အကုသိုလ်ႏမျိုꩻယို

အကုသိုလ်ႏမျိုꩻယို တမာꩻတောဝ်းတွော့ꩻ

လိုꩻသီးလူꩻသီး ကကျံႏစယ်ႏလွဝင်ꩻ မင်္ဂလာႏတရာꩻနောဝ်ꩻ ညသွူ (၁၂)နေင်ႏလဲ့ ခွေဒေါ့ꩻဒျာႏတစွိုး၊ နာꩻဒေါ့ꩻဒျာႏတမျိုꩻ တဖြာꩻတွမ်ႏတဖြာꩻ ကကျံႏစယ်ႏဒါႏ မင်္ဂလာႏတရာꩻနောဝ်ꩻ တဗွိုန်ပီလꩻတောဝ်းလွဝင်ꩻသွူ။ တွိုႏတဟာ မွူးကွို့ꩻနာꩻတိန်ႏတိန်ႏ အခိန်ႏကို အမဉ်ꩻတထင်ႏသျာꩻတောဝ်း လူꩻပိုတဖြာꩻ ဖျော်လွဉ်ထေ့ ဗွေႏဘုရာꩻတွော့ꩻ လောဝ်းတောင်ꩻပြန်ႏဗွေႏဘုရာꩻတဲင် ဗွေႏဘုရာꩻဟော်ꩻဖေႏ မင်္ဂလာႏတရာꩻယို လိုꩻလူꩻသီး ကွဲသေငါꩻသွူ။ ဗွေႏဘုရာꩻကဟော်ꩻနယ်ဒါႏ မင်္ဂလာႏတရာꩻနောဝ်ꩻ ဟော်ꩻပါဠိဂါႏထာႏနေးတဲင် ဂါႏထာႏပေါင်ꩻ အောဝ်ႏ(၁၀)သွူ။ ဂါႏထာႏ(၁၀)အကို ဆဋ္ဌမဂါႏထာႏနောဝ်ꩻ အောဝ်ႏနုဲင်းလယိုအတွိုင်ꩻသွူ။ - အာရတီ ဝိရတီ ပါပါ၊ မဇ္ဇပါနာ စ သံယမော။ အပ္ပမာဒေါ စ ဓမ္မေသု၊ ဧတံ မင်္ဂလ မုတ္တမံ။ ၁။ ထာꩻဟောဝ်တောဝ်း အကုသိုလ်ႏမျိုꩻယို တမာꩻတောဝ်းတွော့ꩻ သျောင်ႏထိုꩻ။ ၂။ ထာꩻတဟောဝ်တောဝ်း အကုသိုလ်ႏမျိုꩻယို သꩻတယူႏတောဝ်းတွော့ꩻ သျေင်ႏထိုꩻ။ ၃။ ဒေါဝ်ထီသူႏရာႏ ယာလံဖိန်ꩻဖင်ꩻစတဲင် မွန်ꩻတဖေင်ꩻမျိုꩻယို တသုံꩻစွယ်ꩻတောဝ်းတွော့ꩻ သျောင်ႏထိုꩻ။ ၄။ အွဉ်ႏတဖေင်ꩻတောဝ်း ကုသိုလ်ႏတရာꩻ။ မင်္ဂလာႏတရာꩻယိုလစ်ꩻပါꩻအကို အမုဲင်(၁) ကထွာဒါႏ "ထာꩻတဟောတောဝ်း အကုသိုလ်ႏမျိုꩻယို တမာꩻတောဝ်းတွော့ꩻ သျောင်ႏထိုꩻ"ကရိုꩻဒါႏ မင်္ဂလာႏတရာꩻယို အီႏတဲမ်းနယ်လွေꩻတွမ်ႏ ဝတ္ထုသက်သေႏ နုဲင်းဆꩻငါယိုအတွိုင်ꩻသွူ။

မောင်ႏစက္ကန သီႏလသားဝတ္ထု

