လွိုက်ရွေꩻပွယ်ꩻကို

"လွိုက်ရွေꩻပွယ်ꩻကို အီႏပွေါးထွားနွို့ပြဲင်ႏ ဖေႏထူႏလက်ꩻလဲဉ်းနုဲင်းမုဲင်ꩻစား" ၂၀၁၅-လွိုက်ရွေꩻပွဲꩻကို မဉ်ႏတွိုႏနိုဝင်ဘာလာ ၈-နီꩻနဝ်ꩻ အီႏမာꩻလွေꩻသွူအကျောင်ꩻ ခမ်းပေါင်ꩻဗူႏ လွိုက်ရွေꩻပွဲꩻကော်မရှင်အစွိုꩻနွို့ ဦးဝင်းကြည် ဒေါ့ꩻလွေꩻနုဲင်းနဝ်ꩻတဲင် သေထွꩻဗာႏနဝ်ꩻသွူ။ အီႏမာꩻလွေꩻလာမုဲင်၊ အနီꩻမုဲင်ꩻနဝ်ꩻ ခမ်းပေါင်ꩻဗူႏလွိုက်ရွေꩻပွဲꩻ ကော်မရှင်စွိုꩻ ဒေါ့ꩻဖြောင်လဲဉ်းတဲင် မဉ်ႏထွားတွမ်ႏလာယိုခါနဝ်ꩻ အခိန်ႏအဝ်ႏကုဲင် နီသိုမ်လာလွုမ်ꩻသွူ။ နုဲင်းယိုခါ လွိုက်ရွေꩻပွယ်ꩻမွူးနီꩻ အီႏတွိုက်လွဉ်အတွင်ꩻနဝ်ꩻ မန်းခမ်းကအီႏမာꩻ တခမ်းလုမ်းလွိုက်ရွေꩻပါယ်ꩻတန်ယို လွစ်တခြင်တွောင်းတွာရေꩻ၊ ဖြောင်ဒေါင်ရေꩻ အဝ်ႏတအဝ်ႏတဝ်းနဝ်ꩻ အသောင်အရင်ꩻ ခမ်းလင်သားဖုံႏလဲ့ တွမ်ႏသꩻဝင်ႏစာꩻမု အဗွေတဗာႏ အဝ်ႏအုံပွေါးထွားနဝ်ꩻသွူ၊ နဝ်ꩻသွူတကာႏတဝ်း လွိုက်ရွေꩻပွယ်ꩻတွိုက်လွဉ်ခိန်ႏတွမ်ႏ လွိုက်ရွေꩻပွယ်ꩻတွင်ꩻကို သတင်ꩻမီဒီယာလွစ်တခြင်ခွင်ꩻ အခေႏအနေႏနဝ်ꩻလဲ့ တွိုႏယိုခါ အဝ်ႏနန်းဗာႏနေကသွူ။ ဖေႏနေးခမ်းသားကသေတွော့ꩻ ကအဝ်ႏဒေါ့ꩻလောက်ꩻဒါႏ သတင်ꩻမီဒီယာသား လိုꩻအွဉ်ငါသား စာႏရင်ꩻကိုနဝ်ꩻ သမ္မတဦးသိန်းစိန်အဝ်ႏပါ ပြင်သစ်ခမ်း RSF သတင်ꩻစွိုꩻ ဒေါ့ꩻဖောႏနယ်ခါꩻသွူ။ လွိုက်ရွေꩻပွဲꩻကာႏလယို လိုꩻမုရေꩻအစွိုꩻတဲ့နဝ်ꩻ၊ သတင်ꩻမီဒီယာတဲ့နဝ်ꩻ အုံပွေါးထွားနွောင်ꩻဒျာႏ၊ ကမဉ်အုံပွေါးထွားဒါႏ ဝေင်ꩻနယ်ႏယို ဒင်ႏလိတ်အုံပွေါးခွင်ꩻ ဆဲင်ႏရာဝေင်ꩻနယ်ႏ လွိုက်ရွေꩻပွဲꩻကော်မရှင်ထျꩻတွော့ꩻ ထူႏဗာႏနေး အုံပွေါးထွားခွင်ꩻကတ် လွိုက်ရွေꩻပွဲꩻကော်မရှင်စွိုꩻ ဒေါ့ꩻခါꩻနုဲင်းနဝ်ꩻတဲင် ပတ်သဲစ်တွမ်ႏ လွိုက်ရွေꩻပွဲꩻ ဖြောင်ဒေါင်မုꩻ ဖေႏကအဝ်ႏ ပွေါးထွားခွင်ꩻအဝ်ႏဒျာႏ အခေႏနေႏနုဲင်းနဝ်ꩻလဲ့ အမွေးတဗာႏနဝ်ꩻ မဉ်ႏတွိုႏမꩻ အီႏသေနွောင်ꩻနဝ်ꩻသွူ။ မဉ်ႏထွားလွေꩻယင်းဒျာႏ ပါတီနဲင်ႏငံႏရေꩻအခန်ꩻကဏ္ဍလဲ့ ထွိုင်ႏသေလွဉ် ကအီႏမာꩻလွိုက်ရွေꩻပွဲꩻမွူးနီꩻနဝ်ꩻ ဆဲင်ႏရာꩻပါတီထာꩻမာꩻယို ဖျင်ဆင်လွလဲဉ်းနဝ်ꩻသွူ၊ ကအီႏနွို့ပြဲင်ႏဒါႏ ပါတီနမ်းခြောင်ꩻ လိုꩻဖုံႏယိုလဲ့ စစ်ဆေꩻလွလဲဉ်း၊ လွိုက်ရွေꩻလွလဲဉ်း အွဉ်ႏထွော့လွလဲဉ်းဖုံႏသွူ၊ ကအီႏနွို့ပြဲင်ႏဒါႏ ဝေင်ꩻနယ်ႏတွမ်ႏ ခင်ႏလမ်းဖုံႏယိုလဲ့ ချꩻအွဉ်ႏလွလဲဉ်းနဝ်ꩻသွူ။ ကအီႏနွို့ပြဲင်ႏဒါႏ ပါတီဖုံႏယိုလဲ့ အဗွိုန်တဝ်းဒွုမ်နုဲင်း ၂၀၁၀-၂၀၁၂ လွိုက်ရွေꩻပွဲꩻခိန်ႏ နုဲင်းပါတီတန်နီဗာႏလဲ့ ထွာဒျာႏအာႏတလာပါတီနုဲင်းနုဲင်းဝင်ꩻ၊ နဝ်ꩻသွူတကာႏတဝ်း ခမ်းရင်ꩻသားပါတီယဟန်ႏဖုံႏအကို အာႏတလာပါတီဖုံႏလဲ့ အဝ်ႏနေနေတဲင် ၂၀၁၅-လွိုက်ရွေꩻပွဲꩻယို အစွိုꩻတွမ်ႏတစွိုꩻ ပွေါးထွားထိန်ꩻချာငါဝင်ꩻတဲ့ အီႏအဝ်ႏတဲင် ဖြောင်ဒေါင်မုꩻလဲ့ အီႏတွိုႏနွောင်ꩻဒျာႏ ထီႏနုဲင်းနဝ်ꩻသွူ။ အဝ်ႏကုဲင်ယင်းဒျာႏ ပါတီတန်တွမ်ႏ ခမ်းရင်ꩻသားပါတီပေႏဖုံႏ အီႏနွို့ခေးပြဲင်ႏဒါႏ ဝေင်ꩻနယ်ႏတဲ့နဝ်ꩻ၊ ခင်ႏလမ်းတဲ့နဝ်ꩻ မဉ်ႏမာꩻသေꩻဒျာႏ အဖေႏအထူႏနုဲင်ႏငံႏရေꩻဗျူဟာဖုံႏတဲ့ အီႏအဝ်ႏလွဉ်နွောင်ꩻနေနေသွူ။ လွိုက်ရွေꩻပွဲꩻမွူးနီꩻ ထွိုင်ႏအီႏတွိုက်လွဉ် နုဲင်းယိုခါနဝ်ꩻ နုဲင်းဒျာႏခမ်းရင်ꩻသား ဒေႏသယဟန်ႏဖုံႏအကိုလဲ့ ပါတီအဝ်ႏနီသိုမ်စွိုꩻယို အချင်ꩻချင်ꩻ မာꩻအဖေႏအထူႏ ဖေႏကတနꩻမွုန်းဝင်ꩻ လဲ့ꩻဖုဲင်းနွို့ပြဲင်ႏနေးအခေႏနေႏလဲ့ အဝ်ႏလွဉ်နဝ်ꩻသွူ။ NLD အစွိုꩻအွဉ်ငါဒျာႏလဲ့ အဝ်ႏဒေါ့ꩻရိုꩻ "နီပါတီတွမ်ႏ ခမ်းရင်ꩻသားပါတီအခါႏ ခမ်းရင်ꩻသား မဲးဆန္ဒနယ်ႏ ယဟန်ႏကိုဖုံႏနဝ်ꩻ အီႏတနꩻဝင်ꩻအဝ်ႏဒါႏတဲင် မဉ်ႏတခြိꩻ လဲ့ꩻဖုဲင်းနွို့ပြဲင်ႏနေးဒျာႏမꩻ နီကလꩻဒါႏ အနွောင်ꩻနဝ်ꩻ အီႏသေႏချာႏနဝ်ꩻသွူ။ ၂၀၁၅-လွိုက်ရွေꩻပွဲꩻယို ညနေင်ႏနီဆီလွိုအတွင်ꩻ ထွာခမ်းသားအစိုႏရစူကို မာꩻလွေꩻချာလွိုက်ရွေꩻပွဲꩻနဝ်ꩻသွူ။ ကလဲဉ်းနေင်ႏ ၂၀၁၀-လွိုက်ရွေꩻပွဲꩻနဝ်ꩻ ထွာဒျာႏစဲ့ꩻအစိုႏရ စီႏစဲဉ်ႏမာꩻဖေႏ လွိုက်ရွေꩻပွဲꩻတဲင် စဲ့ꩻအစိုႏရကထွို့ꩻဗူႏခါꩻဒါႏ ကြံ့ခိုင်ရေးပါတီနဝ်ꩻ ထွာအာႏတလာသွတ်ꩻပါတီထွူ ပြဲင်ႏဖက်ပါတီစွိုꩻမုဲင်ꩻမုဲင်ꩻလဲ့ အာႏတအဝ်ႏတဝ်းဒွုန်းသွူ။ တယ်ႏ ၂၀၁၁-ဗꩻ ၂၀၁၅-ယိုတောႏတွင်ꩻ လွတ်တောႏကို စဲ့ꩻသားထွာလွတ်တောႏနမ်းခြောင်ꩻနဝ်ꩻ ထူႏသော့ꩻခင်ႏလမ်းတဲင် ခမ်းသားအတာႏ အကျိုꩻကဖေႏဒါႏ ဥပဒေႏဖုံႏယို တဖျင်နွောင်ꩻတဝ်းနဝ်ꩻလဲ့ အဝ်ႏထီႏဗာႏနဝ်ꩻသွူ။ တယ်ႏ ၂၀၁၅-လွိုက်ရွေꩻပွဲꩻမာꩻငါယို ခမ်းသားအတာႏ အကျိုꩻကအဝ်ႏဒါႏ ဥပဒေႏ၊ ဖေႏကလွောက်ꩻတွမ်ႏ ဒီမိုကရေစီစီꩻကန်ꩻဥပဒေႏဖုံႏ၊ ခမ်းသားအခွင်ꩻအရေꩻ ဖေႏကလꩻသော့ꩻနဝ်ꩻ ဒီမိုကရေစီနုဲင်ႏငံႏရေꩻပါတီစွိုꩻဖုံႏ မာꩻဝင်ꩻအဖေႏအထူႏတွော့ꩻ အီႏကျုံႏတလူႏလွေꩻယင်း၊ အီႏကွီထူႏလꩻချာယင်း အာႏဏာႏကအဝ်ႏဒါႏ စဲ့ꩻသားထျꩻအနွောင်ꩻနုဲင်းမုဲင်ꩻဟောင်း----