လိုꩻမျိုꩻဘာႏသာႏ လိုႏရက်ငါႏ

ခမ်ႏဘာႏလောင်းကအဝ်ႏဒါႏ သꩻအဝ်ꩻသတ္တဝါႏမန်ႏသမျနဝ်ꩻ နီလိုꩻသီႏယို ထာꩻသေတရာꩻ အာလွိုဝင်ꩻတဲင် ထွာအဆင်ႏရန်းအထိုသွတ်ꩻ သတ္တဝါႏတမျိုꩻသွူ။ လိုꩻကရိုꩻယို အုံဟံႏတဗီႏချင်ႏနုဲင်းနုဲင်းလဲ့ ကွပ်ပွိုးကအုံဒါႏ ခင်ႏလမ်းဒေႏသဌာနယို တဗွိုန်တဝ်းဝင်ꩻလဲ့နဝ်ꩻ ဒေါ့ꩻငဝ်ႏဘာႏသာႏ တဗွိုန်တဝ်ႏတင်ꩻလဲ့နဝ်ꩻ ကွဉ်ကꩻခွမ်ꩻလာꩻ တဗွိုန်တဝ်းဝင်ꩻလဲ့နဝ်ꩻ ထုံꩻစံႏယေန်ႏကေႏမုꩻ တဗွိုန်တဝ်းဝင်ꩻလဲ့နဝ်ꩻ လိုꩻမျိုꩻကရိုꩻယို ပꩻဖြယ်လွဉ်ဗာႏ ထွာပေါႏလွဉ်ဗာႏသွူ။

လိုꩻသီးနေးတွမ်ႏအကျောင်ꩻတရာꩻ နုဲင်းယိုဖုံႏတဲင် ထွိုင်ႏပꩻဖြယ်လွဉ်လွဝင်ꩻနတ်ꩻ ကအုံအဝ်ႏဒါႏ အရပ်ဒေႏသ ဌာနခင်ႏလမ်း ဟံႏပထဝီႏယိုလဲ့ ဗဲင်းလဝင်ꩻ ဖန်ႏဖြယ်လွဝင်ꩻတွော့ꩻ နဲင်ႏငံႏခမ်းထီယို ပေါႏပေါက်ထွာလွဉ်ဗာႏသွူ။ နဲင်ႏငံႏခမ်းထီတဖြုံႏယို အဝ်ႏသော့ꩻလိုꩻမျိုꩻတမျိုꩻလွုမ်ꩻနဝ်ꩻ အဝ်ႏကြွို့ꩻတဝ်း လိုꩻမျိုꩻပေါင်ꩻစွုမ်ႏ စုခြွဉ်းအုံညီꩻလွဝင်ꩻနဝ်ꩻ ကဲဉ်းအာအာသွူ။ လိုꩻမျိုꩻပေါင်ꩻစွုမ်ႏ ကစုခြွဉ်းအုံညီꩻလွဝင်ꩻ ခမ်ႏထီတဖြုံႏယို ကထွာဒါႏအအာသား လိုꩻမျိုꩻတန်ယို မဉ်ႏရက်သညင်ꩻ လိုꩻမျိုꩻပေႏလဲ့နဝ်ꩻ လိုꩻမျိုꩻပေႏချင်ꩻချင်ꩻ မဉ်ꩻရက်သညင်ꩻလွဝင်ꩻလဲ့ꩻနဝ်ꩻ ခမ်းထီနဝ်ꩻ တိုꩻတက်ထင်ႏထို ခြွေခြာႏချမ်ꩻသာႏသွူ။ အုံအဝ်ႏသွူ တခမ်းချင်ႏလဲ့ လိုꩻမျိုꩻတမျိုꩻတွမ်ႏတမျိုꩻ မဉ်ႏတထီꩻသင်ꩻတဝ်ႏလွဝင်ꩻ မဉ်ႏအဝ်ႏရွိုꩻမာႏလွဝင်ꩻ နုဲင်းနီမန်းခမ်းယိုနဝ်ꩻ တိုꩻတက်ထင်ႏထိုတဝ်ႏ ခြွေခြာႏချမ်ꩻသာႏတဝ်းသွူ။ ကွပ်နဝ်ꩻမ အဝ်ႏလိုꩻထီꩻသင်ꩻငါႏလွဝင်သွူ။ လိုꩻသီးယိုနဝ်ꩻ လိုꩻမျိုꩻတမျိုꩻတွမ်ႏတမျိုꩻ လိုႏထီꩻသင်ꩻလွဝင်ꩻလွုမ်တကာႏတဝ်း လိုꩻမျိုꩻတမျိုꩻ အချင်ꩻချင်ꩻယိုလဲ့ အဝ်ႏလိုႏထီꩻသင်ꩻငါႏလွဝင်ꩻ အဝ်ႏလိုႏလွောင်ႏဗူႏငါႏလွဝင်သွူ။ လိုꩻမျိုꩻတမျိုꩻယိုꩻ ခွေတစွိုးနာꩻတမျိုꩻ နာꩻမဉ်ႏဗွာ ခွေဖြေင်း နာꩻမဉ်ႏဖြေင်း ခွေဗွာထွူတွော့ꩻ မဉ်ႏတထီꩻသင်ꩻတဝ်း မဉ်ႏတလွောင်ႏဗူႏတဝ်းလွဝင်ꩻနဝ်ꩻ ဝင်ꩻသွေꩻကုဲင် ဝင်ꩻယားကုဲင်ယိုꩻငါႏတဲင် တိုꩻတက်ထင်ႏထိုတဝ်ႏ ခြွေခြာႏချမ်ꩻသာႏတဝ်းသွူ။ ကွပ်နဝ်ꩻမ လိုꩻတမျိုꩻချင်ႏယိုလဲ့ အဝ်ႏလိုႏထီꩻသင်ꩻ အဝ်ႏလိုႏရက်ငါႏလွဝင်သွူ။

ယိုနဝ်ꩻလိုꩻမျိုꩻအခရာႏ တဲမ်းခြုဲင်းနယ်ထွူတဲင် အီႏတဲမ်းနယ်လွေꩻယင်း ဘာႏသာႏအကျောင်ꩻအခရာႏသွူ။ ဘာႏသာႏကရိုနဝ်ꩻ ဒေါ့ငဝ်းဘာႏသာႏ ကိုꩻကွယ်ႏမုꩻဘာႏသာႏ အဝ်းနီမျိုꩻသွူ။ ယိုနဝ်ꩻအီႏတဲမ်းနယ်ꩻလွေꩻဒျာႏ ကိုꩻကွယ်ႏမုꩻဘာႏသာႏ တအဲဉ်တဝ်းသွူ။ ထွိုင်ႏကွဲညညနဝ်ꩻ ကွပ်ပွိုးထာꩻသေတရာꩻဆေ့ꩻ ကွပ်ပွိုးထာꩻငမ်းတန်တဲင် ဖေႏကကူႏညီႏစွဲးကို ဝွေꩻသီးအနေတွော့ꩻ ကိုꩻကွယ်ႏတငီႏတငါ ကိုꩻကွယ်ႏမွူး ကိုꩻကွယ်ႏလာ ကိုꩻကွယ်ႏကောင် ကိုꩻကွယ်ꩻသေင်ႏ ကိုꩻကွယ်ႏဖြုံႏ ကိုꩻကွယ်ႏလူꩻ စတဲင်ထာꩻကိုꩻကွယ်ႏ အမျိုꩻမျိုꩻယို ပေါးပေါက်လွဉ်သွူ။ ဘဒ္ဒကပ်ကမ္ဘာႏယို ခါးလားဘုရာꩻကပွင်ꩻတဆူႏဆူႏနဝ်ꩻ လိုꩻသီးယို