ဟဝ်ရာꩻခင်ႏလံး

ဟောဝ်ရာꩻခင်ႏလမ်းကို အုံသော့ꩻဗာႏ

နီဗွေႏဘုရာꩻ ကဟော်ꩻခါꩻဒါႏ မင်္ဂလာႏတရာꩻ (၃၈)ပါꩻနောဝ်ꩻ ပါဠိဂါႏထာႏ အောဝ်ႏ(၁၀)ဂါႏထာႏသွူ။ တဂါႏထာႏနောဝ်ꩻ မင်္ဂလာႏတရာꩻပါသော့ꩻ (၃)ပါꩻ၊ (၄)ပါꩻ၊ (၅)ပါꩻလဲ့ ကဲဉ်းအာအာနောဝ်ꩻ ပါသော့ꩻ (၃)ပါꩻလွုမ်ꩻသွူ။ မင်္ဂလာႏတရာꩻ ဂါႏထာႏ(၁၀)အကို ဒုတိယဂါႏထာႏနောဝ်ꩻ နုဲင်းလယိုအတွိုင်ꩻသွူ။ - ပတိရူပ ဒေသဝါသော စ၊ ပုဗ္ဗေ စ ကတပုညတာ။ အတ္တသမ္မာ ပဏိဓိ စ၊ ဧတံ မင်္ဂလ မုတ္တမံ။

ဒုတိယဂါႏထာႏ မင်္ဂလာႏတရာꩻ (၃)ပါꩻ

- ဟောဝ်မွေးသင်ꩻရာꩻ ခင်ႏလမ်းအရပ်ကို အုံသော့ꩻဗာႏ။ - စိုးရီးပန်ချာ မာꩻသေꩻအာဗာႏကုသိုလ်ႏ။ - နီနမ်းခန္ဓာႏယို နီထိန်ꩻထီစောင်ႏသျောက်ဗာႏဒျာႏ။ မင်္ဂလာႏတရာꩻ ယို(၃)ပါꩻအကို ရီးအွဉ်အစ ပထမတပါꩻနောဝ်ꩻ "ဟောဝ်မွေးသင်ꩻရာꩻ ခင်ႏလမ်းအရပ်ကို အုံသော့ꩻဗာႏ"နောဝ်ꩻ ထွာမင်္ဂလာႏရိုꩻနောဝ်ꩻတဲင် ကွပ်အုံသော့ꩻဗာႏ ဟောဝ်မွေးသင်ꩻရာꩻ ခင်ႏလမ်းအရပ်ကိုတဲင် ထွာဗာႏမင်္ဂလာႏအကျောင်ꩻ အွဉ်ႏနယ်လွေꩻဗာႏ "နဝကနိပါတ်-သကဏုဇာတ်"နုဲင်းဆꩻငါယိုအတွိုင်ꩻသွူ။

