏ"စတဲင် ခွယ်ꩻချာꩻထိုꩻလွဝင်ꩻသွီႏဖုံႏ၊ "အရန်းဖွိုႏ အရန်းထို၊ အခွိုꩻပေႏ အခွိုꩻတန်၊ ခွိုꩻရွဉ်အောဝ်ႏ ခွိုꩻရွဉ်အဲဉ်ထောဝ်း"စတဲင်နုဲင်းနောဝ်ꩻဖုံႏတွော့ꩻ သွီႏခေါ်ညာꩻထိုꩻဝင်ꩻ၊ ရက်ပဲင်ꩻသွီႏထီꩻတောဝ်းဒွုမ်ဝင်ꩻ၊ အချင်ꩻချင်ꩻ သေငါꩻတောဝ်းဒွုမ်ဝင်ꩻဖုံႏနောဝ်ꩻသွူ။ ပွိုးစွဉ်ႏခွယ်ꩻထိုꩻဝင်ꩻသွီႏ၊ လွိုးတအွီႏတောဝ်းဒွုမ်ဝင်ꩻဖုံႏတွော့ꩻ တဖြာꩻတွမ်ႏတဖြာꩻ၊ တစွိုꩻတွမ်ႏတစွိုꩻ၊ တလမ်းတွမ်ႏတလမ်း နွောင်ꩻရာꩻနွောင်ꩻအံႏလူႏလုဲင်ႏဝင်ꩻနောဝ်ꩻမꩻ အီႏဆွန်ꩻဝင်ꩻစူ မာꩻညီꩻဝင်ꩻထာꩻမာꩻနောဝ်ꩻ "သꩻထာꩻယွုမ်းအံႏလူႏလုဲင်ႏဝင်ꩻလောင်း အဲဉ်ထောဝ်း"ဒွုမ်နောဝ်ꩻသွူ။ ကွပ်သွီႏခွယ်ꩻဝင်ꩻအဆင်ႏရန်း အောဝ်ႏရဲးကမ်းပါႏဖွောင်ꩻထိုꩻ နီလိုꩻသီးဆꩻငါတဲင် မုဲင်ꩻခါခါတဲ့ အီႏဆွန်ꩻတဉ်ႏဝင်ꩻစူ မာꩻညီꩻဝင်ꩻထာꩻမာꩻ တထွာတောဝ်း၊ အနီꩻရင်ꩻအောဝ်ႏသားတဲ့ ဝွေꩻသီးမာꩻသမ်းတဒါႏတောဝ်း၊ ကသေကဒါႏတဲ့ ဝွေꩻကအီႏမာꩻယို အာႏတအဲဉ်ထောဝ်းတဲင် မာꩻတလꩻတောဝ်း၊ ပွိုးစွဉ်ႏအနီꩻအရင်ꩻ အောဝ်ႏသားတွမ်ႏ လိုꩻသေဒါႏ ဆွန်ꩻတောဝ်းဝင်ꩻစူ၊ မာꩻတောဝ်းထာꩻမာꩻတွော့ꩻ အောဝ်ႏထဲ့ဖွိုႏကေန်ꩻခြောညီꩻဗာႏဝင်ꩻနောဝ်ꩻသွူ။ ထွားစံꩻဗဗာ့ꩻ မန်းနွောင်ꩻဟံႏခမ်းထီကိုယိုခါ ပွိုးစွဉ်ႏအနီꩻရင်ꩻအောဝ်ႏသား တထွားတောဝ်းလိုꩻသေလိုꩻဒါႏ ပညာႏသားတဲင် လိုꩻသေလိုꩻဒါႏပညာႏသားဖုံႏ လွေꩻထွာပြုံႏပြင်ႏဗာႏတော အနီꩻအရင်ꩻအောဝ်ႏသားသွဉ်း၊ စက်ယွုံႏထာꩻမာꩻယွုံႏသားသွဉ်းနောဝ်ꩻသွူ။ လိုꩻသေလိုꩻဒါႏ ပညာႏအောဝ်ႏသား မက်ႏနွို့မာꩻသော့ꩻ ထာꩻမာꩻစက်ယွုံႏ ထာꩻမာꩻယွုံႏကိုနောဝ်ꩻ ဝွေꩻသီးကသေဒါႏအတွိုင်ꩻ မာꩻတလꩻတောဝ်း၊ ရွဉ်သားထွဉ်ႏနုဲင်းမုဲင်ꩻ မာꩻဗာႏဒျာႏတေ့ꩻတေ့ꩻ၊ ဝွေꩻသီးကသွဉ်ခါꩻဒါႏပညာႏဖုံႏနောဝ်ꩻ ထွာထိုꩻလို့ဒျာႏ ထာꩻသိုႏဖျင်ꩻနောဝ်ꩻသွူ။ နီခမ်းနီထီ နီဒေႏသကို လိုꩻသေလိုꩻဒါႏ အောဝ်ႏဒျာႏလဲ့ ပွိုးစွဉ်ႏဝင်ꩻတသွုံꩻတောဝ်းတွော့ꩻ ထန်ႏလွေꩻထိုꩻဝင်ꩻခမ်းနောဝ်ꩻ ဆေ့ꩻတောဝ်းထာꩻ၊ နီခမ်းကို ထွိုင်ႏအောဝ်ႏလိုႏမွေး လိုꩻသေလိုꩻဒါႏနောဝ်ꩻ အဲဉ်ထောဝ်းဒွုမ်တဲင် ထွိုင်ႏအီႏမာꩻမွေးထာꩻမာꩻတန် စက်ယွုံႏထာꩻမာꩻယွုံႏဖုံႏနောဝ်ꩻ ဟဲ့ꩻဗာႏတောဒျာႏလိုꩻခမ်းထန်ႏ၊ ဝင်ꩻလွဉ်အံႏသော့ꩻလုဲင်ႏတောဒျာႏနောဝ်ꩻသွူ။ နီခမ်းယို ရွဉ်အောဝ်ႏသား ထွိုင်ႏတသေဒျာႏချာတောဝ်း၊ မာꩻထာꩻမာꩻ အာႏကွိုꩻဗာႏဒျာႏ တွမ်ႏလိုꩻသေလိုꩻဒါႏ ခမ်းထန်ႏတွော့ꩻ ပါꩻကွီနုဲင်းမုဲင်ꩻဖေႏဗာႏ၊ ပါꩻမာꩻနုဲင်းမုဲင်ꩻ စူꩻဗာႏဒျာႏဗွီႏဗွီႏ၊ နီကထေဒါႏတခြိုꩻယို အထီအသွီႏ ဗွေတဗွေတောဝ်းလဲ့ သတောဝ်းတွော့ꩻ ဝင်ꩻမာꩻတွိုင်ꩻ ဝင်ꩻလဲဉ်တွိုင်ꩻ ခံႏဗာႏဒျာႏနောဝ်ꩻမꩻ ကွဲညည ထာꩻမာꩻဆွာꩻကို မာꩻနွောင်ꩻတောဝ်း၊ အမျတ်အီႏထန်ႏအာလဲ့ ထန်ႏတောဝ်းဒွုမ်တဲင် အနာလွို သꩻကုဲင် အွဉ်ႏထွူရောင်လွထာꩻမာꩻဖုံႏနောဝ်ꩻ ထီႏဗာႏအာငါႏနောဝ်ꩻသွူ။ နုဲင်းနီပအိုဝ်ႏလိုꩻမျိုꩻလဲ့ နုဲင်းနောဝ်နေနေ၊ ဒုံဆောင်ႏကို စွိုးခွိုꩻကို လိုꩻသေလိုꩻဒါႏဖုံႏ အောဝ်ႏဒျာႏလဲ့ ပွိုးစွဉ်ႏခွယ်ꩻသွီႏဝင်္ကပါႏ အောဝ်ႏရဲးထိုꩻနောဝ်ꩻမꩻ "ယိုနောဝ်ꩻ ခွေခွိုꩻမွေးတောဝ်း၊ ယိုနောဝ်ꩻ လိုꩻတန်ပိုမွေးတောဝ်း"ရိုꩻနောဝ်ꩻတွော့ꩻ တဒင်ႏဖေႏတောဝ်းအရာႏ၊ တဖေႏအာႏသော့ꩻဖေႏတောဝ်းအသင်းတဲင် လိုꩻသေလိုꩻဒါႏဖုံႏ အောဝ်ႏသဲင်ꩻဖြင်းလွင်ꩻဒျာႏ စော်ꩻနံႏထိုးခြာ၊ ဖိုးပနားမေးဆꩻချာ၊ တဖူꩻသောင် ထာꩻအီႏပွုမ်ႏခြာဖုံႏနောဝ်ꩻ အောဝ်ႏထီႏဗာႏအာငါႏနောဝ်ꩻသွူ။ နီပအိုဝ်ႏ အနီꩻအရင်ꩻအောဝ်ႏသားဖုံႏနောဝ်ꩻ ပွိုးစွဉ်ႏတထွားကိုဖေႏတောဝ်း လိုꩻပညာႏအောဝ်ႏသား လိုꩻသေလိုꩻဒါႏဖုံႏတွော့ꩻ ရွဉ်မဉ်ႏအောဝ်ႏလဲ့ ဖြေꩻစုခါꩻဗော့ꩻ ဖိုးပနား၊ ချꩻတန်ဗော့ꩻရွဉ်အေႏ၊ ပလို့ꩻသေꩻခါꩻဗဗာ့ꩻဟံႏကို နုဲင်းလိုꩻဖြားကရီးဖုံႏ အောဝ်ႏနောဝ်ꩻလွုမ်ꩻ၊ ကအီႏထောက်ဖေႏ၊ ထေဖေႏ၊ ထွင်ႏဖေႏ ပညာႏဒါႏသား အနီꩻအရင်ꩻနောဝ်ꩻ ထုဲင်ႏဒျာႏမွော့ အောဝ်ႏကင်ꩻညာꩻနေကဝင်ꩻလွိုႏလွိုႏနောဝ်ꩻသွူ။ အောဝ်ႏဝင်ꩻခမ်းပြန်ႏ ဒါႏလျင်ႏသွူပညာႏ၊ သေဒါႏသွူလဲ့ အနီꩻအရင်ꩻ ထွိုင်ႏတအဲဉ်ထောဝ်း အီႏမာꩻထာꩻမာꩻယို အာႏထွိုင်ႏတအောဝ်ႏတောဝ်းနောဝ်ꩻ လိုꩻသေလိုꩻဒါႏဖုံႏ အုံသူႏအုံနွေႏလို့ဒျာႏ၊ အုံသိုႏအုံဖျင်ꩻ ပညာႏရမ်ꩻလို့ဒျာႏ၊ အနာလွို ပညာႏဒါႏသားဖုံႏ မာꩻတောဝ်းဒွုမ်ထာꩻမာꩻတွော့ꩻ နီစွိုးခွိုꩻလိုꩻမျိုꩻ ကအီႏယုဲင်ခြူလွဉ်ꩻဗာႏခေတ် တွမ်ႏဝင်ꩻစွိုးခွိုꩻလိုꩻမျိုꩻနောဝ်ꩻ ထွꩻတောဝ်း၊ အောဝ်ႏထဲ့ဆုဲင်ꩻစွူစွူဗာႏဒျာႏဝင်ꩻနောဝ်ꩻသွူ။ နုဲင်းတဲမ်းလိတ်သား ကအုံအောဝ်ႏဒါႏ ဒေႏသရပ်ရာႏကိုထဲင်းလေႏလေႏနောဝ်ꩻ ရွဉ်အောဝ်ႏတောဝ်းသား အမျာꩻကို ဒေါ့ꩻထာꩻခွင်ꩻအဲဉ်ထောဝ်း၊ ထင်ႏထွာသော့ꩻ ဖြားဒုံလိုꩻတန်ဖုံႏ ခွင်ꩻအဲဉ်ထောဝ်း၊ ဒေါ့ꩻသော့ꩻစွဉ်ႏထာꩻလဲ့ ဝင်ꩻတစူꩻတောဝ်း၊ အုံဗာႏဒျာႏတေ့ꩻတေ့ꩻ နုဲင်းသေ့ꩻနောဝ်ꩻသွူ။ ပညာႏအောဝ်ႏစွဉ်ႏလဲ့ ရွဉ်မဉ်ႏတအဲဉ်ထောဝ်းနောဝ်ꩻ မာꩻခွင်ꩻတွမ်ႏရိုꩻပုဲင်ႏ ဒေါ့ꩻသော့ꩻခွင်ꩻငါလဲ့ ထွိုင်ႏတအောဝ်ႏတောဝ်းနောဝ်ꩻ အမျာꩻရွဉ်တောင်ႏတာႏဖုံႏ သွုံꩻပွုံႏသွုံꩻနယ်ꩻ ထွိုင်ႏတသေတောဝ်းတွော့ꩻ အထန်ႏပျင်ႏဗာလာလို့ဒျာႏထာꩻ၊ ကလိုႏသွုံꩻကိုသွုံꩻတောဝ်း၊ တလိုႏသွုံꩻတောဝ်းကိုသွုံꩻအီ၊ စူꩻလွဉ်ꩻဗာႏဒျာႏ လိုꩻတဖြာꩻဝင်ꩻနီသꩻမဉ်ထွာ (သဖော်ꩻ)လွုမ်ꩻတွော့ꩻ အရေꩻတန်ကို နွို့ဒိုဝင်ꩻထွိုင်ႏတဒါႏတောဝ်းတဖဲ့ꩻနောဝ်ꩻ အခွင်ꩻအရေꩻ သွုမ်ꩻပျင်ႏလွေꩻဗာႏဒျာႏ ကားမုဲင်ꩻမုဲင်ꩻနောဝ်ꩻသွူ။ အွဉ်ငါဒေႏသရပ်ရာႏတဗာႏ လိုꩻသေလိုꩻဒါႏ မဉ်ႏတပါသော့ꩻတောဝ်းနောဝ်ꩻ ထင်းတွိုင်ꩻမာꩻမဲ့ခေ့ꩻလွေꩻဗာႏထာꩻလွုမ်ꩻတွော့ꩻ ထာꩻမာꩻတန်းထွူပြွိုင်လဲ့ ထွူတောဝ်း၊ ထာꩻမာꩻတန်ႏယံ တန်ႏတရေꩻလဲ့ ယံတရေꩻတောဝ်း၊ ယုဲင်ခြူဝင်ꩻတန်ႏထွꩻလဲ့ ထွꩻတောဝ်း၊ အောဝ်ႏကုဲင်ဆုံးတဝစ်ꩻညာꩻဗာႏဒျာႏဝင်ꩻကရိုꩻနောဝ်ꩻ နီရပ်ရာႏအောဝ်ႏစံပြ(ယံနယ်)လဲဉ်းဝင်ꩻနောဝ်ꩻသွူ။ ကအွဉ်ငါဒါႏ ဒေႏသရပ်ရာႏ စွိုးခွိုꩻလိုꩻမျိုꩻကိုဖုံႏနောဝ်ꩻ ရွဉ်သားတွမ်ႏပညာႏသား အောဝ်ႏလိုႏဆွန်ꩻငါႏလဲဉ်းဝင်ꩻစူ၊ အောဝ်ႏလိုႏမာꩻညီꩻညီꩻလဲဉ်းသွူဝင်ꩻ ထာꩻမာꩻနောဝ်ꩻသွူ။ ရွဉ်သားတွမ်ႏပညာႏသား ထွားတရွိုꩻမွိုန်းဒွုမ်ဝင်ꩻ၊ ခွဲႏတောႏဒေါ့ꩻရီ သွီႏထီꩻရက်ပဲင်ꩻခန်းဝင်ꩻတွော့ꩻ မာꩻညီꩻခန်းဝင်ꩻထာꩻမာꩻ၊ ကွီးဆို့ꩻညီꩻခန်းဝင်ꩻ စွိုးခွိုꩻခမ်းထီအကျောင်ꩻ- နမ်းသꩻနီပါꩻ ယံချံꩻသာႏ တွမ်ႏရွဉ်အာႏ၊ ဉာဏ်ႏအာႏတဲင် ပင်ႏတသွောင်းထိုညီꩻခန်းသွော့ဝင်ꩻ စွိုးခွိုꩻလိုꩻမျိုꩻ အဆင်ႏရန်းအကျောင်ꩻ-တွမ်ႏမေတ္တာႏတဲင်