ရွောမ်ရွောန်ယံအာ နဲယ်ꩻဗျူဟာ

ရွောမ်ရွောန်ကရိုꩻနဝ်ꩻ အွောန်ႏဗာႏထာꩻရေႏမိုးချက်ထွူ တာႏဆွာꩻ(ထာꩻဆငါတာႏသူꩻ) ဟဝ်လွူးငါႏအကျင်ꩻတမျိုꩻသွူ။ ရွောန်ဖေႏကလွိုင်ႏလိုꩻ ခါးလားရွောန်ကနွို့ခွိုင်းမုဲꩻယိုခွေရွောမ်ရွောန် လꩻနွောင်ꩻလဲန်းခွိုင်းမုဲꩻနဝ်ꩻ အရေꩻယီင်းတန်သွူ။ လိုꩻသီးဖိုင်ႏနဝ်ꩻ ကဲန်းအာအာ မဲန်လꩻလွဒျာႏ ရွောန်နွို့ထွူတဲင် ထိုမ်ႏထူႏလနေးဝင်ꩻရွောန်ဖိုင်ႏ။ ယိုနဝ်ꩻ ထွာ အမာႏသုတ်ꩻအချက်သွူ။ နီကအဝ်ႏရွောမ်ရွောန်ခီင်ႏတွင်ꩻ နီသူင်ꩻလွေꩻဗာႏအနဲယ်ꩻဗျူဟာနုဲးမုဲꩻကရိုꩻနဝ်ꩻ မဲန်ဖန်းဖြယ်နဲယ်ငါႏနဝ်ꩻသွူ။

• ၁။ သူင်ꩻစုဲႏထွူမꩻ ကွဲးရွောမ်နဝ်ꩻ မာꩻမွူန်း။

ထေရွောန်လာတာႏ(လာခꩻ)သဲစ်ကထွူ လိုႏတမုဲꩻတဲ့ ဖြေꩻထွူမꩻ ကွဲးရွောမ်ဝင်ꩻရွောန်ဖိုင်ႏသွူ။ အမဲန်ႏတဗာႏနဝ်ꩻ စူမ်ႏလာလာ အွောန်ႏခေါ်ခေါ်ထိုꩻ ကထွော့ခါꩻဒါႏ ကအီႏရွောမ်ရွောန်ပမာဏ ဆေ့ꩻအာထွူမꩻ အဝ်ႏလိုႏဖြေꩻငါႏ နီကအဝ်ႏလိုႏဒါႏ ထာꩻရာꩻမျိုꩻသွူ။ ထေရွောန်လာတာႏသဲစ်ကထွူ အရီးသုတ်ꩻတနီꩻ နီကလိုႏမာꩻရီးရီးသုတ်ꩻနဝ်ꩻ လိုႏအွောန်ႏခေါ်ခေါ်ငါႏ ကအီႏရွောမ်ဒါႏရွောန်နဝ်ꩻသွူ။

• ၂။ စွဲယ်ꩻပီဉ်မျိုꩻမွူန်းတဝ်း တခြိုꩻမိက်(တံꩻဆိတ်)။

ခါးလားကဖြေꩻ iPhone အငိုꩻ သီင်ꩻတဆီစားယို ဖြေꩻခူမ်ဗော့ꩻ အငိုꩻတောႏတောႏတန်ႏတန်ႏ Smart phone (၂/၃)သီင်ꩻစားထွူ ကအဝ်ႏကုဲ (၇/၈)သီင်ꩻယို ရွောမ်ခါꩻလုဲႏဗော့ꩻနဝ်ꩻ အဓိပ္ပဲယ်ႏ ယီင်းအဝ်ႏသွူ။ ခါးလားကလောႏလွောန်ꩻ တံꩻဆိက်မီဉ်ꩻတန်နဝ်ꩻ ဟဝ်သူင်ꩻငါႏ တခြိုꩻအထီအသွီႏဗွေ နုဲးနဝ်ꩻဒျာႏသွူ။ အံႏအွꩻဆဲင်ႏတဲ့ နုဲးနဝ်ꩻနေနေ။ ခါးလားကနွို့အံႏအွꩻဆဲင်ႏမီဉ်ꩻတန်ယို နွို့အံႏအွꩻဗော့ꩻ အအံႏအအွꩻကအွီႏဒါႏနဝ်ꩻ အရသာႏတဲ့ကအဝ်ႏအတွိုင်ꩻ ရွောန်လို့တဲ့ သက်သာႏနဝ်ꩻသွူ။

