လွူးတပဲ့ꩻနဝ်ꩻနုဲင်းယို

အဝ်ႏ ဝီခီပီးဒီးယား ကို

"လွူးတပဲ့ꩻနဝ်ꩻ နုဲင်းယို" ခေတ်စခါ ဗွေႏဗွန်သီး ပျုသာႏသနာႏနဝ်ꩻ သွဉ်ဖေႏလိုꩻပေႏလိတ်လုဲင်ꩻ၊ သျင်ႏပေႏရဟန်ꩻလိတ်လုဲꩻ၊ ကော်ပီႏသျင်ႏပေႏရဟန်ꩻသီး ဘာႏသာႏရေꩻ ယံကစဲင်း ယံကထီႏ ယံကသေတဲင် သွဉ်သင်ဖေႏလိတ်လုဲင်ꩻနဝ်ꩻသွူ။ ဘာႏသာႏရေꩻနဝ်ꩻ အွဉ်ႏအထျꩻတဲင် သွဉ်သင်ဖေႏလိတ်လုဲင်ꩻ၊ ဘာႏသာႏရေꩻဆချာနဝ်ꩻ ယေန်ႏကေႏမုꩻ လိတ်လုဲင်ꩻစာပေတွံႏ ဝင်ꩻကဟဲ့ꩻယိုခါ လိုꩻမုꩻရေꩻ၊ နီပအိုဝ်ႏနဝ်ꩻ ရိုႏသေႏဆရာႏသမာꩻ မွိုးဖါ၊ ရိုႏသေႏ ရတနာႏသွံပါꩻ၊ ရိုႏသေႏလိုꩻတန်တဲင် အခွုမ်အမာꩻ၊ အဒေါ့ꩻအဖြဝ်ႏ၊ အလွေꩻအသဲင်ꩻ ရတနာႏသွံပါꩻ၊ ဆရာႏသမာꩻ မွိုးဖါသီးဆငါနဝ်ꩻ တဟဝ်တဝ်းမန်ႏသမျ မာꩻတဝ်း၊ ခွုမ်တဝ်း၊ ဒေါ့ꩻတဝ်း၊ ဖြဝ်ႏတဝ်း၊ ငမ်း'ရက်'ရိုႏသေႏ ဆရာႏသမာꩻ မွိုးဖါနဝ်ꩻသွူ။ ခေတ်ယိုလဲင်ႏခါ ကအွဉ်ႏနယ်ထွူ ဆကီနဝ်ꩻပါ ခေတ်သုံꩻ အဟော်ꩻ' အတဲမ်းအတွက် လောကအဖြေꩻအစာ' အဒေါ့ꩻအဖြဝ်ႏ အုံညီꩻအဝ်ႏရဝ်းဝင်ꩻအရေꩻနဝ်ꩻလဲ့ သွဉ်ဖေႏဗာႏနဝ်ꩻသွူ။ ကသွဉ်ဗာနုဲးနဝ်ꩻခါ ကမ္ဘာႏလောင်းယိုခါ လိုꩻအမျိုꩻမုဲင်ꩻတရိုꩻတဝ်း ကျိုꩻစာꩻသင်လွနဝ်ꩻသွူ။ နီဗွေႏဗွန်ကျောင်ꩻ ကသွဉ်ယိုခါ၊ နီဒုံနီဆောင်ႏ ကသွဉ်လွယိုခါ ထွာလယ်ႏဒျာႏ ဝင်ꩻခမ်းထီလင် အညံးစားနဝ်ꩻလွုမ်ꩻသွူ။ ဗွေႏဗွန်သီး ကသွဉ်ဖေႏ အတဲမ်းအဟော်ꩻ' အတွက်အချက်ယိုခါ လိုꩻမူႏလိုꩻပေႏနဝ်ꩻ တသူႏသေတဝ်းထာꩻတဲင် ဆရာႏသမာꩻသွဉ်ဖေႏနုဲင်းမုဲင်ꩻလဲ့ အဝ်ႏသွဉ်လွဉ်ꩻဒျာႏနဝ်ꩻသွူ။ လိုꩻပေႏ အမွိုးအဖါ ယဖြာꩻဖြာꩻလဲ့ သဖော်ꩻအဝ်ႏလꩻဒျာႏ၊ ယဖြာꩻဖြာꩻနဝ်ꩻ သဖော်ꩻတလꩻတဝ်းလဲ့အဝ်ႏ၊ ကထွာဗာႏနုဲးနဝ်ꩻခါ ကွပ်စွဉ်ႏဒျာႏ တတွိုႏဗာႏတဝ်း ဝင်ꩻခမ်းထီ၊ တတွိုႏဖိုတဝ်း