လွောင်ႏဗူႏညီႏသွို အဝ်ႏလိုႏလဲဉ်း ပအိုဝ်ႏ

လွောင်ႏဗူႏညီႏသွို အောဝ်ႏလိုႏလဲဉ်း”ပအိုဝ်ႏ”

”လွောင်ႏဗူႏ ဖြွမ်းထွာပိုႏ” ”အောင်ႏထူႏ ယမ်းကာတွိုႏ” ကောဝ်ႏထွန်ႏထျꩻယို နီပအိုဝ်ႏပိုလီꩻသီး အောဝ်ႏလိုႏငီႏလဲဉ်းသွူကွေး ။ ”ယံပဲင်ႏနုဲင်း ခမ်းနယ်ႏ” ”တန်ဆဲင်ႏကုဲင်း နမ်းကယ်ႏ” ပအိုဝ်ႏပိုပငါရာꩻ စွုမ်ႏဖြာꩻဖြာꩻ,သွꩻရုဲင်းဖက်သီးဖုံႏဟွေး ”ခေးပြဲင်ႏ”ပါꩻဖေႏကလꩻ နဲစ်ထောင်ငါလွဉ်ꩻပါꩻခေတ် ဖေႏကထွꩻနောဝ်ꩻ လွောင်ႏဗူႏ,ဖြွမ်းငီႏ တသွီႏယာႏချင်ႏ လိုႏလဲဉ်းသွူကွေး။

ပအိုဝ်ႏခမ်းကောင်,ပအိုဝ်ႏခမ်းဒွမ် တွမ်ႏခွယ်ꩻချာꩻလွဉ်ထဲင်းမွိုန်းဒွုမ် အွဉ်ႏသꩻ”ဗန်ဗန်သန်သန်သွင်ႏ” ရုဲင်းရုဲင်းဟန်ဟန် အွဉ်ႏသꩻ”ယံယံတန်တန်တွင်ႏ”တွော့ꩻ ပအိုဝ်ႏမူႏ/ခိုသီး နွို့စွဲးပင်ႏခွုမ်နက် မာꩻငီꩻသွိုခန်း စွိုးခွိုꩻပအိုဝ်ႏလုဲင်း ။ ”သꩻရက်ခွိုꩻ အွဉ်ႏ” ”လွꩻဖက်မျိုꩻ ဗွဉ်ႏ”ဝေါင်းနုဲင်ႏထိုꩻညာꩻညာꩻဆောင်း ခွိုꩻအလောင်း မျတ်တာႏဝွန်ႏ တွမ်ႏနမ်းရဲင်ꩻအာႏ အောဝ်ႏလိုႏနွန်ႏထွာႏကိုငါႏ ပအိုဝ်ႏမူႏ/ခို လိုꩻအာသီးတဖုံႏဖင်ႏဟွေး။ ”လွောင်ႏဗူႏမꩻ ခေးပြဲင်ႏပါꩻလꩻ” ”ဖြွမ်းဗူႏမꩻ နဲစ်လွဉ်ပါꩻထွꩻ”ကွေးပအိုဝ်ႏ လွောင်ႏဗူႏချိန်ႏတွိုႏ လိုႏအုံပိုႏဖွီထဲင်းဒွုမ် တွမ်ႏစူစေႏ,စူထွေ ခွုမ်ဆွန်ꩻသွိုငီႏဝင်ꩻတွော့ꩻ အောဝ်ႏလိုႏဖောႏအွော့ꩻလန် ထူႏရိမ်ချာယင်းလဲဉ်း နီ”ပအိုဝ်ႏခမ်းထီတန်,ပအိုဝ်ႏခမ်းနယ်ႏယံ”အကျောင်ꩻ တွမ်းငေါဝ်းထီနွိုးနွိုး တဲ့ꩻခေါဝ်းသွီႏယာႏတွော့ꩻ လောဝ်းဒေါ့ꩻတမာဟွိုန်ထေ့ဗာႏ ပအိုဝ်ႏမူႏ/ခိုသီးသွူ။