သꩻကယူႏပက်-အဝ်ႏထာꩻရက်

"ပိယဇာတိကသုတ် (သꩻကယူႏပက်နဝ်ꩻ အဝ်ႏထာꩻရက်ထွာ)" အွိုးခꩻတလဲင်ႏ- နီဗွေႏဘုရာꩻအဝ်ႏအုံ သာဝတ္ထိခမ်း၊ ကျောင်ꩻဇေႏတဝွန်ႏကိုအတွင်ꩻ ပါꩻလိုꩻခြွေတဖြာꩻနဝ်ꩻ အပိုခိုအဝ်ႏတဖြာꩻလွုမ်၊ သမ်းသီထိုꩻတဲင် အဖါနဝ်ꩻ ဗင်ႏလꩻဒွုမ်၊ အံႏလꩻဒူမ်၊ ထာꩻခွုမ်ထာꩻမာꩻသေဒူမ်? ပေါႏယူႏလꩻအပိုနဝ်ꩻ နက်လွေꩻစွဉ်ႏသင်ႏခဲင်ꩻ၊ 'နာꩻအဝ်ႏအွိုးမုဲင်ꩻပိုခို၊ ပါလွဉ်ထုမ်ႏနာꩻယို ပိုခို'ထိုႏမ်ခြောဝ်အပိုနုဲင်းနဝ်ꩻတဲင် ငွိုးထာꩻ၊ 'လွေꩻထေ့ကဘုရာꩻ၊ ဗွေႏဘုရာꩻမဉ်ႏဟော်ꩻဖေႏ တရာꩻနဝ်ꩻ ခွေသꩻခွꩻကွပ်ဟောင်း'ယူႏနုဲင်းနဝ်ꩻတွော့ꩻ ဝွေꩻလွေꩻထေ့ဗွေႏဘုရာꩻ၊ တလောဝ်းတဝ်း ငေါဝ်းတငွါငွါ၊ နီဗွေႏဘုရာꩻရိုꩻ- "တကာႏသဌေꩻဟွေး- နာꩻလွိုးမွော့ တရေꩻတဝ်းငါႏနဝ်ꩻ၊ ထွားနုဲင်းနာꩻမဲ့နဝ်ꩻ နုဲင်းစွဉ်ႏငွိုးထာꩻထွူတန်နဲး၊ မွေးနေဟောင်း တကာႏ"နီဗွေႏဘုရာꩻရီနုဲင်းနောဝ်ꩻသွူ။ "ဩဗွေႏ- မွေးဗွေႏဩ၊ ခွေသွဉ်းနဝ်ꩻ အဝ်ႏပိုခိုတဖြာꩻဒျာႏ၊ ယိုခါ သမ်းသီထိုꩻတဲင် ခွေသွဉ်းလောႏကာႏငါႏ မရေႏမရာႏတွော့ꩻ ဗေင်ႏလꩻဒွုမ်၊ အံႏလꩻဒူမ်၊ ထာꩻခူမ်ထာꩻမာꩻ သေသတဝ်းဒွုမ်ဗွေႏ၊ ပေါႏယူႏလꩻပိုတဲ့ လွေꩻစွဉ်ႏသင်ႏခဲင်ꩻ၊ လွေꩻထုမ်ႏခြောဝ်စွဉ်ႏပို၊ မော့ꩻတဝ်းပိုနဝ်ꩻမꩻ ပေႏသꩻတလွိုး၊ ငွိုးဗာႏစွဉ်ႏထာꩻ ကားမုဲင်ꩻနီꩻနီꩻလဲဉ်းဗွေႏ၊ ခွေသွဉ်းသꩻရာႏ မလျားငါႏနုဲင်းယို ဗွေႏအော်၊ ခွေသွဉ်းသꩻ ဖေႏနေးကခွꩻ ဟော်ꩻဖေႏသွော့ ခွေသွဉ်းတရာꩻ ဗွေႏဩ"တောင်ꩻပြန်ႏလောဝ်းနုဲင်းနောဝ်ꩻသွူ။ "တကာႏသဌေꩻဟွေး- ပေါႏပိုသီနဝ်ꩻတဲးတဲ့ ထွာဒါႏနုဲင်းနဝ်ꩻဒျာႏရင်ꩻ၊ ကထွာမွိုးဖါနဝ်ꩻ အမျိုꩻလောႏကာႏပိုဒျာႏရင်ꩻ၊ ကတလွိုးဗာႏ၊ ကငွိုးဗာႏ၊ နမ်းကဒုက္ခဗာႏ၊ သꩻကဒုက္ခဗာႏ၊ သောကမေႏကခိုးဗာႏ သꩻရာႏနုဲင်းယိုနဝ်ꩻ 'ကွပ်ထာꩻရက်၊ ထာꩻရက်ထွာအထျꩻ'နောဝ်ꩻသွူ။ နီဗွေႏဘုရာꩻ တိန်ႏဟော်ꩻနုဲင်းနောဝ်ꩻတဲင်- တဲ့ꩻဒူမ်သဌေꩻနား၊ ကွပ်နဝ်ꩻမꩻ ဝွေꩻလောဝ်းချာနုဲင်းယို- "တမွေးတဝ်းဗွေႏ၊ ကတလွိုးဗာႏထာꩻ၊ ကငွိုးဗာႏထာꩻ၊ နမ်းကဒုက္ခဗာႏ၊ သꩻကဒုက္ခဗာႏ၊ သောကမေႏကခိုးဗာႏ သꩻရာႏနုဲင်းယိုနဝ်ꩻ ကွပ်ထာꩻရက်တမွေးတဝ်း၊ ထာꩻရက်ထွာအထျꩻ တမွေးတဝ်း၊ ထာꩻရက်သီးအမျိုꩻနဝ်ꩻ တမာꩻဒုက္ခတဝ်းလိုꩻ၊ ကွပ်ပွိုးထာꩻရက်တဲင် အမျိုꩻနစ်သက်ဗာႏဒျာႏ၊ အမျိုꩻသꩻရေꩻဗာႏဒျာႏ၊ 'နီဗွေႏငေါဝ်းနဝ်ꩻ အမာႏတန်' ရိုꩻနုဲင်းနဝ်ꩻထွူတဲင် (ဘုရာꩻတဲ့ ဝွေꩻတဝုဲင်ႏတီႏတဝ်းဒူမ်) ထွိုင်ႏသဲင်ꩻထိုꩻစွဉ်ႏဒျာႏနောဝ်ꩻသွူ။ အတွင်ꩻနောဝ်ꩻ ထာꩻတောႏထာꩻလောင်ꩻသား အဝ်ႏတောႏလောင်ꩻလို့ဝင်ꩻ ဗော့ꩻနဝ်ꩻကိုတဲင် သဌေꩻနဝ်ꩻ လွေꩻထေ့ထာꩻတောႏသားတထျꩻ၊ လွေꩻဒါ့ꩻနယ်ခန်း ဗွေႏဘုရာꩻငေါဝ်း၊ ဝွေꩻနစ်သက်တဝ်းအကျောင်ꩻ၊ ထာꩻတောႏသားဖုံႏရိုꩻ- "မွေး၊ မဲဉ်ႏဒျာႏသဌေꩻ ကရိုꩻနဝ်ꩻသနယ်၊ ထာꩻရက်အမျိုꩻနဝ်ꩻ အမျိုꩻနစ်သက်ဗာႏဒျာႏ၊ အမျိုꩻသꩻရေꩻဗာႏဒျာႏ"ထောက်ခံႏလွေလွေꩻ သဌေꩻငေါဝ်းနောဝ်ꩻသွူ။ သဌေꩻနစ်သက်တဝ်း နီဗွေႏဘုရာꩻငေါဝ်း- အကျောင်ꩻအခရာႏယိုနဝ်ꩻ ခွေဟွူန်နာꩻဟွူန်တွော့ꩻ တရန်းထွူတရန်း တွိုႏထင်ႏခန်းဟော်ကိုနဝ်ꩻသွူ။ ခွန်တန်ကောသလရိုꩻ- 'နင်ꩻတန်မလ္လိကာႏ နာꩻဆရာႏဘုရာꩻရို- 'ကတလွိုးဗာႏ၊ ကငွိုးဗာႏ၊ နမ်းကဒုက္ခဗာႏ၊ သꩻဒုက္ခဗာႏ၊ သောကမေႏကခိုးဗာႏ'သꩻရာႏနုဲင်းယိုနဝ်ꩻ 'ကွပ်ထာꩻရက်၊ ထာꩻရက်ထွာအထျꩻ'တဲ့၊ မွေးနေဟောင်းနဝ်ꩻ။ "ပေါႏဘုရꩻဟော်ꩻမွေးနဝ်ꩻ- မွေးနဝ်ꩻအတွိုင်ꩻသနယ်ဗွေႏ"သꩻရောင်းသꩻရေꩻ လောဝ်းချာနုဲင်းနဝ်ꩻ။ ခွန်တန်ကောသလရိုꩻ- "နင်ꩻတန်မလ္လိကာႏ- နာꩻနဝ်ꩻ နာႏမွေးစွဉ်ႏဆရာႏငေါဝ်း၊ ပေါႏထာꩻရက်ဟ ထွာဒျာႏထာꩻနစ်သက်၊ ထွာဒျာႏထာꩻသꩻရေꩻမတောဝ်၊ တွိုႏယိုနဝ်ꩻ သမ်းရိုꩻတောဒျာႏ ထွာထာꩻဒုက္ခ-တဲ့၊ နင်ꩻမွတန်၊ နာꩻတဲ့ သမ်းအဝ်ႏလွေꩻယွုမ်းတောဒျာႏ နာꩻဆရာႏငေါဝ်း၊ နာꩻပြေ့ꩻထိုꩻညာꩻညာꩻသူꩻ"ခွန်းဟွိုက်ဝါးထိုꩻနင်ꩻတန် မလ္လိကာႏနုဲင်းနောဝ်ꩻသွူ။ တွိုႏနဝ်ꩻတွော့ꩻ- နင်ꩻတန်မလ္လိကာႏနဝ်ꩻ ဟဲ့ꩻလွဉ်'နာဠိဇင်္ဃပုဏ္ဏာꩻ'ထွူတဲင် ထွဉ်ႏထင်ႏရီ နီဗွေႏဘုရာꩻတွော့ꩻ ပုဏ္ဏာꩻထင်ႏရီ နီဗွေႏဘုရာꩻနုဲင်းယို- "ဩဗွေႏ ဘုရာꩻမျတ်ဗွေႏဩ- နင်ꩻတန်မလ္လိကာႏ ထွဉ်ႏခွေသွဉ်း ထင်ႏရီနီဗွေႏဘုရာꩻ၊ 'ကတလွိုးဗာႏ၊ ကငွိုးဗာႏ၊ နမ်းကဒုက္ခဗာႏ၊ သꩻကဒုက္ခဗာႏ၊ သောကမေႏ ကခိုးလျားသꩻရာႏနဝ်ꩻ ကွပ်ထာꩻရက်၊ ထာꩻရက်ထွာအထျꩻ'နီဗွေႏဘုရာꩻဟော်ꩻနုဲင်းနဝ်ꩻ မွေးနေဟောင်း-တဲ့ ဗွေႏဩ" "မွေး- တကာႏပုဏ္ဏာꩻ- ခွေဘုရာꩻဟော်ꩻနဝ်ꩻအတွိုင်ꩻ၊ မွေးနဝ်ꩻအတွိုင်ꩻသနယ်၊ မော့ꩻနဝ်ꩻခါ ဝေင်ꩻသာဝတ္ထိကိုယို ပါꩻမူႏတဖြာꩻနဝ်ꩻ အမွိုးသီ၊ နဝ်ꩻတဲ့ လောႏကာႏအမွိုး၊ ငွိုးငါးဗားဗီးနေးစွဉ်ႏ၊ ကွပ်ဗားထိုꩻတဲင် ထောင်တဖူꩻ တလီးထွူတလီး၊ ထုမ်ႏခြောဝ်အမွိုး၊ 'နီမွိုးအဝ်ႏမုဲင်ꩻကိုနဲး၊ ထီႏတဝ်းနီမွိုးနဲ့'ထိုႏမ်ရီဝင်ꩻ တဖြာꩻထွူတဖြာꩻ၊ ဝွေꩻကတလွိုးဗာႏ၊ ဝွေꩻကငွိုးဗာႏ၊ ဝွေꩻနမ်းကဒုက္ခဗာႏ၊ ဝွေꩻသꩻကဒုက္ခဗာႏ၊ သောကမေႏခိုးလျား လဲင်ꩻတွိုႏစွဉ်ႏ ဘဝဗားနဝ်ꩻ ကွပ်ထာꩻရက်၊ ကွပ်ရက်ငါႏမွိုးသနယ်နဝ်ꩻ၊ ထာꩻရက်ထွာအထျꩻသနယ်နောဝ်ꩻ၊ (မဉ်ႏထွာဝင်ꩻမွိုးဒျာႏနဝ်ꩻ ဝွေꩻတရက်တဝ်း၊ ကွပ်ရက်တဝ်းတဲင် ဝင်ꩻမွိုးသီနဝ်ꩻ ငွိုးတဝ်းထာꩻ၊ ခိုးလျားတဝ်း၊ ဗားတဝ်းသနယ်နဝ်ꩻ) တကာႏပုဏ္ဏာꩻ ယူႏစဉ်ꩻစာꩻယွယွဟုဲင်း။ ဝေင်ꩻသာဝတ္ထိကိုယိုနေနေ ပါꩻမူႏတဖြာꩻနဝ်ꩻ အဖါသီ၊ အဝေးခို အဖူးခိုသီ၊ အဖူးမူႏသီ၊ အဝါꩻသီ-စတဲင်နဝ်ꩻဖုံႏတဲ့ ကငွိုးဗာႏ၊ ကဒုက္ခဗာႏ၊ ကခိုးလျားဗာႏနဝ်ꩻ ကွပ်ထာꩻရက်ဒျာႏ၊ ထာꩻရက်ထွာအထျꩻနဝ်ꩻသွူ"။ တွိုႏနဝ်ꩻခါ နာဠိဇင်္ဃပုဏ္ဏာꩻရိုꩻ- "နီဗွေႏဘုရာꩻကရိုꩻ ကတလွိုးဗာႏ၊ ကငွိုးဗာႏ၊ နမ်းကဒုက္ခဗာႏ၊ သꩻကဒုက္ခဗာႏ၊ သောကမေႏခိုးလျားသꩻရာႏနဝ်ꩻ ကွပ်ထာꩻရက်၊ ထွာရက်ထွာအထျꩻကရိုꩻနဝ်ꩻ ခွေသွဉ်းသဘော်ꩻဗွောင်လဲဉ်းသွူဗွေႏ၊ ခွေသွဉ်းသဲင်ꩻလောဝ်းနယ်က နင်ꩻတန်မလ္လိကာႏ ဗွေႏဩ" လောဝ်းနုဲင်းနဝ်ꩻထွူတဲင် ဝုဲင်ႏဗွေႏဘုရာꩻ၊ သဲင်ꩻထိုꩻခန်းဒျာႏနောဝ်ꩻသွူ။ တွိုႏသဲင်ꩻဟော်တွော့ꩻ သဲင်ꩻဒေါ့ꩻသဲင်ꩻခြုဲင်းနယ်လို့ နင်ꩻတန်မလ္လိကာႏ၊ တွိုႏနဝ်ꩻတွော့ꩻ နင်ꩻတန်မလ္လိကာႏလွေꩻထေ့ ခွန်တန်ကောသလ၊ ရီခွန်တန်နုဲင်းယို- "ခွန်တန်ဗွေႏဩ- နီဗွေႏပိုမူႏ 'ဝဇီရ'နဝ်ꩻ နီဗွေႏရက်မွေးမုဲင်းစွဉ်ႏထာꩻကရို ဗွေႏ" "မွေး-နင်ꩻတန်၊ ခွေပိုမူႏ 'ဝဇီရ'နဝ်ꩻ ခွေရက်မွေးမုဲင်းစွဉ်ႏထာꩻ၊ နာꩻကရီနဝ်ꩻ အကျောင်ꩻအခရာႏအဝ်ႏနုဲင်းမုဲင်ꩻ" "ဩဗွေႏ ခွန်တန်ဗွေႏဩ- သယ်ꩻခံႏနာႏသွော့ဗွေႏဩ၊ ဥပမာႏ- နီဗွေႏပိုမူႏရက် 'ဝဇီရ'မဉ်ႏသီထိုꩻစိန်ႏစွော့ꩻနဝ်ꩻ နီဗွေႏယူႏချာ နီဗွေႏနမ်းဟုဲင်း အီႏထွာနုဲင်းမုဲင်ꩻ၊ နီဗွေႏ အီႏငွိုးထာꩻနဲ့၊ ငွိုးတဝ်းနဲ့" "ပိုမူႏရက်တဖြာꩻ သီထိုꩻဟ ငွိုးအီ" "မွေးသွူ ဗွေႏ၊ တွိုႏနဝ်ꩻခါ နမ်းဒုက္ခနေဟောင်း၊ သꩻဒုက္ခနေဟောင်း ဗွေႏ" "ဒုက္ခသနယ်နဝ်ꩻ" "မွေးသွဓ ဗွေႏ၊ သောကမေႏခိုးလျား နီဗွေႏသꩻနဲ့၊ ခိုးလျားတဝ်းနဲ့" "ကွပ်ခိုးလျားမꩻ ငွိုးဗာႏထာꩻသနယ်" "မဉ်ႏထွာဒျာႏ ဝင်ꩻပိုသီ၊ နီဗွေႏရက်တမွေးတဝ်းနဝ်ꩻ နီဗွေႏအီႏငွိုးနေထာꩻဟောင်း" "ဝင်ꩻပိုမူႏသီဒျာႏဟ ခွေမငွိုးတွိုးထာꩻဟောင်း" "ခွန်တန်ဗွေႏဩ- ယူႏယွယွဟုဲင်း၊ နီဗွေႏပိုမူႏနဝ်ꩻ နီဗွေႏရက်တဲင် မဉ်ႏသီထိုꩻနဝ်ꩻ တလွိုးဗာႏ၊ ငွိုးဗာႏ၊ နမ်းဒုက္ခဗာႏ၊ သꩻဒုက္ခဗာႏ၊ သောကမေႏ ခိုးလျားသꩻရာႏ၊ တွိုႏထာꩻရက်မွေးတဝ်း ဝင်ꩻပိုမူႏမဉ်ႏသီနဝ်ꩻ နီဗွေႏငွိုးတဝ်း၊ ကွပ်နဝ်ꩻမꩻ ကတလွိုးဗာႏ၊ ကငွိုးဗာႏ၊ နမ်းကဒုက္ခဗာႏ၊ သꩻကဒုက္ခဗာႏ၊ သောကမေႏ ကခိုးလျားသꩻရာႏနဝ်ꩻ ကွပ်ပွိုးထာꩻရက်၊ ထာꩻရက်ထွာအထျꩻ နီဗွေႏဘုရာꩻကဟော်ꩻနဝ်ꩻ မဲဉ်ႏတဝ်းနဲ့ဗွေႏ၊ သဘော်ꩻဗွောင်လဲဉ်းနဲ့ ဗွေႏဩ" နင်ꩻတန်မလ္လိကာႏ ရီစွဉ်ႏဒျာႏအမျိုꩻမျိုꩻ၊ ခွန်ကရက်ရက်လိုꩻဖုံႏ မဉ်ႏသီထိုꩻနောဝ်ꩻသွူ။ တွိုႏနဝ်ꩻတွော့ꩻ ခွန်ရိုꩻ- "နင်ꩻတန်မလ္လိကာႏဟွေး- ဗွေႏဘုရာꩻကဟော်ꩻနဝ်ꩻ ခွေသဘော်ꩻဗွောင်လဲဉ်း၊ ဗွေႏဘုရာꩻကဟော်ꩻနဝ်ꩻ မဲဉ်ႏမွေးစွဉ်ႏထာꩻ၊ ဗွူႏန်ဖေႏခွေထီနဝ်ꩻ ခွေပသေထိုꩻ ခွေဖြောင်းယို" ခွန်တန်ကောသလနဝ်ꩻ ပသေထိုꩻအဖြောင်းထွူတဲင် အစူဝုဲင်ႏလွေꩻ ဗွေႏဘုရာꩻ၊ အဖြောင်းနောဝ်ꩻ အံႏဖြာႏရွစ်ပါ "နမော တဿ ဘဂဝတော အရဟတော သမ္မာသမ္ဗုဒ္ဓဿ"သိုမ်လဲင်ႏစွဉ်ႏနောဝ်ꩻသွူ။(သုတ္တန်ႏပိဋကတ်၊ မဇ္ဈိမပဏ္ဏာသပါဠိတောႏ၊ ပိယဇာတိကသုတ်)