လိုꩻမူႏပိုသားနဲဉ်းထီ
"လိုꩻမူႏပိုသား နဲဉ်းထီဖေႏကလွိုင်ႏတွမ်ႏ နဲဉ်းရောႏဂါႏတသီႏနယ်ꩻဖုံႏ"
လိုꩻမူႏသီးယို ပေါႏအဝ်ႏနမ်းလောင်း၊ သန္ဓေႏ ပေါႏတန်သဲင်ꩻ ဖြားသဲင်ꩻတနီꩻတစိꩻစိꩻ၊ တလာတစိꩻစိꩻနဝ်ꩻ သဘာဝအတွိုင်ꩻ အီႏအဉ်ႏနဲဉ်းအီပိုတာႏ နဲဉ်းဖုံႏ၊ နဉ်းရာႏယိုလဲ့ တန်လွဉ်ဒျာႏနုဲင်းနုဲင်းသွူ။ ထွိုင်ႏလွူးဖွါꩻသွူနဝ်ꩻ အမွိုးနဲဉ်းယို ပေါႏအပိုစုတ်ꩻ၊ အပိုနဲဉ်းလဲ့ နဲဉ်းထီထန်ႏစွဉ်ႏဒျာႏ ကဲဉ်းအာအာသွူ။ ကွယ်ႏတွော့ꩻ ကဲဉ်းဆေ့ꩻဆေ့ꩻ ညာꩻညာꩻတဖြာꩻနဝ်ꩻ နဲဉ်းထီထန်ႏတဝ်းလဲ့ အဝ်ႏသွူ။ နဲဉ်းထီတထန်ႏတဝ်းနဝ်ꩻ နဲဉ်းထီအဲဉ်ထဝ်းတွော့ꩻ ထနႏတဝ်းလဲ့အဝ်ႏ၊ နဲဉ်းထီအဝ်ႏဒျာႏလဲ့ နဲဉ်းအိုပစ်ꩻတွော့ꩻ ထန်ႏတဝ်းလဲ့အဝ်ႏသွူ။ နဲဉ်းထီအဲဉ်ထဝ်း ဖေႏကအဝ်ႏလဲ့နဝ်ꩻ၊ အဝ်ႏဒျာႏလဲ့ အအိုပစ်ꩻတွော့ꩻ ထန်ႏနွောင်ꩻတဝ်းလဲ့နဝ်ꩻ နဲဉ်းထီဖေႏကအဝ်ႏ၊ နဲဉ်းထီဖေႏကထန်ႏနွောင်ꩻနဝ်ꩻ သေရာꩻဒါႏရာꩻအနယ်ꩻဖုံႏ အံႏဗာႏသူႏဖြွꩻဗာႏ တသီႏဖုံႏသွူ။ နဲဉ်းထီ တထန်ႏတဝ်း လိုꩻမူႏပိုသားနဝ်ꩻ ပိုပေႏအတာႏ ဖြေꩻဖေႏဗာႏနေး ဖိုးနဲဉ်းထီသဲင်ဖုံႏတဲင် ထာꩻမာꩻပိုႏ၊ ရွဉ်လို့ပိုႏသွူ။ နဝ်ꩻသွူတကာႏတဝ်း လိုꩻပေႏသူလာမာꩻလနဝ်ꩻ ဖေႏနဲဉ်းစွဉ်ႏဖိုးနဲဉ်းထီသဲင်၊ ဖေႏအံႏစွဉ်ႏထမုဲင်ꩻမုဲင်ꩻလဲ့ တထွာဒါႏ အာဟာႏရနဝ်ꩻ တထွꩻနွောင်ꩻတဝ်း မွိုးနဲဉ်းထီသွူ။ သူလာဗွေထွူမꩻ ဖေႏအံႏဖဖ အာဟာရမုန့်၊ ထထီႏဆျာႏမဉ်စတဲင် အဆာႏကကေႏယိုꩻဒါႏ ထာꩻအံႏပနဲဉ်ႏနဲဉ်ႏမျိုꩻဖုံႏလဲ့ အဝ်ႏလꩻဒျာႏသွူ။ မဉ်ႏဖေႏအွꩻ ဒဲဉ်ထီနဝ်ꩻလဲ့ ဟဝ်ငါႏသွူ။ လိုꩻမူႏဝေင်ꩻ ရွဉ်သားယဟန်ႏ၊ အစိုႏရဝွန်ႏထံꩻသား ယဟန်ႏနဝ်ꩻ လွူးသွူပိုလဲ့ နမ်းတနေးပျုစုတဝ်း၊ စင်းနေးဝင်ꩻနေးပျုစု၊ နမ်းတအွဉ်ႏနဲဉ်းတဝ်း အွဉ်ႏနဲဉ်းနေးဒျာႏ ဖိုးနဲဉ်းထီသဲင်လဲ့ အဝ်ႏသွူ။ ကမာꩻနုဲင်းယိုနဝ်ꩻ တဖုဲင်ႏတတန်ꩻတဝ်း၊ လိုꩻမူႏဝွန်ႏထံꩻသားဖုံႏနဝ်ꩻ စင်းဒေါ့ꩻတဝ်း၊ စင်းဒင်ႏတဝ်းအပဲစ်လဲ့ အဝ်ႏဖုဲင်ႏတန်ꩻဒျာႏတွော့ꩻ တပျုစုတဝ်း၊ တအွဉ်ႏနဲဉ်းတဝ်း၊ ကစင်းနေးဝင်ꩻနဝ်ꩻ လွိုဆန်သဘာဝတရာꩻတဲင် အနယ်ꩻတမဲဉ်ႏတဝ်း၊ အမျိုꩻတမွေးတဝ်းသွူ။ ရွမ်ဖြုဲင်ꩻယိုနဝ်ꩻ အဝ်ႏမဲဉ်အွဉ်ႏနဲဉ်းဒျာႏလဲ့ နဲဉ်းထီတအဲဉ်ထဝ်း၊ နဲဉ်းထီတထန်ႏတဝ်း လိုꩻမူႏသီးအတာႏ တဲမ်းနယ်ဒေါ့ꩻနယ်ဖေႏ တသီႏနဲဉ်းထီလွိုင်ႏ၊ နဲဉ်းထီထန်ႏနွောင်ꩻနယ်ꩻဖုံႏတဲင် မဉ်ႏလိုႏအပ်နဝ်ꩻ ထူႏသုံꩻဖောႏအံႏနုဲင်းနဝ်ꩻလွုမ်ꩻသွူ။
"နဲဉ်းထီဖေႏကလွိုင်ႏ၊ ဖေႏကထန်ႏအနယ်ꩻဖုံႏ"
- ၁။ လိုꩻမူႏပိုသား နဲဉ်းအိုမဉ်ႏပစ်ꩻနဝ်ꩻ ခြွုတ်ပဲစ်ꩻတမာႏလာႏတဲင် သူႏဖေႏခွိုꩻခွိုꩻနဝ်ꩻ နဲဉ်းအိုဖြောင်ခွုန်ꩻယင်းဒါႏသွူ။
- ၂။ နဲဉ်းအိုပစ်ꩻ တသီႏနယ်ꩻ ထဲင်းတနယ်ꩻနဝ်ꩻ ဒွိုႏအံႏဖက်ပုမ်းကောင် (ကြိတ်မှန်ရွက်)တွမ်ႏ ထေင်ႏ(ငါးကြင်းသား)နဝ်ꩻလဲ့ ဖြောင်ခွုန်ꩻယင်းဒါႏနေနေသွူ။
- ၃။ နဲဉ်းအိုပစ်ꩻတသီႏနယ်ꩻ ထဲင်းတနယ်ꩻနဝ်ꩻ သေင်ႏမုဲင်းသက်ꩻ(ကျွန်းသား)ယို ဗုံကျွမ်ꩻထွူတွော့ꩻ ကလꩻဒါႏမေႏသွာႏယို တွမ်ႏဟူထီမူထွူတွော့ꩻ သူႏအာအာ သူႏခွိုꩻခွိုꩻဖေႏ နဲဉ်းတဖြုံႏလွုမ်းနဝ်ꩻလဲ့ ဖြောင်ချာယင်းဒျာႏနေနေသွူ။
