သွို့ꩻခြံမာꩻသား

"သွို့ꩻခြံမာꩻသား အောဝ်ႏခိုးလျား" ခေတ်လီꩻပြတ်လုဲင်ႏလဲ့ ပနဲအာ၊ ခေတ်သာနွို့ငါလဲ့ အခြွိုက်ခြွိုက်လဲဉ်းမွေးတဲ့ နီလုဲင်းလုပ်ꩻခြံမာꩻသားယို ထာꩻယူႏအောဝ်ႏတွိုက်ဗာႏဒျာႏတသေႏသေႏ၊ ပိုပေႏလီꩻပေႏ ကွီအံႏတခိုး၊ အောဝ်ႏကော့ꩻအောဝ်ႏငွိုး အောဝ်ႏခြီခြောဝ်စွဉ်ႏလဲ့ ကွပ်စွဉ်ႏဟို့ꩻဆာႏ တဗွေတောဝ်းဟို့ꩻတဲင် ပိုလီꩻအောဝ်ႏထုမ်ႏရွို့ꩻထာꩻယောဝ်း တဖြေႏသျင်ꩻဖေႏနွောင်ꩻတောဝ်းဒွိုန်းနောဝ်ꩻသွူ။ ပွိုးတမုဲင်ꩻနဲတဲင် တယ်ႏနေင်ႏထျꩻ ဗꩻနေင်ႏနာ ခမ်းခါခမ်းသဲင် ကလုပ်ꩻမာꩻဒါႏ အမွူးအဒီႏအရာႏဖုံႏ ဟံႏဩဇာႏငိုꩻငါလဲ့ ပြုတ်ꩻချာတဗဉ်ႏတောဝ်း၊ ဝင်ꩻကွန်ႏနောဝ်ꩻ ငိုꩻထို၊ နီကွန်ႏခန်နောဝ်ꩻ ခမ်းတထင်ႏဒါႏတောဝ်း၊ ခွန်စောဝ်းအဖြာꩻမုဲင်ꩻမုဲင်ꩻလဲ့ တထွားကိုဖေႏတောဝ်း နီလုဲင်းလုပ်ꩻခြံမာꩻသားတွော့ꩻ ထွိုင်ႏစောဝ်းသဲင်ꩻခေ့ꩻ မွူးပြေ့ꩻထံပဉ်ဗာႏဗာႏစွဉ်ႏယောဝ်း နီထာꩻလုပ်ꩻသားယို အောဝ်ႏငွိုးစေ့ꩻတွိုင်ꩻတွိုင်ꩻဗာႏဒျာႏထာꩻနောဝ်ꩻသွူ။ မဉ်ႏလွဉ်တွိုင်ꩻတွိုင်ꩻဗော့ꩻ အပွုံႏနုဲင်းယိုနောဝ်ꩻ နီထာꩻလုပ်ꩻသားယို ထာꩻခိုးလျား အမျိုꩻသွတ်ꩻနွောင်ꩻတမွေးတောဝ်း၊ အွဉ်ႏဗော့ꩻထာꩻတယောဝ်းလဲ့ သမ်းမလꩻ၊ မဉ်ႏနုဲင်းယိုတဲ့ ရွဉ်မဉ်ႏခြောခြောနောဝ်ꩻ စာအံႏဗာႏ နီပအိုဝ်ႏဟံႏယာႏဒျာႏရင်ꩻရင်ꩻ၊ နီခြံသား ပျဿနာႏယို တမုဲင်ꩻစွဉ်ႏလဲ့ တလွဉ်ဖြေႏသျင်ꩻကိုဖေႏတောဝ်းနောဝ်ꩻ ကွဲညည လွꩻလုပ်ꩻမာꩻထာꩻတွော့ꩻ ကွိုꩻစာဗာႏဒျာႏဟံႏရင်ꩻရင်ꩻနောဝ်ꩻသွူ။ နီပအိုဝ်ႏ လိုꩻသေလိုꩻဒါႏသားဖုံႏ၊ နီပအိုဝ်ႏပွယ်ꩻစာꩻတန်သားဖုံႏ ထွားထုမ်ႏကိုဖေႏတောဝ်း နီထာꩻလုပ်ꩻသား အနယ်ꩻဆꩻဆꩻဟောင်း? မဉ်ႏမွေးတောဝ်း နီထာꩻလုပ်ꩻသားယို မဲ့ကတွိုးခေ့ꩻ၊ နားကတွိုးအွိုင်၊ လိုꩻကတွိုးဒွုန်တခွိုတ်တွော့ꩻ မဉ်ႏအွဉ်ႏနယ် အနယ်ꩻဆꩻလဲ့ ငမ်းသꩻလဲဉ်အံႏဆျာႏအံႏ နီထာꩻလုပ်ꩻသားလောင်း လꩻတောဝ်းတဲင် အွဉ်ႏနယ်တောဝ်းဒျာႏဟောင်း? ဟောဝ်ယူႏခရာႏတန်နောဝ်ꩻသွူ။ မဉ်ႏနေးအမဲဉ်ႏမွော့ နီပအိုဝ်ႏကို လိုꩻသေလိုꩻဒါႏကအာ၊ ပွယ်ꩻစာꩻသဌေꩻတန်လဲ့ကလွိုင်ႏ၊ လိုꩻကတွိုႏခမ်းတန်ထီတန်သားလဲ့ အောဝ်ႏဗောႏဗာႏလဲဉ်းသွူထာꩻမွော့ နီကွန်ႏခန်ပျဿနာႏယို ဖြေႏသျင်ꩻလꩻနွောင်ꩻမတောဝ်ဟွေး၊ တွိုႏယိုနောဝ်ꩻ ပွိုးတမုဲင်ꩻ တဖြေႏသျင်ꩻဖေႏကိုတောဝ်း နီကွန်ႏခန်ယို အွဉ်ႏဗော့ꩻထာꩻတယောဝ်း စွုမ်ႏနေင်ႏနေင်ႏ ခြေင်ႏထံစွဉ်ႏကမ္ဘာႏနဲ့ ဟောဝ်ရီခရာႏတန်နောဝ်ꩻသွူ။ မဉ်ႏနုဲင်းကထွူလဲဉ်းဒါႏ အခိန်ႏခါႏနောဝ်ꩻ ပညာႏသားဖုံႏ၊ ရွဉ်သားဖုံႏ ပေါင်ꩻသွူလိုꩻဗားတွော့ꩻ ထွဉ်ႏဆို့ꩻသွူ နီထာꩻလုပ်ꩻသားလဲ့ အခိန်ႏမဉ်ႏစာစာနောဝ်ꩻ အီႏလွေꩻစာဗာႏမုဲင်ꩻကိုလဲ့ တသေတောဝ်း၊ ကေားဖြေꩻသားလဲ့ လေယာမေႏထုမ်ႏလယ်ႏ စာထေ့လဲ့ တမော့ꩻတောဝ်း၊ နုဲင်း"စိန်တစ်လုံး"တခေါ့ꩻခြံယို ထူႏတန်သွူဝင်ꩻရွဉ်အေႏတွော့ꩻ ဆို့ꩻထွူလဲဉ်း၊ ရာႏလွဉ်လဲဉ်းလဲ့ အီႏလွေꩻစာဗာႏမုဲင်ꩻကို သူႏသေတောဝ်းနောတ်ꩻသွူ။ နီခမ်းကို ကွန်ႏကပသာလွေꩻဒါႏ ခယ်ႏခမ်းနောဝ်ꩻ တနီꩻတနီꩻယို အောဝ်ႏကာꩻပေင်တဆီစား အဆွိုင်ꩻပေါင်ꩻတရေင်လွို၊ စွုမ်ႏနီꩻနီꩻတဲ့ တွိုႏနီကွန်ႏခန် ပွိုးတမုဲင်ꩻ တထင်ႏတောဝ်းယို၊ အပွိုးတမုဲင်ꩻ၊ အပါႏတမုဲင်ꩻ၊ အခါႏကို ပါꩻဖျတ်အံႏတွာမုဲင်ꩻ၊ ကျောင်ꩻလံꩻလꩻခရာႏ အောဝ်ႏနုဲင်းမုဲင်ꩻကရိုꩻနောဝ်ꩻ----။ နီကွန်ႏခန်ဖေႏကလꩻ အငိုꩻတန်တန်နောဝ်ꩻ နီပအိုဝ်ႏပွယ်ꩻအုံကွံကို၊ ပွယ်ꩻမော့ꩻခွဲကို၊ နေင်ႏထီဝဲင်ꩻကို၊ ဆေꩻကို၊ ပွယ်ꩻကို၊ အွဉ်ဝင်ꩻတွိုင်ႏပင်ႏဖေႏဗာႏဖိုလဲဉ်း ခွိုင်းမုဲင်ꩻလဲင်ႏ၊ လိုꩻသေလိုꩻဒါႏသားဖုံႏ ယူႏကိုဖေႏဗာႏဖိုလဲဉ်း ခွိုင်းမုဲင်ꩻလဲင်ႏ၊ ပွယ်ꩻစာꩻရွဉ်သား ပင်ႏထိုဖေႏကိုလဲဉ်း ခွိုင်းမုဲင်ꩻလဲင်ႏ၊ မဉ်ႏယူႏယူႏနောဝ်ꩻ နီပအိုတ်ႏလꩻလွဉ်အုပ်ချွုတ်ပဲင်ႏခွင်ꩻယို လုဲင်းလုပ်ꩻခြံမာꩻသားတာႏ ခွင်ꩻရေꩻတာႏတပါတောဝ်းဒျာႏရင်ꩻဟောင်းနောႏ----။ နီပအိုဝ်ႏလိုꩻသေလိုꩻဒါႏသားတွမ်ႏ လိုꩻရွဉ်လွိုင်ႏအာသား ပွယ်ꩻစာꩻတန်ဖုံႏ အွဉ်ဝင်ꩻပေါင်ꩻစပ်သွူဝင်ꩻတွော့ꩻ မဉ်ႏထုမ်ႏဖေႏဒါႏ အနယ်ꩻဆꩻနောဝ်ꩻ နီထာꩻလုပ်ꩻသားယို အွဉ်ဝင်ꩻတဗꩻစူဖေႏအာႏ ဘုရာꩻတမွေးတောဝ်းလဲ့ လွိုးသားဓုမာႏစွဉ်ႏရင်ꩻ၊ နီပအိုဝ်ႏစီꩻပွာꩻရေꩻလဲ့ လွိုးရတပြုဲင်ပြင်ꩻနွောင်ꩻတောဝ်းဒွုမ်၊ နီဒေႏသလဲ့ လွိုးရခွꩻစုံရောင်းရီႏ၊ နီခြံသားကထီႏ စွိုးခွိုꩻအွဉ်ငါသား၊ ကျိုꩻဆောင်ႏဖေႏသားဖုံႏလဲ့ လွိုးရမဲဉ်ယွော့၊ မဲဉ်ဖင်ꩻ၊ မဲဉ်နို့ꩻ၊ မဲဉ်အွမ်ႏစွဉ်ႏရင်ꩻရင်ꩻနောဝ်ꩻသွူ။ ကထွူလဲဉ်းဒါႏ ခိန်ႏခါႏကိုနောဝ်ꩻ ကွပ်စွဉ်ႏပညာႏသား၊ ရွဉ်သား၊ အွဉ်ငါသားဖုံႏ တထွားကိုဖေႏတောဝ်း လုဲင်းလုပ်ꩻခြံမာꩻသားဟောင်း နီပအိုဝ်ႏကွန်ႏ ဝင်ꩻနွန်ႏဆျမ်ႏတလေင်ႏထဲ့လင်ꩻလို့ဒျာႏ အခန်တဲင် အနေင်ႏမုဲင်ꩻမုဲင်ꩻလဲ့ နီထာꩻလုပ်ꩻသား အောဝ်ႏခိုးလျားဒျာႏ တွိုႏထံယိုခါနောဝ်ꩻသွူ။ နီပအိုဝ်ႏဖုံႏကဲဉ်းအာအာ သမ်းထွာဒျာႏလုဲင်းလုပ်ꩻခြံမာꩻသားကွေႏကွေႏတဲင် ကွန်ႏခန်မဉ်ႏအောဝ်ႏတွိုင်ꩻတွိုင်ꩻနုဲင်းယိုနောဝ်ꩻ နီပအိုဝ်ႏဘဝယို ဗွိုန်ပီနုဲင်းမေႏလူးထင်ႏမို့ꩻတွော့ꩻ မေႏလူးတဲ့ တသွတ်ꩻတောဝ်း၊ မို့ꩻလဲ့တသွတ်ꩻတောဝ်း နီပအိုဝ်ႏဘဝ ထာꩻခိုးလျားယိုလဲ့ မဲ့ꩻတသွတ်ꩻဒါႏတောဝ်းနောဝ်ꩻသွူ။ ကွပ်နောဝ်ꩻမꩻ နီပအိုဝ်ႏလိုꩻသေလိုꩻဒါႏ ပညာႏတန်သား၊ လိုꩻတဲးဝါးလိုꩻယံ၊ လိုꩻရွဉ်လွိုင်ႏပွယ်ꩻစာꩻတန်၊ လိုꩻတန်သားဖုံႏ အွဉ်ဝင်ꩻအောဝ်ႏလိုႏထုမ်ႏကိုဖေႏငါႏလဲဉ်း နီပအိုဝ်ႏကွန်ႏခန် ပျဿနာႏအဖြေႏမဲဉ်ႏနောဝ်ꩻသွူ။