လိုꩻယွုတ်လိုꩻမျတ်လိုꩻယိန်းမျတ်

"အဿဒ္ဓမ္မသုတ် (လိုꩻယွုတ်၊ လိုꩻယိန်းယွုတ်၊ လိုꩻမျတ်၊ လိုꩻယိန်းမျတ်)" နီဗွေႏဘုရာꩻဟော်ꩻဖေႏ ဗွေႏရဟန်ꩻသီးဖုံႏ တရာꩻနုဲင်းယို- "ရဟန်ꩻသီးဖုံႏဟွေး- ခွေအီႏဟော်ꩻဖေႏသီ - လိုꩻယွုတ်၊ လိုꩻယိန်းယွုတ် - လိုꩻမျတ်၊ လိုꩻယိန်းမျတ် အကျောင်ꩻအခရာႏ၊ နာႏလွသွော့နော" "နာႏလွဒျာႏ ဗွေႏဩ" "ရဟန်ꩻသီးဖုံႏဟွေး- ၁။ 'လိုꩻယွုတ်'ကရိုꩻနဝ်ꩻ နုဲင်းမုဲင်ꩻနဲတဲင်- လောကကိုယို လိုꩻယင်ဟန်ႏနဝ်ꩻ သဒ္ဓါႏတရာꩻအဲဉ်ထဝ်း (ယွုမ်းတဝ်းဘုရာꩻ တရာꩻ သံဃာႏ၊ ကံႏ၊ ကံႏအကျိုꩻ)၊ ထာꩻဝင်ꩻသꩻအဲဉ်ထဝ်း (မာꩻသွူအကုသိုလ်ႏတဲ့ ဝင်ꩻသꩻတဝ်းဝင်ꩻ)၊ ထာꩻငမ်းအဲဉ်ထဝ်း (မာꩻသွူအကုသိုလ်ႏတဲ့ ငမ်းတဝ်းအပဲ့စ်)၊ အထီႏအဟွူန်ဆေ့ꩻ (နာႏတဝ်းတရာꩻ)၊ လွꩻတန်(မာꩻတဝ်းစီꩻပွာꩻ၊ မာꩻတောဝ်းကုသိုလ်ႏ) သတိꩻအဲဉ်ထဝ်း (ယူႏလꩻတဝ်းကုသိုလ်ႏ)၊ ပညာႏအဲဉ်ထဝ်း (အဟောဝ်အကုဲင်၊ ကုသိုလ်ႏ၊ အကုသိုလ်ႏ)သေတဝ်း၊ ပါꩻယိုနဝ်ꩻ ရိုꩻဗာႏ 'လိုꩻယွုတ်'တန်သွူ။ ရဟန်ꩻသီးဖုံႏဟွေး- ၂။ 'လိုꩻယိန်းယွုတ်'ကရိုꩻနဝ်ꩻ နုဲင်းမုဲင်ꩻနဲတဲင်- လောကကိုယို လိုꩻယင်ဟန်ႏနဝ်ꩻ ဝွေꩻနမ်းတဲ့ သဒ္ဓါႏတရာꩻအဲဉ်ထဝ်း၊ ဝင်ꩻသဒ္ဓါႏတရာꩻ ဖေႏကအဝ်ႏမွုန်း နုဲင်းနုဲင်းတဲ့ ဝွေꩻမာꩻ၊ ဝွေꩻနဝ်ꩻ ထာꩻဝင်ꩻသꩻအဲဉ်ထဝ်း၊ ထာꩻငမ်းအဲဉ်ထဝ်း၊ ဝင်ꩻတဲ့ ထာꩻဝင်ꩻသꩻ ဖေႏကအဝ်ႏမွုန်း၊ ထာꩻငမ်း ဖေႏကအဝ်ႏမွုန်းနဝ်ꩻ ဝွေꩻမာꩻ။ ဝွေꩻနဝ်ꩻ အထီႏအဟွူန်ဆေ့ꩻ၊ လွꩻတန်၊ သတိꩻအဲဉ်ထဝ်း၊ ပညာႏအဲဉ်ထဝ်း၊ ဝင်ꩻတဲ့ အထီႏအဟွူန် ဖေႏကဆေ့ꩻ၊ ဖေႏကလွꩻ၊ သတိꩻဖေႏကအဝ်ႏမွုန်း၊ ပညာႏဖေႏကအဝ်ႏမွုန်းနုဲင်းနုဲင်းနဝ်ꩻ ဝွေꩻမာꩻ၊ ပါꩻယိုနဝ်ꩻ ရိုꩻဗာႏ 'လိုꩻယိန်းယွုတ်'နောဝ်ꩻသွူ။ ရဟန်ꩻသီးဖုံႏဟွေး- ၃။ 'လိုꩻမျတ်'ကရိုꩻနဝ်ꩻ နုဲင်းမုဲင်ꩻနဲတဲင်- လောကကိုယို လိုꩻယင်ဟန်ႏနဝ်ꩻ သဒ္ဓါႏတရာꩻအဝ်ႏ၊ ထာꩻဝင်ꩻသꩻအဝ်ႏ၊ ထာꩻငမ်းအဝ်ႏ၊ အဟွူန်အထီႏအာ၊ လိုꩻဝီရိယအဝ်ႏ-လိုꩻကုဲင်း၊ သတိꩻအဝ်ႏ၊ ပညာႏအဝ်ႏ၊ ဝွေꩻယိုနဝ်ꩻ ဟဲ့ꩻဗာႏ 'လိုꩻမျတ်'နဝ်ꩻသွူ။ ရဟန်ꩻသီးဖုံႏဟွေး- ၄။ 'လိုꩻယိန်းမျတ်'ကရိုꩻနဝ်ꩻ နုဲင်းမုဲင်ꩻနဲတဲင်- လောကကိုယို လိုꩻယင်ဟန်ႏနဝ်ꩻ ဝွေꩻနမ်းတဲ့ သဒ္ဓါႏတရာꩻအဝ်ႏ၊ ထာꩻဝင်ꩻသꩻအဝ်ႏ၊ ထာꩻငမ်းအဝ်ႏ၊ အဟွူန်အထီႏအာ၊ ဝီရိယအဝ်ႏ၊ ကုဲင်းတန်၊ သတိꩻအဝ်ႏ၊ ပညာႏအဝ်ႏ၊ ဝင်ꩻတဲ့ သဒ္ဓါႏတရာꩻ၊ ထာꩻဝင်ꩻသꩻ၊ ထာꩻငမ်း၊ အဟွူန်အထီႏ၊ ဝီရိယ၊ သတိꩻ၊ ပညာႏ-ဖေႏကအဝ်ႏနုဲင်းဝွေꩻနဝ်ꩻ ဝွေꩻသွဉ်ဖေႏ၊ ဝွေꩻမာꩻ၊ ဝွေꩻယိုနဝ်ꩻ ဟဲ့ꩻဗာႏ'လိုꩻယိန်းမျတ်'နောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ စတုက္ကနိပါတ်၊ အဿဒ္ဓမ္မသုတ်)