ရွမ်ဖြုဲင်ꩻအယ်ဒီတာ ငဝ်းအွဉ်ႏသေ

ဒဲဉ်သီႏလက်ဆောင်ႏ အမုဲင် (၂၇)ဟန်ႏနေင်ႏတာႏ ရွမ်ဖြုဲင်ꩻနဝ်ꩻ ဖျော်လွဉ်အပုဒ် (၄၀)တဲင် - နီသွဉ်းသီး ဒဲဉ်သီႏလက်ဆောင်ႏနဝ်ꩻ ရွဉ်အာႏအလꩻ နေင်ႏဟာမာꩻချာနဝ်ꩻ ဒွေါင်ႏဒွေါင်ႏဆွာꩻဆွာꩻ သွုံꩻနွောင်ꩻရွမ်ဖြုဲင်ꩻ အပုဒ်ပေါင်ꩻ (၃၀) မာꩻလလွုမ်ꩻတဲင် ဟန်ႏနေင်ႏ အမုဲင်(၂၇)ယိုလဲ့ စေးငိုꩻထင်ႏ၊ တွယ်ႏနျꩻငိုꩻလို့ပိုႏတဲင် သွုံꩻနွောင်ꩻအပုဒ်(၃၀)မာꩻလလွုမ်ꩻနေနေသွူ ။ ကွပ်နဝ်ꩻမꩻ အနယ်ꩻတလွစ်တဝ်း ရွမ်ဖြုဲင်ꩻယဟန်ႏနဝ်ꩻ ဖျင်ဖေႏတဝ်းဒွုမ်တဲင် အွဉ်ႏကုဲင်ထိုꩻဗာႏဒျာႏသွူ ။ ကဖျော်လွဉ်ရွမ်ဖြုဲင်ꩻအကို ကဉ်းအာအာန၀်ꩻ လွိုက်ရွေꩻဖေႏလဲ့ ကဉ်းဆေ့ꩻဆေ့ꩻန၀်ꩻ တလွိုက်ရွေꩻတဝ်းတွော့ꩻ တလွိုက်ရွေꩻတဝ်း၊ ကအဝ်ႏကုဲင်ထိုꩻဗာႏ ရွမ်ဖြုဲင်ꩻတွက်တာႏ သꩻတဟဝ်တဝ်းငါႏသွူ။ ကထွာတဲမ်းရွမ်ဖြုဲင်ꩻသားလဲ့ နေးတွမ်ႏစေႏတနာႏ၊ ဝါႏသနာႏ၊ နေးတွမ်ႏသꩻဖေႏအာႏမုꩻတွော့ꩻ ကျိုꩻကျိုꩻစာꩻစာꩻ တဲမ်းလွဉ်ဒျာႏလဲ့ ကအဝ်ႏကုဲင်ထိုꩻဗာႏန၀်ꩻ ကွပ်ပွိုးစွဉ်ႏ နယ်ꩻခရာႏအ၀်ႏ၊ အထီအသွီႏပါဆေ့ꩻလွိုဝင်ꩻတဲင် အဝ်ႏကုဲင်ထိုꩻဗာႏမတ်သွော့နုဲင်းနဝ်ꩻ။ ကလွိုက်ရွေꩻဒါႏ ရွမ်ဖြုဲင်ꩻယိုလဲ့ ယပုဒ်ပုဒ်နဝ်ꩻ "မဉ်ႏအံႏလဲ့ သုဲင်ꩻသံးပသဲ့ꩻ၊ မဉ်ႏနုဲင်ႏထိုꩻလဲ့ နံးမန်ꩻသံးစိုႏစဲ့ꩻ" ကရိုꩻဒါႏငဝ်းအတွိုင်ꩻ ဖျင်တဝ်းတွော့ꩻ သွုံꩻစွဉ်ႏကတဲမ်းလွဉ်အတွိုင်ꩻနဝ်ꩻ တထွာတဝ်းတဲင် ဖျင်ဖေႏနေးဆေ့ꩻဆေ့ꩻတွော့ꩻ သွုံꩻလွေꩻလဲ့အဝ်ႏ၊ ဖျင်ဗာႏအာအာ တဲမ်းကူꩻတသာဗာႏနေးတွော့ꩻ သွုံꩻလွေꩻလဲ့ အဝ်ႏသွူ ။ ကွပ်နဝ်ꩻမꩻ လိတ်မူတဗာႏ အင်္ဂါႏလက္ခဏာႏယို ခွေသွဉ်းကသေနာႏအတွိုင်ꩻ တဲမ်းနယ်ဖျင်ဗာႏ နုဲင်းဆꩻလယိုသွူ။ "တဲမ်းနယ်ဖျင်ဗာႏ" ကရိုꩻဒါႏနုဲင်းနဝ်ꩻနဝ်ꩻ ပွိုင်းဝွို့တွမ်ႏ တဲမ်းလိတ်ခရာႏယို ဟန်ႏနီꩻမာꩻချာနဝ်ꩻ ဒဲဉ်သီႏလက်ဆောင်ႏကို တဲမ်းသော့ꩻဗာႏဖိုလဲဉ်းတဲင် "တဲမ်းနယ်ဖျင်ဗာႏ" ရိုꩻဗာႏနုဲင်းနဝ်ꩻသွူ။ တဲမ်းလိတ်ကရိုꩻယိုနဝ်ꩻ နီထာꩻခံႏစာꩻချက်ယို၊ မွေးတဝ်းလဲ့ အကျောင်ꩻခရာႏတစွိုးစွိုးယို "ဖေႏဝင်ꩻကသေနာႏ"နဝ်ꩻ အရေꩻတန်သွတ်ꩻတချက်သွူ။ "ဖေႏဝင်ꩻကသေနာႏ"ကရိုꩻဒါႏငဝ်းယို ငဝ်းအအဲဉ်ႏသွတ်ꩻစားဒျာႏတဲင် ဖေႏဝင်ꩻကသေနာႏ-ကရိုꩻဒါႏငဝ်းယို မဉ်ႏဒေါ့ꩻလုဲင်း မဉ်ႏခြုဲင်းဆွာꩻထဲင်းနဝ်ꩻ တဲမ်းလိတ်အမျိုꩻမုဲင်ꩻတယဝ်းလွောက်ꩻနာႏကျင်ꩻသွုံꩻဗာႏ အချက်နုဲင်းဆꩻလယိုဖုံႏသွူ။ အဒွို့ꩻအစꩻ ။ ။ ဝါကျတဗာႏကိုတရိုꩻတဝ်း၊ လိတ်ပွိုက်တပွိုက်ကို တရိုꩻတဝ်း ငဝ်းတငွါတွမ်ႏတငွါယို လိုႏအွဉ်ႏဒွို့ꩻ လိုႏအွဉ်ႏကပ်ꩻဗာႏဝင်ꩻလဲ့ အွဉ်ႏဒွို့ꩻအွဉ်ႏကပ်ꩻဗာႏ၊ လိုႏအွဉ်ႏခါႏစꩻလဲ့ အွဉ်ႏခါႏစꩻဗာႏ၊ နဝ်ꩻစားမဉ်ႏတမွေးတဝ်းနဝ်ꩻ နီကရေႏဒါႏ အဓိပ္ပါယ်ႏအတွိုင်ꩻ တထန်ႏတဝ်းတဲင် အဓိပ္ပါယ်ႏ ထန်ႏတစွိုးတမျိုꩻဒါႏထာꩻသွူ။ ပုဒ်မွူးပုဒ်ထီး ။ ။ ပုဒ်မွူး ( ။ )၊ ပုဒ်ထီး ( ၊ ) ကဟဲ့ꩻဒါႏ ပုဒ်တလီး ပုဒ်နီလီးယိုလဲ့ အခင်ႏလံးတွမ်ႏအခင်ႏလံး သွုံꩻလွေꩻဖေႏ၊ သော့ꩻလွေꩻဖေႏဗာႏသွူ ။ ဝါကျတဗာႏအကို သရုပ်သင်ႏချေႏ၊ အကျောင်ꩻခရာႏပါသော့ꩻ နီသွံစွိုးတွော့ꩻ တစွိုးတွမ်ႏတစွိုး ဖေႏကရော်ꩻပုဲင်ႏဝင်ꩻ၊ ထွားဖေႏကသျင်ꩻနဝ်ꩻ အွဉ်ႏခါႏခါꩻဗာႏတွမ်ႏ ပုဒ်ထီး ( ပုဒ်တလီး ) ( ၊ ) ယိုသွူ။

