လူႏမွန်ဖေႏထန်ႏ

လူႏမွန်ဖေႏထန်ႏ-ခွန်ဝေဿန်ႏ “အကျောင်ꩻနိတန်ꩻ” ကဟော်ꩻဗာႏတရာꩻယိုအခရာႏနဝ်ꩻ တရာꩻနာႏသား ဖေႏကသေဗာႏတဲင် တွော့ꩻ အီႏဒေါ့ꩻနယ်ကတစိꩻငါ၊ တကာႏလုံဆရာႏမောင်ႏဟိန်တွမ်ႏ ဆရာႏဖြေင်းသီး ဖျော်ထင်ႏဗွေႏစင်ꩻထျꩻ ထင်ႏလဝ်းဗွေႏစင်ꩻ နုဲင်းယို- “ဝင်ꩻကော့ꩻမောင်ꩻလွငါႏ နီဗွေႏတရာꩻ၊ ဟော်ꩻဖေႏဗဲင်းသွော့ နီသွဉ်းသီး၊ တောငါနီဗွေႏဟော်ꩻဖေႏဒါႏငါ၊ တိတ်ခွေႏမဉ်လို့ ကားမုဲင်ꩻလို့ နီသွဉ်းသီး ခံႏလူႏဒျာႏ၊ တွမ်ႏနီဗွေႏတကာႏ ပေါင်းစင်ꩻဆရာႏမတ်ယင်၊ တွမ်ႏပေါင်းစင်ꩻပျာꩻ(တောင်ႏကီꩻ)ယင် နီသွဉ်း သီး ဒေါ့ꩻရီထွူလဲဉ်းလို့ဝင်ꩻ၊ နီသွဉ်းသီး ကသေငါꩻဒါႏ တရာꩻဝါႏသနာႏသားထျꩻတဲ့ နီသွဉ်းသီး အီႏလူႏလွေꩻ၊ နီသွဉ်းသီး ကအီႏလူႏ လွေꩻနဝ်ꩻ- သီႏသဲင်ႏ၊ ကျောက်လုံꩻ၊ ပင်လောင်ꩻ၊ အောင်ဗန်း၊ လုံးပဲဉ်၊ ဝါႏလီႏ၊ ထီယွန်ꩻသေင်ႏမွူးဖြေင်း၊ ထီဗွာပင်ကွယ်ꩻ၊ တရွပ်တန်၊ နတ်ရွာ၊ အခြဲမ်တရျာꩻ၊ ဘားအင်၊ ထီအုံႏလုံး၊ ကန်ꩻတူꩻ၊ ဟိုနမ်း၊ မုဲင်းအော်ꩻ၊ ကောင်တန်၊ ထီနဲ့ꩻ၊ တောင်ႏတပ်၊ ပွဉ်ရင်း၊ လွယ်ပွတ်ꩻ၊ ပင်အွဉ်း၊ ပဆျာႏကြိုႏ၊ စငေါဝ်ꩻ၊ လုံးဟီႏ၊ မွိုင်ꩻပွဉ်၊ ပင်ႏလုံ၊ ကောင်ခယ်ႏ၊ ကျောက်တန်ꩻ၊ ဟွေးဟွမ်း၊ နောင်ထဝ်၊ နောင်ရင်ႏ၊ လွယ် ကောႏ၊ သုဲင်ꩻခေါဝ်၊ နောင်ဗွဉ်၊ နမ်းခုတ်၊ ဟိုပုံꩻ၊ တောင်ႏကီꩻ၊ အဝ်ႏ(၃၈)ဌာႏန လဝ်းလွနုဲင်းနဝ်ꩻ။ ဗွေႏစင်ꩻတဲ့ သမ်းအဝ်ႏဗွောင်လိတ်သွဉ်တွိုက်၊ ကျောင်ꩻတွိုက်ကို သံႏဃာႏ(၁၄၀)လွိုကိစ္စ၊ သီႏသဲင်ႏနယ်ႏကိုသံႏဃာႏကိစ္စ၊ သာႏသနာႏကိစ္စ၊ ဗွေႏသံႏဃာႏသီး ကဖေႏတာႏဝွန်ႏဒါႏ တဲမ်းလိတ်ကိစ္စ-စတဲင်ကိစ္စဖုံႏနဝ်ꩻအတွက် အဝ်ႏဆောင်ႏရွက်မာꩻဗာႏတဲင် တွော့ꩻ အီႏဟော်ꩻသော့ꩻဖေႏ တရာႏခွေႏတဲ့ အခိန်ႏတရအဲဉ်ထဝ်း၊ ကွပ်ပွိုးနဝ်ꩻမꩻ “မဉ်ႏတန်ꩻမဲ့ꩻ ဟော်ꩻဖေႏဒျာႏ”အာႏမခံႏပသာႏ လေႏကွို့ꩻနုဲင်းနဝ်ꩻလွုမ်ꩻ။ တနီꩻထွူတနီꩻ၊ တလာထွူတလာ၊ မုဲင်ꩻခါခါတဲ့ တတန်ꩻဒါႏတဝ်းထာꩻ၊ ကမဉ်နာႏတရာꩻသားတဲ့ ပသာလွဉ်အတိတ်ခွေႏ၊ တိတ်ခွေႏတဲ့ ကွဲးအာကွဲးအာ၊ မုဲင်ꩻခါခါတဲ့ တန်ꩻဟော်ꩻဖေႏတဝ်း၊ ဆင်ႏဆင်ႏဝင်ꩻသမ်းအဝ်ႏရီ၊ ကွပ်ပွိုးနဝ်ꩻမꩻ တရာꩻဟော်ꩻတာႏ ဝွန်ႏတန်ယိုနဝ်ꩻ ကွဲးဗဉ်ႏကွဲးဗဉ်ႏလွဉ်စွဉ်ႏနမ်း၊ တွိုႏနဝ်ꩻမꩻ “အုံပွေါးထာꩻတန်ꩻနဝ်ꩻတဲး လေထံတနေင်ႏ၊ ခြေင်ႏထံတသက်၊ မုဲင်ꩻခါ ခန်းတဲ့ အမျိုꩻတန်ꩻမွေးတဝ်း၊ ‘ကွပ်ဝင်ꩻနာႏဗာႏတရာꩻယိုတဲင်တွော့ꩻ ဝင်ꩻမဉ်ႏလꩻထိုꩻ သံႏဝွေႏဂ ဗဟုသုတမဉ်ႏပွာꩻ ထာꩻသေတရာꩻ မဉ်ႏပေါႏတဲ့နဝ်ꩻ၊ ဝင်ꩻမဉ်ႏဟော်ꩻဖြယ်ဖြယ် ဝင်ꩻမဉ်ႏနယ်တေားတေားတဲ့နဝ်ꩻ ကေားဟော်ꩻသားယိုနဝ်ꩻ ထာဝရကုသိုလ်ႏ အဝ်ႏလꩻ ပိုႏသနယ်ယို’ သꩻကိုယူႏလꩻနုဲင်းနဝ်ꩻတဲင်တွော့ꩻ ဟော်ꩻဖေႏထွာထွာကမꩻ”ချꩻသꩻစွဉ်ႏဒျာႏနုဲင်းနဝ်ꩻ။ မွေးသွူ၊ အီႏဟော်ꩻဖေႏဗာႏ တရာꩻအမျိုꩻမုဲင်ꩻ? သမ်းထိုမ်ႏလွိုက်ဗာႏက၊ တရာꩻယိုနဝ်ꩻ အီႏဟော်ꩻပအိုဝ်ႏနေးတဲင်တွော့ꩻ တရာꩻနာႏသားတဲ့ ကဲဉ်းအာအာ အီႏထွာပအိုဝ်ႏ၊ နီပအိုဝ်ႏပရိသတ်တွမ်ႏ ဗုဒ္ဓတရာꩻမျတ်ယိုနဝ်ꩻ အဝ်ႏမော့ꩻဆေ့ꩻနေကလွဝင်ꩻ၊ နီပ အိုဝ်ႏသီး သောတခံꩻဖွိုင်ꩻ နားအွိုင်ꩻကိုသူꩻနဝ်ꩻ တရာꩻအဝ်ႏသော့ꩻဆေ့ꩻနေ၊ မဉ်ႏဟော်ꩻထွူစွဉ်ႏဒျာႏ ခန္ဓာႏ အာယတန ဓာတ် ပရ မတ်သစ္စာႏ ရုပ်နာမ်ႏခရာႏ တလဲင်ႏချင်ꩻတဲ့ သမ်းအီႏတသေနာႏတဝ်း၊ ကွပ်ပွိုးနဝ်ꩻမꩻ “လိုꩻပေႏမဉ်ႏနာႏတဲ့ ယံကနွို့နား၊ လိုꩻဖြာႏ မဉ်ႏနာႏတဲ့ ဖေႏကတောင်ꩻ၊ လိုꩻတလောင်ꩻမဉ်ႏနာႏတဲ့ ဖေႏနေးကသေ”လွိုက်ထေဖေႏဗာႏ ဝေဿန္တရာႏဇာတ်တောႏယို။ ဇာတ်တောႏတန် အဇာတ်တဆီအကိုနဝ်ꩻ ဇာတ်ယိုတဲ့ အဝ်ႏပါသော့ꩻတဇာတ်တဲင်တွော့ꩻ မဉ်ႏဟော်ꩻဒေါ့ꩻဖောႏ ဇာတ်တောႏကိုအတွိုင်ꩻ ခြေင်ခြေင်ငါမဉ်ႏတဲ့ အီႏလို့ဒျာႏထာꩻ ငတ်ꩻနားရီႏ၊ တိတ်ခွေႏငတ်ꩻခွေႏတာႏ၊ ကအီႏဟော်ꩻယိုနတ်ꩻ ဖေႏ နေးကလို့ငါ နီနားရီႏ နီခွေႏငါ၊ ကေားကနာႏလိုꩻ အကျိုꩻကရထွာ သော့ꩻပါကရလꩻ ဗဟုသုတအမျိုꩻနဝ်ꩻလဲ့ ဟော်ꩻသော့ꩻဖေႏပါ၊ ဇာတ်တွယ်ꩻအခရာႏတဲ့ ဖေႏနေးကကုဲင်ဗာႏမွုန်း၊ အခိန်ႏတဲ့ ဖေႏနေးကတွမ်ႏလို့အာငါမွုန်းတဲင်တွော့ꩻ ယဟန်ႏနဝ်ꩻ အွဉ်ႏကုဲင်ခါꩻ၊ ညာꩻပေႏတထွောင်းနဝ်ꩻ အပင်အလာႏ အရသာႏအနေႏ ထဲမ်သော့ꩻဖေႏတဲ့ အဝ်ႏပါ။ ယိုခါ ကဟော်ꩻနွောင်ꩻတရာꩻနုဲင်းယိုနဝ်ꩻ အနန္တငတ်ꩻပါꩻ ဂုဏ်ႏကေꩻဇူꩻဖုံႏဒျာႏ၊ ကွပ်ပွိုးနဝ်ꩻမꩻ ဘုရာꩻတရာꩻသံႏဃာႏ ဆရာႏမွိုးဖါ အွဉ်ႏငါဒင်ႏထို မူႏခိုဟဲ့ꩻဖန် စင်ꩻတန်ကောဝိဒ သိဿခွေသွဉ်း စူနုံခြွဉ်းဗူႏ ဒင်ႏကတူႏမာန်ႏချော့ꩻ ကွဉ်းတော့ꩻဝုဲင်ႏ ငေါက်ꩻ သိုမ်ခေါက်ꩻဗွေႏဩ။ ဝုဲင်ႏထွူတဲင်ခါ ဘဝတသာ ခြုဲင်းငါသက်ဆွိုး တကာႏမမွိုး မုဲင်းစင်ꩻဗွော်တဲ့နဝ်ꩻ၊ အဝ်ႏနေယိုခါ တကာႏလုံဖါ စင်ꩻဖါတိတဲ့ နဝ်ꩻ၊ တကာႏပစ္စေꩻ စင်ꩻဖါဆရာႏမတ်+မုဲင်းကျောင်ꩻမူႏ၊ မုဲင်းကျောင်ꩻယွယ်ꩻသီးယိုတဲ့နဝ်ꩻ၊ ဝေင်ꩻသထုံႏပေႏ-သီႏသဲင်ႏ ဇဝနာရာမ လိတ်သွဉ်တွိုက် ဗွေႏဆရာႏတောႏ နီဗွေႏဗွန်ဖြားတွမ်ႏစင်ꩻပညာႏ ဗွေႏဆရာႏသီးဖုံႏယိုတဲ့နဝ်ꩻ၊ တောင်ႏကီꩻကျောင်ꩻတန် နဲင်ႏငံႏ တောႏဩဝါဒါစရိယ၊ အဂ္ဂမဟာပဏ္ဍိတ၊ မဟာနာယကဗွေႏဆရာႏတောႏ နီဗွေႏဗွန်ဖြားတွမ်ႏ စင်ꩻတန်တိလောက၊ စင်ꩻတန်ဓမ္မ သာမိ၊ စင်ꩻတန်ဝရိန္ဒ အာစရိယဗွေႏသီးဖုံႏယိုတဲ့နဝ်ꩻ။ ညောင်တုန်းရွေဟင်္သာတောရ၊ မြောင်းမြပဇ္ဇောတာရုံ သတင်ꩻသုံꩻကအုံဒါႏ ဗွေႏဆရာႏသီးဖုံႏတဲ့နဝ်ꩻ၊ မွိုးဗွေႏဖူးခို ဗွေႏ ဆရာႏနာရဒ ထွက်လှ(ဟိုနမ်း၊ ထီတခေါ့ꩻ) ယိုတဲ့နဝ်ꩻ၊ ဗွေႏဆရာႏ စင်ꩻတန်ပညာသာမိ ကျောင်ꩻပေါမူတဲ့နဝ်ꩻ၊ ဗွေႏဆရာႏတောႏ လွယ်ကောႏရွှေတောင်၊ ဗွေႏဗွန်နောင်အင်းယား တရာꩻဟော်ꩻသား ဓမ္မကထိက ဦးဓမ္မဝရတဲ့နဝ်ꩻ ခွေသွဉ်းလောင်းယို ကေꩻဇူꩻဖြို ငါႏ မရေႏမရာႏဗွေႏဩ။ ကေားကော့ꩻကေားမောင်ꩻ သူႏတောႏကောင်ꩻလိုꩻမျတ် ပရိသတ်ဖုံႏတဲ့နဝ်ꩻ၊ ကထွဉ်ႏသေꩻခါꩻ တရာꩻဟော်ꩻစောင်ႏ ဗွေႏဗွန်၊ ဗွေႏစင်ꩻ၊ သွꩻပေႏချင်ꩻတွမ်ႏ တပဲ့ꩻပေႏသီးဖုံႏယိုတဲ့နဝ်ꩻ၊ ကလွဉ်ကွီထင်ႏဒါႏ ဓမ္မကထိကသွဉ်တန်ꩻ သွꩻပေႏချင်ꩻတွမ်ႏ တပဲ့ꩻ ပေႏသီးဖုံႏယိုတဲ့နဝ်ꩻ ကေꩻဇူꩻတင်ႏငါႏ မရေႏမရာႏ။ ကွပ်ပွိုးနဝ်ꩻမꩻ မွိုးဖါတွမ်ႏဆရာႏ၊ တကာႏတွမ်ႏသွꩻချင်ꩻ၊ တပဲ့ꩻရင်ꩻသီး ကေꩻဇူꩻဖုံႏယိုနဝ်ꩻ ဖြော်ချာဖေႏတွမ်ႏ “လူႏမွန်ဖေႏ ထန်ႏ ခွန်ဝေဿန်ႏ”တရာꩻယို၊ တရာꩻအရသာႏ၊ ဇာတ်တွယ်ꩻအရသာႏ အဝ်ႏဒါႏနုဲင်းမုဲင်ꩻ၊ ကေားဟော်ꩻသားဖေႏခါꩻ သတိꩻသံႏဝွေႏဂ ဗဟုသုတနုဲင်းမုဲင်ꩻကရိုꩻနဝ်ꩻ ယံဖေႏကသေဗာႏတဲင်တွော့ꩻ သောတခံꩻလာႏ၊ ဒွူႏနာႏလွသွော့ ပငါပရာꩻ။ ငဝ်းပလ္လင်ႏယိုနဝ်ꩻ အွဉ်ႏသဝ်ꩻဒွိုန်းက၊ တယ်ႏစသွူတရာꩻနမ်း - သမန္တာ စက္ကဝါဠေသု၊ အတြာ-ဂစ္ဆန္တု ဒေဝတာ။ သဒ္ဓမ္မံ မုနိရာဇဿ၊ သုဏန္တု သဂ္ဂမောက္ခဒံ။ ဓမ္မဿဝနကာလော အယံ ဘဒ္ဒန္တာ (၃)လဲင်ႏ။ ဣတိပိ သော ဘဂဝါ အရဟံ၊ သမ္မာသမ္ဗုဒ္ဓေါ၊ ဝိဇ္ဇာစရဏသမ္ပန္နော၊ သုဂတော၊ လောကဝိဒူ၊ အနုတ္တရောပုရိသဒမ္မသာ ရထိ၊ သတ္ထာ ဒေဝမနုဿာနံ၊ ဗုဒ္ဓေါ၊ ဘဂဝါ။ မဟာကာရုဏိကော နာထော၊ ဟိတာယ သဗ္ဗပါဏိနံ။ ပူရေတွာ ပါရမီ သဗ္ဗာ၊ ပတ္တော သမ္ဗောဓိ မုတ္တမံ။ ဧတေန သစ္စဝဇ္ဇေန သောတ္ထိ၊ တေ ဟောတု သဗ္ဗဒါ (၃)လဲင်ႏ။ အွိုးစခါ ဇေတုတ္တရာႏခမ်း ရာႏဇာႏခွန်နမ်းနဝ်ꩻ အမဉ်ꩻခွန်သိဉ္စယ်ꩻတဲ့၊ နင်ꩻမူႏနဝ်ꩻ အမဉ်ꩻဖုဿတီႏဒေႏဝီႏ၊ နင်ꩻဖုဿတီႏ ဒေႏဝီႏ အဝ်ႏနမ်းလောင်းတွင်ꩻနဝ်ꩻ မဉ်လူႏမွေးစွဉ်ႏထာꩻ၊ ကွပ်ပွိုးနဝ်ꩻမꩻ ဝေင်ꩻတခါꩻငွါလစ်ꩻဖဲ့ꩻ၊ နန်ꩻတောႏဟော်ထျꩻ၊ ယိုသူထွောင်း နဝ်ꩻ ဆို့ꩻစွဉ်ႏစရွပ်သူဆောင်၊ လူႏတန်ꩻစာႏဂ မာꩻဒါႏန တနီꩻတနီꩻယိုနဝ်ꩻ တန်ႏစွဉ်ႏသူသိန်ꩻသူသိန်ꩻ၊ ကေားလူႏကေားတန်ꩻ ခွန်နင်ꩻ သီးတဲ့ ရွဉ်ခံꩻတခြိုꩻဟဝ် သဲင်လဝ်ပတ္တမျာꩻ ယိန်းတိုꩻပွာꩻ ယိန်းလွိုင်ႏအာစွဉ်ႏဒျာႏ။ နင်ꩻဖုဿတီႏဒေႏဝီႏ လွူးလင်ꩻပိုပေႏတဖြာꩻ၊ အပိုပေႏနဝ်ꩻ သဲစ်ကလွူးတဲင်တွော့ꩻ အွဉ်ႏဒေါ့ꩻစွဉ်ႏဒျာႏထာꩻ “မွိုး- ပိုခိုပေႏ အီႏလူႏထာꩻ၊ တခြိုꩻတစူးတစိꩻ အဝ်ႏနေဟောင်းမွိုး?” ရီစွဉ်ႏဒျာႏနုဲင်းနဝ်ꩻ၊ အမွိုးကထင်ႏဟွုန် အပိုငဝ်းနုဲင်းနဝ်ꩻတဲင်တွော့ꩻ သꩻရေꩻ မွေးစွဉ်ႏဒျာႏထာꩻ၊ “ပိုခိုဗွာ- ကမ်းသꩻလူႏသွော့ဟုဲင်း ပိုခို”ရိုꩻနုဲင်းနဝ်ꩻထွူတဲင်တွော့ꩻ ထူႏရွဉ်တရေင် ဖေႏစွဉ်ႏဒျာႏအပိုပေႏ-တဲ့၊ ခွန် ပေႏယိုနဝ်ꩻ ဖန်ဖေႏအမဉ်ꩻ “ဝဿန္တရာႏ”။ ခွန်ပေႏဝေဿန်ႏ ကလွူးထန်ႏနီꩻနဝ်ꩻ ဆင်ထီးဗွာပေႏတဲ့ ပေါႏလွဉ်၊ ဆင်ထီးဗွာပေႏယိုနဝ်ꩻ ဖန်ဖေႏအမဉ်ꩻ “ပစ္စယ”တဲ့၊ ခွန်ပေႏဝေဿန်ႏ အသက်ထွိုင်ႏလꩻ လစ်ꩻငတ်ꩻနေင်ႏကိုနဝ်ꩻ ဗွောင်ႏအငွဉ်ꩻဟွဲး ကတန်ႏတသိန်ꩻတန်နဝ်ꩻ ဖေႏထိုꩻစွဉ်ႏဒျာႏ ကေား နေးသားတဲ့၊ ကေားနေးသားနဝ်ꩻ လွေꩻလဝ်းခန်းအဖါ၊ အဖါရိုꩻ “ပေါႏခွေပိုပေႏဖေႏနဝ်ꩻတဲး တွမ်ႏခွေကဖေႏနဝ်ꩻ ပီပီဝင်ꩻ”ရိုꩻနုဲင်းနဝ်ꩻ တဲင်တွော့ꩻ အွဉ်ႏဟွဲးဖေႏချင်စွဉ်ႏငွဉ်ꩻဟွဲးခံꩻ၊ ဝေဿန်ႏခွန်ပေႏ ဖေႏထိုꩻဖျင်စွဉ်ႏဝင်ꩻ၊ ကဖေႏထိုꩻဝင်ꩻနုဲင်းယိုနဝ်ꩻ ဗꩻစွဉ်ႏဒျာႏ ကွတ်ꩻ လဲင်ႏဗွေဗွေ။ လိုꩻပေႏတဲ့ ကုသိုလ်ႏကံႏပငါပရာꩻဒျာႏ၊ ဇာတ်ကရီးပန်အွဉ် ကလူႏလွဉ်ဖိုသားနဝ်ꩻ “ကံႏတနꩻမို့ꩻကဲဉ်၊ ကံႏတနဲဉ်မို့ꩻစော့ꩻ” သဲင်ꩻမော့ꩻမွိုးရွဉ်အာ၊ ဖါရွဉ်သား၊ အဗီအခွမ်ꩻလာꩻတဲ့ ကားမုဲင်ꩻစားစား၊ အဟဝ်မုဲင်ꩻရာꩻ၊ အတရေꩻမုဲင်ꩻရာꩻ၊ အတသာမုဲင်ꩻရာꩻတဲ့ ကွဉ်ကꩻဗာႏ၊ အွီႏမုဲင်ꩻရာꩻတဲ့ အံႏဗာႏ၊ ဟဝ်မုဲင်ꩻရာꩻတဲ့ အုံသော့ꩻဗာႏ၊ ဗေင်ႏသော့ꩻဗာႏ။ ဇာတ်ကရီးပန်အွဉ် တလူႏလွဉ်ဖိုတဝ်းသားနဝ်ꩻ “အကျောင်ꩻအုံသို့ဟံႏ၊ အကံႏအုံသို့တွာ”တဲင်တွော့ꩻ သဲင်ꩻမော့ꩻဒျာႏမွိုးဖါ ခြေားခြဲ့၊ အဗီတဲ့ ယယယိယိ၊ ကျမ်ꩻကျမ်ꩻကိမ်ꩻကိမ်ꩻ၊ ခွမ်ꩻလာꩻတဲ့ သဲ့သဲ့သသ၊ ပြဝ်ႏပြဝ်ႏပြီႏပြီႏ၊ စဝ်ႏပီးစဝ်ႏပဲ့ꩻ၊ တဗော့ꩻလီးတဗော့ꩻ လဲ့ꩻ၊ အီႏပြွတ်တေားငါတဲ့ အဲဉ်ထဝ်း၊ မဉ်ႏယူႏယွယွနဝ္ꩻ သတိꩻသံႏဝွေႏဂ ဟဝ်လꩻငါႏ မရေႏမရာႏ၊ ဟဝ်လူႏဟဝ်တန်ꩻငါႏထာꩻ။ ခွန်ပေႏဝေဿန်ႏ သက်ကထင်ႏလꩻ သွစ်ꩻနေင်ႏကိုနဝ်ꩻ အထာꩻကျမ်ႏ ပေါႏထန်ႏစွဉ်ႏနုဲင်းယို- “ခွေယိုနဝ်ꩻ လူႏဗာႏလေႏ ကွို့ꩻ တခြိုꩻလူႏအတန်ႏလွုမ်ꩻ၊ တလꩻတွိုႏသꩻတဝ်း၊ ပါꩻတဖြာꩻဖြာꩻ မဉ်ႏလွဉ်ကွီခွေသꩻရာႏနဝ်ꩻ ခွေဖြဲ့ꩻဖေႏစွဉ်ႏ ခွေသꩻအင်၊ ခွေအီႏ ဖေႏစွဉ်ႏ၊ မဉ်ႏလွဉ်ကွီ ခွေမဲ့နီပင်တဲ့ ခွေအီႏအွာထန်ႏဖေႏစွဉ်ႏ၊ မဉ်ႏလွဉ်ကွီခွေယာႏတဲ့ တွမ်ႏနꩻခွေအီႏသွို့ꩻဖေႏစွဉ်ႏ၊ “နာꩻထွာဖေႏခွေ သွဉ်းဟုဲင်း”မဉ်ႏရိုꩻနဝ်ꩻတဲ့ ခွေအီႏထွာဖေႏစွဉ်ႏ၊ ခွေမဉ်ႏလူႏဗာႏ ခွေနမ်းအင်္ဂါႏ သꩻရာႏယာႏနုဲင်းယိုနဝ်ꩻမꩻ ခွေအီႏတွိုႏသꩻနွောင်ꩻ”အ ထာꩻကျမ်ႏပေါက်ထန်ႏစွဉ်ႏဒျာႏနုဲင်းနဝ်ꩻတဲ့။ အထာꩻကျမ်ႏ ကတိန်ႏပေါက်ထင်ႏနုဲင်းနဝ်ꩻတဲင်တွော့ꩻ ခမ်းလော့တျာႏငွိုး၊ ဟံႏတသွိုးတလီꩻမာꩻ သီကျာꩻဗျဟ္မာႏ အံႏဖြာႏ လွစွဉ်ႏဒျာႏ ပငါပရာꩻတဲ့၊ ခွန်ဝေဿန်ႏ သက်ထင်ႏလꩻ တဆီသူနေင်ႏနဝ်ꩻ ဉာဏ်ႏပညာႏ ထာꩻဒါႏတဆီသွစ်ꩻမျိုꩻ ကွပ်ကျိုꩻသွဉ်ထင်ႏ ဒါႏလျင်ႏလို့လဲဉ်း။ နီတကာႏသီးပိုတဲ့ ဉာဏ်ႏပညာႏ ဖေႏနေးကဒါႏနဝ်ꩻ ပေါႏအသက်လꩻ လစ်ꩻငတ်ꩻနေင်ႏတဲ့ ထွဉ်ႏအုံခန်းကျောင်ꩻ၊ တောအ သွဉ်ပညာႏငါ ထွဉ်ႏလွေꩻငါသွော့၊ “အပေႏငါႏ၊ ညာꩻငါႏ၊ သေနန်းငါႏ၊ မဲ့ꩻအအုံဟဝ်တဝ်း”နုဲင်းနဝ်ꩻဖုံႏနဝ်ꩻ တွမ်ႏရိုꩻမွုန်း၊ တွမ်ႏဟဲ့ꩻတ ရတ်တရစ်သဲင်ꩻမွုန်း၊ အမဉ်ႏကွီသဲင်ꩻလမ်းတဲ့ ဖေႏသဲင်ꩻကြွို့ꩻကြꩻမွုန်း၊ အမဉ်ႏကွီထန်ႏထိုꩻကျောင်ꩻတဲ့ ဖေႏထန်ႏကြွို့ꩻကြꩻမွုန်း၊ မွိုး ဖါတဲ့ မဉ်ႏထူႏရေꩻ၊ ဝွေꩻတဲ့ မဉ်ႏသွဉ်မွေးနဝ်ꩻတဲး ဒါႏဗာႏပညာႏ နုဲင်းခွန်ဝေဿန္တရာႏယိုသနယ်။ ခွန်ဝေဿန္တရာႏယိုနဝ်ꩻ ဒါႏနဖဲ့ꩻတဲ့ သမ်းဝါႏသနာႏ၊ ထာꩻဒါႏပညာႏတဲ့ သမ်းတန်၊ ထီႏခမ်းသားထီသားတဲ့ ဟွုန်ရက်သ ညင်ꩻ၊ ယောင်ꩻဆင်ꩻတဲ့ သမ်းတရေꩻ၊ ကွပ်ပွိုးနဝ်ꩻမꩻ ယဲက်အဖဲ့ꩻမုဲင်ꩻတဲ့ တဲးဝါး၊ ထွားအဖဲ့ꩻမုဲင်ꩻတဲ့ သေႏချာႏ၊ မင်္ဂလာႏတောႏလမ်း၊ အိုပ်ခမ်းစိုꩻထီ၊ ဒင်ႏကီအရာႏ၊ ခိန်ႏခါႏတွိုႏလွဉ်လဲဉ်းသွူတဲင်တွော့ꩻ အဖါခွန်တွမ်ႏ အမွိုးနင်ꩻနဝ်ꩻ တွိုင်ႏပင်ႏခန်းလို့ဝင်ꩻ၊ အပိုခိုအီႏ တောႏလမ်းတွက်တာႏ၊ အီႏတောႏပါႏကိစ္စ။ တရာꩻဟော်ꩻပုဂ္ဂိုလ်ႏကရိုꩻနဝ်ꩻ ဟဝ်မုဲင်ꩻရာꩻတဲ့ အဗာႏဒေါ့ꩻ၊ ရော့ꩻမုဲင်ꩻရာꩻတဲ့ အဗာႏဟော်ꩻ၊ မဉ်ႏဟော်ꩻနယ်နဝ်ꩻမꩻ အဟဝ် အီႏမော့ꩻ၊ မဉ်ႏဒေါ့ꩻနယ်နဝ်ꩻမꩻ အကျိုꩻအီႏထွာ၊ ကွပ်ပွိုးနဝ်ꩻမꩻ ငဝ်းလိုꩻလမ်းခြာ၊ ငွါလိုꩻလမ်းခြွိုင်းကရိုꩻဒါႏ တောႏလမ်းတောႏပါႏ ကိစ္စယိုနဝ်ꩻ ဗွေႏစင်ꩻနေးတွမ်ႏမေတ္တာႏ စေႏတနာႏ ထီႏငါႏတရာꩻနာႏသားအကျိုꩻတဲင်တွော့ꩻ ဗွေႏစင်ꩻအီႏဟော်ꩻဒေါ့ꩻပါက တစိꩻပေႏ ငါ။ “တောႏလမ်း တယ်ႏစေႏတီႏ၊ သမ်ꩻတသီႏ ယိုသိုမ်စား၊ ပေါႏရော့ꩻတဝ်း ဖျင်ဆုဲင်ꩻဗာႏ၊ ယပ်ꩻငါႏခိုးလျား” တောႏလမ်းတ စား၊ တယ်ႏစေႏတီႏတစား၊ သမ်ꩻတသီႏတစား ယိုသိုမ်စားနဝ်ꩻ ပေါႏတရော့ꩻထွူတဝ်း၊ မဉ်ႏဖျင်ဆုဲင်ꩻဗာႏနဝ်ꩻ ယပ်ꩻငါႏ၊ ခိုးလျားဗာႏ၊ ကွပ်ပွိုးနဝ်ꩻမꩻ တောႏလမ်းတောႏပါႏကရိုꩻနဝ်ꩻ ထာꩻခွုမ်ဆိုးမွေးတဝ်း၊ ဝင်ꩻအွိုးမုဲင်ꩻ နီအွိုးမုဲင်ꩻ၊ ဝင်ꩻနုဲင်းမုဲင်ꩻ နီနုဲင်းမုဲင်ꩻ ထောင် သွတ်ꩻသွတ်ꩻက အထျꩻအနာထွူမꩻ “ချꩻငီꩻလို့ဝင်ꩻအကျောင်ꩻ၊ ပေါင်ꩻငီꩻလို့ဝင်ꩻအကံႏ”၊ နဝ်ꩻမꩻ ကုံꩻလမ်းကုံꩻပါႏ သာႏယာႏမုꩻအဝ်ႏ၊ အသက်အနေႏတဲ့ အမူႏနဝ်ꩻ အပေႏသွတ်ꩻ (၁၈)ကို၊ အခိုတဲ့ အပေႏသွတ်ꩻ ဖေႏကလꩻဗဲင်း (၂၀)ရပ်နဝ်ꩻမꩻ ထာꩻသူႏသေ ဟမ်းပေါင်း အဝ်ႏ။ ယဟန်ႏသားနဝ်ꩻ “စမိုမ်ꩻလွုမ်ꩻတဲ့ကုဲင်၊ စတုဲင်လွုမ်ꩻတဲ့နွူႏ”ထိုꩻလို့ဒျာႏ၊ ယဟန်ႏသားနဝ်ꩻ ဖွီလွဉ်ꩻငါႏဟ “ထီႏဆေꩻကိုတဲ့ စွယ်ꩻ၊ မော့ꩻပွယ်ꩻကိုတဲ့ကျွိုက်”စွဉ်ႏဒျာႏ၊ တွိုႏဆုဲင်ꩻတွော့ꩻ ကော့ꩻမာႏချာဗာႏအနမ်း ပငါပရာꩻ၊ မွိုးဖါသီး တောႏလမ်းတောႏပါႏ မဉ်ႏ တသာႏယာႏတဝ်းနဝ်ꩻ တွိုႏလင်ꩻပိုစိုးယိုတဲ့ “အဝ်ႏလိုႏအွဉ်ႏတီဖိုး”ရိုꩻမကောင်၊ “အဝ်ႏလိုႏအွဉ်ႏနေးအဖူး”ရိုꩻမကောင်၊ ခိန်ႏသွဉ်သွူ ပညာႏတဲ့ သွဉ်ဗာႏတဝ်း၊ ပိုဖုံႏလီꩻဖုံႏနဝ်ꩻ နစ်နာႏတငါငါတေား။ ခွန်ဝေဿန်ႏယိုနဝ်ꩻ ဖေႏနေးကတွမ်ႏထွာဗာႏမွုန်းနုဲင်းနဝ်ꩻတဲင်တွော့ꩻ အမွိုးတွမ်ႏအဖါနဝ်ꩻ ထွားထိုမ်ႏဖေႏဒျာႏ လိုꩻမူႏ လိန်ႏမာႏ၊ လိုꩻမူႏဟဝ်၊ ပွိုးထမုဲင်ꩻနဲးတဲင် မွိုးဖါသီးကရိုꩻနဝ်ꩻ “မိဉ်ထွားတဝ်း ပိုထိုမ်းထွီႏ၊ မိဉ်ထီႏဒျာႏ ပိုထိုမ်းဆင်၊ မိဉ်ထွားတဝ်း ပိုဆွ ပသီႏ၊ မိဉ်ထီႏဒျာႏ ပိုဆွခံꩻ”၊ ကွပ်ပွိုးနဝ်ꩻမꩻ ထိုမ်ႏဖေႏဗာႏနုဲင်းနဝ်ꩻ၊