လိုꩻမျိုꩻထဲ့ဖွိုႏ

"လိုꩻမျိုꩻထဲ့ဖွိုႏအကျောင်ꩻတရာꩻကို ဝွေꩻယိုတဲ့ပါ" ယိုခါ အဟွိုန်အာသွတ်ꩻသတင်ꩻ တကင်ꩻလွစ်တောဝ်းတွမ်ႏဥပဒေႏ၊ ကဖေႏဒါႏနီလိုꩻသီးအကျိုꩻကုဲင် ဘတအသုဲင်အခြောင်ꩻကပြောင်ꩻထိုꩻအီလဲ့ဝွေꩻ၊ အောဝ်ႏသဌေꩻဘဝ ထွာဒုက္ခသားတဖြာꩻ၊ ခါးလားကမော့ꩻဝွေꩻနောဝ်ꩻ ထွာလိုꩻဟောဝ်ရိုꩻသာꩻ အမျာꩻလဲ့ အောဝ်ႏအုပ်ꩻရောင်၊ ထွိုင်ႏပေါင်ꩻကွိုက်မာႏဝွေꩻ သဌေꩻခန်းတယောဝ်း အီႏတွိုႏဗာႏတခွန်ꩻဘဝ၊ အီႏမာꩻဗာႏအကျိုꩻကုဲင်ထာꩻမာꩻနောဝ်ꩻ တာႏဝွန်ႏတထွူႏတောဝ်းဒွုမ်ကရိုꩻနောဝ်ꩻ လိတ်တဲမ်းသားအနေႏ အောဝ်ႏထီႏရီးရီးစွဉ်ႏနောဝ်ꩻသွူ။ "ဝွေꩻ"ကရိုꩻနောဝ်ꩻ အလင်မွေးတောဝ်း၊ ပအိုဝ်ႏရိုꩻ တသီႏမွန်ꩻတဖေင်ꩻ (ယာမ)နောဝ်ꩻသွူ။ နောဝ်ꩻမꩻ မဉ်ႏထွားချာတွမ်ႏ မြန်မာနဲင်ႏငံႏ တသီႏမွန်ꩻတဖေင်ꩻတွိုက်ꩻကုဲင်ရေꩻ ဗဟိုႏအစွိုꩻနောဝ်ꩻ အီႏတွိုက်ꩻထန်ႏ တသီႏမွန်ꩻတဖေင်ꩻတာႏ မဟာဗျူဟာ နီမျိုꩻတွမ်ႏ အနယ်ꩻဗျူဟာ (၃)ချက် ချꩻခါꩻ ၂၀၁၅-နေင်ႏနောဝ်ꩻ အန္တိမချꩻမတ်ခွုမ်မာꩻလွေꩻနောဝ်ꩻသွူ။ မြန်မာနဲင်ႏငံႏ ယာလံဖေင်ꩻဖင်ꩻတွမ်ႏ ကမာꩻပြောင်ꩻအီဒါႏလိုꩻသꩻ တသီႏမွန်ꩻတဖေင်ꩻမျိုꩻ ဥပဒေႏနောဝ်ꩻ နဲင်ႏငံႏတောႏအစိုႏရ ချꩻတီႏပျဌာန်းသေꩻခါꩻ ၁၉၉၃-ဗာႏတဲင် မာꩻလွေꩻကာႏကွယ်ႏ၊ ရဲးပေ့ꩻရေꩻဖုံႏနောဝ်ꩻမꩻ ကဆို့ꩻဒါႏယာသားယိုလဲ့ ယွမ်ꩻလင်ꩻ၊ ယေန်လွဉ်ထိုꩻဆေ့ꩻဆေ့ꩻနောဝ်ꩻသွူ။ ကွဲးတွော့ꩻ အခေႏခံႏတွမ်ႏ ဓာတတခြိုꩻ ကမွန်ꩻအီဒါႏမျိုꩻယို နွို့ထူႏလွဉ်လုဲင်ႏခင်ႏလမ်းတဲင် အီႏမာꩻလွေꩻဗာႏ ရဲးပေ့ꩻ၊ ကာႏကွယ်ႏရေꩻယို ထူႏလွေꩻဗာႏယင်းဒျာႏ အခိန်ႏ(၂)(၃)နေင်ႏနောဝ်ꩻသွူ။ မြန်မာနဲင်ႏငံႏ ခေတ်အသွုပ်သွုပ်ကမာꩻလွဉ်ဒါႏ ယာလံဖေင်ꩻဖင်ꩻ တသီႏမွန်ꩻသီးအမျိုꩻယို အစိုႏရအစွုပ်ရီးစူကို ၂၀၀၂-ဗာႏနေင်ႏ၊ ဇွန်လာ(၅)နီꩻနောဝ်ꩻ ခြွိုင်ႏသန်ꩻရေꩻဝွန်ႏတန်ဌာႏန ယာလံဖေင်ꩻဖင်ꩻတွမ်ႏ တသီႏမွန်ꩻအီဒါႏ လိုꩻသီးသꩻယို ကထေမာꩻဒါႏ ဓာတတခြိုꩻ (၂၅)မျိုꩻ၊ ဇွန်လာ(၂၁)နီꩻနောဝ်ꩻ ဓာတုတခြိုꩻ (၁၁၃)မျိုꩻ၊ လာဇူလှိုင်(၂၉)နီꩻနောဝ်ꩻ ဓာတုတခြိုꩻ (၁၂၄)မျိုꩻယို ချꩻအမိန်းထေလွေꩻလိတ်ကေႏညာႏတဲင် ထိန်ꩻချုပ်လွေꩻအီနောဝ်ꩻသွူ။ နောဝ်ꩻမꩻ မြန်မာနဲင်ႏငံႏ ကခွုမ်မာꩻလွေꩻဒါႏ ယာလံဖေင်ꩻဖင်ꩻတွမ်ႏ တသီႏကမာꩻပြောင်ꩻအီဒါႏသꩻ တွိုက်ꩻကုဲင်ရေꩻထာꩻမာꩻနောဝ်ꩻ ကဆို့ꩻဒါႏယာသား၊ ကဖြေꩻစာကူꩻကားသား၊ အွဉ်ႏသိမ်ဟောဝ်သားတွမ်ႏ ကသွုံꩻစွယ်ꩻဒါႏလိုꩻဖုံႏယို ရဲးပေ့ꩻကာႏကွယ်ႏနွောင်ꩻအီဒါႏ ပဲစ်တမ်ႏအမျိုꩻမျိုꩻ၊ ဝင်ကုဲင်ထိုꩻယာခြံ၊ ကဆွမ်ꩻလꩻထွူလဲဉ်းဒါႏ ယာလံဖေင်ꩻဖင်ꩻဖုံႏယိုလဲ့ လဲ့ꩻမေႏယားကုဲင်ထိုꩻနောဝ်ꩻသွူ။ နောဝ်ꩻထွူတဲင် ဆို့ꩻထဲမ်သော့ꩻလွေꩻ ယာလံဖေင်ꩻဖင်ꩻမွူးခြောင်ꩻ လွူးမွီးရေꩻ၊ ဆို့ꩻရုဲင်ရေꩻဖုံႏယိုလဲ့ အစိုႏရတွမ်ႏ လိုꩻမုꩻအစွိုꩻအဗူႏဖုံႏ အောဝ်ႏခွုမ်စံႏမာꩻလွေꩻဖေႏလွုမ်ꩻတကာႏတောဝ်း ကဆွဉ်းဒါႏလိုꩻသား ဖေႏကအောဝ်ႏမွိုန်းဒွုမ်တဲင် ဖေႏပညာႏ၊ လွံꩻလꩻစစွဉ်ႏ ထာꩻမာꩻဖုံႏယိုလဲ့ အောဝ်ႏမာꩻလွေꩻနောဝ်ꩻသွူ။ ကွဲးတဲင်တွော့ꩻ နီပအိုဝ်ႏဒေႏသ လိုꩻကဆွဉ်းသားတွမ်ႏ ကစာသားယို တွိုႏခြောင်ꩻမုꩻအောဝ်ႏအောဝ်ႏ အီႏခွုမ်စံႏထာꩻမာꩻနောဝ်ꩻ အောဝ်ႏဆေ့ꩻနေကဒွိုန်း ထီႏလွေꩻနုဲင်းနောဝ်ꩻသွူ။ နောဝ်ꩻလွုမ်ꩻတကာႏတောဝ်း ကဆို့ꩻဒါႏအမွူးသားယိုလဲ့ ဖေႏကထဲမ်သော့ꩻနွောင်ꩻ ယာခင်ႏလမ်းတာႏ ကထွာဒါႏဆို့ꩻရုဲင်ရေꩻထာꩻမာꩻ၊ လွူးမွီးရေꩻထာꩻမာꩻယို အောဝ်ႏလိုႏမာꩻဖေႏအာအာငါႏနောဝ်ꩻသွူ။ မဉ်ႏတွက်ထွားချာတွမ်ႏ ကလွဉ်ꩻလဲဉ်းဒါႏ လစ်ꩻငတ်ꩻနေင်ႏမာꩻချာနောဝ်ꩻ အဆို့ꩻသားရွောင်ပသာႏရိုꩻကီလဲ့ ဓာတုကထွိုင်ႏနွို့ထူႏလွဉ်ခင်ႏလမ်းနောဝ်ꩻ အဆွဉ်းသားယို ဒေါ့ꩻလဲဉ်းနုဲင်းသွန်ꩻနောဝ်ꩻသွူ။ မဉ်ႏထွားလွေꩻယင်း ခြွိုင်ႏသန်ꩻရေꩻအလꩻ အီႏလွံꩻလာꩻဒါႏယိုနောဝ်ꩻ ဇီဝကမ္မတမဲဉ်ႏတောဝ်းလိုꩻသားယို အီႏလွံꩻလာꩻဖေႏဗာႏနောဝ်ꩻ မဲဉ်ႏဒျာႏ၊ ကွဲးတွော့ꩻ သꩻဖဲ့ꩻဆဲင်ႏရာꩻတွမ်ႏ လိုꩻမုꩻရေꩻဖဲ့ꩻယို ပညာႏသျင်ႏလွုမ်ꩻတကာႏတောဝ်း ဝွေꩻစွိုးခွိုꩻအသောင်အရင်ꩻ ပါတွမ်ႏအစွိုꩻအဗူႏဖုံႏယို လိုႏဆွန်ꩻစူခွုမ်မာꩻငါႏအကျောင်ꩻ၊ နောဝ်ꩻမꩻ ကမ္ဘာႏခမ်းသားတရပ်လိုမ်းအတာႏ ခြွိုင်ႏသန်ꩻရေꩻ၊ ပညာႏရေꩻ၊ လိုꩻအုံအောဝ်ႏမု အဆင်ႏအရန်းထင်ႏထိုရေꩻတွမ်ႏ ထာꩻသေပညာႏ ဗဟုသုတဖုံႏယိုလဲ့ ကမာꩻကုဲင်၊ ကမာꩻထဲ့ဖွိုႏအီလွုမ်ꩻတကာႏတောဝ်း မာꩻထွာအီဒုက္ခ၊ ဆင်ꩻရယ်ꩻမုꩻ အစုအဗူႏကာႏကအောဝ်ႏတဲင် နီပအိုဝ်ႏဒေႏသကို ဖေႏနေးကအောဝ်ႏမွုန်းဒွုမ်၊ ယံဖေႏနေး ကတွိုက်ꩻထန်ႏခန်းသွော့ဝင်ꩻအကျောင်ꩻ ဆွန်ꩻစူတွမ်ႏခမ်းသားတဲင် မောင်းမွူးခံꩻအနေႏ ဖေႏသေဗာႏနောဝ်ꩻသွူ။