မဉ်ႏကောႏစလိတ်ပွိုက်နဝ်ꩻ ။ ။ တဲမ်းလိတ်ကရိုꩻယိုနဝ်ꩻ လိတ်တပွိုက်လွုမ်းလို့လို့ တဲမ်းဆွိုင်ꩻသွုံꩻဆွိုင်ꩻဝင်ꩻ တလꩻတဝ်း၊ ထွားသျင်ꩻတဝ်း၊ ဟော်ꩻကုဲင်းတဝ်း၊ အခရာႏသျင်ꩻတဝ်းတဲင် တဲမ်းဗာႏဒျာႏ ပဉ်ပွိုက်ပွိုက်သွူ။ အပွိုက်ကရိုꩻလဲ့ အပွိုက်ဒွေါင်ႏအဝ်ႏ၊ အပွိုက်ဆွာꩻအဝ်ႏ၊ မဉ်ႏတဲမ်းငါႏ လိတ်ပွိုက်ဒွေါင်ႏလဲ့ ဟော်ꩻတဟဝ်တဝ်း၊ မဉ်ႏတဲမ်းငါႏ လိတ်ပွိုက်ဆွာꩻလဲ့ အခရာႏတစဲင်းတဝ်း၊ သျင်ꩻတဝ်းနေနေသွူ။ ကွပ်နဝ်ꩻမꩻ လိတ်ပွိုက်(ဝါကျ) မဒွေါင်ႏမဆွာꩻနဝ်ꩻ၊ မဉ်ႏတမွေးတဝ်းလဲ့ ဒွေါင်ႏဒွေါင်ႏဆွာꩻဆွာꩻ တဲမ်းသွုံꩻရော်ꩻရယ်ꩻဝင်ꩻန၀်ꩻ ဟဝ်ဒျာႏသွူ။ လိတ်ပွိုက်တပွိုက်ထွူ အီႏတဲမ်းသွုပ်လွေꩻထဲင်း တပွိုက်နဝ်ꩻ လိတ်ရဲဉ်ႏစေးလာႏလောင်း မဉ်ႏတလို့တဝ်းဒွိုန်းလဲ့ တဲမ်းသွုပ်ဗာႏတဝ်း၊ တဲမ်းခေါ်ခေါ်ဖျင်ဗာႏဒျာႏ တရဲဉ်ႏသွူ။ တဲမ်းခေါ်ဖျင်ကရိုꩻလဲ့ ကကောႏစလိတ်ရဲဉ်ႏန၀်ꩻ အွဉ်ႏတသွုန်ဗာႏတဝ်း လိတ်ရဲဉ်ႏဖဲ့ꩻကီအထျꩻ (အမော့ချာ)၊ အွဉ်ႏဆွတ်ငါပသာႏဗာႏ တစူမွူးရပ်နဝ်ꩻသွူ။ အဝ်ႏကုဲင်လိတ်ရဲဉ်ႏ ဖဲ့ꩻလဖုံႏနဝ်ꩻမꩻ အွဉ်ႏသွုန်လꩻသွူ။ 'တဲမ်းတချဗာႏတဝ်း ။ ။ တဲမ်းလိတ်ယိုနဝ်ꩻ လိတ်ရဲဉ်ႏ ( ခွဉ်းကဲစ်ꩻ ) တလီးလွုမ်းလွုမ်း တဲႏအထျꩻဗꩻအနာ တဲမ်းလို့တဲမ်းသွတ်ꩻဗာႏတဝ်း၊ တဲမ်းသော့ꩻဗွေဗိတ် တချနေ့ꩻဗာႏတဝ်းထာꩻ၊ ခွဉ်းကဲစ်ꩻအစနဝ်ꩻ အွဉ်ႏခြေင်ဗာႏ တစူမွူးရပ်၊ ခွဉ်းကဲစ်ꩻအသွတ်ꩻန၀်ꩻ အွဉ်ႏခြေင်ဗာႏ၊ အွဉ်ႏကုဲင်သေꩻဗာႏ ထာႏဝစူမွူးရပ်၊ မဉ်ႏတမွေးတဝ်းလဲ့ စူမွူးလစ်ꩻပြုံႏတပြုံႏရပ်န၀်ꩻသွူ။ လိတ်အုပ်ခြေင်ယိုခါနဝ်ꩻ ဖဲ့ꩻချာဖဲ့ꩻငါ အီႏအွဉ်ႏကုဲင်တာႏ ဝင်ꩻကဲစ်ꩻခါꩻထွူဖေႏနေးလဲ့ အဝ်ႏသွူ ။

     ကော်မာ ။         ။  လိတ်တဖြုံႏ ငဝ်းတငွါတရိုꩻတဝ်း၊ ငဝ်းဥပမာႏပွုံႏခွိုင်ꩻ ငဝ်းတဲက်တွိုင်ꩻတဗာႏတရိုꩻတဝ်း၊ ဝါကျတဗာႏတရိုꩻတဝ်း ဖေႏကတွမ်ႏရော်ꩻပုဲင်ႏ ငဝ်းယာႏလင် မဉ်ႏမဲဉ်အွဉ်ႏစဲင်းစဲ့၊ မဉ်ႏမဲဉ်အွဉ်ႏထင်ႏသျာꩻလွိုဝင်ꩻန၀်ꩻ လိတ်ရဲဉ်ႏဖဲ့ꩻကီပသာႏသာႏ ဖဲ့ꩻချာဖဲ့ꩻငါယို ပေ့ꩻခါꩻဗာႏတွမ်ႏ ကော်မာတန် ( "  " ) နုဲင်းယိုသွူ ။ ဝါကျတဗာႏယို မဲဉ်အွဉ်ႏသေစဲင်း ထူꩻချာꩻတွော့ꩻ ဖဲ့ꩻချာဖဲ့ꩻငါနဝ်ꩻ ပေ့ꩻခါꩻလဲဉ်း တွမ်ႏကော်မာတန်လဲ့ ဝါကျအကို ငဝ်းတငွါငွါယို လိုႏအွဉ်ႏသေထူꩻလွိုမဉ်ႏအဝ်ႏနေ၊ မဉ်ႏလိုႏပေ့ꩻနေနဝ်ꩻ ပေ့ꩻအီဗာႏတွမ်ႏ ကော်မာပေႏ ( '  ' )နုဲင်းယိုသွူ ။ ရွမ်ဖြုဲင်ꩻကိုတရိုꩻတဝ်၊ ဝတ္ထုကိုတရိုꩻတဝ်း တဖြာꩻတွမ်ႏတဖြာꩻ ငဝ်းဒေါ့ꩻရီဝင်ꩻယိုနဝ်ꩻ ငဝ်းစတွမ်ႏငဝ်းသွတ်ꩻ (အထျꩻတွမ်ႏအနာ)ယို ပေ့ꩻသေꩻခါꩻဗာႏတွမ်ႏ ကော်မာတန် ( "  " )နုဲင်းယိုလွဉ်းလွဉ်းသွူ။ ( "  " ) ယို ကဟဲ့ꩻကော်မာနဝ်ꩻ ပအိုဝ်းငဝ်းတမွေးတဝ်း၊ ဟဲ့ꩻထွားနုဲင်းမန်းငဝ်းဒျာႏသွူ။ မန်းကဟဲ့ꩻဗာႏ ကော်မာယိုတဲ့ အလွိုးဝွေꩻသီးငဝ်းတမွေးတဝ်း၊ အလွိုးထူႏသွုံꩻဒျာႏ ပါꩻငဝ်းနေနေသွူ။ ခွေသွဉ်းကအီႏဟဲ့ꩻ ပအိုဝ်ႏနေးနဝ်ꩻ ဟဲ့ꩻတဒါႏတဝ်းတွော့ꩻ ဟဲ့ꩻနုဲင်းဗော့ꩻမန်း ကော်မာနုဲင်းန၀်ꩻသွူ ။

