သံႏဝွေႏခန်ꩻဆုမ္မꩻ

၁။ လိုꩻခမ်းလောက၊ ကဒုက္ခ၊ ထီးမ ယံသေဗာႏ။ ၂။ ချံꩻသာႏမျိုꩻတန်၊ တွာသွီနံ၊ ထုမ်ႏလင် မော့ꩻတဝ်းဗာႏ။ ၃။ ဟို့ꩻဆာႏအတွက်၊ စွုမ်ႏနီꩻသတ်၊ ယူႏပက် ထွူတဝ်းဗာႏ။ ၄။ အာဟာႏရခန်ꩻ၊ ကလုံꩻပန်ꩻ၊ သဝ်ꩻလင်ꩻအဲဉ်ထဝ်းဗာႏ။ ၅။ အံႏမုအွꩻမု၊ ကပျုစု၊ ကုရုလဲင်ꩻရွိုးဒါႏ။ ၆။ စွုမ်ႏနီꩻအွꩻအံႏ၊ စွုမ်ႏနီꩻထန်ႏ၊ အမန်ႏထာꩻသေင်ဒျာႏ။ ၇။ ခွေနာꩻအဝ်ႏရက်၊ စွုမ်ႏစိုးဇာတ်၊ ယူႏပက်မသွတ်ꩻဒါႏ။ ၈။ ရက်ငါႏပိုမာ၊ စွုမ်ႏနီꩻဟာ၊ ဆုဲꩻချာအီႏဖဗာႏ။ ၉။ မာꩻဗားဒွါႏနမ်း၊ သဲင်ꩻလိုꩻခမ်း၊ တွိုႏသမ်းအပါယ်ႏရွာႏ။ ၁၀။ အဝ်ႏလိုႏကီးကူꩻ(စိက္ကူꩻ)၊ ထာꩻဟဝ်ဆူꩻ၊ တဖူꩻဟဝ်ထုမ်ႏငါႏ။ ၁၁။ ခေတ်ပြောင်ꩻတသာ၊ ယိုလဲင်ႏခါ၊ သꩻဗွာယံမာꩻဗာႏ။ ၁၂။ ဘာႏဝနာႏကမ္မဋ္ဌာန်ꩻ၊ လိုႏစီꩻဖျန်ꩻ၊ နန်းရင်ꩻယိုမꩻသာႏ။ ၁၃။ ခွိုက်ကခြွိုင်ႏသန်ꩻ၊ ကျံႏစဲႏဝင်ꩻ၊ အတွင်ꩻသာႏသနာႏ။ ၁၄။ မီႏတန်မီႏဖြား၊ အာႏထိုꩻမား၊ ရွိုးလွားအာလွဉ်ꩻငါႏ။ ၁၅။ ဆာဗာႏရင်ꩻရင်ꩻ၊ မလွစ်ကင်ꩻ၊ ယပ်ꩻခန်ꩻအီႏမော့ꩻဗာႏ။ ၁၆။ ထာꩻသီလဲ့ခါ၊ လွစ်တဝ်းဟာ၊ ဆငါအီႏမော့ꩻဗာႏ။ ၁၇။ တစိုးတကုံ၊ အဝ်ႏလိုꩻဒုံ၊ ကအုံညတဝ်းဗာႏ။ ၁၈။ တစိုးတဆင်ႏ၊ အီႏသီထင်ႏ၊ အမန်ႏလွစ်တဝ်းဗာႏ။ ၁၉။ မရဏသေမင်ꩻ၊ မီႏဟဲ့ꩻလင်ꩻ၊ ခွန်နင်ꩻလွေꩻလွဉ်ꩻဗာႏ။ ၂၀။ ကထွာသွꩻခွ၊ အဝ်ႏဒါႏန၊ လူႏဖဟဝ်မာꩻငါႏ။ ၂၁။ လူႏဗွုန်ႏတဝ်းဝင်ꩻ၊ မီႏသီလင်ꩻ၊ နမ်းရင်ꩻအဲဉ်ထဝ်းဒျာႏ။ ၂၂။ လိုꩻဖုံႏဆချာ၊ အီႏအံႏတာ၊ ဟွုန်ဆာမီႏယူႏဒါႏ။ ၂၃။ ဥစ္စာႏပြုံႏပြင်ႏ၊ ထွာအီရန်ႏ၊ အမန်ႏကွိုင်ႏထီႏဗာႏ။ ၂၄။ လိုꩻပေႏအပို၊ ထွာဗာႏယို၊ သꩻကိုဟဝ်ယူႏငါႏ။ ၂၅။ ကြိုဖို့နမ်းရင်ꩻ၊ လိုႏသညင်ꩻ၊ ထိုမ်ႏဝင်ꩻထာꩻဟဝ်တာႏ။ ၂၆။ သာႏသနာႏရောင်ႏ၊ အဝ်ႏလေတောင်ႏ၊ မူႏမောင်ႏဟဝ်ထုမ်ႏငါႏ။ ၂၇။ အနိစ္စတရာꩻ၊ လိုꩻစွုမ်ႏဖြာꩻ၊ မတ်ခါꩻဟဝ်တောင်ꩻငါႏ။ ၂၈။ နီခန်ႏထာႏ(ခန္ဓာႏ)ယို၊ မမဲꩻဖို၊ မူႏခိုဟဝ်သေငါႏ။ ၂၉။ ခန်ႏထာႏငတ်ꩻတန်ꩻ၊ ခွေါင်တဝ်းရင်ꩻ၊ မတ်ဝင်ꩻယံသေငါႏ။ ၃၀။ ဒုက္ခဒုက္ခ၊ ခုဲႏကဉ်ꩻမွ၊ သုခအဲဉ်ထဝ်းဗာႏ။ (ကေန်ꩻ) ၃၁။ ဒုက္ခမျိုꩻတန်၊ ထာꩻယပ်ꩻဖြန်၊ ပေႏတန်ဟဝ်တောင်ꩻငါႏ။ ၃၂။ အနတ္တယို၊ မူႏတွမ်ႏခို၊ နမ်းယိုပွိုင်ႏတဝ်းဗာႏ။ ၃၃။ ကမ်းဒျာႏအသꩻ၊ ရဲးမလꩻ၊ အီႏဝꩻ သီထွူဗာႏ။ ၃၄။ လွꩻသီငါႏထာꩻ၊ ယိုတပါꩻ၊ နီနာꩻလွစ်တဝ်းဒျာႏ။ ၃၅။ သီဗာႏရင်ꩻရင်ꩻ၊ မလွစ်ကင်ꩻ၊ သေဝင်ꩻဟဝ်ယူႏငါႏ။ ၃၆။ နီခန်ႏထာႏရုက်၊ ဟဝ်စက်ဆုက်၊ ကောင်ပုက်ယံသေငါႏ။ ၃၇။ ရုက်အသုဘ၊ မီႏသေမꩻ၊ လꩻဒါႏနိဗ္ဗာန်ႏနော။ ၃၈။ (သွံပွိုက်)စီႏလင်ꩻ၊ ကမ္မဋ္ဌာန်ꩻ၊ မတ်ဝင်ꩻထွူဆွူနော။ (ခန်ႏထာႏ-ခန္ဓာႏ၊ ယိုနဝ်ꩻ အဗွေႏတဲမ်းအတွိုင်ꩻဒျာႏ၊ ရုက်-နဝ်ꩻပါဠိလင်ꩻလွဉ်ဒျာႏနေနေလဲ့ စီႏခြပ်ချာနဝ်ꩻအတွိုင်ꩻဒျာႏသွူ။)