ဝင်ꩻဝေင်ꩻတန်ကို၊ အသေစွဉ်ႏဒျာႏ အလုပ်ꩻအမာꩻတမျိုꩻဒျာႏ' တစွိုးဒျာႏတဲင် အထွာနုဲးနဝ်ꩻသွူ။ ဗွေႏဗွန်သီး ကကျိုꩻစာꩻသွဉ်ဖေႏ လိုꩻပေႏလိတ်နဝ်ꩻလဲင်ႏခါ အရေႏရွယ်ႏချက်နဝ်ꩻ မဉ်ႏပျောႏကျောင်ꩻ' မဉ်ႏထွာစင်ꩻသျင်ႏလဲ့ ထွာဗွေႏဗွန်တပဲ့ꩻ၊ မဉ်ႏတပျောႏတဝ်းကျောင်ꩻ' မဉ်ႏသဲင်ꩻလမ်းလဲ့ ထွာဗွေႏဗွန် တကာႏ' ထွာတပဲ့ꩻနဝ်ꩻသွူ။ ကွပ်စွဉ်ႏထွာဒျာႏ အတပဲ့ꩻ' အတကာႏတဲင် မဲဉ်အွဉ်ႏဒါႏ' မဲဉ်အွဉ်ႏသေ' မဲဉ်အွဉ်ႏလေနုဲင်းဝင်ꩻလိုꩻလင်၊ ဝင်ꩻလိုꩻလင်' ဝင်ꩻအရပ်နဝ်ꩻသွူ။ အတပဲ့ꩻကို အတကာႏကို အမဲ့အထီႏ' အသေအထာꩻဒါႏ မဉ်ႏအာအာနုဲင်းဝင်ꩻနဝ်ꩻခါ အဆရာႏဗွေႏဗွန်နဝ်ꩻ တအံႏလွဉ်ꩻဗာႏတဝ်းလဲ့၊ အာႏကွိုꩻလွဉ်ꩻဗာႏတဝ်းလဲ့ "ခွေတပဲ့ꩻ' ခွေတကာႏ အခွုမ်အမာꩻဒါႏနုဲင်းဝင်ꩻမွော့" ကထင်ႏထီႏဗာႏနဝ်ꩻခါ အသꩻကိုနဝ်ꩻ ပျောႏသွင်ႏသꩻရေꩻတေ့ꩻဒျာႏနဝ်ꩻသွူ။ အတပဲ့ꩻကို' အတကာႏကို ကထင်ႏပီတဝ်းဝင်ꩻ၊ ကထင်ႏဒါႏတဝ်း နုဲးဝင်ꩻနဝ်ꩻခါ ကထွာဆရာႏလဲ့ သꩻကိုတဟဝ်တဝ်းနဝ်ꩻသွူ။ ကွပ်စွဉ်ႏအွဉ်ႏသꩻနုဲးနဝ်ꩻမꩻ အသွဉ်သင်လိုꩻပေႏနဝ်ꩻလဲင်ႏခါ အသꩻပါအသꩻပျောႏ၊ အအုံကျောင်ꩻနဝ်ꩻ ပျောႏနဝ်ꩻသွူ။ အမဉ်ႏတအဝ်ႏတဝ်းနုဲးနဝ်ꩻခါ အုံစွဉ်ႏကျောင်ꩻလဲ့ တပျောႏတဝ်း၊ ထွာဖေႏပါꩻဗွေႏဗွန်လဲ့ တပျောႏတဝ်းနဝ်ꩻသွူ။ ဗွေႏဗွန်ရေႏရွယ်ႏချက် ကအွဉ်ႏနုဲးနဝ်ꩻတဲင် သွဉ်ဖေႏသင်ဖေႏ တပဲ့ꩻပေႏဖုံႏနဝ်ꩻ လိုꩻပေႏညဖြာꩻဖြာꩻလဲ့ ဉာဏ်ႏဟဝ်'သꩻဟဝ် အုံညီꩻဒျာႏသွꩻပေႏလဲ့ဟဝ်၊ အံႏနွောင်ꩻတဝ်းဝင်ꩻ၊ ညဖြာꩻဖြာꩻနဝ်ꩻ သꩻဟဝ်တဝ်း၊ အံႏနွောင်ꩻဝင်ꩻ၊ ဆရာႏငါတမျိုꩻ၊ ဆရာႏချာတစား၊ ကထင်ႏထွာနုဲးနဝ်ꩻခါတဲင် ကထွာဆရာႏနဝ်ꩻ လွောက်ꩻလိုꩻဟဝ်တဲင် အွဉ်ႏတွမ်ႏဆရာႏထူထောက်၊ အွဉ်ႏထွားကိုဆရာႏ၊ ပျꩻကိုဆရာႏနဝ်ꩻသွူ။ ဆရာႏကထင်ႏချီႏမျောက်လိုꩻပေႏနုဲးနဝ်ꩻခါ သꩻတဟဝ်တဝ်း၊ ချာႏဒါႏစူခိုႏစူယာꩻ လိုꩻပေႏဖုံႏနဝ်ꩻ စာအံႏတေား အသွꩻမဉ်ꩻတကာႏတဝ်း စာအံႏပါဆရာႏမဉ်ꩻနဝ်ꩻသွူ။ ကထင်ႏစာအံႏ' ကထင်ႏဒေါ့ꩻအာနုဲးနဝ်ꩻတဲင် ကထွာမွိုးဖါသားနဝ်ꩻ တရီတရွောင်တဝ်း အဟဝ်အကုဲအဝ်ႏနုဲးမုဲꩻလဲ့ တစုံစမ်းတဝ်း၊ ယံကသေနဝ်ꩻလဲ့ တကျိုꩻစာꩻတဝ်း၊ ကွိုꩻစွဉ်ႏဒျာႏ အပိုဒေါ့ꩻနဝ်ꩻတဲင် အသꩻခိုးတောဗွေႏဗွန်နဝ်ꩻလဲ့ အဝ်ႏအာငါႏနဝ်ꩻသွူ။ ညဖြာꩻဖြာꩻနဝ်ꩻ နမ်းကိုႏတဲင်ႏ ထုမ်ႏရန်ႏစွဉ်ႏဒျာႏဗွေႏဗွန်နဝ်ꩻလဲ့ အဝ်ႏနဝ်ꩻသွူ။ ကထီႏဗာႏ တကာႏတဖြာꩻနဝ်ꩻ အပိုနဝ်ꩻ အဝ်ႏကျောင်ꩻတဲင် အကျင်ꩻတဟဝ်တဝ်း၊ အသꩻတဟဝ်တဝ်း၊ အံႏနွောင်ꩻဒါႏအသွꩻပေႏဖုံႏနဝ်ꩻသွူ။ အဆရာႏဗွေႏဗွန်ဆငါနဝ်ꩻ တမာꩻနွောင်ꩻဗွုန်ႏတဝ်းလဲ့ တွိုႏအဗွေႏဗွန်မဲ့ဗꩻနဝ်ꩻ အံႏနွောင်ꩻဝင်ꩻနဝ်ꩻသွူ။ အဗွေႏဗွန်ဆရာႏ ကထင်ႏသေ' ကထင်ႏထီႏနဝ်ꩻ ဖေႏသတိꩻ ဒေါ့ꩻဆုမ္မꩻဖြောင်းလဲ့ အကိန်ꩻန်ꩻ၊ ကအဝ်ႏတွယ်ႏနက်တွမ်ႏခွဉ်းလဲ့ အလဲင်ႏင်ႏ၊ အကျင်ꩻကုဲင် အကျင်ꩻဟွေႏနဝ်ꩻ တအွဉ်ႏကုဲင်တဝ်း၊ တထိုꩻမားတဝ်းနဝ်ꩻသွူ။ တွိုႏနဝ်ꩻတဲင် ဗွေႏဗွန်လဲ့ စွဉ်ႏခွဉ်းတွဲႏနက် လောက်ꩻဒျာႏတဖဲ့ꩻ၊ အသွꩻပေႏဖုံႏလဲ့ တမာꩻဗော့ꩻတဝ်းခေါ်ခေါ်၊ အသွꩻကွဲးဆေ့ꩻဆေ့ꩻ' သွꩻပေႏကွဲးခြေားခြေား၊ အုံထာꩻလဲ့ ကထင်ႏပျောႏတဝ်းတဲင်ခါ ကွိုꩻစွဉ်ႏဒျာႏ ထာꩻဖင်းနဝ်ꩻသွူ။ ကထင်ႏဖင်းတဲင်ခါ မဲဉ်အွဉ်ႏဒို့ꩻချာ အနမ်းအပဲစ်တဲင် ဒေါ့ꩻတောဒျာႏ"ဗွေႏဗွန်ရက်တဝ်းအကျောင်ꩻ၊ သွꩻပေႏနိစ္စက်အကျောင်ꩻ၊ အံႏအွꩻဗာႏဟဝ်တဝ်းအကျောင်ꩻ"သဲင်ꩻစာအံႏဒျာႏကျောင်ꩻမဉ်ꩻ နုဲးနဝ်ꩻသွူ။ လိုꩻပေႏကထင်ႏသဲင်ꩻဒေါ့ꩻ အမွိုးအဖါနုဲးနဝ်ꩻခါ ကထွာမွိုးဖါနဝ်ꩻ တဆင်ႏချင်ႏတဝ်း' ယွုမ်းစွဉ်ႏဒျာႏအပိုငဝ်းတဲင် တဖေႏထင်ႏတဝ်းဒွုမ်ကျောင်ꩻလဲ့အဝ်ႏ၊ အွဉ်ႏတောဖျင်ဒျာႏကျောင်ꩻလင်လဲ့အဝ်ႏနဝ်ꩻသွူ။ တွိုႏနဝ်ꩻတဲင် အဗွေႏဗွန်တွံႏ အတကာႏနဝ်ꩻ ကွပ်စွဉ်ႏလိုꩻပေႏငဝ်းတဲင် တဖြာꩻတွံႏတဖြာꩻ' ဆရာႏတွမ်တကာႏ ထင်းမာႏဝင်ꩻတဲင် ပွိုင်းလဲင်ႏင်ႏနဝ်ꩻ ငဝ်းအာဝင်ꩻလဲ့ တွိုႏနဝ်ꩻခါ ငဝ်းဆေ့ꩻအီဝင်ꩻ၊ ထင်းမာႏအီဝင်ꩻနဝ်ꩻသွူ။ တောင်ꩻသေꩻ/ ကထင်ႏထွာနုဲင်းနဝ်ꩻခါ လိုꩻပေႏလဲ့ တလွဉ်ဗွုန်ႏတဝ်း ဗွေႏဗွန်ဆရာႏထျꩻ၊ တကာႏလဲ့ ထင်ႏကျောင်ꩻဆေ့ꩻစွဉ်ႏဒျာႏ၊ ဗွေႏဗွန်လꩻစွဉ်ႏအမျတ် ထာꩻလွꩻထီႏနဝ်ꩻလွုမ်ꩻသွူ။ ညဖြာꩻဖြာꩻ အပိုပေႏနဝ်ꩻ အွဉ်ႏဖျင်ဝင်ꩻကျောင်ꩻ၊ ပြောင်ꩻဖျင်ကျောင်ꩻလဲ့ အလွင်ꩻဖျင်ဒျာႏ၊ အဒေါ့ꩻဖျင်ဝင်ꩻကျောင်ꩻ အမဉ်ꩻတဟဝ်တဝ်းအကျောင်ꩻနဝ်ꩻတဲင် အခင်ႏလမ်း ကွဲးဆေꩻဆေ့ꩻ၊ ကွဲးအဲဉ်ႏဉ်ႏတဲင် သဲင်ꩻတွိုႏချာ အဗွေႏဗွန်ထျꩻ၊ ဗွေႏဗွန်လဲ့ စင်းမာꩻတဝ်း သမ်းထွာဒျာႏ အကျောင်ꩻတကာႏကိုတဲင် တနစ်သက်တဝ်း' သဖော်ꩻတလꩻတဝ်းလဲ့ အွဉ်ႏဗာႏဖျင်ဒျာႏ၊ လက်ခံႏချာဗာႏဖျင်ဒျာႏနဝ်ꩻသွူ။ မီႏထောက်နုဲင်း ကထွာပုံႏနဝ်ꩻလဲင်ႏခါ ကထွာဗာႏဗွေႏဗွန်၊ ကပွေါးဖေႏပါꩻကျောင်ꩻနဝ်ꩻ သꩻဆွာꩻလယ်ႏတောႏတောႏတန်ႏန်ႏနဝ်ꩻ တထွာတဝ်းဒျာႏရင်ꩻင်ꩻနဝ်ꩻ ထင်ႏသျာꩻငါႏနဝ်ꩻသွူ။ ကသဲꩻခံႏထွူနုဲးနဝ်ꩻလဲ့ ညဖြာꩻဖြာꩻနဝ်ꩻ ထင်ႏထုမ်ႏရန်ႏစွဉ်ႏဗွေႏဗွန်လဲ့ အဝ်ႏနဝ်ꩻသွူ။ ကွပ်နဝ်ꩻမꩻ ဗွေႏဗွန်သီးအမျိုꩻယိုနဝ်ꩻ သယ်ꩻခံႏမုꩻတရာꩻ သာမညတမွေးတဝ်း၊ လိုꩻပေႏအဆုဲင်ꩻဖုံႏယိုနဝ်ꩻ ကအီႏထွာဗာႏဗွေႏဗွန်နဝ်ꩻ ဟွုန်းငမ်းငါႏငါႏနဝ်ꩻသွူ။[၁][၂]

အာႏကွိုꩻ[မွဉ်းဖျင် | မွဉ်းဖျင်အရွီးခိုႏ]

  1. စင်ꩻတန်ဓမ္မသာမိတဲမ်း
  2. အမာႏအဝ်ႏမꩻ ပျုပျင်ႏလꩻ