သူႏတောႏကောင်ꩻတခြိုꩻအဝ်ႏနွုတ်ꩻမျိုꩻ

ရဟန်ꩻသီးဖုံႏဟွေး-

• သူႏတောႏကောင်ꩻတခြိုꩻ အဝ်ႏနွုတ်ꩻမျိုꩻ၊ နွုတ်ꩻမျိုꩻကရိုꩻနောဝ်ꩻ-

'သဒ္ဓါႏ၊ သီႏလ၊ ဟိရီ၊ ဩတ္တပ္ပ၊ သုတ၊ စာႏဂ၊ ပညာႏ'ယိုနွုတ်ꩻမျိုꩻဖုံႏသွူ။

• ရဟန်ꩻသီးဖုံႏဟွေး-

၁။ 'သဒ္ဓါႏ'ကရိုꩻနဝ်ꩻ 'ထာꩻယွုမ်း'၊ ယွုမ်းအမျိုꩻမုဲင်ꩻနဲတဲင်- သာႏသနာႏကိုယို အရိယာႏတပဲ့ꩻနဝ်ꩻ သဒ္ဓါႏတရာꩻအဝ်ႏ၊ ယွုမ်းဗွေႏဘုရာꩻ အရဟတ္တမဂ်ဉာဏ်ႏတွမ်ႏ ယွုမ်းဗွေႏဘုရာꩻ၊ သဗ္ဗညုတဉာဏ်ႏ၊ ယွုမ်းဗွေႏဘုရာꩻ ဂွုဏ်ႏတောႏကွတ်ꩻပါꩻ။ ဗွေႏဘုရာꩻနဝ်ꩻ ကားကလူႏ ခံႏထူႏထွိုက်တဲင် မဉ်ꩻကျောႏ 'အရဟံ'၊ နမ်းတွမ်ႏနမ်း သေဒျာႏတရာꩻတွော့ꩻ မဉ်ꩻကျောႏ 'သမ္မာသမ္ဗုဒ္ဓေါ'၊ ဗွေဗိတ်တွမ်ႏ ဝိဇ္ဇာစရဏတဲင် မဉ်ꩻကျောႏ'ဝိဇ္ဇာစရဏသမ္ပန္နော'၊ ငေါဝ်းဟောဝ်ရိုꩻဒေါ့ꩻ တွိုႏသော့ꩻနိဗ္ဗာန်ႏတွော့ꩻ မဉ်ꩻကျောႏ'သုဂတော'၊ သေငါꩻလောကသွံပါꩻတဲင် မဉ်ꩻကျောႏ'လောကဝိဒူ'၊ ဆွုံꩻမꩻသတ္တဝါႏ ဒါႏမွေးငါႏတွော့ꩻ မဉ်ꩻကျောႏ 'အနုတ္တရော ပုရိသဒမ္မသာရထိ'၊ ထွာလိုꩻလူꩻသီးဆရာႏတဲင် မဉ်ꩻကျောႏ'သတ္ထာ ဒေဝမနုဿာနံ'၊ သေသစ္စာႏလစ်ꩻပါꩻလစ်ꩻပါꩻတွော့ꩻ မဉ်ꩻကျောႏ 'ဗုဒ္ဓေါ'၊ ဘွုန်ꩻတောႏသူပါꩻဗွေတဲင် မဉ်ꩻကျောႏ 'ဘဂဝါ'၊ ယွုမ်းဗွေႏဘုရာꩻ ဂွုဏ်ႏတောႏကဝ်ꩻပါꩻနုဲင်းနောဝ်ꩻသွူ။

• ရဟန်ꩻသီးဖုံႏဟွေး-

၂။ တခြိုꩻ 'သီႏလ'ကရိုꩻနဝ်ꩻ နုဲင်းမုဲင်ꩻနဲတဲင်- သာႏသနာႏကိုယို အရိယာႏတပဲ့ꩻနဝ်ꩻ မာꩻသီတဝ်းဝင်ꩻသက်၊ ထူႏတခွန်ꩻတဝ်း ဝင်ꩻတခြိုꩻ၊ ပဲ့စ်မာႏတဝ်း ဝင်ꩻပိုမာ၊ ဒေါ့ꩻလိန်ႏလဲဉ်တဝ်းထာꩻ၊ အွꩻတဝ်းဒဲဉ်ဒေါဝ်သူႏရာႏနောဝ်ꩻသွူ။

• ရဟန်ꩻသီးဖုံႏဟွေး-

၃။ တခြိုꩻ'ဟိရီ'ကရိုꩻနဝ်ꩻ နုဲင်းမုဲင်ꩻနဲတဲင်- သာႏသနာႏကိုယို အရိယာႏတပဲ့ꩻနဝ်ꩻ ထာꩻဝင်ꩻသꩻအဝ်ႏ၊ မာꩻကာယဒုစရဲက် ဝင်ꩻသꩻဝင်ꩻ၊ ဒေါ့ꩻဝစီဒုစရဲက်ဝင်ꩻသꩻဝင်ꩻ၊ ယူႏမနော်ꩻဒုစရဲက် ဝင်ꩻသꩻဝင်ꩻ၊ မာꩻအကုသိုလ်ႏ ဝင်ꩻသꩻဝင်ꩻနောဝ်ꩻသွူ။ ၄။ တခြိုꩻ'ဩတ္တပ္ပ'ကရိုꩻနဝ်ꩻ နုဲင်းမုဲင်ꩻနဲတဲင်- မာꩻဒုစရဲက်ဆီပါꩻတွမ်ႏ မာꩻအကုသိုလ်ႏနဝ်ꩻ ဟွူန်ငမ်းဝင်ꩻနဝ်ꩻသွူ။

• ရဟန်ꩻသီးဖုံႏဟွေး-

၅။ တခြိုꩻ'သုတ'ကရိုꩻနဝ်ꩻ နုဲင်းမုဲင်ꩻနဲတဲင်- အဟွူန်အထီႏအာ၊ နာႏတရာꩻ၊ ကျပ်အွံခါꩻတရာꩻ၊ တောင်ꩻခါꩻတရာꩻ-စတဲင်နုဲင်းနောဝ်ꩻသွူ။ ရဟန်ꩻသီးဖုံႏဟွေး- ၆။ တခြိုꩻ'စာႏဂ'ကရိုꩻနဝ်ꩻ- ထာꩻစေꩻ (မစ္ဆရိယ)အဲဉ်ထဝ်း၊ လူႏလဲဉ်းလဲဉ်းဒျာႏ၊ လူႏခွိုꩻခွိုꩻဒျာႏ၊ ပျောႏလွဉ်ꩻဒျာႏ တွမ်ႏထာꩻလူႏနောဝ်ꩻသွူ။ ရဟန်ꩻသီးဖုံႏဟွေး- ၇။ တခြိုꩻ'ပညာႏ'ကရိုꩻနဝ်ꩻ- အရိယာႏတပဲ့ꩻနဝ်ꩻ ထာꩻသူႏသေအဝ်ႏ၊ သေမာꩻကုသိုလ်ႏ၊ ဖေႏကတွိုႏနိဗ္ဗာန်ႏ သေကျံႏ သေမာꩻ သေကျိုꩻစာꩻနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ သတ္တကနိပါတ်၊ ဝိတ္ထတဓနသုတ်)