သေအာႏဇာႏနီႏလစ်ꩻမျိုꩻ

"ပတောဒသုတ် (သေအာႏဇာႏနီႏလစ်ꩻမျိုꩻ-လိုꩻယံလစ်ꩻစား)" နီဗွေႏဘုရာꩻဟော်ꩻဖေႏ ဗွေႏရဟန်ꩻသီး တရာꩻနုဲင်းယို- ရဟန်ꩻသီးဖုံႏဟွေး- သေအာႏဇာႏနီႏ အဝ်ႏလစ်ꩻမျိုꩻ၊ လစ်ꩻမျိုꩻကရိုꩻနဝ်ꩻ- ၁။ ပတောဒစ္ဆာယံ ဒိသွာ သံဝေဂံ အာပဇ္ဇတိ- ထီႏငါ ခွဉ်းဝါးသေငါတဲ့ သꩻဝꩻဟွူန်ငမ်း နဲ့စ်လွင်းလွေꩻမွိုင်။ ၂။ လောမဝေဓဝိဒ္ဓေါ သံဝေဂံ အာပဇ္ဇတိ- ခွဉ်းဝါးသေ ခွေါင်းအဆွဉ်ႏနဝ်ꩻမꩻ သꩻတꩻဟွူန်ငမ်း နဲ့စ်လွင်းလွေꩻမွိုင်။ ၃။ စမ္မဝေဓဝိဒ္ဓေါ သံဝေဂံ အာပဇ္ဇတိ- ခွဉ်းဗာႏပသာ အပီအဖြို့ꩻနဝ်ꩻမꩻ သꩻဝꩻဟွူန်ငမ်း နဲ့စ်လွင်းလွေꩻမွိုင်။ ၄။ အဋ္ဌိဝေဓဝိဒ္ဓေါ သံဝေဂံ အာပဇ္ဇတိ- တွမ်ႏခွဉ်းတွဲႏပသာႏ အယာႏအဆွတ်ꩻနဝ်ꩻမꩻ သꩻဝꩻဟွူန်ငမ်း နဲ့စ်လွင်းလွေꩻမွိုင်။ သေအာႏဇာႏနီႏ အဝ်ႏလစ်ꩻမျိုꩻ နုဲင်းနောဝ်ꩻသွူ။ ရဟန်ꩻသီးဖုံႏဟွေး- လိုꩻယံတဲ့ ဗွန်ပီသေအာႏဇာႏနီႏနဝ်ꩻနေနေ၊ လိုꩻယံအဝ်ႏလစ်ꩻမျိုꩻ၊ လစ်ꩻမျိုꩻကရိုꩻနဝ်ꩻ- ၁။ လောကကိုယို လိုꩻယင်ဟန်ႏနဝ်ꩻ 'ဒုံယိုဒုံနဝ်ꩻ၊ ဝေင်ꩻယိုဝေင်ꩻနဝ်ꩻ အူႏတရိုꩻတဝ်း၊ အခိုတရိုꩻတဝ်း၊ ဝွေꩻဟွူန် မော့ꩻထာꩻဆာဒုက္ခ၊ မွေးတဝ်းတဲ့ ဝွေꩻဟွူန်အသီထိုꩻ'၊ ဝွေꩻနဝ်ꩻ ဟွူန်နေးကွို့ꩻလွုမ်ꩻနဝ်ꩻ သꩻဝꩻဟွူန်ငမ်း၊ နဲ့စ်အားထွုတ်တရာꩻ၊ နဲစ်မာꩻကုသိုလ်ႏ၊ ထွာစွဉ်ႏရဟန္တာႏ၊ လꩻစွဉ်ႏနိဗ္ဗာန်ႏ၊ အာႏဇာႏနီႏလိုꩻယံ ပထမတဖြာꩻယိုနဝ်ꩻ တွမ်ႏပထမသေအာႏဇာႏနီႏ 'ထီႏငါခွဉ်းငါတဲ့ သꩻဝꩻဟွူန်ငမ်း၊ နဲစ်လွင်းလွေꩻမွိုင်'နောဝ်ꩻ ဗွန်ဝင်ꩻနောဝ်ꩻသွူ။ ၂။ လောကကိုယို လိုꩻယင်ဟန်ႏနဝ်ꩻ ဟွုန်နေးလွုမ်ꩻနဝ်ꩻ သံႏဝွေႏဂလꩻတဝ်း၊ ဝွေꩻထီႏတွမ်ႏမဲ့၊ ထီႏလိုꩻအာ၊ မွေးတဝ်းတဲ့ ထီႏလိုꩻသီတဲင် သꩻဝꩻဟွူန်ငမ်း၊ နဲစ်အားထွုတ်တရာꩻ၊ နဲစ်မာꩻကုသိုလ်ႏတွော့ꩻ ထွာစွဉ်ႏရဟန္တာႏ၊ လꩻစွဉ်ႏနိဗ္ဗာန်ႏ၊ အာႏဇာႏနီႏလိုꩻယံ ဒုတိယတဖြာꩻယိုနဝ်ꩻ တွမ်ႏဒုတိယသေအာႏဇာႏနီႏ 'ခွဉ်းခွေါင်းအဆွဉ်ႏမꩻ သꩻဝꩻဟွူန်ငမ်း၊ နဲစ်လွင်းလွေꩻမွိုင်'နောဝ်ꩻ ပီဝင်ꩻနောဝ်ꩻသွူ။ ၃။ လောကကိုယို လိုꩻယင်ဟန်ႏနဝ်ꩻ ဟွုန်လိုꩻလင်ဆာထာꩻꩻ ထီႏလိုꩻလင်သီထာꩻနဝ်ꩻ သꩻဝꩻဟွူန်ငမ်း၊ နဲ့စ်အားထွုတ်တရာꩻ၊ နဲစ်မာꩻကုသိုလ်ႏ၊ ထွာရဟန္တာႏ၊ လꩻနိဗ္ဗာန်ႏ၊ တတိယတဖြာꩻယိုနဝ်ꩻ တွမ်ႏသေတတိယ 'ခွဉ်းဗာႏပသာႏ အပီအဖြို့ꩻမꩻ သꩻဝꩻဟွုန်ငမ်း၊ နဲစ်လွင်းလွေꩻမွိုင်'နောဝ်ꩻ ဗွန်ဝင်ꩻနောဝ်ꩻသွူ။ ၄။ လောကကိုယို လိုꩻယင်ဟန်ႏနဝ်ꩻ ဟွုန်နေးလွုမ်ꩻ၊ ထီႏနေးလွုမ်ꩻ သꩻဝꩻဟွူန်ငမ်းတဝ်း၊ ဝွေꩻနမ်းနမ်း ထွိုင်ႏဆာဒုက္ခနဝ်ꩻမꩻ သꩻဝꩻဟွူန်ငမ်း၊ နဲ့စ်အားထွုတ်တရာꩻ၊ နဲစ်မာꩻကုသိုလ်ႏ၊ ထွာရဟန္တာႏ၊ လꩻနိဗ္ဗာန်ႏ၊ စတုတ္ထတဖြာꩻနဝ်ꩻ တွမ်ႏသေစတုတ္ထ 'တွဲႏပသာႏ အယာႏအဆွတ်ꩻမꩻ သꩻဝꩻဟွူန်ငမ်း၊ နဲစ်လွင်းလွေꩻမွိုင်'နဝ်ꩻ ပီဝင်ꩻနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ စတုက္ကနိပါတ်၊ ပတောဒသုတ်)