လိုꩻယွုတ်သီးအုံညီꩻလို့ဝင်ꩻပွုံႏ
"လိုꩻယွုတ်အုံညီꩻလို့ဝင်ꩻ၊ သူႏတောႏကောင်ꩻသီး အုံညီꩻလို့ဝင်ꩻ အပွုံႏစံႏ"
နီဗွေႏဘုရာꩻဟော်ꩻဖေႏ ဗွေႏရဟန်ꩻသီး တရာꩻနုဲင်းယို- ရဟန်ꩻသီးဖုံႏဟွေး- ၁။ အသန္တ သန္နိဝါသ - လိုꩻယွုတ်အုံညီꩻလို့ဝင်ꩻ ၂။ သန္တ သန္နိဝါသ - လိုꩻဟောဝ်အုံညီꩻလို့ဝင်ꩻ၊ ထာꩻအုံညီꩻလို့ဝင်ꩻနဝ်ꩻ အဝ်ႏနီမျိုꩻနုဲင်းနဝ်ꩻသွူ။ ရဟန်ꩻသီးဖုံႏဟွေး- - ကထံ အသန္တ သန္နိဝါသော ဟောတိ- 'လိုꩻယွုတ်အုံညီꩻလို့ဝင်ꩻ'ကရိုꩻနဝ်ꩻ နုဲင်းမုဲင်ꩻနဲးတဲင်- - ရဟန်ꩻတန်သီးဖုံႏတဲ့ မဉ်ႏဆွုံꩻမꩻတောဝ်းခွေနဝ်ꩻ ဟောဝ်ငါႏဟွေး၊ - ရဟန်ꩻတလောင်ꩻသီးဖုံႏတဲ့ မဉ်ႏဒေါ့ꩻတောဝ်းခွေထမုဲင်ꩻမုဲင်ꩻနဝ်ꩻ ဟောဝ်ငါႏဟွေး၊ - ရဟန်ꩻပေႏဖုံႏတဲ့ မဉ်ႏရိုꩻတောဝ်းခွေထမုဲင်ꩻမုဲင်ꩻနဝ်ꩻ ဟောဝ်ငါႏဟွေး။ ဗွေႏရဟန်ꩻတန်တဲ့နဝ်ꩻ၊ ရဟန်ꩻတလောင်ꩻတဲ့နဝ်ꩻ၊ ရဟန်ꩻပေႏတဲ့နဝ်ꩻ ပိတ်ခန်းအမဉ်ႏဒေါ့ꩻခွေတဲ့ အမျိုꩻဒေါ့ꩻဖေႏအဟောဝ်မွေးတဝ်း၊ ပူးရူးနဝ်ꩻ ဒေါ့ꩻဖေႏဒျာႏခွေ အကုဲင်ဖဲ့ꩻသနယ်၊ ပိတ်ခန်းဝွေꩻဗွေႏသီး ဒေါ့ꩻဖေႏခွေအဟောဝ်ဖဲ့ꩻတဲ့ယဝ်း ခွေတနာႏတဝ်း ဝွေꩻဗွေႏသီးငေါဝ်း၊ စွုမ်ႏပါꩻပါꩻ လွူးလို့ဒျာႏ သꩻယွုတ်နုဲင်းနဝ်ꩻꩻ ကွပ်လွူးသꩻယွုတ်တဲင် မာꩻမောင်းလို့ဝင်ꩻ၊ ဒေါ့ꩻမောင်းလို့ဝင်ꩻ၊ ထင်လို့ဝင်ꩻ၊ ရွို့ꩻလို့ဝင်ꩻ၊ တမွာႏလို့ဝင်ꩻ၊ လိုꩻယွုတ်ဖုံႏနဝ်ꩻ အုံညီꩻလို့ဝင်ꩻ အပွုံႏစံႏနုဲင်းနောဝ်ꩻဖုံႏသွူ။ - ကထံ သန္တ သန္နိဝါသော ဟောတိ- 'သူႏတောႏကာင်ꩻသီး အုံညီꩻလို့ဝင်ꩻ'ကရိုꩻနဝ်ꩻ နုဲင်းမုဲင်ꩻနဲးတဲင်- - ရဟန်ꩻတန်သီးဖုံႏ မဉ်ႏဆွုံꩻမꩻခွေနောဝ်ꩻ ဟောဝ်ငါႏဟွေး၊ - ရဟန်ꩻတလောင်ꩻသီးဖုံႏတဲ့ မဉ်ႏဒေါ့ꩻဖေႏခွေနောဝ်ꩻ ဟောဝ်ငါႏဟွေး၊ - ရဟန်ꩻပေႏသီးဖုံႏတဲ့ မဉ်ႏရိုꩻဖေႏခွေနောဝ်ꩻ ဟောဝ်ငါႏဟွေး။ ဗွေႏရဟန်ꩻတန်တဲ့နဝ်ꩻ၊ ဗွေႏရဟန်ꩻတလောင်ꩻတဲ့နဝ်ꩻ၊ ဗွေႏရဟန်ꩻပေႏတဲ့နဝ်ꩻ အမဉ်ႏဆွုံꩻမꩻခွေ၊ အမဉ်ႏဒေါ့ꩻဖေႏခွေနဝ်ꩻ အအီႏဆွုံꩻမꩻဒျာႏ အဟောဝ်ဖဲ့ꩻဒျာႏ၊ အအီႏဒေါ့ꩻဖေႏဒျာႏ အဟောဝ်ဖဲ့ꩻဒျာႏ၊ ဝွေꩻဗွေႏသီး မဉ်ႏဆွုံꩻမꩻခွေ၊ မဉ်ႏဒေါ့ꩻဖေႏခွေနဝ်ꩻ ခွေအီႏနာႏဒျာႏ ဝွေꩻဗွေႏသီးငေါဝ်း၊ စွုမ်ႏပါꩻပါꩻ လွူးလို့ဒျာႏ သꩻမျတ်နုဲင်းနဝ်ꩻ၊ ကွပ်လွူးသꩻမျတ်တဲင် မာꩻမောင်းတဝ်းလို့ဝင်ꩻ၊ ဒေါ့ꩻမောင်းတဝ်းလို့ဝင်ꩻ၊ ထေင်တဝ်းလို့ဝင်ꩻ၊ ရွို့ꩻတဝ်းလို့ဝင်ꩻ၊ တမွာႏတဝ်းလို့ဝင်ꩻ၊ ပယွုမ်းထေ့ဒျာႏလို့ဝင်ꩻꩻ ငထေ့ဒျာႏလို့ဝင်ꩻꩻ သူႏတောႏကောင်ꩻသီးဖုံႏ အုံညီꩻလို့ဝင်ꩻ အပွုံႏစံႏနောဝ်ꩻ နုဲင်းနောဝ်ꩻဖုံႏသွူ။ နီဖဲ့ꩻနီခေါဝ် ပေါႏအဝ်ႏခွန်းငါ ခွန်းချာလို့ဝင်ꩻ၊ ပေါႏအံႏနွောင်ꩻလို့ဝင်ꩻ၊ ပေါႏကေႏနပ်တဝ်းလို့ဝင်ꩻနဝ်ꩻ အုံညီꩻလို့ဝင်ꩻ သꩻတချမ်ꩻသာႏတဝ်း၊ အဝ်ႏထွာအကုသိုလ်ႏ စွုမ်ႏနီꩻနီꩻနောဝ်ꩻသွူ။ နီဖဲ့ꩻနီခေါဝ် ဟောဝ်ဒျာႏလို့ဝင်ꩻꩻ ခွန်းချာခွန်းငါတဝ်းလို့ဝင်ꩻ၊ အံႏနွောင်ꩻချာအံႏနွောင်ꩻငါတဝ်းလို့ဝင်ꩻ၊ အဝ်ႏကေႏနပ်သေႏသေႏဒျာႏလို့ဝင်ꩻနဝ်ꩻ အုံညီꩻလို့ဝင်ꩻ ပျောႏငါႏ၊ ကုသိုလ်ႏတဲ့ ထွာအာဒျာႏနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ ဒုကနိပါတ်၊ ပုဂ္ဂလဝဂ်-၆၃)[၁][၂]