နဝကနိပါတ်-သကုဏဇာတ်

ပွိုင်းလဲင်ႏစခါ ဟိမဝန္တာႏတခြာတန်အထျꩻ တခြာပေႏအောဝ်ႏတဖြုံႏသွူ။ တခြာပေႏအကို ညောင်ႏမွူးတမွူးလောင်းနောဝ်ꩻ ဘုရာꩻလောင်ꩻ သကုဏခွန်ဝါး အောဝ်ႏတဗာႏသွူ။ ဘုရာꩻလောင်ꩻနောဝ်ꩻ အောဝ်ႏအုပ်ချွုတ်လွေꩻ ဝါးအဆေ့ꩻအအာနောဝ်ꩻ သူသောင်ႏသွူ။ ညောင်ႏမွူးဆꩻလ ဟံႏလောင်းနောဝ်ꩻ ထာꩻသားခင်ႏလစ်ꩻပင်အပေါင်ꩻယို ချင်ႏသေ့ꩻတဗာႏနောဝ်ꩻ အောဝ်ႏအုပ်ချွုတ်နောဝ်ꩻသွူ။ တွိုႏတနီꩻတွော့ꩻ မုတ်ဆိုꩻ လော်တခြာ ဖျော်လွဉ်တဲင် ထာꩻသားခင်ႏလစ်ꩻပင် ကအောဝ်ႏဒါႏဟံႏလောင်းဖုံႏနောဝ်ꩻ ဖင်းချာဖင်းငါဗာႏထာꩻတွော့ꩻ အံႏဗာႏကွို့ꩻတောဝ်းအဆာႏဖုံႏသွူ။ တွိုႏနောဝ်ꩻတွော့ꩻ ခွန်ဝါးနောဝ်ꩻ "ပေါႏရန်ႏသူႏလွဉ်လဲ့ သီအောဝ်ႏသေင်ႏလောင်းဖုံႏနောဝ်ꩻ ဖေႏဗာႏအချက်ကွေး"ဒေါ့ꩻဖေႏခန်း အဝါးနုဲင်းနောဝ်ꩻသွူ။ တယ်ႏနောဝ်ꩻမာꩻငါ ပေါႏရန်ႏသူႏလွဉ်လဲ့ ဝါးဖုံႏနောဝ်ꩻ အောဝ်ႏသေင်ႏမွူးလောင်း မာꩻလွေꩻအငေါဝ်းတွော့ꩻ ထာꩻသားကားကအောဝ်ႏ ဟံႏလောင်းနောဝ်ꩻ အွဉ်ႏဖင်းထိုꩻဒျာႏသွူ။ မုတ်ဆိုꩻနောဝ်ꩻ တတန်ꩻတွိုႏတောဝ်းဒွိုန်း ထာꩻသားထျꩻလဲ့ ထာꩻသားဖုံႏ ဖင်းထိုꩻလို့ဒျာႏတဲင် ယူႏသူႏသေဒွုမ်တွော့ꩻ ဝွေꩻကအောဝ်ႏလွူးသေꩻခါꩻဒါႏ သာလိကာ ဝါးတဗာႏယို အွဉ်ႏလွေꩻစုံစမ်းရီးအွဉ်ခန်းဒျာႏနောဝ်ꩻသွူ။ သာလိကာနောဝ်ꩻ ပေါႏတွိုႏလွေꩻ ညောင်ႏမွူးလောင်းနောဝ်ꩻလဲ့ ဝါးခွန်နောဝ်ꩻ လောင်ႏလွိုးမဲ့ငါ တဗွိုန်တောဝ်းဝါးလင်ဖုံႏတွော့ꩻ အွဉ်ႏလွိုးမဲ့ငါ ကတဒါႏတောဝ်း ဝါးသာလိကာယို ဝါးထိုꩻခန်းဒျာႏနောဝ်ꩻသွူ။ သာလိကာနောဝ်ꩻလဲ့ ထာꩻသားအပေါင်ꩻ၊ ဝါးအပေါင်ꩻဖုံႏယို အောဝ်ႏလို့ဒျာႏ ဝါးခွန်ဟော်ခံꩻစူဆꩻလအကျောင်ꩻယို သေထိုꩻခန်းဒျာႏနောဝ်ꩻသွူ။ ထွူနောဝ်ꩻ သာလိကာနောဝ်ꩻလဲ့ ကျောင်ႏသဲင်ꩻချာ အဗွေႏမုတ်ဆိုꩻထျꩻတွော့ꩻ သဲင်ꩻဖွို့ꩻအုံဒင်ႏထွူ အဗွေႏမုတ်ဆိုꩻပြေင်တဲင် ဒေါ့ꩻဖေႏခန်းသတင်ꩻ၊ ခြုဲင်းနယ်ခန်းသတင်ꩻနောဝ်ꩻသွူ။ မုတ်ဆိုꩻလဲ့ တွမ်ႏခြီႏတွမ်ႏပြာႏ တွမ်ႏထွီႏနီဗာႏ ထန်ႏလွေꩻခန်းဒျာႏ ဟိမဝန္တာႏတခြာကိုသွူ။ အခိန်ႏယိုတွင်ꩻနောဝ်ꩻ ထာꩻလျားယိန်ႏယိန်ႏ ဒဲဉ်သီႏလာအီႏလို့လို့ခိန်ႏတဲင် သေင်ႏမွူးဖုံႏနောဝ်ꩻ အလာႏလွꩻလို့တွော့ꩻ အောဝ်ႏညာꩻထွားနောဝ်ꩻ ထီႏဒျာႏအပင်တရားရားလွုမ်ꩻသွူ။ သေင်ႏမွူးဆꩻလနောဝ်ꩻ လွေꩻဗွီႏဗွီႏထာꩻတလꩻတောဝ်း၊ ခင်ႏငေါဝ်းသင်ႏဒျာႏ သက်သက်သိက်သိက် သေင်ႏလာႏသဲင် ဗွေထံနေးစွဉ်ႏထာꩻသွူ။ သကုဏဝါးခွန်နောဝ်ꩻလဲ့ "အခိန်ႏယိုနောဝ်ꩻ အုံဗဉ်ႏအောဝ်ႏဗꩻထာꩻ တလꩻတောဝ်းဒွုမ်၊ နီအွဉ်ႏနေး ထောက်လမ်းရေးကရိုꩻယိုလဲ့ ရန်ႏသူႏသေလို့လဲဉ်း၊ ကွပ်ပွိုးနောဝ်ꩻမꩻ အရပ်ယိုကိုနောဝ်ꩻ တဟောဝ်အုံတောဝ်း၊ အပ္ပတိရူပအရပ်တန်ဒျာႏ၊ ထိုꩻလွေꩻအုံဒျာႏ ပတိရူပအရပ်နောဝ်ꩻမꩻ"ရိုꩻနုဲင်းနောဝ်ꩻတွော့ꩻ ဒေါ့ꩻဟွိုန်လွေꩻလို့သွူ ဝါးအပေါင်ꩻဖုံႏတဲင် အွဉ်လွဝင်ꩻ ထိုꩻလွခန်းဒျာႏသွူ။ ဝါးခွန်ဟော်ခံꩻအမိန်းယိုနောဝ်ꩻ ထာꩻသားခင်ႏလစ်ꩻပင် အကဲႏကထွာဒါႏ ချင်ႏသေ့ꩻခွန်နောဝ်ꩻ တယွုမ်းတောဝ်းတွော့ꩻ လွေꩻလွဉ်ꩻတောဝ်း၊ အုံကုဲင်ဆုဲင်ꩻဒျာႏ အရပ်နောဝ်ꩻကိုသွူ။ တညတောဝ်းအခိန်ႏနောဝ်ꩻ ထာꩻလော်သား လဲ့ꩻထာꩻတဲင် ဖင်းလွေꩻမုဲင်ꩻလဲ့ တလွစ်တောဝ်းတွော့ꩻ မေႏခိုးသီထိုꩻခန်းဒျာႏနောဝ်ꩻသွူ။ မုတ်ဆိုꩻထွိုင်ႏလွဉ် ထွိုင်ႏထီႏချင်ႏသေ့ꩻအောဝ်ႏသီထာꩻနောဝ်ꩻ "အားလားလား၊ ဟန်ႏနီꩻယို လꩻစွဉ်ႏဒျာႏ အဖို့ꩻထွူတန်ယို"ရိုꩻထွူနုဲင်းနောဝ်ꩻတွော့ꩻ အွဉ်ႏခန်းအလိုꩻ မုတ်ဆိုꩻပေႏဖုံႏ ထံႏသဲင်ꩻသွူ။ ထာꩻသားခင်ႏနီပင် ဝါးအပေါင်ꩻဖုံႏနောဝ်ꩻ နာႏဝါးခွန်ငေါဝ်းတွော့ꩻ တဟောဝ်အုံတောဝ်း အပ္ပတိရူပအရပ်ယို စွဉ်ꩻထိုꩻထွူတဲင် ကဟောဝ်အုံဒါႏ ပတိရူပအရပ်ကိုသူꩻ ပြောင်ꩻလွေꩻအုံလွဝင်ꩻတဲင် ချံꩻသာႏသုခ ဘဝမျိုꩻယို လꩻလွေꩻခံႏစာꩻလွေꩻဗာႏခန်းဒျာႏနောဝ်ꩻသွူ။

