သွမ်ꩻသဲ့ꩻအံႏဖြာႏ မာꩻဗာႏနုဲင်းမုဲင်ꩻ
"ပေါႏဝင်ꩻသွမ်ꩻသဲ့ꩻ ကဲ့ꩻရဲ့ꩻ-အံႏဖြာႏနောဝ်ꩻ မာꩻဗာႏနုဲင်းမုဲင်ꩻ"
နီဗွေႏဘုရာꩻတွမ်ႏ တပဲ့ꩻသံဃာႏ အဝ်ႏရာႏဇဂျိုဟ်ႏခမ်း ကျွꩻလွေꩻ "ဝေင်ꩻနာဠန္ဒာ"၊ သံဃာႏဆꩻချာနဝ်ꩻ "သုပ္ပိယပရိဗိုဇ်"တက္ကတွဉ်ꩻတွမ်ႏ အတပဲ့ꩻခိုဗင်ႏ "ဗြဟ္မဒတ္တ"အဝ်ႏထွေလွဉ်ꩻနောဝ်ꩻသွူ။ မွူးတိန်ႏဟာတဲင် ဗွေႏဘုရာꩻတွမ်ႏ သံဃာႏဖုံႏနဝ်ꩻ အုံပဆားလွ "ဥယျာဉ်ႏအမ္ဗလဋ္ဌိကာ"စရွပ်တန်ကို၊ သုပ္ပိယတွမ်ႏ အတပဲ့ꩻဗြဟ္မဒတ္တနဝ်ꩻတဲ့ အုံပဆားနုဲင်းနုဲင်းနောဝ်ꩻကိုသွူ။ အဆရာႏသုပ္ပိယနဝ်ꩻ ထီႏဖွီသွမ်ꩻသဲ့ꩻ ကဲ့ꩻရဲ့ꩻနီဗွေႏဘုရာꩻအမျိုꩻမျိုꩻ၊ တွိုႏအတပဲ့ꩻ ဗြဟ္မဒတ္တနဝ်ꩻ အံႏဖြာႏနီဗွေႏဘုရာꩻအမျိုꩻမျိုꩻ၊ ဆရာႏတွမ်ႏတပဲ့ꩻ ဒေါ့ꩻခတ်ꩻလို့ဝင်ꩻ၊ ထေင်လို့ဝင်ꩻ တဟာသူႏသူႏစွဉ်ႏနောဝ်ꩻသွူ။ ထာꩻလေစနဝ်ꩻ နုဲင်းမွူးရောဝ်ꩻတွော့ꩻ ရဟန်ꩻသီးဖုံႏ အုံပြုံႏဒေါ့ꩻလွနုဲင်းနယို- "ဗွေႏသီးဖုံႏဟွေး- နီဗွေႏဘုရာꩻနဝ်ꩻ ကသေမွေးတရာꩻ အမျာꩻပူႏဇောႏထွိုက်၊ တွိုႏပါꩻမွိုက် သုပ္ပိယနဝ်ꩻ ထီႏဖွီဘုရာꩻ၊ သွမ်ꩻသဲ့ꩻတရာꩻ၊ ကဲ့ꩻရဲ့ꩻသံဃာႏ၊ တွိုႏအတပဲ့ꩻခိုဗင်ႏ ဗြဟ္မဒတ္တနဝ်ꩻ အံႏဖြာႏဘုရာꩻ တရာꩻ သံဃာႏ၊ ရိုႏသေႏရတနာႏသွံပါꩻ" အဝ်ႏဒေါ့ꩻနုဲင်းနဝ်ꩻတွင်ꩻ နီဗွေႏဘုရာꩻကျွꩻလွဉ်၊ နီဗွေႏဘုရာꩻရီ- "ရဟန်ꩻသီးဖုံႏဟွေး- ထာꩻလေစအုံပြုံႏ သီဖုံႏဒေါ့ꩻလွငါႏ ပါꩻမုဲင်ꩻခရာႏဟောင်း" "ဩဗွေႏ၊ ဘုရာꩻမျတ်ဗွေႏဩ- အဆရာႏ သုပ္ပိယပရိဗိုဇ်တက္ကတွဉ်ꩻနဝ်ꩻ သွမ်ꩻသဲ့ꩻဘုရာꩻ တရာꩻ သံဃာႏ၊ ရတနာႏသွံပါꩻ၊ တွိုႏအတပဲ့ꩻခိုဗင်ႏ ဗြဟ္မဒတ္တနဝ်ꩻ အံႏဖြာႏဘုရာꩻ တရာꩻ သံဃာႏ ရတနာႏသွံပါꩻ၊ ဆရာႏတပဲ့ꩻ မတဲ့ꩻမခဝ်း ဒေါ့ꩻငဝ်းခတ်ꩻလို့ဝင်ꩻ၊ ထေင်ညင်ꩻတဟာသူႏသူႏစွဉ်ႏဒျာႏ- နီသွဉ်းသီး အဝ်ႏဒေါ့ꩻနောဝ်ꩻခရာႏ ဗွေႏဩ" "ရဟန်ꩻသီးဖုံႏဟွေး- ဝင်ꩻအွဉ်ႏဒေါ့ꩻ ဘုရာꩻအပဲ့စ်တဲ့နဝ်ꩻ၊ တရာꩻအတပဲ့စ်တဲ့နဝ်ꩻ သံဃာႏအပဲ့စ်တဲ့နဝ်ꩻ သီအွဉ်ႏမွုန်းအပွေႏ၊ သꩻကုဲင်မွုန်း၊ သꩻလျားမွုန်း၊ ပေါႏသꩻလျားချာနဝ်ꩻ ထွာဒါႏအန္တရာယ်ႏ၊ သီကဒေါ့ꩻငေါဝ်းနဝ်ꩻ ကွပ်နုဲင်းယိုတဲင် မွေးတဝ်း၊ ပွိုးနုဲင်းနဝ်ꩻတွော့ꩻ မဲဉ်ႏတဝ်း၊ နီအပဲ့စ်အဲဉ်ထောဝ်း" ဖြေႏသျင်ꩻချာဗာႏ ဟောဝ်ဟောဝ်ဒါႏဒါႏနုဲင်းနောဝ်ꩻ။ "ရဟန်ꩻသီးဖုံႏဟွေး- ဝင်ꩻမဉ်ႏအံႏဖြာႏတဲ့ သꩻရေꩻငါႏမွုန်း၊ ကွပ်နုဲင်းယိုတဲင် မွေး၊ ပွိုးနုဲင်းနဝ်ꩻတွော့ꩻ မဲဉ်ႏ၊ နီဂွုဏ်ႏအဝ်ႏမွေးနုဲင်းနဝ်ꩻ ဝွန်ႏခံႏဗာႏမွေးမဲဉ်ႏ အတွိုင်ꩻနုဲင်းနဝ်ꩻ" ဗွေႏဘုရာꩻ မိန်းစွဉ်ႏနုဲင်းနောဝ်ꩻသွူ။ (သုတ္တန်ႏပိဋကတ်၊ သီလက္ခန္ဓ၊ ဗြဟ္မဇာလသုတ်)[၁][၂]