လူꩻကပ်မဟာကဿပသွမ်ꩻ
"၅၆။ ဂါႏထာႏ ပြန်ႏပအိုဝ်ႏခြေင်ခြေင်"
ကောဝ်ႏတင်ႏစန္ဒကူꩻသီး အလွီးနဝ်ꩻ အဝ်ႏတစိꩻစော့ꩻပေႏဒျာႏ၊ ခံႏစွဉ်ꩻစွဉ်ႏသက် ရက်မွေးသီႏလ ပုဂ္ဂိုလ်ႏကျသီး အလွီးသတင်ꩻနဝ်ꩻ အမျတ်ငါႏမꩻတဲင် ဟွမ်တွိုႏဗꩻစွဉ်ႏ လူꩻခမ်းသူꩻယင်သွူ။
"လꩻဗဟုသုတ၊ လꩻအိသတိꩻနုဲင်းယို"
ဟော်ꩻထွားသွဉ်ဗာႏ မဟာကဿပတ္ထေရ ပိဏ္ဍပါတဒိန္နဝတ္ထုယိုနဝ်ꩻ-
၁။ အဝ်ႏသွူလူꩻခမ်းတဲ့ မီႏမဉ်လောင်ꩻသွမ်ꩻနဝ်ꩻ လင်ꩻလောင်ꩻဗာႏဒျာႏ လိုꩻခမ်းကိုအကျောင်ꩻ၊
၂။ လူႏထာꩻသာႏသနာႏခေ့ꩻတွင်ꩻနဝ်ꩻ အကျိုꩻတန်တဝ်း၊ လူႏဗာႏသာႏသနာႏလေတွင်ꩻ(နုဲင်းယိုခါ)မꩻ အကျိုꩻတန်အကျောင်ꩻ၊
၃။ ထာꩻလူႏဒါႏနနဝ်ꩻ မာꩻခြွေခြာႏ၊ မာꩻထိုဒါႏ အဆင်းအရန်းအကျောင်ꩻ၊
၄။ ကောဝ်ႏလွီးဟွမ်ဟွမ်တဲ့ ထွꩻတောဝ်းသီႏလလွီး သီႏလဂွုဏ်ႏအကျောင်ꩻ-စတဲင် နုဲင်းနဝ်ꩻ သေထွꩻ-လꩻအီသတိꩻအာတန်။
၅၇။ ဂါႏထာႏ ပြန်ႏပအိုဝ်ႏခြေင်ခြေင်
နမ်းကျင်ꩻသီႏလ ကဗွေလွဒါႏ တအုံတငွို့တဝ်းထာꩻ၊ နေးတွမ်ႏအကျောင်ꩻ အနယ်ꩻမဲဉ်ႏမဲဉ်ႏတဲင် သစ္စာႏလစ်ꩻပါꩻ ထီႏသေငါꩻတွော့ꩻ အဝ်ႏကိလေႏသာႏခြာ ကလွစ်ငါထန်ႏဒါႏ ရဟန္တာႏနုဲင်းဂေါဓိကသီး တဖူꩻကလွေꩻ နိဗ္ဗာန်ႏယို ခွန်သုံလူꩻဗား ထုမ်ႏထွားနုဲင်းမုဲင်ꩻတဲ့ယဝ်း တလꩻတဝ်းဖြီႏဖြီႏ တထီႏနွောင်ꩻတဝ်းလာꩻလာꩻသွူ။
လꩻဗဟုသုတ၊ လꩻအီသတိꩻနုဲင်းယို ဟော်ꩻထွားသွဉ်ဗာႏ ဂေါဓိကတ္ထေရ ပရိနိဗ္ဗာနဝတ္ထုယိုနဝ်ꩻ- ၁။ ကအဝ်ႏရေꩻ ကအဝ်ႏသန်ꩻတွင်ꩻနဝ်ꩻ အဝ်ႏလိုႏအားထွုတ်သေꩻငါႏတရာꩻ၊ တိန်ႏဆာသွူထာꩻမꩻ စယူႏလꩻတရာꩻ မဉ်ႏအားထွုတ်တရာꩻနဝ်ꩻ သောင်သောင်ခြင်ꩻခြင်ꩻ ထင်ႏလင်ꩻကီလဒုက္ခငါႏ၊ မဉ်ႏလꩻလွေꩻ ထီႏလွေꩻ သေလွေꩻတရာꩻနဝ်ꩻ မွေးနေက၊ မဉ်ႏတလꩻတဝ်း၊ ထီႏတဝ်း သေတဝ်းနဝ်ꩻ သွုမ်ꩻစိုးငါႏအကျောင်ꩻ၊
