သမ္ဖပ္ပလာပါဝေရမဏိ
ဗွောင်နယ်သမ္ဖပ္ပလာပါ ဝေရမဏိခရာႏ[မွဉ်းဖျင် | မွဉ်းဖျင်အရွီးခိုႏ]
သမ္ဖ-ငေါဝ်းယားကုဲင် ချမ်ꩻသာႏစီꩻပွါꩻ (ငဝ်းခွဉ်ႏဆေ့ꩻ) ပလာပ-ဒေါ့ꩻ
သမ္ဖပ္ပလာပ-ဒေါ့ꩻငေါဝ်းခွဉ်ႏဆေ့ꩻ[မွဉ်းဖျင် | မွဉ်းဖျင်အရွီးခိုႏ]
"သမ္ဖပ္ပလာပ-ဒေါ့ꩻငေါဝ်းခွဉ်ႏဆေ့ꩻ"ကရိုꩻနောဝ်ꩻ- ၁။ ဒေါ့ꩻတောဝ်း သစ္စဝါႏစာႏ (ဒေါ့ꩻတောဝ်း ငေါဝ်းမွေးငွါမဲဉ်ႏ)၊ ဒေါ့ꩻတောဒျာႏ ငေါဝ်းလိန်ႏငွါလဲဉ်။ ၂။ ဒေါ့ꩻတောဝ်း သုဘာသိတာဝါႏစာႏ (ဒေါ့ꩻတောဝ်း ငေါဝ်းအွီႏငွါနွိုး)၊ ဒေါ့ꩻတောဒျာႏ ငေါဝ်းတရီ ငွါခါႏ။ ၃။ ဒေါ့ꩻတောဝ်း ပိယဝါႏစာႏ (ဒေါ့ꩻတောဝ်း ငေါဝ်းရက်ငွါပဲင်ꩻ)၊ ဒေါ့ꩻတောဒျာႏ ငေါဝ်းဗွိုႏငွါစန်း။ ၄။ ဒေါ့ꩻတောဝ်း ငေါဝ်းဓမ္မကထာႏ (ဒေါ့ꩻတောဝ်း ငေါဝ်းတရာꩻ၊ ဟော်ꩻတောဝ်းတရာꩻ၊ ခြုဲင်းတောဝ်းတရာꩻ)၊ ဒေါ့ꩻတောဒျာႏ ငေါဝ်းသိုႏငွါဖျင်ꩻ။ ၅။ ဒေါ့ꩻတောဒျာႏ တိရစ္ဆာနကထာႏ (ဒေါ့ꩻတောဒျာႏ ငေါဝ်းတလꩻအီတဝ်း မဂ်ဖိုလ်ႏနိဗ္ဗာန်ႏ)။ ဒေါ့ꩻတောဒျာႏ ငေါဝ်းတထွာအီတောဝ်း ထာꩻချမ်ꩻသာႏ၊ ဒေါ့ꩻတောဒျာႏ ငေါဝ်းတထွာအီတောဝ်း အကျိုꩻစီꩻပွါꩻ၊ ဒေါ့ꩻတောဒျာႏ ငေါဝ်းကယားကုဲင်အီဒါႏ ချမ်ꩻသာႏစီꩻပွါꩻ၊ ဒေါ့ꩻတောဒျာႏ ငေါဝ်းအကျိုꩻတအဲဉ်ထောဝ်း- စတဲင်နုဲင်းနောဝ်ꩻဖုံႏနဝ်ꩻ ထွာသမ္ဖပ္ပလာပ အကုသိုလ်ႏကံႏလွဉ်းလွဉ်းသွူ။
ဝေရမဏိ-သျောင်ႏထိုꩻ(ဒေါ့ꩻတောဝ်း)ငေါဝ်းခွဉ်းဆေ့ꩻ"ကရိုꩻနောဝ်ꩻ[မွဉ်းဖျင် | မွဉ်းဖျင်အရွီးခိုႏ]