• ၃။ ပစျꩻပနျꩻတယဝ်း လိုႏအွောန်ႏဖွီတဝ်း။

ဖြေꩻအွꩻကွို့ ဖျောႏထီလူမ်ꩻဟ လို့ကွို့ ငတ်ꩻစွဲးလူမ်ꩻ။ ညညတလဲင်ႏနဝ်ꩻ တထွာတဝ်းမုဲꩻမုဲꩻရိုꩻကီလဲ့ အလဲင်ႏမီဉ်ႏအာလွောန်နဝ်ꩻ "မွတ်ꩻလဲင်ႏပေါင်ႏအာ ထွာထာꩻဆာ" ထွာဒါႏနုဲးနဝ်ꩻသွူ။ ဥပမာႏ-ဆဲင်ႏသား ကစောက်ꩻသော့ꩻဖေႏဒါႏ စေးကောႏယို နုဲႏဝေါင်းထိုꩻတဝ်း၊ အွောန်ႏဟဝ်ထွူ မီဉ်ႏမာꩻအီလုဲႏ သော့ꩻအီထာꩻအီႏခင်ႏလမ်းနဝ်ꩻ ထာꩻအီႏစေးတာႏ သက်သာႏထိုꩻနုဲးနဝ်ꩻသွူ။

• ၄။ အိုင်ယွူန်းစံꩻသွော့ တကွို့ꩻလာ ဗျူဟာ။ (၂ပတ်)

ပေါႏမီဉ်ႏမဲန်ဖြေꩻသွူ တခြိုꩻတစွိုးစွိုးနဝ်ꩻ ဖြေꩻသွူးမွူန်းတလဲင်ႏချင်ꩻ။ အိုင်ယွူန်းစံꩻသွော့ တကွို့လာ။ (၂ပတ်)။ အိုင်ယွုန်းတကွို့လာမီဉ်ႏဗွေ နမ်းတဲ့မဲန်လꩻ၊ လိုႏတဲ့မီဉ်ႏအဝ်ႏလိုႏအပ်နဝ်ꩻ ဖြေꩻသွော့။ ကအဝ်ႏအိုင်ယွုန်းအခီင်ႏတွင်ꩻနဝ်ꩻ ငမ်းမွုန်းတဝ်း မဲ့ꩻပါꩻယိုပါꩻနဝ်ꩻ ဖြေꩻတကတ်ꩻလꩻလို့ထိုꩻ။ ဆဲင်ႏကိုသူꩻနဝ်ꩻ တခြိုꩻယီင်းယီင်းကျဖိုင်ႏ အဝ်ႏဗွေဗောႏထာꩻ။

• ၅။ ချင်းသူင်ꩻသွော့ internet (အီဉ်တာနဲက်)။

နီထာꩻမာꩻ ပေါႏတဆဲင်ႏတဝ်းတောမ်ႏ အီဉ်တာနဲက်နဝ်ꩻ တနီꩻယိုသူင်ꩻငါ တနားရီႏငါ။ သူင်ꩻအီဉ်တာနဲက်ယို ခါးလားကသူင်ꩻရိုꩻရိုꩻနဝ်ꩻ (၁) လိုႏအပ်နဲ့?။ (၂) မဲဉ်သူင်ꩻနဲ့?။ လိုꩻကရိုꩻနဝ်ꩻ နမ်းတာႏတလိုႏအပ်တဝ်းငါႏတခြိုꩻယိုမꩻ မဲန်လꩻလွဝင်ꩻဖိုင်ႏ။ "ပေါႏဖြေꩻဒျာႏ နီတလိုႏအပ်တဝ်းတခြိုꩻမျိုꩻနဝ်ꩻ မဲ့ꩻစာထန်ႏထိုꩻတေားဗာႏလုဲႏ နီကလိုႏအပ်ဒါႏတခြိုꩻဖိုင်ႏ"ကရိုꩻနဝ်ꩻအတွိုင်ꩻ လွောက်ꩻလွောန်ꩻငါႏမွုန်းတဝ်း သꩻဆန္ဒနေား။

အဆုဲꩻသုတ်ꩻ အရေꩻကတန်ငါႏနဝ်ꩻ နမ်းတာႏ၊ လမ်းတာႏ၊ ခမ်းတာႏ၊ ခြွိုင်ႏသန်ꩻရေꩻတာႏ၊ ပညာႏရေꩻတာႏ၊ စွိုးခွိုꩻရေꩻတာႏ စတဲင် အရေꩻအမျိုꩻမျိုꩻတာႏဖိုင်ႏယို "ရွောန်မီဉ်ႏအဝ်ႏမꩻ မာꩻတွိုင်ꩻလꩻ"သွူ။ ကောပ်နဝ်ꩻမꩻ ကအဝ်ႏရွောမ်ရွောန်တွင်ꩻ အွောန်ႏနေးရေႏမိုးချက်ထွူ အဝ်ႏလိုႏရွောမ်ဒါႏဒါႏ၊ ရွောမ်ထွာထွာငါႏဝင်ꩻအကျောင်ꩻသွူ။