ဟောဝ်ပသို့ꩻခရာႏ
"ဇိဂုစ္ဆိတဗ္ဗသုတ် (ကွပ်ပွိုးတွမ်ႏ ထာꩻဟောဝ်ပသို့ꩻခရာႏ)"
နီဗွေႏဘုရာꩻဟော်ꩻဖေႏ ဗွေႏရဟန်ꩻသီးဖုံႏ တရာꩻနုဲင်းယို- ၁။ လိုꩻပသို့ꩻခရာႏတန်၊ လိုႏဆယ်ꩻကပ်တောဝ်း၊ ၂။ လိုꩻလိုႏထွားလွို၊ ဟောဝ်ဆယ်ꩻကပ်တောဝ်း၊ ၃။ လိုꩻဟောဝ်လိုꩻမျတ် လိုႏဆယ်ꩻကပ်၊ လောကကိုယို လိုꩻအဝ်ႏသွံမျိုꩻ နုဲင်းနောဝ်ꩻသွူ။ ရဟန်ꩻသီးဖုံႏဟွေး- 'လိုꩻပသို့ꩻခရာႏတန်၊ လိုႏဆယ်ꩻကပ်တဝ်း'ကရိုꩻနဝ်ꩻ လိုꩻနုဲင်းမုဲင်ꩻနဲတဲင်- ပုဂ္ဂိုလ်ႏယင်ဟန်ႏနဝ်ꩻ သီႏလအဲဉ်ထဝ်း၊ သꩻယွုတ်တန်၊ အကျင်ꩻတဗော့ꩻတန်၊ လိုꩻအကျင်ꩻမျတ်တမွေးတဝ်းတဲ့ ရိုꩻအကျင်ꩻမျတ်၊ သꩻကိုသေင်တန်၊ အသꩻအဝ်ႏဒျာႏတွမ်ႏ ကိလေႏသာႏတဏှာႏရာႏဂ။ လိုꩻစားနဝ်ꩻနဝ်ꩻ ဆယ်ꩻကပ်ထွိုက်တဝ်း၊ မဉ်ႏဆယ်ꩻကပ်နဝ်ꩻ တထွာနုဲင်းတဝ်းခန်း ဝွေꩻတဲ့ယောဝ်း ပါꩻနဝ်ꩻကွိုက်ꩻဒျာႏ လိုꩻညမ်းတန်၊ ဆယ်ꩻကပ်ဒျာႏ လိုꩻယွုတ်တန်၊ ခံႏဗာႏဝင်ꩻသွမ်ꩻသဲ့ꩻနုဲင်းနဝ်ꩻ၊ ဥပမာႏ- ရူးတဗာႏနဝ်ꩻ ထဲ့သော့ꩻအေႏအောင်၊ တွမ်ႏစူဆွမ်ꩻထန်ႏဖေႏ၊ ပိတ်ခန်းရူးနဝ်ꩻ တအဲင်ႏတဝ်းဝွေꩻတဲ့ ဝွေꩻစူနဝ်ꩻ တဗော့ꩻလဲဉ်းအေႏနောဝ်ꩻသွူ။ ရဟန်ꩻသီးဖုံႏဟွေး- ကွပ်ပွိုးနဝ်ꩻမꩻ လိုꩻသီႏလအဲဉ်ထဝ်း၊ လိုꩻကျင်ꩻဟောဝ်တဝ်း၊ လိုꩻသꩻရင်ꩻဟောဝ်တဝ်း၊ လိုꩻနုဲင်းနဝ်ꩻနဝ်ꩻ လိုႏဆယ်ꩻကပ်တဝ်း၊ လꩻမဉ်ꩻကုဲင်ခြေင်နောဝ်ꩻလွုမ်ꩻသွူ။ ရဟန်ꩻသီးဖုံႏဟွေး- 'လိုꩻလိုႏထွားလွို-ဟောဝ်ဆယ်ꩻကပ်တဝ်း'ကရိုꩻနဝ်ꩻ လိုꩻနုဲင်းမုဲင်ꩻတဲင်- လိုꩻသꩻဒွေါင်ႏတန်၊ လိုꩻသꩻလျားဒါႏထာꩻ၊ လိုꩻဆꩻဆာဒါႏလိုꩻ၊ လိုꩻကျံꩻတန်၊ သယ်ꩻခံႏဒါႏတောဝ်း၊ ယွုန်းယောဒါႏတဝ်း၊ ဒို့ꩻဒါႏတဝ်းတရေႏ၊ ပေါႏသꩻလျားထာꩻတဲ့ ဝင်ꩻသꩻဒွုမ်ဝင်ꩻ၊ အာႏနာႏဒွုမ်ဝင်ꩻ ထꩻစွဉ်ႏထာꩻ ဝင်ꩻခိုႏဝင်ꩻငါနောဝ်ꩻသွူ။ ရဟန်ꩻသီးဖုံႏဟွေး- လိုꩻစားနဝ်ꩻ အသꩻကိုနဝ်ꩻ တွမ်ႏဒွေအွံအမဉ် ဗွန်ဝင်ꩻ၊ တွမ်ႏထာꩻဆာသေင်ပီဝင်ꩻ၊ ဒွေတဲ့နဝ်ꩻ၊ ထာꩻဆာသေင်တဲ့နဝ်ꩻ တွမ်ႏခွဉ်းတွမ်ႏဖွိုင်ꩻခေါဝ် မဉ်ႏခွေါင်းဗာႏနဝ်ꩻ အမဉ်နွုမ်ꩻသေင်နဝ်ꩻ ထွတ်ꩻထန်ႏစွဉ်ႏတလဲင်ႏချင်ꩻ၊ ဝွေꩻတဲ့ ပေါႏဝင်ꩻစွော့ꩻ တရော့ꩻတဝ်းတဲ့ အသꩻအောက်ꩻထန်ႏစွဉ်ႏ တလဲင်ႏချင်ꩻ။ ပေါႏခွဉ်းထဲ့သော့ꩻသွူ အေႏအောင်၊ ပေါႏဖွိုင်ꩻခေါဝ် ဝေင်ႏသော့ꩻသွူ အေႏအောင်နဝ်ꩻ ခွဉ်းတဲ့နဝ်ꩻ၊ ဖွိုင်ꩻခေါဝ်တဲ့နဝ်ꩻ အေႏဗွို့ꩻလွုမ်ꩻတကာႏတဝ်း အလွီးတဲ့ နွုမ်ꩻသေင်ပါစွဉ်ႏဒျာႏ၊ ဥပမာႏနုဲင်းနဝ်ꩻနေနေ ပေါႏဆယ်ꩻကပ်၊ ပေါႏပေါင်ꩻကွိုက်ꩻ လိုꩻသꩻဒွေါင်ႏ၊ လိုꩻကုဲင်၊ လိုꩻကျံꩻနဝ်ꩻ ခံႏဗာႏဝွေꩻငေါဝ်းခွန်း၊ ခံႏဗာႏဝွေꩻဒိုႏ၊ အကျိုꩻတဲ့ တအဲထဝ်း၊ မဉ်ꩻတဲ့တအွီႏတဝ်း၊ ဝင်ꩻထီႏဖွီထဲင်းလိုꩻ၊ ဝင်ꩻရိုꩻထဲင်း လိုꩻတငွို့နောဝ်ꩻသွူ။ ရဟန်ꩻသီးဖုံႏဟွေး- 'လိုꩻဟောဝ်လိုꩻမျတ်-လိုႏဆယ်ꩻကပ်'ကရိုꩻနဝ်ꩻ လိုꩻနုဲင်းမုဲင်ꩻနဲတဲင်- လိုꩻသီႏလအဝ်ႏ၊ လိုꩻသဘော်ꩻဟောဝ်၊ လိုꩻအကျင်ꩻဟောဝ်၊ လိုꩻထူꩻလိုꩻမျတ်၊ လိုꩻစားနဝ်ꩻနဝ်ꩻ အဝ်ႏလိုႏဆယ်ꩻကပ်၊ အဝ်ႏလိုႏပေါင်ꩻကွိုက်ꩻ၊ ပေါႏဆယ်ꩻကပ် ပေါင်ꩻကွိုက် လိုꩻထူꩻလိုꩻမျတ်နဝ်ꩻ နီနဝ်ꩻ တထွာခန်းတောဝ်း လိုꩻထူꩻလိုꩻမျတ်နုဲင်းဝွေꩻတဲ့ 'ပါꩻယိုနဝ်ꩻ အဆယ်ꩻကပ်လို့မျတ်၊ အပေါင်ꩻကွိုက်ꩻလိုꩻဟောဝ်၊ အဆရာႏမျတ်အဝ်ႏ၊ အသွꩻဟောဝ်အောဝ်ႏ'ခံႏဗာႏဝင်ꩻအံႏဖြာႏ၊ ဝင်ꩻထီႏဖွီတဝ်း၊ ဝင်ꩻရိုꩻလိုꩻလိန်ႏမာႏနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ တိကနိပါတ်၊ ဇိဂုစ္ဆိတဗ္ဗသုတ်)[၁][၂]