သဒ္ဓါႏအဝ်ႏသား အခွင်ꩻအရေꩻ
"သဒ္ဓသုတ် (လိုꩻသဒ္ဓါႏတရာꩻအဝ်ႏသား လꩻရီးအခွင်ꩻအရေꩻငတ်ꩻမျိုꩻ-အကျိုꩻငတ်ꩻစား)" နီဗွေႏဘုရာꩻဟော်ꩻဖေႏ ဗွေႏရဟန်ꩻသီး တရာꩻနုဲင်းယို- ရဟန်ꩻသီးဖုံႏဟွေး- လိုꩻသဒ္ဓါႏတရာꩻ ကအဝ်ႏသားနဝ်ꩻ လꩻရီးအခွင်ꩻအရေꩻငတ်ꩻမျိုꩻ-အကျိုꩻငတ်ꩻစား၊ ငတ်ꩻမျိုꩻကရိုꩻနဝ်ꩻ- ရဟန်ꩻသီးဖုံႏဟွေး- ၁။ လောကကိုယို သွုန်ႏသꩻစင်ဗွာ ကထွာသူႏတောႏကောင်ꩻသီးဖုံႏနဝ်ꩻ မဉ်ႏအဝ်ႏလိုႏပင်ႏထို၊ အဗာႏမဉ်ႏလိုႏသညင်ꩻနဝ်ꩻ ပင်ႏထိုရီးရီးဒျာႏ၊ သညင်ꩻရီးရီးဒျာႏ လိုꩻသဒ္ဓါႏတရာꩻအဝ်ႏ၊ လိုꩻသဒ္ဓါႏတရာꩻ တအဲဉ်ထဝ်းသားနဝ်ꩻ ပင်ႏထိုရီးတဝ်း-သညင်ꩻရီးတောဝ်းနောဝ်ꩻသွူ။ ရဟန်ꩻသီးဖုံႏဟွေး- ၂။ လောကကိုယို သွုန်ႏသꩻစင်ဗွာ ကထွာသူႏတောႏကောင်ꩻသီးဖုံႏနဝ်ꩻ မဉ်ႏအဝ်လိုႏလွေꩻထေ့နောဝ်ꩻ လွေꩻထေ့ရီးဒျာႏ သဒ္ဓါႏတရာꩻအဝ်ႏသား၊ သဒ္ဓါႏတရာꩻ တအဲဉ်ထဝ်းသားနဝ်ꩻ လွေꩻထေ့ရီးတဝ်း။ ရဟန်ꩻသီးဖုံႏဟွေး- ၃။ လောကကိုယို သွုန်ႏသꩻစင်ဗွာ ကထွာသူႏတောႏကောင်ꩻသီးဖုံႏနဝ်ꩻ မဉ်ႏအဝ်လိုႏလူႏခံႏနောဝ်ꩻ လူႏခံႏရီးဒျာႏ သဒ္ဓါႏတရာꩻအဝ်ႏသား၊ သဒ္ဓါႏတရာꩻ တအဲဉ်ထဝ်းသားနဝ်ꩻ လူႏခံႏရီးတောဝ်း။ ရဟန်ꩻသီးဖုံႏဟွေး- ၄။ လောကကိုယို သွုန်ႏသꩻစင်ဗွာ ကထွာသူႏတောႏကောင်ꩻသီးဖုံႏနဝ်ꩻ မဉ်ႏအဝ်လိုႏဟော်ꩻဖေႏတရာꩻနဝ်ꩻ ဟော်ꩻဖေႏရီးဒျာႏ သဒ္ဓါႏတရာꩻအဝ်ႏသား၊ သဒ္ဓါႏတရာꩻ တအဲဉ်ထဝ်းသားနဝ်ꩻ ဟော်ꩻဖေႏရီးတဝ်း။ ရဟန်ꩻသီးဖုံႏဟွေး- ၅။ လောကကိုယို သွုန်ႏသꩻစင်ဗွာ ကထွာသူႏတောႏကောင်ꩻသီးဖုံႏနဝ်ꩻ ခန္ဓာႏကုဲင်လီ မဉ်ႏသီသူꩻနောဝ်ꩻ တွိုႏကီထင်ႏဒျာႏ လူꩻခမ်းသူꩻသွူ။ ရဟန်ꩻသီးဖုံႏဟွေး- ဥပမာႏ-တဖူꩻလစ်ꩻလီးဆွုမ်ႏ ကအဝ်ႏဒါႏ ညောင်ႏမွူးတန်တမွူးနဝ်ꩻ လစ်ꩻဖဲ့ꩻသွစ်ꩻနား ထွာဝါးသီးဖုံႏ လွဉ်အုံပြုံႏ၊ လွဉ်အုံကွူႏ၊ လွဉ်အုံရျူႏနောဝ်ꩻသွူ။ အနုဲင်းနဝ်ꩻနေနေ- လိုꩻခြွေ သဒ္ဓါႏတရာꩻသားဖုံႏနောဝ်ꩻ ထွာရဟန်ꩻသံဃာႏတွမ်ႏ တကာႏလိုꩻလမ်းသီးဖုံႏ ထာꩻအာႏကွိုꩻ (ထာꩻသꩻဆွော့ꩻ) ထာꩻအုံနောင်နောဝ်ꩻသွူ။ လိုꩻသဒ္ဓါႏတရာꩻအဝ်ႏသား တဲဝါးလိုꩻခြွေဖုံႏနောဝ်ꩻ ယွုမ်းအံႏဘုရာꩻ တရာꩻ သံဃာႏ ရတနာႏသွံပါꩻတွမ်ႏ ကံႏ-ကံႏအကျိုꩻတဲင် အားထွုတ်ဗာႏဟောဝ်တရာꩻ၊ မာꩻဗာႏဟောဝ်ကုသိုလ်ႏတွော့ꩻ အီႏလꩻမွိုင်မွိုင်၊ အီႏလꩻယိုꩻယိုꩻ နိဗ္ဗာန်ႏနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ ပဉ္စကနိပါတ်၊ သဒ္ဓသုတ်)[၁][၂]