နမ်း (ကိုႏတဲင်ႏ)တဲ့ ဒေါ့ꩻတောဝ်း ငေါဝ်းခွဉ်ႏဆေ့ꩻ၊ ဝင်ꩻတဲ့ ဝွေꩻတထွဉ်ႏဒေါ့ꩻတောဝ်းငေါဝ်းခွဉ်ႏဆေ့ꩻ၊ မဉ်ႏသေမဉ်ႏဟွိုန် ဝင်ꩻဒေါ့ꩻငေါဝ်းခွဉ်ႏဆေ့ꩻတဲ့ ဆီꩻခါꩻရဲခါꩻ၊ ဖေႏတဝ်းဒေါ့ꩻတဝ်း ငေါဝ်းခွဉ်ႏဆေ့ꩻ၊ ဒေါ့ꩻငေါဝ်းခွဉ်ႏဆေ့ꩻနုဲင်းနဝ်ꩻနဝ်ꩻ သꩻရေꩻတဝ်း၊ သဖော်ꩻတူႏတဝ်း၊ နစ်သက်တဝ်း၊ ဟွိုန်ဟောဝ်တဝ်း၊ ကျွိုက်တဝ်း၊ ပေါႏဒေါ့ꩻငေါဝ်းခွဉ်ႏဆေ့ꩻနဝ်ꩻ ခံႏဗာႏအပဲစ်နုဲင်းယိုနုဲင်းနဝ်ꩻ သွဉ်သင်ဆွုံꩻမꩻ ချꩻနားဖေႏဝင်ꩻ စတဲင်နုဲင်းနဝ်ꩻဖုံႏနဝ်ꩻ ထွာသျောင်ႏထိုꩻ (ထွာဒေါ့ꩻတောဝ်း)ငေါဝ်းခွဉ်ႏဆေ့ꩻနဝ်ꩻသွူ။ ဒေါ့ꩻငေါဝ်းခွဉ်ႏဆေ့ꩻနဝ်ꩻ ဟောဝ်တဝ်း၊ ထွာ သမ္ဖပ္ပလာပ ဒုစရဲက်၊ ထွာအကျင်ꩻဟောဝ်တဝ်း။ ဒေါ့ꩻတောဝ်း ငေါဝ်းခွဉ်ႏဆေ့ꩻနဝ်ꩻ ဟောဝ်၊ ထွာ သမ္ဖပ္ပလာပါ ဝေရမဏိ သုစရဲက်၊ ထွာအကျင်ꩻဟောဝ်နောဝ်ꩻသွူ။
ဟောဝ်တောဝ်းနုဲင်းမုဲင်ꩻ၊ ဟောဝ်နုဲင်းမုဲင်ꩻ"နဲတဲင်[မွဉ်းဖျင် | မွဉ်းဖျင်အရွီးခိုႏ]
လိုꩻကဒေါ့ꩻဒါႏ ငေါဝ်းခွဉ်ႏဆေ့ꩻနောဝ်ꩻ ဝင်ꩻဟဲ့ꩻလိုꩻဟုတ်ꩻလာꩻ၊ ဝင်ꩻဟဲ့ꩻလိုꩻဖုတ်ꩻတလီꩻဆျာႏ၊ ဝင်ꩻဟဲ့ꩻလိုꩻတလီꩻဖွိုင်ꩻ၊ ဒေါ့ꩻစွဉ်ႏငေါဝ်းမွေးငွါမဲဉ်ႏတဲ့ ဝင်ꩻတယွုမ်းတောဝ်း၊ ဒေါ့ꩻထာꩻတဲ့ ဝင်ꩻတနာႏတောဝ်း၊ ဒေါ့ꩻထာꩻ အထီထွူႏတောဝ်း၊ ဒေါ့ꩻထာꩻဩဇာႏအာႏဏာႏအဲဉ်ထဝ်း၊ ဂုဏ်ႏသိက္ခာႏအဲဉ်ထဝ်း၊ ဝင်ꩻထီႏဖွီ၊ ဝင်ꩻတထင်းတန်တောဝ်း၊ ဖုတ်ꩻအာတလီꩻဆျာႏတဲင် ဒေါ့ꩻထာꩻငေါဝ်းအမာႏပါဒါႏ၊ ဝင်ꩻအံႏသွင်ꩻတဝ်း၊ ဝင်ꩻရိုႏသေႏတောဝ်း၊ ဒေါ့ꩻဒါႏဝင်ꩻပွုံႏဝင်ꩻမဉ်ꩻ၊ ကွပ်ငေါဝ်းတဲင် မဲ့ငါပေႏ တရေႏကုဲင်အီဒါႏ၊ အချိန်ႏလို့ခြေင်၊ ထာꩻမာꩻ၊ ထာꩻလွေꩻ၊ ထာꩻသဲင်ꩻဖုံႏ တန်ႏအီႏစောဝ်းတဲ့ လားထိုꩻ (ထဲ့ဆုဲင်ꩻထိုꩻ)ဒါႏ၊ ကုသိုလ်ႏတန်ႏအီႏထွာအာတဲ့ ထွာဆေ့ꩻ၊ တန်ႏအီႏထွာကုသိုလ်ႏတဲ့ ထွာတောအကုသိုလ်ႏ၊ တွိုႏဘဝငါသူꩻတဲ့ တွိုႏလွေꩻဗာႏ ခင်ႏလမ်းညမ်း၊ အပါယ်ႏခမ်းစတဲင်နုဲင်းနဝ်ꩻသွူ။ မဉ်ႏဒေါ့ꩻတောဝ်း ငေါဝ်းခွဉ်ႏဆေ့ꩻနောဝ်ꩻ ဝင်ꩻဟဲ့ꩻတောဝ်း လိုꩻဟုတ်ꩻထာꩻ၊ ဝင်ꩻဟဲ့ꩻတောဝ်း လိုꩻဖုတ်ꩻတလီꩻဆျာႏ၊ ဝင်ꩻဟဲ့ꩻတောဝ်း လိုꩻတလီꩻဖွိုင်ꩻ၊ ဒေါ့ꩻငေါဝ်းမွေးငွါမဲဉ်ႏတဲင် ဝင်ꩻယွုမ်း၊ ဒေါ့ꩻထာꩻတဲ့ ဝင်ꩻနာႏ၊ ဒေါ့ꩻထာꩻအထီထွူႏ၊ ဒေါ့ꩻထာꩻ ဩဇာႏအာႏဏာႏအောဝ်ႏ၊ ဂုဏ်ႏသိက္ခာႏအောဝ်ႏ၊ ဝင်ꩻထင်းဖွီတောဝ်း၊ ဝင်ꩻထင်းတန်၊ ဝင်ꩻအံႏသွင်ꩻ၊ ဝင်ꩻရိုႏသေႏ၊ ဖုတ်ꩻတဝ်းတလီꩻဆျာႏတဲင် ဒေါ့ꩻထာꩻငေါဝ်းအမာႏပါဒါႏတဝ်း၊ ဒေါ့ꩻဒါႏတဝ်း ဝင်ꩻပွုံႏဝင်ꩻမဉ်ꩻ၊ ကွပ်ငေါဝ်းတဲင် မဲ့ငါပေႏ တရေႏကုဲင်အီဒါႏတဝ်း၊ အချိန်ႏလို့ခြေင်တဝ်း၊ ထာꩻမာꩻ၊ ထာꩻလွေꩻ၊ ထာꩻသဲင်ꩻဖုံႏ မာꩻဗာႏစောဝ်း၊ ထွူစောဝ်း၊ လွေꩻသဲင်ꩻဗာႏစောဝ်း၊ တွိုႏစောဝ်း၊ ဖျော်စောဝ်း၊ အချိန်ႏမဲဉ်ႏ၊ တန်ႏအကုသိုလ်ႏအီႏထွာအာတဲ့ ထွာဆေ့ꩻ၊ တန်ႏအီႏထွာအကုသိုလ်ႏတဲ့ ထွာတောကုသိုလ်ႏ၊ တွိုႏဘဝငါသူꩻတဲ့ တွိုႏလွေꩻဗာႏ ခင်ႏလမ်းဟောဝ်၊ လိုꩻခမ်းလူꩻခမ်းစတဲင်နုဲင်းနောဝ်ꩻသွူ။
ကွပ်ဒေါ့ꩻတောဝ်း ငေါဝ်းခွဉ်ႏဆေ့ꩻတဲင် ကခံႏစာꩻဗာႏအကျိုꩻဖုံႏနောဝ်ꩻ[မွဉ်းဖျင် | မွဉ်းဖျင်အရွီးခိုႏ]
