လိုꩻခိုမျတ်သီးထာꩻကျံႏ

"အနုရုဒ္ဓ မဟာဝိတက္ကသုတ် (လိုꩻခိုမျတ်သီး ထာꩻကျံႏ)" အွိုးခꩻတလဲင်ႏ- ဗွေႏအနုရုဒ္ဓါႏ အဝ်ႏအုံတပါꩻ စဉ်ꩻစာꩻသꩻယူႏ ကလꩻနွောင်ꩻ လောကုတ္တရာႏနဝ်ꩻ အောဝ်ႏနွုတ်ꩻမျိုꩻ၊ နီဗွေႏဘုရာꩻကျွꩻလွဉ်ထေ့ ဝွေꩻဗွေႏ၊ နီဗွေႏဘုရာꩻ သော့ꩻဖေႏယင်း အဆုဲင်ꩻသွတ်ꩻ တမျိုꩻတဲင် ထွာသွစ်ꩻမျိုꩻ၊ သွစ်ꩻမျိုꩻကရိုꩻနဝ်ꩻ နီဗွေႏဘုရာꩻ ဟော်ꩻနယ်နုဲင်းယို- ရဟန်ꩻသီးဖုံႏဟွေး- ၁။ သာႏသနာႏကို ရဟန်ꩻ(တပါꩻ)နဝ်ꩻ 'လောဘဆေ့ꩻ'သွူတဲ့ ကျွားတဝ်းထာꩻ၊ ငမ်းပါꩻသေ၊ 'အဝ်ႏနုဲင်းမုဲင်ꩻကွို့ꩻသꩻ'ဒျာႏသွူတဲ့ ကျွားတဝ်းထာꩻ၊ ကျွိုက်ဒျာႏ ထာꩻယေန်ကိုသွူတဲ့ ကျွားတဝ်းထာꩻ၊ အဝ်ႏကျိုꩻစာꩻမွေးသွူတရာꩻတဲ့ ကျွားတဝ်းထာꩻ၊ သတိꩻဟောဝ်မွေးမုဲင်းသွူတဲ့ ကျွားတဝ်းထာꩻ၊ သမာႏဓိဟောဝ်(သꩻစွူ)မွေးမုဲင်းသွူတဲ့ ကျွားတဝ်းထာꩻ၊ ပညာႏအဝ်ႏသွူတဲ့ ကျွားတဝ်းထာꩻ၊ သꩻပျောႏလွက်ꩻသွူ နိဗ္ဗာန်ႏတဲ့ ကျွားတဝ်းထာꩻ၊ လိုꩻကျွားတဝ်းထာꩻသွစ်ꩻမျိုꩻ၊ လိုꩻရိုꩻရိုꩻသာꩻသာꩻနုဲင်းနဝ်ꩻမꩻ လꩻနွောင်ꩻလောကုတ္တရာႏ(လꩻနွောင်ꩻမဂ်ဖိုလ်ႏ)နောဝ်ꩻသွူ။ ရဟန်ꩻသီးဖုံႏဟွေး- ၂။ ရဟန်ꩻ(တပါꩻ)နောဝ်ꩻ ဗုဲင်ဗာႏသင်္ကန်ꩻနုဲင်းမုဲင်ꩻမုဲင်ꩻတဲ့ယဝ်း၊ သွုံꩻဗာႏသွမ်ꩻ နုဲင်းမုဲင်ꩻမုဲင်ꩻတဲ့ယောဝ်း၊ အုံသော့ꩻဗာႏကျောင်ꩻနုဲင်းမုဲင်ꩻမုဲင်ꩻတဲ့ယဝ်း၊ သွုံꩻဗာႏတသီႏ နုဲင်းမုဲင်ꩻမုဲင်ꩻတဲ့ယဝ်း အဝ်ႏကေႏနပ်ကွို့ꩻသꩻဒျာႏ၊ ကေႏနပ်ကွို့ꩻသꩻနုဲင်းနဝ်ꩻမꩻ လꩻနွောင်ꩻမဂ်ဖိုလ်ႏ၊ (ပေါႏလိုꩻလောႏဘꩻတန်နဝ်ꩻ လꩻနွောင်ꩻတဝ်းမဂ်ဖိုလ်ႏ)နောဝ်ꩻသွူ။ ရဟန်ꩻသီးဖုံႏဟွေး- ၃။ ရဟန်ꩻ(တပါꩻ)နဝ်ꩻ မဉ်အုံဒျာႏ ထာꩻတေ့ꩻတေ့ꩻယေန်ယေန်ကို၊ ဝင်ꩻဖေႏကကမဉ်လꩻ ထာꩻတေ့ꩻထာꩻယေန်နိဗ္ဗာန်ႏတဲ့ ဟော်ꩻထန်ႏဖေႏတရာꩻ၊ ကျွိုက်ဒျာႏနုဲင်းယိုမꩻ လꩻနွောင်ꩻမဂ်ဖိုလ်ႏ၊ (ပေါႏပျောႏလွဉ်ꩻမွိုင်းသွꩻခွ၊ လယ်ႏလွင်ꩻမွိုင်းထာꩻနဝ်ꩻ လꩻနွောင်ꩻတဝ်းမဂ်ဖိုလ်ႏ)နောဝ်ꩻသွူ။ ရဟန်ꩻသီးဖုံႏဟွေး- ၄။ ရဟန်ꩻ(တပါꩻ)နဝ်ꩻ ကျိုꩻစာꩻအားထွုတ်မွေးတရာꩻ၊ နဝ်ꩻမꩻ လꩻနွောင်ꩻမဂ်ဖိုလ်ႏ၊ (ပေါႏလိုꩻလွꩻနောဝ်ꩻ လꩻနွောင်ꩻတဝ်း မဂ်ဖိုလ်ႏ)နောဝ်ꩻသွူ။ ရဟန်ꩻသီးဖုံႏဟွေး- ၅။ ရဟန်ꩻ(တပါꩻ)နဝ်ꩻ သတိꩻဟောဝ်မွေးစွဉ်ႏထာꩻ၊ နဝ်ꩻမ လꩻနွောင်ꩻမဂ်ဖိုလ်ႏ၊ (ပေါႏလိုꩻသတိꩻတဟဝ်တဝ်းနဝ်ꩻ လꩻနွောင်ꩻတဝ်း မဂ်ဖိုလ်ႏ)နောဝ်ꩻသွူ။ ရဟန်ꩻသီးဖုံႏဟွေး- ၆။ ရဟန်ꩻ(တပါꩻ)နဝ်ꩻ သမာႏဓိဟောဝ်(သꩻစွူ)မွေးစွဉ်ႏထာꩻ၊ နဝ်ꩻမꩻ လꩻနွောင်ꩻမဂ်ဖိုလ်ႏ၊ (ပေါႏသꩻစွူတဝ်းနဝ်ꩻ လꩻနွောင်ꩻတဝ်း မဂ်ဖိုလ်ႏ)နောဝ်ꩻသွူ။ ၇။ ရဟန်ꩻ(တပါꩻ)နဝ်ꩻ ထီႏနွောင်ꩻရုပ်နာမ်ႏ ဉာဏ်ႏပညာႏအဝ်ႏ၊ နဝ်ꩻမꩻ လꩻနွောင်ꩻမဂ်ဖိုလ်ႏ၊ (ထီႏတောဝ်းရုပ်နာမ်ႏ ဉာဏ်ႏပညာႏအဲဉ်ထဝ်းနဝ်ꩻ လꩻနွောင်ꩻတဝ်း မဂ်ဖိုလ်ႏ)နောဝ်ꩻသွူ။ ရဟန်ꩻသီးဖုံႏဟွေး- ၈။ ရဟန်ꩻ(တပါꩻ)နဝ်ꩻ စူꩻလွဉ်ꩻတဝ်း တဏှာႏ မာႏန ဒိဋ္ဌိ၊ သꩻပျောႏလွဉ်ꩻဒျာႏ နိဗ္ဗာန်ႏ၊ နဝ်ꩻမꩻ လꩻနွောင်ꩻမဂ်ဖိုလ်ႏ၊ (လိုꩻစူꩻလွဉ်ꩻ တဏှာႏ မာႏန ဒိဋ္ဌိသားနဝ်ꩻ လꩻနွောင်ꩻတဝ်း မဂ်ဖိုလ်ႏ)နောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ အဋ္ဌကနိပါတ်၊ အနုရုဒ္ဓ မဟာဝိတက္ကသုတ်)