၂။ ရဟန္တာႏသီး ကကျွꩻလွေꩻဒါႏ နိဗ္ဗာန်ႏ(တဖူꩻ)နဝ်ꩻ ခွန်သုံလူꩻဗား ထုမ်ႏထွားတထီႏနွောင်ꩻတဝ်းအကျောင်ꩻ-စတဲင်နုဲင်းနဝ်ꩻ သေထွꩻ-လꩻအီသတိꩻအာတန်။
၅၈။ ဂါႏထာႏ ပြန်ႏပအိုဝ်ႏခြေင်ခြေင် တဖူꩻတန်အသောင်အဆွုမ်ႏ ကထောက်ꩻပွုမ်ႏခါꩻဒါႏ ထာꩻအီပွုမ်ႏကိုနဝ်ꩻ အလွီးကဟွမ် သꩻစွယ်ꩻကအဝ်ႏ ကဝ်ႏဗိုတုဲင်နောဝ်ꩻ ဒေါ့ꩻဖြဲဉ်လွဉ်-(နဝ်ꩻအတွိုင်ꩻ)။ ၅၉။ ဂါႏထာႏ ပြန်ႏပအိုဝ်ႏခြေင်ခြေင် ပွုံႏခွိုင်ꩻတဲက်အီ ဗွန်ပီနဝ်ꩻနေနေ၊ ပညာႏအဲဉ်ထဝ်း သေတဝ်းမော့ဆွုမ်ႏ လိုꩻထာꩻအီႏပွုမ်ႏဖုံႏအခြာ ကထွာကပေါႏပေါက်လွဉ်ဒါႏ ဘုရာꩻတပဲ့ꩻနဝ်ꩻ တွမ်ႏအထာꩻသေ တွမ်ႏအထာꩻဒါႏ တရေꩻလဲဉ်းဒျာႏ လိုꩻမဲ့ခေ့ꩻဖုံႏယို တရေꩻလဲဉ်းဒျာႏ ပုထုဇဉ်ႏဖုံႏယိုသွူ။
လꩻဗဟုသုတ၊ လꩻအီသတိꩻနုဲင်းယို ဟော်ꩻထွားသွဉ်ဗာႏ ဂရဟဒိန္နဝတ္ထုယိုနဝ်ꩻ- ၁။ လိုꩻခြွေခြာႏ (လိုꩻပညာႏတအဲဉ်ထဝ်း)သားနဝ်ꩻ ဆရာႏတုꩻ ဆရာႏယောင်ႏ လွဉ်မျောက် လွဉ်ချောက်လꩻထိုꩻဒါႏအကျောင်ꩻ၊ ၂။ တသေ တထီႏတဝ်းတရာꩻတဲ့ ရိုꩻ'သေ'ရိုꩻ'ထီႏ'မဉ်ႏအံႏလဲဉ်ဝင်ꩻနဝ်ꩻ မော့ꩻဒါႏထာꩻဒုက္ခအကျောင်ꩻ၊ ၃။ နီဗွေႏဘုရာꩻမꩻ လꩻသဗ္ဗညုတဉာဏ်ႏ ထီႏသေမွေးမန်ႏတရာꩻ ယံကယ်ꩻလွိုပါꩻအကျောင်ꩻ၊ ၄။ နီဗွေႏဘုရာꩻသီး ဘွုံꩻကံႏနဝ်ꩻ ထူꩻဆန်ꩻဟဝ်ငါႏ၊ အံႏဖြာႏတလို့နွောင်ꩻတဝ်းအကျောင်ꩻ၊ ၅။ ကိုꩻကွယ်ႏဆယ်ꩻကပ် ဆရာႏမျတ် ဆရာႏမဲဉ်ႏမꩻ လꩻကုသိုလ်ႏ၊ လꩻနွောင်ꩻတရာꩻအကျောင်ꩻ-စတဲင်နုဲင်းနဝ်ꩻ သေထွꩻ လꩻအီသတိꩻအာတန်။ [၁][၂][၃]