လိတ်တဖြုံႏ
"လိတ်တဖြုံႏငေါဝ်းတငွါ ယံဖေႏကထွာဒျာႏ နီခွိုꩻတာႏ" နီလိုꩻမျိုꩻကအောဝ်ႏအုံဒါႏ ခင်ႏလမ်းအထွောင်းမုဲင်ꩻတရိုꩻတောဝ်း ကွပ်စွဉ်ႏလိုꩻသေလိုꩻဒါႏ လိုꩻပညာႏသား ခံႏအနစ်နာႏ အွဉ်ငါကွီဖေႏ၊ ခွုမ်မာꩻဖေႏတဖဲ့ꩻ၊ ခွိုꩻရက်သꩻ ကအောဝ်ႏငါႏ သွꩻဟောဝ်ထာꩻမာꩻဖက်ဖုံႏ စွဉ်ꩻသွီႏသက် ကျိုꩻစာꩻနက်တွော့ꩻ ခမ်းကောင်ခမ်းဒွမ် ကအောဝ်ႏဒါႏ နီလိုꩻမျိုꩻဖုံႏ အုံဗာႏဟောဝ်၊ မာꩻဗာႏဟောဝ်စီꩻပွာꩻရေꩻ၊ သွဉ်ဗာႏဟောဝ်ပညာႏ၊ လွေꩻသဲင်ꩻဗာႏဟောဝ်တဲင် ကထွိုက်တန်ႏတွမ်ႏနီလိုꩻမျိုꩻ အခွင်ꩻအရေꩻဖုံႏလဲ့ အင်းတူႏအင်းတန်ႏ ဝင်ꩻဖေႏလွဉ်၊ ဝင်ꩻဗွောင်ဖေႏ နဲင်ႏငံႏရေꩻတဖူꩻတွော့ꩻ မန်းခမ်းကို ထွာလွဉ်ဗာႏဝင်ꩻသေငါꩻ တင်ႏသျာꩻလွဉ် လိုꩻမျိုꩻတမျိုꩻနောဝ်ꩻသွူ။
လိုꩻတွိုင်ꩻစွုမ်ႏဖြာꩻ လိုႏယူႏလꩻချာ စခါနီဘဝ ဝင်ꩻတိတ်ꩻနျꩻဒါႏနီ ပွိုင်းလဲင်ႏနောဝ်ꩻ စဲင်သꩻတခွိုင်းမုဲင်ꩻ၊ ယပ်ꩻခုဲင်ႏတခွိုင်းမုဲင်ꩻ၊ ခံႏဗာႏဝင်ꩻနွောင်ꩻအံႏ တခွိုင်းမုဲင်ꩻ၊ ဟန်ႏသနီꩻ သမဲင်ꩻကို ဝင်ꩻတဲမ်းနယ်လဲဉ်းလဲ့ ခွိုꩻရက်သꩻအောဝ်ႏသား အောဝ်ႏလိုႏထွား၊ အောဝ်ႏလိုႏဟော်ꩻ၊ အောဝ်ႏလိုႏဖေႏ ခွိုꩻသွုပ်တသာသီး သဘော်ꩻတရာꩻနောဝ်ꩻသွူ။ ခေတ်ပြောင်ꩻလုဲင်ႏမုꩻအလꩻ အွန်လိုင်းခေတ်၊ လူမုမီဒီယာခေတ် ယိုခါ နီအောဝ်ႏလိုႏသွုံꩻဒါႏဒါႏ၊ နီအောဝ်ႏလိုႏတဲမ်း၊ နီအောဝ်ႏလိုႏဒင်ႏ နီစွိုးခွိုꩻအကျိုꩻကအောဝ်ႏအီဒါႏ လိတ်ဖုံႏ၊ ဓာတ်ပွုံႏဖုံႏ၊ နေးတွမ်ႏလိတ်တဖြုံႏလဲ့သင်၊ ငေါဝ်းတငွါလဲ့သင်၊ ဓာတ်ပွုံႏတပွုံႏလဲ့သင် နီခွိုꩻဂွုဏ်ႏသိက္ခာႏ ကထဲ့အီဒါႏ ထာꩻမာꩻမန်ႏသမျ နီလိုႏသျောင်ႏလꩻလꩻငါႏဝင်ꩻသွူ။ နီလိုꩻမျိုꩻကို အစွိုꩻပေါင်ꩻစွုမ်ႏ၊ လိုꩻတွိုင်ꩻစွုမ်ႏဖြာꩻ ခံႏစာꩻချက် အောဝ်ႏလွဉ်းလွဉ်း၊ အမာႏတဲ့အောဝ်ႏလွဉ်းလွဉ်း၊ မာꩻတွိုင်ꩻခံႏစာꩻတွိုင်ꩻ အောဝ်ႏလိုႏတဲမ်းနယ်တောဝ်းဝင်ꩻ၊ အောဝ်ႏလိုႏထုမ်ႏအဖြေႏ၊ အောဝ်ႏလိုႏတွိုင်ႏပင်ႏ လိုꩻသေလိုꩻဒါႏ၊ အောဝ်ႏလိုႏထုမ်ႏတောဝ်း ပျဿနာႏ၊ နီလိုꩻချင်ꩻ အောဝ်ႏလိုႏယားတရေႏတောဝ်းဝင်ꩻ၊ အောဝ်ႏလိုႏဖျင်စွို့ꩻဖေႏဒျာႏဝင်ꩻ တဖူꩻနောဝ်ꩻသွူ။
မွိုက်ခွိုက်အခွင်ꩻကဖေႏ အောဝ်ႏလိုႏခွုမ်မာꩻဖေႏငါႏ ရပ်ရာႏလွိုင်ႏကွိုန်ꩻရေꩻတာႏလဲ့ တစွိုꩻတွမ်ႏတစွိုꩻ၊ တဖြာꩻတွမ်ႏတဖြာꩻ ကွပ်ထီႏညာꩻတောဝ်းထာꩻ အနာႏဂတ်တာႏတဲင် ထွာလွဉ်ပျဿနာႏ၊ ကထွာဒါႏ အတန်အကဲႏဖုံႏလဲ့ အခိန်ႏလို့ဗွော့ꩻတွမ်ႏ ဖြေႏသျင်ꩻဖေႏ နီလိုꩻချင်ꩻပျဿနာႏနောဝ်ꩻ တထွူထွာတောဝ်းနောဝ်ꩻသွူ။ ယာႏတွမ်ႏယာႏ ဖေႏကထွာမွိုန်းလုံႏနောဝ်ꩻ အနယ်ꩻတကျတောဝ်းဒါႏ ဒုံစီꩻကန်ꩻဖုံႏ အောဝ်ႏလိုႏထေတောဝ်း၊ တဖဲ့ꩻရန်ႏသူႏ ကသေထွꩻအီ ကထင်းပေႏအီဒါႏ နီအာႏပေႏချက်ဖုံႏနောဝ်ꩻ လိုႏဒေါ့ꩻတောဝ်း၊ လိုꩻတဲမ်းတောဝ်းလိုင်းလောင်း၊ အမျိုꩻကတွိုင်ႏပင်ႏနေးစားလဲ့ တွိုင်ႏပင်ႏနေး၊ အမျိုꩻကလိုႏဖေႏသေနေးလိတ်လဲ့ ဖေႏသတိꩻတဲမ်းလွဉ်နေးလိတ်၊ မဉ်ႏမာꩻနုဲင်းယိုမꩻ နီစွိုးခွိုꩻ တခွိုꩻလွုမ်းလွုမ်း အီႏတွိုႏဗꩻ ကောဝ်ႏထွန်ႏထျꩻနောဝ်ꩻသွူ။
တိရစ္ဆာန်ႏလောကကို ချို့ꩻဖုံႏ ခီဖုံႏ ကထွာဗာႏ ကေဆားထံဆာႏ မုဆိုꩻဆာႏနောဝ်ꩻ ကွပ်စွဉ်ႏအချင်ꩻချင်ꩻ ရွို့ꩻရန်ႏဝင်ꩻ၊ ထေင်ညင်ꩻဝင်ꩻတဲင် တဖဲ့ꩻသာꩻရန်ႏသူႏတာႏ ထွာအီတော ထာꩻပျောႏခရာႏနောဝ်ꩻသွူ။ လိုꩻတဖြာꩻယံ လိုꩻတစွိုꩻယံနောဝ်ꩻ တလꩻအီနွောင်ꩻတောဝ်းခမ်းထီ၊ တထွာနွောင်ꩻတောဝ်းအာႏ၊ ခမ်းသားမွိုးဖါယို အွဉ်ႏအထျꩻ လိုꩻသေလိုꩻဒါႏ အွဉ်ငါဆွန်ꩻစူနေးတွမ်ႏ အစွိုꩻပေါင်ꩻစွုမ်ႏ ခွုမ်မာꩻနေးတွမ်ႏ အနယ်ꩻပညာႏ ယုံယုံသာႏသာႏမꩻ အီႏလꩻညီꩻဝင်ꩻ အောင်ႏမျင်ႏမုꩻကရိုꩻနောဝ်ꩻ တဲမ်းနယ်ဗာႏ ထွားလိတ်သားသီးသွူ။[၁]
အာႏကွိုꩻ[မွဉ်းဖျင် | မွဉ်းဖျင်အရွီးခိုႏ]
- ↑ အယ်ဒီတာ၊ မောင်းမွူးခံꩻ အမုဲင်-၇၀