ဥပဒေသ

- ဝါးအပေါင်ꩻဖုံႏနောဝ်ꩻ လွေꩻငါငါ ကာတောတော၊ လွေꩻမော့ꩻတော အဆာႏလွိုင်ႏ၊ ထီလွိုင်ႏအရပ်တဲင် လꩻလွချံꩻသာႏဖုံႏသွူ။ - ချင်ႏသေ့ꩻစတဲင် ထာꩻသားခင်ႏလစ်ꩻပင်နောဝ်ꩻ နာႏတောဝ်း ဝါးခွန်ငေါဝ်းတွော့ꩻ မေႏခိုးလျံႏ သီထင်ႏဗာႏထာꩻသွူ။

ရန်ႏကရိုꩻနောဝ်ꩻ

= ရန်ႏတွမ်ႏရန်ႏချင်ꩻ မဉ်ႏဖြေႏသျင်ꩻနောဝ်ꩻ

 ရန်ႏစင်ꩻညိမ်ꩻတောဝ်း ဘုရာꩻဟော်ꩻ။
 

= တဖြာꩻနောဝ်ꩻရန်ႏ ဒေါသထန်ႏလဲ့

 တရန်ႏနုဲင်းတောဝ်း မဉ်ႏသျော့ꩻစောဝ်းနောဝ်ꩻ
 အဲဉ်ထောဝ်းညထိုꩻ ရန်ႏမျိုꩻနော်ꩻ။
 

= ရွို့ꩻရန်ႏအမျိုꩻ ထုမ်ႏမာႏမျိုꩻယို

 အောဝ်ႏတဖြာꩻဒျာႏ  အီႏထုမ်ႏမာႏနောဝ်ꩻ
 တထွာဗာႏတောဝ်း  သနယ်အော်။
 

= ရန်ႏနောဝ်ꩻဒေါသ ကျောင်ꩻမူလတဲင်

 လောကလိုꩻခမ်း    ခိုးလျားသမ်းဒါႏ
 မေတ္တာႏချင်ꩻမꩻ    ခွꩻရျူႏနော်။
 

= ကွပ်ပွိုးနောဝ်ꩻမꩻ ယံညိမ်ꩻခွꩻနောဝ်ꩻ

 သꩻဒေါသယို     ပယ်ႏသွော့နော်ꩻ။
 

= ကညိမ်ꩻရျူႏခွꩻ မေတ္တာႏသꩻယို

 လွူးမꩻညိမ်ꩻဟောဝ် သွူနဲ့နော်ꩻ။