၁။ တွိုႏထင်ႏဗာႏ လူꩻအခမ်း ၂။ ယံမျတ်လဲဉ်းက လူꩻလင် ၃။ တိန်ႏတွိုႏသဲင်ꩻယင်း လိုꩻခမ်းတဲ့ ထွာဗာႏခွန်စက်ျာႏ ၄။ ကာႏပေါင်တရေꩻ နုဲင်းချင်ႏသေ့ꩻ ၅။ ဝင်ꩻယားကုဲင်နွောင်ꩻတောဝ်း- စတဲင်နုဲင်းနောဝ်ꩻဖုံႏသွူ။ ကွပ်နောဝ်ꩻမꩻ ဒေါ့ꩻတောဝ်းငေါဝ်းခွဉ်ႏဆေ့ꩻနောဝ်ꩻ ဟဝ်ငါႏ မရေႏမရာႏနောဝ်ꩻသွူ။
သမ္ဖပ္ပလာပ အင်္ဂါႏ ၂-ပါꩻ" (ဒေါ့ꩻတောဝ်းငေါဝ်းခွဉ်ႏဆေ့ꩻ အချက် ၂-ချက်)[မွဉ်းဖျင် | မွဉ်းဖျင်အရွီးခိုႏ]
၁။ ရေႏဒေါ့ꩻငေါဝ်းအကျိုꩻအဲဉ်ထောဝ်းစား ၂။ ဒေါ့ꩻငေါဝ်း အကျိုꩻအဲဉ်ထောဝ်းနောဝ်ꩻစား။ တောင်ꩻသေꩻ- ဝင်ꩻမဉ်ႏယွုမ်းမꩻ ကမ္မပထထွာ၊ ပေါႏဝင်ꩻတယွုမ်းတောဝ်း ဝွေꩻငေါဝ်းနောဝ်ꩻ ကမ္မပထထွာတောဝ်း။ က- ကမ်ႏ(ထာꩻမာꩻ) ပထ- တဖူꩻလွေꩻအပါယ်ႏ ကမ္မပထ - ထာꩻမာꩻထောင်လွေꩻ အပါယ်ႏတဖူꩻ (ထာꩻမာꩻတွိုႏလွေꩻအီဒါႏ အပါယ်ႏ)။ ကဗျာ + အကျိုꩻအဲဉ်ထဝ်း - ဒေါ့ꩻငေါဝ်းလွဉ်ꩻမာႏ နုဲင်းနဝ်ꩻမာꩻမွိုန်း - မဉ်ႏယွိုန်းနောဝ်ꩻရာꩻ အကျင်ꩻဟဝ်မျတ် - စွုမ်ႏဇာတ်ချမ်ꩻသာႏ ဘွုန်ꩻထိုငါႏ - သေႏချာႏယံငါငါ။
ကဗျာယို မဉ်ႏပြန်ႏငေါဝ်းရိုꩻရိုꩻနောဝ်ꩻ[မွဉ်းဖျင် | မွဉ်းဖျင်အရွီးခိုႏ]
ဒေါ့ꩻငေါဝ်းအကျိုꩻအဲဉ်ထဝ်း၊ ဒေါ့ꩻငေါဝ်းခွဉ်ႏဆေ့ꩻ၊ ဖြောင်းလွဉ်ꩻမာႏနုဲင်းနဝ်ꩻနဝ်ꩻ တွမ်ႏမာꩻမွိုန်း၊ မဉ်ႏယွိုန်းထိုꩻနဝ်ꩻ ထွာအကျင်ꩻဟဝ်၊ ထွာအကျင်ꩻမျတ်၊ (ကွပ်အကျင်ꩻဟဝ်၊ အကျင်ꩻမျတ်တဲင်) ချမ်ꩻသာႏဗာႏ စွုမ်ႏဇာတ်ဇာတ် စွုမ်ႏပန်ပန်၊ ဘွုံꩻကံႏလဲ့ ထိုငါႏ၊ သေႏချာႏယံလွေꩻတငါငါစွဉ်ႏနောဝ်ꩻသွူ။ [၁][၂]