     'တဲမ်းဗာႏတဖဲ့ꩻလွုမ်ꩻ ။      ။  ဒဲဉ်သီႏလက်ဆောင်ႏလိတ်စောင်ႏနဝ်ꩻ ပါတွမ်ႏဟန်ႏနေင်ႏနဝ်ꩻ ဗꩻလဲဉ်းအမုဲင် (၂၇)ရွမ်ဖြုဲင်ꩻ၊ ဝတ္ထုကပါနဝ်ꩻ တယ်ႏအမုဲင် (၁၀)တဲင် ထွာလဲဉ်း (၁၈)နေင်ႏလဲ့ ဟန်ႏနေင်ႏယို ကပသာလွဉ်ဒါႏ လိတ်မူနဝ်ꩻ စေးလာႏတဗီႏ တဲမ်းနီဖဲ့ꩻလဲ့ အဝ်ႏပါနေဒွိုန်းသွူ။ တဲမ်းလိတ် နျꩻလိတ်စောင်ႏန၀်ꩻ လိတ်အမျိုꩻမုဲင်ꩻတယဝ်း၊ ဘာႏသာႏမုဲင်ꩻတယဝ်း တဲမ်းဗာႏတဝ်းနီဖဲ့ꩻ၊ တဲမ်းဗာႏတဖဲ့ꩻလွုမ်ꩻသွူ။ တဲမ်းနီဖဲ့ꩻနဝ်ꩻ ထုံꩻစံႏအဲဉ်ထဝ်း၊ မဲဉ်ႏတဝ်းစီꩻကန်ꩻသွူ ။
  လိုႏဒျာႏလိတ်ဖြုံႏစဲင်း ။      ။  လိတ်မူတဗာႏယို သွုံꩻတသွုံꩻတဝ်း လွိုက်ရွေꩻဆုံꩻဖျတ်မုꩻနဝ်ꩻ လွိုက်ရွေꩻသား (အယ်ဒီတာ) တာႏဝွန်ႏတဲင် နီလိတ်မူယို လွိုက်ရွေꩻသား ဖေႏကကျွိုက်၊ ထွားဖေႏကယိုꩻနဝ်ꩻ အဝ်ႏလိုႏတဲမ်းစဲင်းစဲင်း၊ အဝ်ႏလိုႏတဲမ်းသျင်ꩻသျင်ꩻသွူ။ လိတ်ဖြုံႏတရေꩻတယဝ်း ပေါႏတစဲင်းတဝ်း၊ တသျင်ꩻတဝ်း၊ ဖံꩻဗာႏအာ၊ ဟော်ꩻဗာႏယပ်ꩻနဝ်ꩻ လွိုက်ရွေꩻမုꩻအမတ်ယွမ်ꩻအီဒါႏတဲင် အယ်ဒီတာယဟန်ႏန၀်ꩻ လွꩻဟော်ꩻတွော့ꩻ ကုဲင်းပယ်ႏထိုꩻဒါႏ နီလိတ်မူသွူ။ ကွပ်န၀်ꩻမꩻ လိတ်ဖြုံႏတရေꩻတဝ်းတယဝ်း လိုႏတဲမ်းစဲင်းစဲင်း၊ လိုႏတဲမ်းသျင်ꩻသျင်ꩻသွူ ။

   ရွမ်ဖြုဲင်ꩻနဲ့ ဝတ္ထုနဲ့ ။       ။  နီသွဉ်းသီး ဒဲဉ်သီႏလက်ဆောင်ႏ လိတ်မူလွိုက်ရွေꩻသားနဝ်ꩻ လိုꩻတဖြာꩻလွုမ်ꩻမွေးတဝ်း၊ အုံအဝ်ႏတထွောင်းချင်ႏ မွေးတဝ်းတဲင် နီလိတ်မူယို ရွမ်ဖြုဲင်ꩻနဲ့  ဝတ္ထုနဲ့  မဉ်ႏတတဲမ်းပါတဝ်းနဝ်ꩻ ဟော်ꩻဗာႏလိတ်ယာႏဗဲင်းတွော့ꩻ အခိန်ႏလဲ့လို့အာ၊ အမာႏလဲ့ပါဒါႏသွူ ။ ကွပ်နဝ်ꩻမꩻ လိတ်မဲ့ငါ (၁) အမော့ကီဖဲ့ꩻငါဖဲ့ꩻနဝ်ꩻ မဉ်ႏထွာရွမ်ဖြုဲင်ꩻလဲ့ (ရွမ်ဖြုဲင်ꩻ)၊ မဉ်ႏထွာဝတ္ထုလဲ့ (ဝတ္ထု) မဉ်ႏတဲမ်းပါနုဲင်းနဝ်ꩻနဝ်ꩻ ဖန်းဖြယ်လွဝင်ꩻယိုꩻသွူ ။
   တဲမ်းရော်ꩻပုဲင်ႏဝင်ꩻ ။      ။  ကပသာလွဉ်ဒါႏ လိတ်မူယို ယဖြာꩻဖြာꩻနဝ်ꩻ ဝတ္ထု၊ ရွမ်ဖြုဲင်ꩻ၊ ကဗျာ၊ ရုတ်တယွို့-စတဲင် လိတ်မူအမျိုꩻမျိုꩻယို ပသာတမျိုꩻမွေးတဝ်း ပသာလွဉ် နီသွံမျိုꩻလဲ့ အဝ်ႏသွူ။ မဉ်ႏပသာနီသွံမျိုꩻနဝ်ꩻ စေးလာႏတဗီႏလောင်းယို လိတ်နီမျိုꩻမာꩻကီ တဲမ်းညီꩻမွော့ဝင်ꩻ၊ တဲမ်းဒျာႏသွော့ စေးလာႏတမျိုꩻတဗီႏစီႏ၊ မဉ်ႏတဲမ်းညီꩻဝင်ꩻနဝ်ꩻ ဖန်းဖြယ်ဝင်ꩻယပ်ꩻနေနေသွူ ။
  တဲမ်းမုဲင်သွော့ လိတ်မဲ့ငါ ။     ။  ယဖြာꩻဖြာꩻ ပသာလွဉ်လိတ်မူနဝ်ꩻ တဲမ်းမုဲင်ပါတဝ်း လိတ်မဲ့ငါလဲ့ အဝ်ႏသွူ။ လိတ်မဲ့ငါ မဉ်ႏတပါတဝ်းနဝ်ꩻ စေးလာႏမဉ်ႏလွတ်ꩻထိုꩻ လိတ်မဲ့ငါကွင်ကယ်ဒါႏသွူ။ ကွပ်ပွိုးန၀်ꩻမꩻ တဲမ်းလိတ်န၀်ꩻ စေးလာႏမော့ကီ တရိုꩻတ၀်း၊ မော့လတရိုꩻတဝ်း တဲမ်းမုဲင်ဗာႏ လိတ်မဲ့ငါ ၁-၂-၃ စတဲင်ဂဏန်ꩻစဲဉ်ႏနုဲင်းနဝ်ꩻသွူ ။
   လိတ်မူအကျောင်ꩻခရာႏ ။       ။  နီကပသာဒါႏ လိတ်မူအကျောင်ꩻခရာႏယို တဲမ်းခေါ်ခေါ် စေးတဗီႏတွော့ꩻ မတ်ဗွို့ထွူလိတ်မူ မဲ့ငါဒို့ꩻလောင်းတဲင် မဉ်ႏပသာနဝ်ꩻ ဟဝ်ငါႏသွူ။