ထာꩻအာႏကွို့ ကိုꩻကွယ်ႏအစဲစ်အမဲဉ်ႏ တမော့ꩻတဝ်း ကိုꩻကွယ်ႏကြွို့ꩻ ကိုꩻကွယ်ႏမာႏဒျာႏထာꩻသွူ။ ဂေါကသန်ႏဘုရာꩻထွိုင်ႏပွင်ꩻထွူမꩻ ကိုꩻကွယ်ႏမုꩻအစဲစ်အမဲဉ်ႏယို ကွဲးမော့ꩻလွဉ်သွူ၊ ကွယ်ႏတွော့ ဘုရာꩻပွင်ꩻစွဉ်ႏလဲ့ ပါႏရမီႏတအဲဉ်ထဝ်းလိုꩻနဝ်ꩻ တမော့ꩻခွဲတဝ်းဘုရာꩻတဲင် တသေတဝ်းဒျာႏ ထာꩻကိုꩻကွယ်ႏအစဲစ်အမဲဉ်းနေနေသွူ။ ယိုခါနဝ်ꩻ ဂေါတမဘုရာꩻ သာႏသနာႏကိုတဲင် ပါႏရမီႏကအဝ်ႏလို့နဝ်ꩻ သဲင်ꩻခွဲးသဲင်ꩻမော့ꩻဘုရာꩻသာႏသနာႏတွော့ꩻ နာႏဗာႏ ဘုရာꩻတရာꩻ သေဗာႏထာꩻအာႏကွိုꩻအစဲစ်အမဲဉ်ႏသွူ။ မျက်မှောက်ကာႏလ သမယခေတ်ယိုခါ ကထွာဒါးနီမန်းခမ်းယိုနဝ်ꩻ ဗုဒ္ဓဘာႏသာႏ အထွန်ꩻကာꩻသွတ်ꩻ ခမ်းတခမ်းသွူ။ နီပအိုဝ်ႏလိုꩻမျိုꩻလဲ့ အဝ်ႏသော့ꩻမန်းခမ်းကို ထွာဗုဒ္ဓဘာႏသာႏတွော့ꩻ ပါႏရမီႏအဝ်ႏကံႏဟဝ်ငါႏရိုဗာႏနုဲင်းနဝ်ꩻသွူ။

နဝ်ꩻတွော့ꩻ ကမ္ဘာႏလောင်းယိုခါ ဘာႏသာႏတန်လစ်မျိုꩻအကိုနဝ်ꩻ ဗုဒ္ဓဘာႏသာႏလဲ့ပါသွူ။ ဘာႏသာႏတန်လစ်ꩻမျိုꩻအကိုယို ကမ္ဘာႏလောင်းပညာႏသျင်ႏသီး ကထွိုင်ႏစဲစ်ဆေꩻဝွေႏဖန်ႏထွားနဝ်ꩻ ဗုဒ္ဓဘာႏသာႏယို အမဲဉ်ႏလွိုသွတ်ꩻဝင်ꩻရိုꩻနဝ်ꩻသွူ။ ဘာႏသာႏလင်နဝ် ဖေႏအာႏဒျာႏ လောဘ ဒေါသ မောဟ မာႏနတဲင် ကိလေႏသာႏတရာꩻဖုံꩻတွော့ꩻ ဝဋ်ဒုက္ခဆင်ꩻရယ်ꩻယို တလွစ်ထန်ႏနွောင်ꩻအီတဝ်းသွူ။ နီဗုဒ္ဓဘာႏသာႏတရာꩻယို လွစ်ထန်းနွောင်ꩻအီ ဝဋ်ဒုက္ခဖဝဆင်ꩻရယ်ꩻတဲင် ထွားဘာႏသာႏအစဲစ်အမဲဉ်ႏနဝ်ꩻမꩻ နီအဝ်ႏလိုꩻထိန်ꩻ နီꩻအဝ်ႏလိုꩻရက်ငါႏသွူ။