သက်ဖေႏကဆွာꩻ

အဝ်ႏ ဝီခီပီးဒီးယား ကို

သက်ဖေႏကဆွာꩻ လိုႏနမ်းကျင်ꩻတရာꩻ[မွဉ်းဖျင် | မွဉ်းဖျင်အရွီးခိုႏ]

နီဗွေႏဘုရာꩻ ကဟော်ꩻခါꩻဒါႏ လောကစီꩻပွါꩻချံꩻသာႏအီ အကျောင်ꩻ (၃၈)ပါꩻ မင်္ဂလာႏတရာꩻ ဂါႏထာႏပေါင်ꩻတဆီအကို ပဉ္စမဂါႏထာႏနဝ်ꩻ နုဲင်းလယိုအတွိုင်ꩻသွူ။ - ဒါနဉ္စ ဓမ္မစရိယာ စ၊ ဉာတကာနဉ္စ သင်္ဂဟော။ အနဝဇ္ဇာနိ ကမ္မာနိ၊ ဧတံ မင်္ဂလ မုတ္တမံ။

ပဉ္စမဂါႏထာႏ မင်္ဂလာႏတရာꩻ(၄)ပါꩻ[မွဉ်းဖျင် | မွဉ်းဖျင်အရွီးခိုႏ]

(၁) စွဉ်ꩻကြယ်ꩻစာႏဂ ဖေႏဖလူႏတန်ꩻ၊ (၂) အကျင်ꩻဟဝ်မျတ် သုစရဲက်တရာꩻဖုံႏယို အုံအဝ်ႏကျင်ꩻသုင်ꩻ၊ (၃) ခီႏမျောက်ထောက်ပံးဗာႏ ဖူးဝေးသွꩻဟဝ်၊ (၄) မာꩻဒျာႏ အပဲစ်တအဲဉ်ထဝ်း ဟဝ်မျိုꩻ။ မင်္ဂလာႏတရာꩻ ယို(၄)ပါꩻအကို အမုဲင်(၂)မင်္ဂလာႏတရာꩻနဝ်ꩻ "အကျင်ꩻဟတ်မျတ် သုစရဲက်တရာꩻဖုံႏယို အုံအဝ်ႏကျင်ꩻသုင်ꩻ"ရိုꩻနုဲင်းနဝ်ꩻတဲင် လိုꩻကျင်ꩻသုင်ꩻ သုစရဲက်တရာꩻဖုံႏတွော့ꩻ သက်ထိုစိုးဆွာꩻဗာႏ ဝွတ္ထုသက်သေႏယို တဲမ်းနယ်လွေꩻဗာႏ နုဲင်းငါယိုအတွိုင်ꩻသွူ။

သက်ဖေႏကဆွာꩻ လိုႏနမ်းကျင်ꩻတရာꩻ[မွဉ်းဖျင် | မွဉ်းဖျင်အရွီးခိုႏ]

ပွိုင်းလဲင်ႏစခါ ကာသိတုံးကိုနဝ်ꩻ ဓမ္မပါလကမဉ်ꩻဒါႏ ဒုံတန်အဝ်ႏတဒုံသွူ။ ဓမ္မပါလဒုံသားဖုံႏနဝ်ꩻ ဒါႏန၊ သီႏလ၊ ဘာႏဝနာႏစတဲင် ကုသိုလ်ႏတရာꩻဖုံႏယို အဝ်ႏသေနန်းယူႏလꩻဒျာႏ သေႏသေႏသွူ။ ဓမ္မပါလဒုံကိုနဝ်ꩻ မဟာဓမ္မပါလ အမဉ်ꩻကအဝ်ႏဒါႏ ပုဏ္ဏာꩻတန် အဝ်ႏတဖြာꩻသွူ။ ပုဏ္ဏာꩻတန်နဝ်ꩻ ပိုခိုအဝ်ႏတဖြာꩻ၊ မဉ်ꩻဒျာႏ ဓမ္မပါလနေနေသွူ။ မောင်ႏဓမ္မပါလယို အခိန်ႏသွောန်ပညာႏ ကထွိုင်ႏတွိုႏနဝ်ꩻ အဖါပသာလွေꩻခန်းဒျာႏ တက္ကသိုလ်ႏခမ်း ဒိသာပါမောက္ခ ဆရာႏတန်ထျꩻသွူ။ ဖေႏလွေꩻပါတောမ်ႏ အသပျာႏရွောန်တရေင်၊ အွဉ်ႏလွေꩻလူႏဆရာႏတန်သွူ။ မောင်ႏဓမ္မပါလ ထွိုင်ႏတွိုႏလွေꩻ ဒိသာပါမောက္ခဆရာႏတန်ထျꩻနဝ်ꩻ ကောပ်ရိုꩻသာꩻလိန်ႏမာႏ ကျိုꩻစာꩻပညာႏတဲင် တညတဝ်း ဆရာႏအွဉ်ႏထွာခန်းဒျာႏ တပဲ့ꩻတန်၊ အိုပ်ချုက်ချာဗာႏကျောင်ꩻသားငတ်ꩻရျာꩻသွူ။ တွိုႏတနီꩻတွော့ꩻ ဒိသာပါမောက္ခဆရာႏ ပိုတန်တဖြာꩻနဝ်ꩻ အနိစ္စခန္ဓာႏပြောင်ꩻလွေꩻခန်းဒျာႏသွူ။ ထွိုင်ႏသင်္ဂျိုဟ်ႏလွေꩻဆရာႏတန်ပို သင်ႏခဲင်ꩻကိုနဝ်ꩻ ဝင်ꩻလင်နဝ်ꩻ ငွိုးလွထာꩻ ပငါပရာꩻလဲ့ မောင်ႏဓမ္မပါလနဝ်ꩻ ငွိုးတဝ်းနုဲင်းဝင်ꩻသွူ။ အဝ်ႏသင်ႏခဲင်ꩻ ထွိုင်ႏတွိုႏသဲင်ꩻလံးနဝ်ꩻ "သွꩻဖုံႏဟွေး- ဆရာႏတန်ပိုနဝ်ꩻ ကျင်ꩻလဲ့ကဟဝ်၊ သက်အရွယ်ႏ အဝ်ႏပေႏနေဒွိုန်းလဲ့ သိထိုꩻတေားလဲန်း"ဆရာႏတန်တပဲ့ꩻဖုံႏနဝ်ꩻ ဒေါ့ꩻလွဝင်ꩻနုဲင်းနဝ်ꩻသွူ။ တွိုႏနဝ်ꩻတွော့ꩻ မောင်ႏဓမ္မပါလနဝ်ꩻ သေနာႏတဝ်းအခရာႏတဲင် ရီခန်းအသွꩻလင်ဖုံႏသွူ။ "သွꩻဖုံႏဟွေး- သက်ရွယ်ႏအဝ်ႏပေႏတွင်ꩻနဝ်ꩻ တဟဝ်သီတဝ်းဒွိုန်းလဲ့ ပွိုးထာꩻမုဲင်ꩻသီဗာႏတွိုႏဟောင်း" "သွꩻဓမ္မပါလဟွေး- သတ္တဝါႏသီးယိုနဝ်ꩻ သီဗာႏဒျာႏလွဉ်းလွဉ်းကရိုꩻနဝ်ꩻ နာꩻသေတဝ်းဟောင်း" "သွꩻဖုံႏဟွေး- ခွေအဝ်ႏသေဒျာႏ၊ ကွယ်ႏတွော့ꩻ နီဒုံနဝ်ꩻ သီပေႏသီဆားထာꩻ အဝ်ႏဖိုတဝ်း၊ ဖြားမꩻ သီလွဉ်းလွဉ်းသွူ" မောင်ႏဓမ္မပါလတောမ်ႏ အသွꩻကျောင်ꩻသားဖုံႏ အဝ်ႏဒေါ့ꩻရီလို့ဝင်ꩻနုဲင်းယိုနဝ်ꩻ တဲႏအထျꩻဗꩻအနာ ဆရာႏတန်အဝ်ႏဟွုန်လို့လို့ဒျာႏသွူ။ ဆရာႏတန်နဝ်ꩻ ဟဲ့ꩻလွဉ်မောင်ႏ ဓမ္မပါလတွော့ꩻ- "မောင်ႏဟွေး- သီဒုံနဝ်ꩻ သီပေႏသီဆားထာꩻအဲန်ထဝ်းကရိုꩻနဝ်ꩻ မွေးဒျာႏနဲ့"ရီသံးခန်းနုဲင်းနဝ်ꩻသွူ။ မောင်ႏဓမ္မပါလလဲ့ "မွေးဒျာႏဆရာႏဩ"ဖြေႏချာခန်းနုဲင်းနဝ်ꩻ။ ဆရာႏတန်နဝ်ꩻ "မောင်ႏဓမ္မပါလယို ဒေါ့ထူꩻဆန်ꩻမွေးထာꩻဟွေး၊ မွေး- တမွေးတဝ်း၊ ခွေလွေꩻရီက ဝွေꩻသီးဖါနဝ်ꩻမꩻ၊ မီႏမွေးလဲ့ ခွေရီပါက အတသီႏသက်ဆွာꩻနဝ်ꩻမꩻ"ယူႏခန်းနုဲင်းနဝ်ꩻသွူ။ တွိုႏနဝ်ꩻတွော့ꩻ ဆရာႏတန်နဝ်ꩻ ဒေါ့ꩻဖေႏခန်း မောင်ႏဓမ္မပါလနုဲင်းယို "မောင်ႏဟွေး- နာꩻငဝ်း မွေးတမွေးတဝ်း၊ ခွေအီႏရီသီဖါ၊ ခွေအဲန်ထဝ်းတွင်ꩻယို ထွားထိန်ꩻအိုပ်ချုက်သွူကျောင်ꩻသားဖုံႏတွော့ꩻ သွောန်ဖေႏပါအလိတ်နေား" ဆရာႏတန်နဝ်ꩻ တောင်းပွိုကို သော့ꩻတောမ်ႏဗဲဆွတ်ꩻတလီးတဲင် ထန်ႏလွေꩻခန်းဒျာႏနဝ်ꩻသွူ။ ထွိုင်ႏတွိုႏမောင်ႏဓမ္မပါလသီးဒုံနဝ်ꩻ မောင်ႏဓမ္မပါလသီးဖါ မဟာဓမ္မပါလ ပုဏ္ဏာꩻတန်နဝ်ꩻလဲ့ သꩻရောင်းသꩻရေꩻ ကျိုႏဆွုမ်ႏဒျာႏသွူ။ ဒေါ့ꩻရီအွီႏအွီႏလွူးတဲင်စာႏဂဆွုမ်ႏဒျာႏ ဟဝ်ဟဝ်ဒါႏဒါႏသွူ။ ဒေါ့ꩻရီလွဝင်ꩻ ငဝ်းအွီႏငွါသာႏထွိုင်ႏထွူနဝ်ꩻ "ပုဏ္ဏာꩻတန်ဟွေး- နာꩻပိုမောင်ႏဓမ္မပါလနဝ်ꩻ နာꩻပိုမောင်ႏဓမ္မပါလနဝ်ꩻ ဉာဏ်ႏဟဝ်ငါႏ၊ ပေႏတင်ႏသိုမ်သုံꩻတောမ်ႏ ထာꩻဒါႏပညာႏ (၁၈)မျိုꩻယို သွဉ်ဒါႏလို့လဲန်း၊ ကွယ်ႏတွော့ꩻ ဆာတန်ထာꩻတဲင် သီထိုꩻလဲန်းသွူ"ဆရာႏတန် ဒေါ့ꩻဖေႏခန်း မောင်ႏဓမ္မပါလသီးဖါနုဲင်းနဝ်ꩻသွူ။ တွိုႏနဝ်ꩻတွော့ꩻ ပုဏ္ဏာꩻတန် ကွဉ်းကသꩻကအီႏပေႏနဝ်ꩻ တဗꩻစူတွော့ꩻ ငသင်ႏထဲင်းစွဉ်ႏထာꩻသွူ။ "ဆရာႏဖြားဟွေး- ခွေသွဉ်းပိုနဝ်ꩻ တသီနွောင်ꩻတဝ်း၊ အမျိုꩻဆာတန်ထာꩻလဲ့ တမွေးတဝ်း၊ အလွိုးလိုꩻလင်ပိုဒျာႏကွေး"ရိုꩻဖေႏခန်း ဆရာႏတန်နုဲင်းနဝ်ꩻ။ "ယွုမ်းတဝ်းနဲ့ ဖြားပုဏ္ဏာꩻ၊ ယိုနာꩻပိုဆွတ်ꩻ"ရိုꩻသွူနုဲင်းနဝ်ꩻတဲင် ဆရာႏတန် ထေနယ်ခန်း ထာꩻဆွတ်ꩻတောင်းပွိုကိုသွူ။ "ဆရာႏတန် ထာꩻဆွတ်ꩻနဝ်ꩻ ခွေပိုဆွတ်ꩻတမွေးတဝ်း၊ ဗဲဆွတ်ꩻထွီႏဆွတ်ꩻဒျာႏမတဝ်၊ ခွေပိုဓမ္မပါလနဝ်ꩻ တသီနွောင်ꩻတဝ်း၊ နီခွိုꩻနဝ်ꩻ (၇)ဆက်လဲန်းသွူ။ သီပေႏဆာႏထာꩻတအဝ်ႏတဝ်းဖြာꩻဖြာꩻ၊ နာꩻတောမ်ႏအဝ်ႏဒေါ့ꩻလဲန်ပုဲင်ႏထာꩻ"ပုဏ္ဏာꩻတန်ဒေါ့ꩻထဲင်းနုဲင်းနဝ်ꩻ၊ ပုဏ္ဏာꩻဖြားထွိုင်ႏဒေါ့ꩻနုဲင်းနဝ်ꩻနဝ်ꩻ လိုꩻအသောင်အရင်ꩻဖုံႏလဲ့ တဗꩻစူငရောင်စွဉ်ႏထာꩻသွူ။ တွိုႏနဝ်ꩻမꩻ ဒိသာပါမောက္ခ ဆရာႏတန်နဝ်ꩻ ကွဲးဒေါ့ꩻစွဉ်ႏယင်း၊ မောင်ႏဓမ္မပါ်လ တသီတဝ်းအကျောင်ꩻ၊ ဒုံကိုနဝ်ꩻ လိုꩻသီပေႏသီဆာႏထာꩻ ကတအဲန်ထဝ်းအကျောင်ꩻယို မဲန်သေတွော့ꩻ လွဉ်ရီစောႏတနာႏဒျာႏအကျောင်ꩻ ခြုဲင်းနယ်ထွူတဲင် ရီသံးပါခန်း သက်ထိုစိုးဆွာꩻအီအကျောင်ꩻတရာꩻဖုံႏသွူ။ ပုဏ္ဏာꩻတန်လဲ့ "ဆရာႏတန်ဟွေး- နီနဝ်ꩻ နမ်းကျင်ꩻတရာꩻအဝ်ႏလွဒျာႏ ပငါပရာꩻ၊ ထာꩻတဟဝ်တဝ်း ဒုစရဲက်မျိုꩻယို နီတမာꩻတဝ်း၊ လိုꩻမွိုက်တရာꩻလဲ့နဝ်ꩻ လိုꩻဟဝ်သူႏတောႏကောင်ꩻတရာꩻလဲ့နဝ်ꩻ နီနာႏလို့လို့ဒျာႏ၊ ကွယ်ႏတွော့ꩻ လိုꩻမွိုက်တရာꩻနဝ်ꩻ နီတကျင်ꩻသုင်ꩻတဝ်း၊ နီကျင်ꩻသုင်ꩻဒျာႏ လိုꩻဟဝ်တရာꩻလွုမ်ꩻ"။ "နီလူႏထာꩻယို ခါးလားကလူႏလဲ့ သꩻရေꩻနေစ်သက်၊ လူႏထွူလဲ့ သꩻရေꩻနေစ်သက်၊ လူႏထွူနဝ်ꩻ နီတလောက်ꩻကာႏတဝ်း ရဟန်ꩻ၊ ပုဏ္ဏာꩻ၊ လွေꩻတဖူꩻသား၊ ထာꩻကွီႏအံႏသား-စတဲင် လိုꩻအမျိုꩻမျိုꩻဖုံႏယို ဒဲန်ဟန်ႏစတဲင် အံႏအွꩻသုင်ꩻဆောင်ႏခရာႏဖုံႏလဲ့ နီစွဉ်ꩻကြယ်ꩻစာႏဂ ဖေႏဖလူႏတန်ꩻဒျာႏသွူ" "ဝင်ꩻသက်လဲ့ နီတမာꩻသီတဝ်း၊ ဝင်ꩻတခြိုꩻဥစ္စာႏလဲ့ နီတထူႏတခွန်ꩻတဝ်း၊ ဝင်ꩻပိုဝါꩻလဲ့ နီတပဲစ်မာႏတဝ်း၊ ငဝ်းတမွေးတဝ်းလဲ့ နီတဒေါ့ꩻတဝ်း၊ ဒဝ်ထီသူႏရာႏလဲ့ နီတအွꩻတဝ်း၊ တဲႏစွဉ်ႏမွိုးဖါ ဗꩻလင်ꩻပိုလီꩻ သွဉ်းသယ်ႏချွေႏရံႏကအစ လိုꩻနီဒုံယိုနဝ်ꩻ နမ်းကျင်ꩻတရာꩻမဲန်ႏဒျာႏ ပငါပရာꩻ၊ ကောပ်နဝ်ꩻမꩻ အီႏသီပေႏသီဆားထာꩻ တအဲန်ထဝ်း"မဟာဓမ္မပါလ ပုဏ္ဏာꩻတန်နဝ်ꩻ ခြုဲင်းနယ်ဖေႏခန်း ဒိသာပါမောက္ခဆရာႏတန် နုဲင်းနဝ်ꩻသွူ။ ထွိုင်ႏဟွုန်ဗာႏ ပုဏ္ဏာꩻတန်ငဝ်းနုဲင်းယိုနဝ်ꩻ ဒိသာပါမောက္ခ ဆရာႏတန်လဲ့ နေစ်သက်သꩻရေꩻမွေးစွဉ်ႏထာꩻသွူ။ ပုဏ္ဏာꩻတန် ကဒေါ့ꩻဒါႏငဝ်းဖုံႏယို မဉ်ႏအဝ်ႏတဖေင်ꩻလဲ့ ထွားချာဖေႏကလꩻ၊ ဖေႏကအုံအဝ်ႏကျင်ꩻသုင်ꩻလွဉ်ꩻနဝ်ꩻ တဲမ်းမတ်သေႏချောင်းသေႏချာႏစွဉ်ႏ လိတ်အုပ်လိတ်ပပ်ကိုသွူ။

ဥပဒေသ[မွဉ်းဖျင် | မွဉ်းဖျင်အရွီးခိုႏ]

ဓမ္မပါလဒုံတန်နဝ်ꩻ အုံအဝ်ႏကျင်ꩻသုင်ꩻ အကျင်ꩻဟဝ်မျတ် သုစရဲက်တရာꩻဖုံႏတဲင် ဝွေႏဒနာႏရောႏဂါႏကင်ꩻ အုံဟဝ်ခြွိုင်ႏသန်ꩻ သီပေႏသီဆားထာꩻအဲန်ထဝ်းသွူ။[၁][၂]

အာႏကွိုꩻ[မွဉ်းဖျင် | မွဉ်းဖျင်အရွီးခိုႏ]

  1. ခွန်ကုဝေ-မုဲင်းကောင်
  2. ခမ်းသားငဝ်း အမုဲင်-၇၊ အစဲဉ်ႏ-၈၆