ပုံႏစံႏ - ဒဲဉ်သီႏလက်ဆောင်ႏ အမုဲင် (၂၇) လိတ်မူ

         လိတ်မူမဉ်ꩻ              -    ရွမ်ဖြုဲင်ꩻအယ်ဒီတာ ငဝ်းအွဉ်ႏသေ
         လိတ်မူအမျိုꩻ           -    ရွမ်ဖြုဲင်ꩻ
         ကလောင်မဉ်ꩻ           -    ခွန်ကုဝေ ၊ မုဲင်းကောင်
         မဉ်ꩻရင်ꩻတွမ်ႏအုံအဝ်ႏရပ်ရာႏ - ဗွေႏကုဝေရ ၊ ကျောင်ꩻလဲင်းခါႏ ၊ ဝေင်ꩻနယ်ႏဟိုပုံꩻ
         ပသာမွူးနီꩻ              -    နေင်ႏ  ၁၃၆၉-ဗာႏ၊ တင်ꩻကျွစ်ဆန်ꩻ (၁၀)နီꩻ 
                                            (တဲမ်းအင်္ဂလေက်(စ်)မွူးနီꩻလဲ့လꩻ၊ တဲမ်းနီမျိုꩻ 
                                            လဲ့ လꩻဒျာႏသွူ။)

    သွုံꩻဒျာႏသွော့နီငဝ်း ။      ။  နီကသွုံꩻဒါႏ ( ဝေါဟာရ ) ယို စူꩻယိုꩻပုဲင်ႏထာꩻ၊ သွုံꩻဒျာႏသွော့ နီပအိုဝ်ႏငဝ်း၊ မန်း၊ ဖြဝ်ꩻ၊ အင်္ဂဂေလက်(စ်)၊ ပါဠိ-စတဲင် ဝင်ꩻဘာႏသာႏငဝ်းယို တွမ်ႏတဲမ်းထူႏသွုံꩻပုဲင်ႏ၊ ဒါႏနွောင်ꩻသမျ သျောင်ႏသွော့၊ ပအိုဝ်ႏဝေါဟာရ မဉ်ႏအဲဉ်ထဝ်းဒွိုန်းလဲ့ ကျံႏထွင်ႏသွော့ ။
   ဟော်ꩻကုဲင်းကုဲင်း ထွားနုဲင်းသွော့ ။     ။  မဉ်ႏမဲဉ်တဲမ်းဒါႏလိတ်နဝ်ꩻ ဟော်ꩻကုဲင်းကုဲင်းလိတ်တွော့ꩻ လိတ်တပုဒ်အင်းရွယ်ႏချက် ထူꩻချာꩻမုꩻ အဝ်ႏနုဲင်းမုဲင်ꩻစတဲင် အကျောင်ꩻခရာႏယို စဉ်ꩻစာꩻဆင်ႏချင်ႏ ဝွေႏဖန်ႏသွူတဲင် ကလꩻအီသတိꩻ ကလꩻအီပညာႏ အကျောင်ꩻခရာႏဖုံႏယို တောင်ꩻမတ်ခါꩻထွူတွော့ꩻ ထူႏအနယ်ꩻ၊ ထူႏပုံႏစံႏတဲင် ထွားကုဲင်းကုဲင်းသွော့နေား ။

  တဲမ်းထွူဟော်ꩻချာသွော့ ။     ။  တဲမ်းလိတ်အမျိုꩻမုဲင်ꩻတယဝ်း တလဲင်ႏချင်ꩻ သွုံꩻစွဉ်ႏနဝ်ꩻ နပ်တေားတဝ်း၊ တဲမ်းပထမလဲင်ႏထွူ ဟော်ꩻထွားစဲစ်ဆေꩻချာထွူတွော့ꩻ ကအဝ်ႏလိုႏထဲမ်၊ ကအဝ်ႏလိုႏပယ်ႏ၊ ကအဝ်ႏလိုႏဖျင်ဖုံႏယို ထဲမ်ပယ်ႏဖျင်ထွူမꩻ တဲမ်းကူꩻဗာႏယင်း တလဲင်ႏနဝ်ꩻ ကဉ်းအာအာသွူ ။ တဲမ်းကူꩻချော်ꩻထွူ ဒုတိယအလဲင်ႏနဝ်ꩻလဲ့ ဟော်ꩻစဲစ်ဆေꩻဗာႏ အလဲင်ႏလဲင်ႏ အခြွိုက်ခြွိုက်ထွူတဲင် ကေႏနပ်သွူမꩻ ပသာလွေꩻဆဲင်ႏရာꩻသားထျꩻန၀်ꩻ အဟဝ်သွတ်ꩻသွူ ။

  မဉ်ႏပသာလိတ်မူနဝ်ꩻ ။      ။  လိတ်စောင်ႏအမျိုꩻမုဲင်ꩻတာႏတယဝ်း မဉ်ႏပသာလိတ်မူနဝ်ꩻ ကလောင်မဉ်ꩻ၊ မဉ်ꩻရင်ꩻ၊ အုံအဝ်ႏရပ်ရာႏ (လိပ်စာ)ဖုံႏယို လိုႏတဲမ်းပါစုံႏစုံႏလင်ႏလင်ႏသွူ။ အုံအဝ်ႏရပ်ရာႏ မဉ်ႏပါစုံႏစုံႏလင်ႏလင်ႏန၀်ꩻ ဝင်ꩻမဉ်ႏဖေႏချာ မေတ္တာႏလက်ဆောင်ႏ လိတ်စောင်ႏတရိုꩻတဝ်း၊ တဲမ်းလိတ်ခꩻတရိုꩻတဝ်း၊ ပွိုင်း၀ွို့တွမ်ႏလိတ်မူ မဉ်ႏလိုႏရီချာတရိုꩻတဝ်း အဆင်ႏပြေႏယိုꩻဟဝ်သွူ။ ကွပ်နဝ်ꩻမꩻ တဲမ်းပါသွော့ စုံႏစုံႏလင်ႏလင်ႏနေား၊ မဉ်ႏနုဲင်းလိတ်စောင်ႏမန်း (မဂ္ဂဇင်း)ဖုံႏယို (လိပ်စာ) တစုံႏလင်ႏတဝ်း လိတ်မူနဝ်ꩻ ဝင်ꩻတလွိုက်ရွေꩻဖေႏတဝ်းသွူ။ ရွမ်ဖြုဲင်ꩻပနဲးဆွာꩻလဲဉ်းတဲင် အွဉ်ႏထွူဒွုန်းက တခွုင်းယို၊ တွိုႏဆုဲင်ꩻအကျောင်ꩻမဉ်ႏဆွိုက်မꩻ တဲမ်းနယ်ဖေႏယင်းသွူ ။