သဌေꩻမာဝတ္ထု
"သဌေꩻမာဝတ္ထု(ကတူႏဆာကဟဝ်ထိုꩻဗာႏကျောင်ꩻ၊ ယားကုဲင်ပျင်ႏတဝ်းရွဉ်ခံꩻအကျောင်ꩻ"
ဝေင်ꩻသာကေတကို သဌေꩻမာမူႏတဖြာꩻနဝ်ꩻ ကဆူႏဆာ လꩻနွုတ်ꩻနေင်ႏ၊ ဆရာႏတန်ဖုံႏ လွမ်ꩻလာꩻကားမုဲင်ꩻဖြာꩻဖြာꩻ ဟောဝ်တဝ်း၊ အဝ်ႏဆရာႏသီး ကလꩻသဲင်ꩻ စူဟွာႏခꩻဖုံႏနဝ်ꩻလွုမ်ꩻသွူ။ ဆရာႏဇီဝကတဲ့ ဖျော်လွဉ် ဝေင်ꩻသာကေတကို၊ ဝွေꩻရီလိုꩻဆာ၊ ပါꩻထွဉ်ႏလွေꩻ သဌေꩻလမ်း၊ ဝွေꩻတွိုႏလွေꩻသဌေꩻလမ်း၊ ဝွေꩻအွဉ်ႏဒေါ့ꩻ ပွေါတခါꩻသား၊ ဝွေꩻအီႏလွမ်ꩻလာꩻဖေႏ သဌေꩻမူႏကတူႏဆာ၊ ပွေါတခါꩻသား လွေꩻဒေါ့ꩻသဌေꩻမာ၊ သဌေꩻမာရီချာ- "ဆရာႏနဝ်ꩻ အရွယ်ႏတန်နဲ့ အရွယ်ႏဖြားနဲ့ အရွယ်ႏပေႏဆားနဲ့" "အရွယ်ႏပေႏပေႏလွုမ်ꩻ ဗွေႏမူႏ" "ဆရာႏတန်ဖုံႏ လွမ်ꩻလာသွူမဉ်ႏတဲ့ တဟောဝ်တဝ်းဟ ဆရာႏပေႏလွမ်ꩻလꩻနဝ်ꩻ အမျိုꩻအီႏဟောဝ်နဲ့၊ ဖေႏဗဲင်းခင်ႏခꩻ ထွဉ်ႏကျွꩻချာထိုꩻခန်း ယိုခါခါနော" ဆရာႏဇီဝကရိုꩻ- "ရောႏဂါႏမဉ်ႏဟဝ်မꩻ ထူႏစူဟွာႏခꩻ၊ ပေါႏတဟောဝ်တဝ်းနဝ်ꩻ တထူႏခြေင်တဝ်း နုဲင်းဆရာႏတန်ဖုံႏနဝ်ꩻ" ထွိုင်ႏအာႏမခံႏခြေင်းခြဲ့နုဲင်းနဝ်ꩻမꩻ သဌေꩻမာစူꩻယင်း၊ အီႏဖောႏအီတသီႏ ထွဉ်ႏထူႏလွဉ်ထောပတ် ထဝဝန်ႏနေင်းထီရပ်နောဝ်ꩻသွူ။ ဆရာႏဇီဝက ဖောႏတသီႏတွမ်ႏ ထောပတ်ထွူတဲင် ထောပတ်နဝ်ꩻ ဖေႏအွꩻနေးယင်ဟန်ႏ၊ ထွဉ်ႏတရေ့ꩻနေးယင်ဟန်ႏ၊ အုံတဆင်ႏတွော့ꩻ သဌေꩻမာဖြားဖြော့ꩻစွဉ်ႏထာꩻ၊ ဖြော့ꩻသော့ꩻဆွေႏအင်ႏ၊ ထောပတ်ကဖဲင်းဖင်းထိုꩻဖုံႏနဝ်ꩻ ထွဉ်ႏအသွဉ်းမူႏ ဒွုတ်ꩻထူႏဟောဝ်တွမ်ႏဖုဲင်၊ ဆရာႏဇီဝကလွိုး တကုဲင်စွဉ်ႏဒျာႏ။ "ဆရာႏလွိုး မတကုဲင်တွိုး၊ ကွပ်ပွိုးထမုဲင်ꩻ"သဌေꩻမာရီနုဲင်းနဝ်ꩻ။ "ခွေတသီႏဖုံႏနဝ်ꩻ တသီႏအငိုꩻကားစားဖုံႏဒျာႏ၊ နုဲင်းကွို့ꩻထောပတ်စျꩻခွို့၊ ထောပတ်ဖြော့ꩻယိုမဉ်ႏတဲ့ အဝ်ႏလောႏကာႏဟ ရွဉ်ထဲင်း ယိန်းလောႏကာႏ၊ အမျိုꩻဖေႏဗွေခွေ စူဟွာႏခꩻတမွေးတဝ်း ခွေယူႏနုဲင်းနဝ်ꩻ' "ယူႏမွုန်းနုဲင်းနဝ်ꩻ ဆရာႏပေႏ- ခွေဖေႏဗွေဗွေဒျာႏနာꩻ၊ ထောပတ်ယိုနဝ်ꩻ သော့ꩻဝန်ႏတေ့ꩻကို၊ ဖုဲင်ယို မာꩻမေႏဆာႏ တဲစ်ꩻမွိုင် ထွာမေႏတေန်ꩻတဝန်ႏသနယ်၊ ပေါႏသွုံꩻအဝ်ႏလꩻနေနေတမျိုꩻမျိုꩻနဝ်ꩻ ဝေါင်းကုဲင်ထိုꩻမွုန်း၊ သွုံꩻလို့လို့ဗာႏ၊ ရွဉ်ခံꩻတဲ့ အမျိုꩻကလို့မꩻလို့၊ ယားပျင်ႏပိန်ႏထိုꩻနဝ်ꩻ ခြွေတဝ်း၊ ဒုက္ခ" သဌေꩻမာ ဖေႏဝွေꩻပညာႏနုဲင်းနဝ်ꩻ၊ "ထောပတ်လယ်ႏကွို့ꩻလွုမ်ꩻမဉ်ႏတဲ့ ဝင်ꩻတယားပျင်ႏတဝ်း၊ ရွဉ်ခံꩻထဲင်းဟ အမျိုꩻယားပျင်ႏမွေးတဝ်း၊ နဝ်ꩻမꩻ ကခြွေငါႏ"ဆရာႏဇီဝက လꩻခန်းဒျာႏ ထာꩻခြွေနယ်ꩻတနယ်ꩻနဝ်ꩻသွူ။ ဝွေꩻလွမ်ꩻလာꩻဟောဝ်တဲင် လꩻရွဉ်တသောင်ႏသူရေင်တွမ်ႏ သွဉ်းမူႏတဖြာꩻ၊ သွဉ်းခိုတဖြာꩻ၊ သေလာလာꩻတဆွိုင်ꩻနောဝ်ꩻသွူ။(ဝိနယ၊ မဟာဝဂ္ဂပါဠိတောႏ၊ စီဝရက္ခန္ဓက)[၁][၂]