- ၄။ နဲဉ်းအိုပစ်ꩻ တသီႏနယ်ꩻ ထဲင်းတနယ်ꩻနဝ်ꩻ မုဲင်းသက်ရာႏ(ကျွန်းသီး)ယို မူတွမ်ႏဟူထီနေနေတွော့ꩻ သူႏဖေႏခွိုꩻခွိုꩻနဝ်ꩻလဲ့ ဖြောင်ယင်းဒါႏသွူ။
- ၅။ နဲဉ်းအိုပစ်ꩻ တသီႏနယ်ꩻ ထဲင်းတနယ်ꩻနဝ်ꩻ ပအိုဝ်ႏဟဲ့ꩻ"ဟန်ႏတရဲစ်ꩻ"မန်းဟဲ့ꩻ "ဇရစ်"ထောင်ꩻဆား၊ စော့ꩻဆားယို သော့ꩻတွမ်ႏဟန်ႏခါႏဖွန်ႏဆေ့ꩻဆေ့ꩻလဲ့ဟဝ်၊ ဂန့်ကလာဖွန်ႏဆေ့ꩻဆေ့ꩻလဲ့ဟဝ်၊ သွုန်ႏအေႏ၊ တဗာအေႏဆေ့ꩻဆေ့ꩻလဲ့ဟဝ် ဒွိုႏအံႏဟန်ႏအိုထီခါႏနဝ်ꩻ နဲဉ်းအိုဖြောင်ခွုန်ꩻယင်းဒါႏသွူ။
- ၆။ ပိုမွိုးတသီႏနဲဉ်းထီလွိုင်ႏ၊ နဲဉ်းထီထန်ႏနယ်ꩻနဝ်ꩻ ဒွိုႏအံႏအာအာ သင်္ဘောꩻရာႏမိုနဝ်ꩻ နဲဉ်းတဖြုံႏလွုမ်း တန်လွဉ်ခြေင်းလွဉ်တဲင် နဲဉ်ထီထန်ႏအာရိုꩻနဝ်ꩻသွူ။ မဉ်ႏသော့ꩻတွမ်ႏ ဟန်ႏခါႏဖွန်ႏဆေ့ꩻဆေ့ꩻ၊ ခဲဉ်ႏဒွီႏပေႏ(ငြုပ်ကောင်းမုန့်)ဖွန်ႏဆေ့ꩻဆေ့ꩻနဝ်ꩻ ယိန်းဟဝ်ဟဝ်သွူ။ ငြုပ်ကောင်းဖွန်ႏအကျိုꩻဟော်ꩻနဝ်ꩻ တွမ်ႏပအိုဝ်ႏမူႏ ကအဝ်ႏဒွိုႏအံႏဒါႏ အေင်ထီနဝ်ꩻဗွိုန်ဝင်ꩻသွူ။ ဝင်ꩻကအဝ်ႏဖောႏစာဒါႏ တသီႏလျားသော့ꩻဟန်ႏအိုနဝ်ꩻ အေင်သဲင်တွမ်ႏငြုပ်ကောင်းဖွန်ႏကယ်ꩻဒျာႏနေနေသွူ။
- ၇။ ပိုမွိုးတသီႏနဲဉ်းထီလွိုင်ႏနယ်ꩻ ထဲင်းတနယ်ꩻနဝ်ꩻ မုတ်ဆိုꩻကအဝ်ႏစာဒါႏ ဟန်ႏအိုတနျာႏယို ရီဖြေꩻအဖိုးမေးတဲင် ဖိုးမေးခြွစ်ꩻကြောင်းကြောင်းသွူအဆွဉ်းတွော့ꩻ ပသေကြောင်း တဒွေါ့ꩻပဲစ်ꩻခြွူဖူးဖူးထွူနဝ်ꩻ သော့ꩻတွမ်ႏဟန်ႏဆျာယာႏလာႏဆား (ဒန့်သလွန်ရွက်)၊ ဖက်ꩻခေါ်(၇)ကြိပ်ꩻ၊ ငြုပ်ကောင်း(၇)ခူꩻတွော့ꩻ အံႏအာအာနဝ်ꩻ အမွိုးနဲဉ်းထီယို အပိုနဲဉ်းလွုမ်ꩻတကာႏတဝ်း၊ အဖါနဲဉ်းရုမ်းခန်းလဲ့ တလို့နွောင်ꩻတဝ်းရိုꩻနဝ်ꩻသွူ။
- ၈။ ပိုမွိုးအတာႏ တသီႏနဲဉ်းထီလွိုင်ႏနယ်ꩻ ထဲင်းတနယ်ꩻနဝ်ꩻ ဖိုးမေးသွတ်ꩻဖူးထွူနုဲင်းကီနဝ်ꩻဟွဉ်ႏအကို သော့ꩻတဝ်းဟန်ႏဆျာယာႏတွော့ꩻ သော့ꩻရော်ꩻလုဲင်ႏ ခြေင်ႏပင်လာႏ(ကြောင်ပန်းရွက်နု)နဝ်ꩻ ထွာဟန်ႏအိုထီခါႏတဲင် အံႏအာအာဖေႏနဝ်ꩻလဲ့ နဲဉ်းထီလွိုင်ႏငါႏ ဆရာႏမန်း ရိုꩻနဝ်ꩻသွူ။
- ၉။ တသီႏနဲဉ်းထီလွိုင်ႏနယ်ꩻ ထဲင်းတနယ်ꩻနဝ်ꩻ "ချဉ်ပေါင်နီရွက်၊ နွားသားဖက်၊ ကြိုချက်စားသောက်ကျ၊ စမ်းရေပမာ၊ နို့ထွက်လာ၊ လင်ပါကူသောက်ရ"ကရိုꩻဒါႏ မန်းသံပေါက်လင်္ကာႏအတွိုင်ꩻ ဒွိုႏအံႏသုမ်းပူတနျာႏတွမ်ႏ ဖိုးယာႏနဝ်ꩻလဲ့ နဲဉ်းထီလွိုင်ႏနေနေ ရိုꩻနုဲင်းနဝ်ꩻသွူ။
၁၀။ တသီႏနဲဉ်းထီလွိုင်ႏနယ်ꩻ ထဲင်းတနယ်ꩻနဝ်ꩻ မူဆင်မနယ်ႏတွမ်ႏ မောက်ꩻစင်းဖေ့ꩻတွော့ꩻ အွꩻဖေႏနဝ်ꩻလဲ့ နဲဉ်းထီလွိုင်ႏရိုꩻနဝ်ꩻသွူ။ ယိုတနယ်ꩻနဝ်ꩻ လို့တဝ်းအငိုꩻလဲ့ အွꩻတအွီႏတဝ်း ခါႏကရစ်ꩻတန်သွူ။
- ၁၁။ နဲဉ်းထီလွိုင်ႏနယ်ꩻ ထဲင်းတနယ်ꩻနဝ်ꩻ ဖက်ꩻပုမ်းကောင် (ကြိတ်မှန်ရွက်)စော့ꩻလာႏယို ဒွိုႏအံႏခွိုꩻခွိုꩻ ဟန်ႏအိုထီခါႏနဝ်ꩻလဲ့ နဲဉ်းထီလွိုင်ႏနေနေရိုꩻနဝ်ꩻသွူ။
