သေလသုတ်

"သေလသုတ် (ရသေ့ꩻဖုံႏ အားထွုတ်တရာꩻ ထွာလို့ရဟန္တာႏအကျောင်ꩻ)"

အွိုးခꩻတလဲင်ႏ နီဗွေႏဘုရာꩻတွမ်ႏ တပဲ့ꩻရဟန်ꩻ တရေင်နီရျာꩻငတ်ꩻဆီနဝ်ꩻ ဖျော်တွိုႏ "အင်္ဂုတ္တရာပ"ခမ်း၊ ဒုံတန်"အာပဏ"၊ အုံသတင်ꩻသွုံꩻ ကောင်ရွေꩻသွမ်ႏသွမ်ႏထျꩻ၊ တခြာကိုနောဝ်ꩻသွူ။ "ကေဏိယ"ရသေ့ꩻနဝ်ꩻ ဟွုန်နီဗွေႏဘုရာꩻ ကျွꩻလွဉ်တဲင် နဲစ်လွေꩻထေ့ဗွေႏဘုရာꩻ၊ ရိုႏရိုႏသေႏသေႏ ဝုဲင်ႏနီဗွေႏဘုရာꩻ၊ နီဗွေႏဘုရာꩻတဲ့ ဒေါ့ꩻဖေႏငေါဝ်းသꩻရေꩻ၊ ဟော်ꩻဖေႏပါတရာꩻ၊ ကေဏိယရသေ့ꩻပင်ꩻခါꩻ- "ဩဗွေႏ ဘုရာꩻဗွေႏဩ- မွူးရောဝ်ꩻနီꩻ နီဗွေႏဘုရာꩻတွမ်ႏ တပဲ့ꩻသံဃာႏ ခွေသွဉ်းမဉ်ကပ်ငါႏသွမ်ꩻ၊ လက်ခံႏဖေႏသွော့ ဗွေႏဩ" "ကေဏိယရသေ့ꩻဟွေး- ခွေတပဲ့ꩻ သံဃာႏအပါꩻပေါင်ꩻ အဝ်ႏပဉ် "တရင်နီရျာꩻငတ်ꩻဆီမွော့ယို" "မဉ်အာနုဲင်းမုဲင်ꩻအာတဲ့ယဝ်း နီသွဉ်းသီး ပင်ꩻလို့လို့၊ ကပ်လို့လို့ဒျာႏ ဗွေႏဩ" "ဆရာႏရသေ့ꩻဟွေး- နာꩻနဝ်ꩻ ကေႏညိုႏသားအာ၊ တပဲ့ꩻအာ၊ တကာႏအာဟ ကပ်လို့လို့နွောင်ꩻဒျာႏရင်ꩻ" ဗွေႏဘုရာꩻမိန်းနုဲင်းနဝ်ꩻ၊ သေဗာႏ ဗွေႏဘုရာꩻလက်ခံႏတဲင် သꩻရောင်းသꩻရေꩻ ရဲဉ်ꩻစွဉ်ႏဒျာႏ သွမ်ꩻကိစ္စ ဗုဒ္ဓဘုရာꩻတာႏ၊ ဗွေႏသံဃာႏမွူးရောဝ်ꩻတွက်နောဝ်ꩻသွူ။ ကေဏိယရသေ့ꩻ ကကေႏညိုႏငါႏ "သေလ"ရသေ့ꩻတွမ်ႏ အတပဲ့ꩻဖုံႏ သွံရျာꩻလွဉ်လယ်ႏ၊ ပွိုင်းလဲင်ႏနဝ်ꩻ သဲစ်သေရသေ့ꩻသီး ကဖျော်တဲ့ နဲစ်လောႏလွေꩻကျိုႏ၊ အွဉ်ႏတံꩻထီ၊ ဒေါ့ꩻရီအွီႏအွီႏနွိုးနွိုး၊ တွိုႏယိုတလဲင်ႏနဝ်ꩻ ကေဏိယရသေ့ꩻသီးဖုံႏ ထီႏသွူဝွေꩻသီးတဲ့ နဲစ်ဝဲ့ကျိုꩻစာꩻ၊ အဝ်ႏမာꩻဒျာႏဒဲဉ်တာႏ ဟန်ႏတာႏဖုံႏတွော့ꩻ တစွော့ꩻရီတဝ်း ထဉ်ႏရေသ့ꩻဖုံႏနောဝ်ꩻသွူ။ သေလရသေ့ꩻရိုꩻ- "နီဗွေႏသီး ရဲဉ်ꩻအာငါႏ ဒဲဉ်ဟန်ႏအိုဖုံႏနဝ်ꩻ အီႏမာꩻထမုဲင်ꩻ၊ အီႏလွူးခွန်ဗိမ္ဗိသာရနဲ့၊ မွေးတဝ်းတဲ့ ပိုမူႏမင်္ဂလာႏနဲ့" "လွူးခွန်တဲ့ မွေးတဝ်း၊ ပိုမူႏမင်္ဂလာႏတဲ့ မွေးတဝ်း၊ မွူးရောဝ်ꩻနဝ်ꩻ နီသွဉ်းသီး အီႏကပ်လူႏ ဗွေႏဘုရာꩻတွမ်ႏ ဗွေႏသံဃာႏသီးသွမ်ꩻ"နုဲင်းနောဝ်ꩻဒျာႏ။ "ဗွေႏဘုရာꩻအဝ်ႏမုဲင်ꩻကို ယိုခါ" "အဝ်ႏအွိုး ကောင်ရွေꩻသွမ်ႏသွမ်ႏထျꩻ" သေလပုဏ္ဏာꩻတွမ်ႏ အတပဲ့ꩻ လွေꩻဝုဲင်ႏဗွေႏဘုရာꩻထွူ၊ ဗွေႏဘုရာꩻဟော်ꩻဖေႏတရာꩻတဲင် ကားကအဝ်ႏ ဗုဲင်လို့ရဟန်ꩻ၊ သေလရသေ့ꩻ ဆရာႏတပဲ့ꩻဖုံႏတဲ့နောဝ်ꩻ၊ ကေဏိယရသေ့ꩻ ဆရာႏတပဲ့ꩻဖုံႏတဲ့နဝ်ꩻ ကေႏညိုႏဗွေႏဘုရာꩻ၊ ကေႏညိုႏဗွေႏသံဃာႏ အားထွုတ်မွေးတရာꩻဖုံႏတဲင် ထွာလို့စွဉ်ႏ ရဟန္တာႏဖုံႏနောဝ်ꩻသွူ။ (သုတ္တန်ႏပိဋကတ်၊ သုတ္တနိပါတ်၊ သေလသုတ်)