လိုꩻယွဲးတွမ်ႏအစိုန်ꩻထီ

"လိုꩻယွဲးတွမ်ႏအစိုန်ꩻထီဖုံႏ" နဲင်ႏငံႏအွဉ်ငါသားဖုံႏနဝ်ꩻ အရေꩻတန်အဝ်ႏလိုႏသဘော်ꩻဖြောင်ငါႏ နဲင်ႏငံႏအနာႏဂတ်အလောင်ꩻ လိုꩻယွဲးသီးအကျောင်ꩻခရာႏသွူ၊ ခွုင်းခေတ်ကပြောင်ꩻလုဲင်ႏ လိုꩻပေႏလိုꩻယွဲးသီး အသောင်အရင်ꩻလဲ့ အဝ်ႏပြောင်ꩻလုဲင်ႏလွဉ်ꩻ၊ ခွုင်းယေန်ႏငဲးမုꩻ ကထင်ႏထိုကပြောင်ꩻလုဲင်ႏအတွိုင်ꩻ လိုꩻယွဲးသီးအသောင်အရင်ꩻ ခေတ်အခေႏအနေႏလဲ့ အဝ်ႏပြောင်ꩻလုဲင်ႏလွဉ်ꩻနဝ်ꩻသွူ။ လိုꩻယွဲးကရိုꩻနဝ်ꩻ သꩻရာႏအဝ်ႏပနဲဉ်ႏလွဒွိုန်းတဲင် ထာꩻသေဉာဏ်ႏတွမ်ႏ အခွဲးအကျုံႏ ကနပ်ကဖြားကယ်ꩻလဲဉ်းဝွေꩻသီးသား လိုꩻတန်ဖုံႏ အွဉ်ငါတဖူꩻမွဉ်းဖျင်လွဖေႏဗာႏသွူ၊ လိုꩻယွဲးသီး ကခီႏထင်ႏငါတဖူꩻ ဖေႏနေးကတရွို့ꩻဗာႏမွုန်းနဝ်ꩻ အွဉ်ႏနယ်ဖေႏဗာႏတဖူꩻ၊ ထွို့ꩻဗူႏအွဉ်ငါဖေႏဗာႏနဝ်ꩻသွူ၊ လိုꩻသီးကရိုꩻယိုနဝ်ꩻ ပေါႏအရွယ်ႏချင်ꩻတဗိုန်တဝ်းလဲ့ ထာꩻယူႏထာꩻတွေꩻဖုံႏလဲ့ တဗိုန်လွတဝ်း၊ ထာꩻခံႏစာꩻလဲ့ တဗိုန်နွောင်ꩻလွတဝ်းဒျာႏရင်ꩻသွူ။ အကျောင်ꩻခရာႏ ကမွဉ်းဖျင်ကထွို့ꩻငင်ႏနွောင်ꩻအီသꩻတွမ်ႏ သꩻထာꩻယူႏ ကတမာထွာႏနွန်ႏနွောင်ꩻအီ ထာꩻယူႏစိက္ကူꩻလဲ့ တဗိုန်လွနွောင်ꩻတဝ်း၊ ဘဝမေႏခြဲး ကအဝ်ႏသော့ꩻလိုꩻတန်သီးစူကိုယို ကပဲင်ႏဆဲင်ႏဒါႏအနာႏဂတ် လိုꩻယွဲးသီး အီႏခွုမ်သွုပ်လွေꩻဗာႏဒျာႏရင်ꩻရင်ꩻ၊ လိုꩻသီးနဝ်ꩻ အရွယ်ႏအဝ်ႏသိုမ်ပါꩻ၊ ပထမအရွယ်ႏနဝ်ꩻ ထွာအရွယ်ႏထိုမ်ႏပညာႏ၊ ဒုတိယအရွယ်ႏနဝ်ꩻ ထွာအရွယ်ႏထိုမ်ႏစီꩻပွာꩻဥစ္စာႏ၊ တတိယအရွယ်ႏနဝ်ꩻ ထွာအရွယ်ႏထိုမ်ႏဘာႏဝနာႏ-အွဉ်ႏထွော့လွနုဲင်းနဝ်ꩻဖုံႏသွူ။ ကအဝ်ႏထိုမ်ႏပညာႏတွင်ꩻ ဖေႏကဖြွဉ် ဖေႏကအောင်ႏမျင်ႏနဝ်ꩻ ကျိုꩻစာꩻဗာႏ၊ ကအဝ်ႏထိုမ်ႏဥစ္စာႏတွင်ꩻ ဖေႏကလွိုင်ႏကွုန်ꩻ၊ ဖေႏကထင်ႏထို ထိုမ်ႏရောမ်အွဉ်ႏခြွဉ်းခါꩻဗာႏ၊ ကအဝ်ႏထိုမ်ႏဘာႏဝနာႏတွင်ꩻ ထာꩻသေထာꩻထီႏဖေႏကမဲဉ်ႏ ကံကျင်ꩻအားထုတ်လွဗာႏ၊ အရွယ်ႏယို မဉ်ႏခြယ်ꩻလုဲင်းပသာႏဗာႏတစိꩻနဝ်ꩻ လိုꩻသီးအရွယ်ႏ အဝ်ႏယင်းသူမျိုꩻ၊ အရွယ်ႏခါးလားကအုံကျောင်ꩻ၊ အရွယ်ႏအုံကျောင်ꩻ၊ အရွယ်ႏခိုဗင်ႏ(မူႏနံꩻ)တရဝ်း၊ အရွယ်ႏလိုꩻယွဲး၊ အရွယ်ႏလိုꩻတလောင်ꩻ၊ အရွယ်ႏလိုꩻတန်ဖုံႏနဝ်ꩻသွူ၊ လိုꩻပေႏတဲႏသက်(၁၅)ဗꩻ သက်(၂၅)နေင်ႏအရွယ်ႏယို ဟဲ့ꩻလွလိုꩻယွဲးနဝ်ꩻသွူ။ အတိတ်ကာႏလ ရုဲင်ꩻတသွိုးမုꩻအသွုပ်သွုပ်ကိုနဝ်ꩻ လိုꩻယွဲးသီးအစဲဉ်ႏအဆက် အဝ်ႏပါသော့ꩻလွဒျာႏသွူ၊ ကရုဲင်ꩻတသွိုးဒါႏ မန်းနဲင်ႏငံႏ ယံကဒါႏလိတ်အကိုနဝ်ꩻလဲ့ မူႏမောင်ႏလိုꩻယွဲးသီးဖုံႏ အဝ်ႏနွို့ရုဲင်ꩻတသွိုးကိုလွဒျာႏ၊ နဲင်ႏငံႏတာႏ အရေꩻပါကတွိုႏခြောင်ꩻမွေးဒါႏ ကတွမ်ထူႏလမ်းခိုႏစာႏရင်ꩻတွိုင်ꩻကိုလဲ့ ထူႏဗာႏသေႏသေႏဒျာႏ လိုꩻယွဲးမူႏမောင်ႏသီးအာႏတန်သွူ။ ခေတ်စနစ်အလꩻ ကမာꩻဒါႏ ပွယ်ꩻလွိုက်ရွေꩻအစွိုးစွိုးအဒဝ်ႏဒဝ်ႏတွိုင်ꩻလဲ့ လိုꩻယွဲးမူႏမောင်ႏသီး အွဉ်ဆꩻငါတဲင် ဖွီသွောင်တလျူ အဝ်ႏပါသော့ꩻလွဒျာႏဝင်ꩻ၊ နဲင်ႏငံႏတောႏမွူးနီꩻထူꩻမွူးနီꩻမျတ်ကထွာဒါႏ "ခမ်းခြွဉ်းဗူႏနီꩻ၊ လွတ်လပ်ရေꩻနီꩻ၊ လိုပ်ꩻလုဲင်းသားမွူးနီꩻ၊ ထာꩻမာꩻသားမွူးနီꩻ"ဖုံႏအကိုနဝ်ꩻလဲ့ ထဲ့ရာꩻအခန်ꩻ လွစ်ဟင်ꩻဖိုတဝ်း အဝ်ႏပါသော့ꩻဝင်ꩻဖုံႏ၊ ခမ်းရင်ꩻသားလိုꩻမျိုꩻ(၁၃၅)အလောင်းတဲ့သင်၊ မန်းနဲင်ႏငံႏနပ်လိုꩻအဖြာꩻ(၅၁)သန်းအလောင်းတဲ့သင် သစ္စာႏအဝ်ႏလွဒျာႏနဝ်ꩻသွူ၊ ထောက်ဒျာႏလိုꩻချင်ꩻချင်ꩻ သညင်ꩻလွဒျာႏနဝ်ꩻသွူ၊ ရက်စိုမ်ꩻလွဒျာႏ ထာꩻမာꩻအာႏသီးအတန်ႏဖိုꩻဖုံႏသွူ။ ဖေႏနေးကထွာဒျာႏ လိုꩻတဲႏထောင်ႏနဲင်ႏငံႏသား၊ ယံကထွာဒျာႏ လိုꩻရဲးဆီꩻပွေါးထွားနဲင်ႏငံႏသားနဝ်ꩻ အဝ်ႏကျိုꩻလွသေႏသေႏဒျာႏသွူ၊ ကဖေႏအပ်လွဉ်ဒါႏ တာႏဝွန်ႏတွမ်ႏဝတ္တရာꩻဖုံႏယို ဖေႏနေးကကေႏနဝ်ꩻ ထေင်းထမ်ႏလွဒျာႏဝင်ꩻဖုံႏ၊ အွဉ်ငါသီးအခင်ႏမွဉ်ကလိုႏအပ်ဒါႏ နမ်းထာꩻယွုမ်းအံႏဖုံႏယို ယွုမ်းအံႏရိုꩻရိုꩻသာꩻသာꩻလွဒျာႏ၊ နမ်းထာꩻယွုမ်းအံႏ မာꩻဖေႏကအောင်ႏမျင်ႏနဝ်ꩻ မာꩻပုံႏမာꩻနယ်ꩻမဲဉ်ႏလွဒျာႏ၊ မာꩻထာꩻမာꩻလဲ့ အွဉ်ႏသꩻစေႏတနာႏမာꩻလွဒျာႏ၊ အခေႏအနေႏမဲဉ်ႏယို နေးတွမ်ႏမဇ္ဈိမပဋိပဒါတဲင် ထွူႏထွူႏတွုမ်တွုမ် လွူꩻနပ်ဒါႏလွဒျာႏဖုံႏနဝ်ꩻသွူ။ ဖေႏတာႏဝွန်ႏအွဉ်ႏထွော့လွဒျာႏ အကျိုꩻကရအဝ်ႏအီဒါႏ တာႏဝွန်ႏဖုံႏသွူ၊ ကုဲင်းတမာဒါႏလွဒျာႏ ဖေႏထာꩻသေပညာႏစား၊ အနယ်ꩻဗျူဟာအလꩻ ရုဲင်ꩻတသွိုးထွို့ꩻဗူႏဒါႏလွဒျာႏဖုံႏ၊ မာꩻခွေါင်ခံႏဒါႏလွ ထာꩻအောင်ႏမျင်ႏမုꩻဖုံႏ၊ မဉ်ႏအဝ်ႏလိုႏလွဉ်လဲ့ ရော့ꩻဆွတ်တဲ့ ဆွတ်ချာလွဒျာႏ၊ ဝွေႏဖန်ႏနပ်ချာလွယင်း အခွဲးအကျုံႏဖုံႏ၊ အမာႏကိုဖုံႏနဝ်ꩻ ထူႏဒါႏလွသွဉ်ခန်ꩻဖုံႏနဝ်ꩻသွူ။ ခါးလားအခိန်ႏကလွဉ်ꩻနဝ်ꩻ ထွူႏထွူႏတွုမ်တွုမ် ဖျင်ချာဒါႏအမာႏဖုံႏသွူ၊ အီႏခီႏထင်ႏငါအီတာႏ ထူႏယင်းအာႏ၊ အနာလွိုနဝ်ꩻ လိုꩻယွဲးတွိုင်ꩻ ဆꩻချာဆꩻငါ ဖေႏနေးကညီႏလꩻ ကျိုꩻစာꩻခွုမ်မာꩻလွေꩻထာꩻမာꩻနဝ်ꩻသွူ၊ လိုꩻယွဲးဖုံႏနဝ်ꩻ ရိုꩻသာꩻလွဒျာႏ၊ စွို့ꩻစွဉ်ႏဗွာစင်လွဒျာႏ၊ သူရသတ္တိလဲ့အဝ်ႏလွဒျာႏ၊ တမွေးတဝ်းနဝ်ꩻ တခံႏတဝ်းတဲင် ကုဲင်းမာꩻမဲဉ်ႏလွဒျာႏထာꩻ၊ အွဉ်ႏကုဲင်နွောင်ꩻနမ်းကျိုꩻ၊ ခံႏနွောင်ꩻအဆာ(အနစ်နာႏ)၊ ထေင်းထံႏခွုမ်မာꩻ တနူႏတနီႏဒါႏ နဲင်ႏငံႏအကျိုꩻနဝ်ꩻသွူ။ ကောင်တန်ဖုံႏလဲ့ မာꩻပြင်ꩻနွောင်ꩻစွဉ်ႏ၊ ထာꩻအုံႏ(ထာꩻယန်ꩻ)လဲ့ ထိုမ်နွောင်ꩻစွဉ်ႏ၊ ကောင်လောင်းကီလဲ့ တဲႏနွောင်ꩻစွဉ်ႏထီအုံႏတန်၊ လိုꩻယွဲးသီးအာႏနဝ်ꩻ ထွာနဲင်ႏငံႏတောႏအာႏ၊ လိုꩻယွဲးသီးစိုန်ꩻထီနဝ်ꩻ ထွာနဲင်ႏငံႏတောႏစိုန်ꩻထီ၊ သꩻဓာတ်ဖွီသွောင်တလာလွငါႏဖုံႏ၊ မဉ်ထိုမ်ႏစမ်ꩻလွ ထာꩻထူꩻဆန်ꩻဖုံႏ၊ မဉ်ခွုမ်မာꩻလွိုကယ်ꩻစွဉ်ႏ လိုꩻလောင်ႏလင်၊ မဉ်ခံႏထူႏမဉ်ထွာ ဝင်ꩻထာꩻအာႏကွိုꩻ၊ သꩻဆန္ဒမဉ်အွဉ်ႏကုဲင်နမ်းကျိုꩻအဝ်ႏလွ၊ နမ်းကာယအာႏ အဝ်ႏဗွေစွုမ်ႏမွေး၊ အွဉ်ႏမဲ့ငါလဲ့ ဖြောင်ဒေါင်လွဒျာႏ၊ လိုꩻသꩻရာႏ အပဲစ်ကင်ꩻစားဖုံႏ၊ ကျိုꩻစာꩻလွဒျာႏ ဖွီသွောင်တလျူမျိုꩻ၊ ယလဲင်ႏလဲင်ႏနဝ်ꩻ အလဲင်ꩻဖြောင်ဒေါင်လွဉ်ꩻဒါႏနေးစွဉ်ႏထဲင်း၊ လိုꩻယွဲးသီးသဘာဝနဝ်ꩻ ထွာဒျာႏ မွန်ဗန်၊ ပြွူႏဖြို၊ တန်ပြွူႏနုဲင်းနဝ်ꩻဖုံႏသွူ။ ထာꩻခြွိုင်ႏသန်ꩻ ထာꩻတလာနဝ်ꩻ အဝ်ႏထွꩻဒျာႏ ဝင်ꩻကအွဉ်ႏထွော့အရန်းဖုံႏ၊ လိုꩻယွဲးနဝ်ꩻ သဘာဝအလွောက်ꩻ ရုဲင်ꩻတသွိုးဖွီသွောင်မွိုင်ကြွိုင်လွငါႏ၊ လိုꩻယွဲးနမ်းရင်ꩻအထီအသွီႏ ဖေႏနေးကယံလွဉ်နဝ်ꩻ အခင်ႏမွဉ်ယံယံ အဝ်ႏလိုႏမာꩻကျင်ꩻမွဉ်းဖျင်ဖေႏတထွူဒျာႏ ဗော့ꩻလမ်းကို၊ အခင်ႏမွဉ်ကလိုႏလွူꩻကျင်ꩻဒါႏ အလောင်ႏအလင်ဖုံႏလဲ့ အဝ်ႏမာꩻဖေႏတထွူဒျာႏ ဗော့ꩻလမ်းငါသွူ။ လိုꩻယွဲးသီးအဟဝ်အကုဲင်နဝ်ꩻ အဝ်ႏဒင်ႏဒျာႏ ကသွဉ်ကဖျင်ဖေႏအွိုးလမ်းကိုအလောင်း၊ အခင်ႏမွဉ် အွဉ်ႏအွိုးလမ်းကိုကလွူꩻကျင်ꩻအလောင်းထွူတဲင် ထွိုင်ႏတွိုႏကျောင်ꩻခိန်ႏနဝ်ꩻ ဆရာႏကျောင်ꩻ ဖျင်သွုပ်တဲႏဆို့ꩻလွေꩻဖေႏယင်း၊ အခင်ႏမွဉ်အွိုးလမ်း မဉ်ႏတဟဝ်တဝ်းနဝ်ꩻ အွိုးကျောင်ꩻကို ဆရာႏအီႏဗွော့ꩻစွိုꩻဖေႏလဲ့ တယိုꩻတဝ်းဒွုမ်၊ ခေတ်ယိုခါ လိုꩻယွဲးသီး ကထွာဒါႏအပဲစ်ဖုံႏနဝ်ꩻ ထွာဒျာႏ ကွပ်မွိုးဖါသီးထွားလွိုတဲင် အမာႏထိုꩻနုဲင်းနဝ်ꩻဖုံႏသွူ။ လိုꩻပေႏသီး ဖေႏကဒေါ့ꩻငဝ်းမဲဉ်ႏနဝ်ꩻ သွဉ်ဖေႏဗာႏ၊ ဖေႏနေးကစွဲးကမ်းဒါႏ လိုꩻအာႏပေႏသားနဝ်ꩻလဲ့ သွဉ်ဖေႏဗာႏ၊ ဖေႏကယေန်ႏကေႏတဗွီႏနဝ်ꩻလဲ့ သွဉ်ဖေႏဗာႏ၊ လိုꩻပေႏသီး ဖေႏကခံႏလွဉ်အီ ထာꩻယူႏထာꩻတွေꩻမဲဉ်ႏနဝ်ꩻ အရေꩻတန်အဝ်ႏလိုႏသွဉ်ဖေႏငါႏသွူ၊ လိုꩻသီးအသောင်အရင်ꩻကို ဖေႏနေးသꩻကမဉ်ခွုမ်မာꩻခြွဉ်းတွမ်ႏ လိုꩻအာဖုံႏလဲ့ သွဉ်ဖေႏဗာႏနဝ်ꩻသွူ။ လိုꩻဘဝ အခင်ႏမွဉ်ဒျာႏ ဒီမိုကရေစီ အခင်ႏမွဉ်တဗာႏအကိုပေႏငါလဲ့ ရေႏမိုးထွားရီးဒျာႏ နမ်းကပါသော့ꩻဒါႏအစွိုꩻအဗူႏ ဖေႏကယံ နမ်းတွမ်ႏနမ်းထိန်ꩻချာဒါႏ စီꩻကန်ꩻနဝ်ꩻ အဝ်ႏလိုႏငါႏသွူ၊ ထာꩻရာꩻအမျိုꩻမုဲင်ꩻတယဝ်း ဗိုန်ပီနုဲင်းယွယ်ꩻခဉ်ႏနဝ်ꩻအတွိုင်ꩻ လိုꩻယွဲးသီးဖုံႏ အဝ်ႏလိုႏထီႏတွာတွာ-တရျားရျားဒါႏငါႏသွူ၊ လိုꩻပေႏလိုꩻယွဲးတဖြာꩻ အဝ်ႏလိုꩻဘဝ ကထွိုင်ႏပြောင်ꩻငါလွေꩻ လိုꩻတန်ဘဝကိုခိန်ႏနဝ်ꩻ ဝွေꩻကမ္ဘာႏလဲ့ ယိန်းလုဲင်းပြင်ႏလွဉ်စွဉ်ႏနဝ်ꩻသွူ။ (ဝွန်ႏခံႏချက်- အဗွေႏဖြားကတဲမ်းနဝ်ꩻ တဲမ်းမန်းနေးဒျာႏ၊ ယိုနဝ်ꩻ လွောက်ꩻရာꩻပြန်ႏပအိုဝ်ႏချာဖေႏနေးအကျောင်ꩻ၊ ငဝ်းလွေꩻသဲင်ꩻ မဉ်ႏတချော်ꩻပြေတဝ်းလဲ့ သေနာႏစွꩻခွင်ꩻဖေႏပါသွော့အကျောင်ꩻ ဝွန်ႏခံႏ-တောင်ꩻပြန်ႏ-အွဉ်ႏဟွုန်ဗာႏနုဲင်းယိုသွူ)