- ၁၂။ လိုꩻမူႏလွူးထွူပိုတွော့ꩻ နဲဉ်းထီမဉ်ႏသေ့ꩻ၊ နဲဉ်းထီမဉ်ႏဆေ့ꩻနဝ်ꩻ မောက်ꩻကြင်ꩻလာႏဆား စော့ꩻဆားယို တဒွေါ့ꩻပဲစ်ꩻပဲစ်ꩻတွော့ꩻ သော့ꩻတွမ်ႏမက်ဖစ်ပွမ်း၊ သော့ꩻတွမ်ႏဟန်ႏခါႏဆေ့ꩻဆေ့ꩻတွော့ꩻ မဉ်ႏဒွိုႏအံႏခွိုꩻခွိုꩻနဝ်ꩻလဲ့ နဲဉ်းထီလွိုင်ႏနေနေသွူ။
- ၁၃။ တသီႏနဲဉ်းထီလွိုင်ႏနယ်ꩻ ထဲင်းတနယ်ꩻနဝ်ꩻ ပြူးလာႏယို တနီႏပဲစ်ꩻပဲစ်ꩻစေ့ꩻအထီတဆ၊ အေင်တသဉ် ထောင်းပဲစ်ꩻပဲစ်ꩻစေ့ꩻအထီတဆ၊ တောင်းလျက်ꩻထန်ꩻတဆ၊ ယို(၃)မျိုꩻနဝ်ꩻ ဖွောင်ဗို့ꩻညီꩻဝင်ꩻတွော့ꩻ အွꩻသွော့တလဲင်ႏ တစောအံႏဟန်ႏအိုနော၊ တသီႏထီယိုနဝ်ꩻ နဲဉ်းထီလဲ့ စင်ႏကြယ်ႏသွူ။
- ၁၄။ လိုꩻမူႏပိုသားနဝ်ꩻ အပိုနဲဉ်းတွော့ꩻ အပိုအဲင်ႏပါတဲင် နဲဉ်းကဲင်ထိုꩻလဲ့နဝ်ꩻ၊ အဝ်ႏလွိုႏလွိုႏကာႏတွော့ꩻ ဆာဒျာႏလဲ့နဝ်ꩻ ဗွူရွီးတဆ၊ လုံႏဟီႏပဉ္စငတ်ꩻပါꩻတဆ၊ ယိုနီမျိုꩻနဝ်ꩻ ထောင်းပဲစ်ꩻ၊ ခြွူပဲစ်ꩻငီꩻသွူဝင်ꩻတွော့ꩻ သူႏဖေႏသွော့နဲဉ်းတဖြုံႏလွုမ်းနော၊ အသေ့ꩻနဝ်ꩻလဲ့ အွဉ်ႏပယ်အွဉ်ႏကွပ်ဖေႏသွော့နော။
- ၁၅။ တသီႏနဲဉ်းထီလွိုင်ႏနယ်ꩻ ထဲင်းတနယ်ꩻနဝ်ꩻ ဖိုးယာႏယို ဒွိုႏတွမ်ႏဖက်ꩻခေါ်၊ တွမ်ႏခြေင်ႏပင်စော့ꩻဆားတွော့ꩻ အံႏဖေႏခွိုꩻခွိုꩻနဝ်ꩻလဲ့ နဲဉ်းထီလွိုင်ႏနေနေသွူ။
- ၁၆။ ပိုမွိုးနဲဉ်းဆာဟဝ်တသီႏနယ်ꩻ ထဲင်းတနယ်ꩻနဝ်ꩻ မူသူႏဖေႏသွော့ မေ့ဒီႏတွမ်ႏငွီးခြုံနော။
- ၁၇။ ပိုမွိုးနဲဉ်းထီအဝ်ႏဒျာႏလဲ့ နဲဉ်းအိုပစ်ꩻတွော့ꩻ နဲဉ်းထီမဉ်ႏတထန်ႏနွောင်ꩻတဝ်းနဝ်ꩻ မူမဲလေင်းကြွဉ်အိုခြုံ(နဂျီအိမ်) သူဖေႏနဲဉ်းတဖြုံႏလွုမ်း၊ တနီꩻ(၃)လဲင်ႏနဝ်ꩻ ဖြောင်လွဉ်ဒျာႏသွူ။[၁][၂]