လိုꩻလစ်ꩻစား
"ခိပ္ပနိသန္တိသုတ် (ပုဂ္ဂိုလ်ႏလစ်ꩻမျိုꩻ၊ လိုꩻလစ်ꩻစား)"
နီဗွေႏဘုရာꩻဟော်ꩻဖေႏ ဗွေႏရဟန်ꩻသီး တရာꩻနုဲင်းယို- ၁။ အတ္တဟိတာယ ပဋိပန္နော နော ပရဟိတာယ- ကံကျင်ꩻဒျာႏ နမ်းတာႏအကျိုꩻလွုမ်ꩻ၊ ဝင်ꩻတာႏအကျိုꩻနောဝ်ꩻ ကျင်ꩻတောဝ်း။ ၂။ ပရဟိတာယ ပဋိပန္နော နော အတ္တဟိတာယ- ကျင်ꩻဒျာႏ ဝင်ꩻတာႏအကျိုꩻလွုမ်ꩻ၊ နမ်းတာႏအကျိုꩻနဝ္ꩻ ကျင်ꩻတောဝ်း။ ၃။ နေဝတ္တဟိတာယ ပဋိပန္နော နော ပရဟိတာယ- နမ်းတာႏအကျိုꩻတဲ့ ကျင်ꩻတဝ်း၊ ဝင်ꩻတာႏအကျိုꩻတဲ့ ကျင်ꩻတောဝ်း။ ၄။ အတ္တဟိတာယ စေဝ ပဋိပန္နော ပရဟိတာယ စ- နမ်းတာႏအကျိုꩻတဲ့ ကျင်ꩻဒျာႏ၊ ဝင်ꩻတာႏအကျိုꩻတဲ့ ကျင်ꩻဒျာႏ။ လောကကိုယို လိုꩻအောဝ်ႏလစ်ꩻမျိုꩻ နုဲင်းနောဝ်ꩻသွူ။ ရဟန်ꩻသီးဖုံႏဟွေး- ၁။ 'ကျင်ꩻဒျာႏ နမ်းတာႏအကျိုꩻလွုမ်ꩻ၊ ဝင်ꩻတာႏအကျိုꩻနဝ်ꩻ ကျင်ꩻတဝ်း'ကရိုꩻနဝ်ꩻ နုဲင်းမုဲင်ꩻနဲတဲင်- လောကကိုယို လိုꩻယင်ဟန်ႏနဝ်ꩻ သေမွိုင်မွေးစွဉ်ႏ ကုသိုလ်ႏတရာꩻ၊ ကနာႏထွူလဲဉ်း တရာꩻဖုံႏနဝ်ꩻ တောင်ꩻချာလို့ဒျာႏ၊ ယူႏချာဖြောင်ဒျာႏ၊ ပါဠိတဲ့ဒါႏဒျာႏ၊ အနက်တဲ့သေဒျာႏ၊ ကျင်ꩻလွဉ်ꩻဒျာႏ လောကုတ္တရာႏ၊ မာꩻဒျာႏ ကလꩻအီမဂ်ဖိုလ်ႏ၊ ကတွိုႏအီနိဗ္ဗာန်ႏနဝ်ꩻ။ ကွဲႏတွော့ꩻ ဝွေꩻနဝ်ꩻ ဒေါ့ꩻဟောဝ်ဟောဝ်ဒါႏဒါႏ ဒါႏတဝ်း၊ ငေါဝ်းကျံꩻတန် နာႏလꩻတဝ်း၊ ဒေါ့ꩻထာꩻယေန်ႏကေႏတဝ်း၊ ဒေါꩻ့ဖေႏဝင်ꩻ ငေါဝ်းအကျိုꩻထွာ-ငွါအကျိုꩻအဝ်ႏနဝ်ꩻ ဒါႏတဝ်း၊ ဝင်ꩻဖေႏကလွောက်ꩻနာႏတရာꩻတဲ့ ဒေါ့ꩻဖေႏဒါႏတဝ်း၊ ဝင်ꩻဖေႏနေး ကမဉ်ကျင်ꩻလွက်ꩻတရာꩻတဲ့ ဒေါ့ꩻဖေႏဒါႏတဝ်း၊ မာꩻပျောႏသွင်ႏဝင်ꩻ ဒါႏတဝ်း။ ကွပ်နဝ်ꩻမꩻတဲင် ဝွေꩻနဝ်ꩻ ထွာထိုꩻ'ကျင်ꩻဒျာႏ နမ်းတာႏအကျိုꩻလွုမ်ꩻ၊ ဝင်ꩻတာႏအကျိုꩻနဝ်ꩻ ကျင်ꩻတဝ်း'နောဝ်ꩻသွူ။ ၂။ လိုꩻယင်ဟန်ႏနဝ်ꩻ သေမွိုင်တဝ်း ကုသိုလ်ႏတရာꩻ၊ တောင်ꩻတဝ်း၊ ကျင်ꩻလွဉ်ꩻတဝ်း၊ ကွဲႏတွော့ꩻ ဝွေꩻနဝ်ꩻ ဒေါ့ꩻထာꩻဒါႏ၊ ဒေါ့ꩻထာꩻဖုဲင်ႏနာႏ၊ ကွပ်ဝွေꩻဒေါ့ꩻတဲင် ဝင်ꩻလွောက်ꩻနာႏ၊ ဝင်ꩻကျင်ꩻလွဉ်ꩻ၊ ဝင်ꩻပျောႏသွင်ႏ၊ ကွပ်နဝ်ꩻမꩻ ဝွေꩻနဝ်ꩻ ထွာလိုꩻ'ကျင်ꩻဒျာႏ ဝင်ꩻတာႏအကျိုꩻလွုမ်ꩻ၊ နမ်းတာႏအကျိုꩻနဝ်ꩻ ကျင်ꩻတဝ်း'နဝ်ꩻသွူ။ ၃။ လိုꩻယင်ဟန်ႏနဝ်ꩻ သေမွိုင်တဝ်း ကုသိုလ်ႏတရာꩻ၊ တောင်ꩻတဝ်း၊ ကျင်ꩻလွဉ်ꩻတဝ်း၊ ဒေါ့ꩻဖေႏဝင်ꩻတဲ့ ဒါႏတဝ်း၊ ကွပ်နဝ်ꩻမꩻ ဝွေꩻနဝ်ꩻ ထွာလိုꩻ'နမ်းတာႏအကျိုꩻတဲ့ ကျင်ꩻတဝ်း၊ ဝင်ꩻတာႏအကျိုꩻတဲ့ ကျင်ꩻတောဝ်း'နောဝ်ꩻသွူ။ ၄။ လိုꩻယင်ဟန်ႏနဝ်ꩻ သေမွိုင်မွေးစွဉ်ႏ ကုသိုလ်ႏတရာꩻ၊ နာႏထွူတောင်ꩻဒျာႏ၊ ယူႏချာဖြောင်ဒျာႏ၊ နမ်းတဲ့ ကျင်ꩻလွဉ်ꩻဒျာႏ၊ ဒေါ့ꩻဖေႏဝင်ꩻတဲ့ ဒါႏဒျာႏ၊ ဝင်ꩻတဲ့ ကျင်ꩻလွဉ်ꩻဒျာႏ၊ ကွပ်နဝ်ꩻမꩻ ဝွေꩻနဝ်ꩻ ထွာလိုꩻ'နမ်းတာႏအကျိုꩻတဲ့ ကျင်ꩻဒျာႏ၊ ဝင်ꩻတာႏအကျိုꩻတဲ့ ကျင်ꩻဒျာႏ'နောဝ်ꩻသွူ။(သုတ္တန်ႏပိဋကတ်၊ အင်္ဂုတ္တရပါဠိ၊ စတုက္ကနိပါတ်၊ ခိပ္ပနိသန္တိသုတ်)[၁][၂]