ဗွေႏဘုရာꩻ ကူꩻထွူနိဗ္ဗာန်ႏဆꩻချာ သီႏဟိုဠ်ႏခမ်း ရောဟနဇနပုဒ်၊ မဟာဂါမဒုံတန်တဒုံကိုနောဝ်ꩻ စက္ကနကမဉ်ꩻဒါႏ သီႏလသား လိုꩻယွဲးပေႏအောဝ်ႏတဖြာꩻသွူ။ စက္ကနနောဝ်ꩻ အောဝ်ႏတွမ်ႏအမွိုး၊ အောဝ်ႏတွမ်ႏအဝေးတဖြာꩻသွူ။ စက္ကနမွိုးနောဝ်ꩻ ခံႏစာꩻဗာႏဝွေႏဒနာႏရောႏဂါႏတွော့ꩻ ထွိုင်ႏတလꩻတောဝ်း၊ ဗေင်ႏဗာႏဒျာႏထာꩻသေႏသေႏနောဝ်ꩻ နေင်ႏပေါင်ꩻညလဲဉ်းသွူ။ စက္ကနဝေးနောဝ်ꩻ လုပ်ꩻလုဲင်းတဲင် လွူးအမွိုး၊ လွူးအဖူးသွူ။ စက္ကနနောဝ်ꩻ မာꩻကိုတခါႏခါႏအဝေး၊ ပျုစုဗာႏဒျာႏအမွိုးနောဝ်ꩻ ကဲဉ်းအာအာသွူ။ တွိုႏတလဲင်ႏတွော့ꩻ စက္ကနအဝေးနောဝ်ꩻ ဟဲ့ꩻလွဉ်ခန်း ဆရာႏတဖြာꩻ၊ အွဉ်ႏလုမ်ꩻလာꩻအမွိုးသွူ။ ဆရာႏနောဝ်ꩻနောဝ်ꩻ ဉာဏ်ႏခွိုင်းကအောဝ်ႏ လုမ်ꩻလာꩻလဲ့ သမ်းတဟောဝ်တောဝ်းတွော့ꩻ "သီမွိုးယိုနောဝ်ꩻ မဉ်ႏဖေႏအံႏ ကွယ်သာႏယာႏနုနုပေႏနောဝ်ꩻမꩻ ထာꩻဆာအီႏဟောဝ်"ဒေါ့ꩻဖေႏခန်း အဝေးနုဲင်းနောဝ်ꩻသွူ။ တွိုႏနောဝ်ꩻတွော့ꩻ ကထွာအဝေးနောဝ်ꩻ အွဉ်ႏခန်းအဖူးစက္ကန လွေꩻထုမ်ႏသဲင်ꩻ ကွယ်သာႏယာႏသွူ။ စက္ကနနောဝ်ꩻ လွိုဗွိုန်ႏတောဝ်း အဝေးငေါဝ်းတဲင် လွေꩻထုမ်ႏမွေးခန်း ကွယ်သာႏသွူ။ လွေꩻထုမ်ႏလဲ့ ဝွေꩻနောဝ်ꩻတယ်ႏစွဉ်ႏ ကသူႏသေစထာꩻကာႏ ဆောက်တယ်ႏသေႏသေႏသီႏလတဲင် ဝင်ꩻအသက်ယို တမာꩻသီဖိုတောဝ်းတွော့ꩻ သꩻအောဝ်ႏယပ်ꩻခုဲင်ႏတန်ဒျာႏသွူ။ တွိုႏလွေꩻလုဲင်းကိုနောဝ်ꩻ အုံပွေါးထွားခန်းကွယ်သာႏ လွဉ်အံႏဗွူမွူးသွူ။ အောဝ်ႏတဆင်ႏ ကွယ်သာႏပေႏတလောင်ꩻတဗာႏနောဝ်ꩻ ဖျော်လွဉ်ခန်း ကျံႏလွဉ်အံႏခန်းဗွူမွူးသွူ။ ထွိုင်ႏအီႏအံႏ ထွားချာငါထာꩻနောဝ်ꩻ ထီႏခန်းစက္ကနတွော့ꩻ သꩻဝီးသꩻဝꩻ နဲစ်ဖင်းခန်းဒျာႏသွူ။ ကွယ်သာႏပေႏနောဝ်ꩻ ဖင်းတမွိုးထာꩻတဲင် လွေꩻတပတ်ꩻဗာႏခန်းသွီႏတွော့ꩻ သွီႏလိမ်ꩻခန်းအခင်ႏ၊ ဖြေင်ꩻခန်းထာꩻ "ကိရိ-ကိရိ"နုဲင်းနောဝ်ꩻသွူ။ စက္ကနထွိုင်ႏထီႏကွယ်သာႏပေႏ အောဝ်ႏခံသွီႏနောဝ်ꩻ လွေꩻထေ့ထွူတွော့ꩻ ဆွမ်ꩻခန်းဒျာႏသွူ။ ကွယ်သာႏပေႏနောဝ်ꩻ ငမ်းငါႏထာꩻသီတဲင် ကျံႏဖင်းကျံႏရွန်ꩻ မာꩻပါအငေါဝ်း "ကိရိ-ကိရိ"နုဲင်းနောဝ်ꩻသွူ။ စက္ကနထွိုင်ႏထီႏကွယ်သာႏ ရွန်ꩻထာꩻဖြေင်ꩻထာꩻနုဲင်းယိုနောဝ်ꩻ ထွားစဲင်းသွူ ကွယ်သာႏပေႏတွော့ꩻ ဒေါ့ꩻတေ့ꩻခန်းငေါဝ်းသꩻကိုနုဲင်းယိုသွူ- "နီမွိုးနောဝ်ꩻ ထာꩻဆာဖေႏကဟောဝ်၊ ကွယ်သာႏနောဝ်ꩻ ဖေႏကသီဗာႏလုဲင်ႏ၊ အမျိုꩻမွေးတောဝ်းဟွေး" ယူႏထွူနုဲင်းနောဝ်ꩻနောဝ်ꩻ "ကွယ်သာႏပေႏဟွေး- ခွေတမာꩻသီတောဝ်းနာꩻ၊ ခွေအွဉ်ႏစွꩻဒျာႏနာꩻ၊ သꩻချံꩻချံꩻသာႏသာႏ သဲင်ꩻထေ့ခန်းသွော့ နာꩻသွꩻဟုဲင်း"ရိုꩻထွူနုဲင်းနောဝ်ꩻတွော့ꩻ အွဉ်ႏစွꩻခန်းဒျာႏ ကွယ်သာႏသွူ။ အွဉ်ႏစွꩻထွူကွယ်သာႏတွော့ꩻ ထွိုင်ႏဖျော်သဲင်ꩻလမ်းနောဝ်ꩻ အဝေးရီဆွုမ်ႏ- "လꩻတောဝ်းကွယ်သာႏယာႏနဲ့"နုဲင်းနောဝ်ꩻသွူ။ ဝွေꩻလဲ့ ခြုဲင်းနယ်ခန်း အဝေးအခရာႏသွူ။ အဝေးထွိုင်ႏဟွိုန် အွဉ်ႏစွꩻချာထိုꩻ ကွယ်သာႏနောဝ်ꩻ သꩻလျားထာꩻ၊ ခွန်းထွမ်သွူတွော့ꩻ ဝါးထိုꩻခန်းဝွေꩻသွူ။ အဝေးထွိုင်ႏဝါးထိုꩻနောဝ်ꩻ အာႏကွိုꩻခရာႏပါꩻမုဲင်ꩻမုဲင်ꩻ အဲဉ်ထောဝ်းတွော့ꩻ "ခွေယိုနောဝ်ꩻ သီခန်းမꩻညိမ်ꩻ"ယူႏနုဲင်းနောဝ်ꩻတွော့ꩻ ရေႏလွေꩻစို့ꩻသီနမ်း၊ ထန်ႏလွေꩻခန်းဒုံသွူ။ စက္ကနထွိုင်ႏထန်ႏလွေꩻဒုံနောဝ်ꩻ သိကျာꩻကမ္ဗလာႏလျားတွော့ꩻ ထွိုင်ႏထွားလင်ꩻလိုꩻခမ်းနောဝ်ꩻ ထီႏခန်းစက္ကနမော့ꩻထာꩻဒုက္ခသွူ။ သိကျာꩻနောဝ်ꩻ မာꩻနမ်းလိုꩻဖြားတွော့ꩻ လင်ꩻမော့ꩻခွဲးခန်း စက္ကန အွိုးဒုံသောင်သွူ။ ထွိုင်ႏရီစက္ကနနောဝ်ꩻ ဝွေꩻခြုဲင်းနယ် ထွေꩻထာꩻယပ်ꩻခုဲင်ႏခရာႏတွော့ꩻ သိကျာꩻဖြားနောဝ်ꩻ- "ပေါႏနောဝ်ꩻ သဲင်ꩻချာယင်းလမ်းမောင်ႏ၊ ခွေယိုနောဝ်ꩻ ဆရာႏနေနေ၊ သီမွိုးရောႏဂါႏယို မဲ့ꩻခွေလုမ်ꩻလာꩻဖေႏဒျာႏ"ရိုꩻထွူနုဲင်းနောဝ်ꩻတွော့ꩻ သဲင်ꩻနုဲင်းနုဲင်းခန်းဝင်ꩻသွူ။ ထွိုင်ႏတွိုႏသဲင်ꩻလမ်း၊ ထွိုင်ႏခြုဲင်းနယ်အမွိုး၊ အဝေးဖုံႏနောဝ်ꩻ အမွိုးအဝေးလဲ့ ဟွိုန်ဟောဝ်သꩻရေꩻဒျာႏသွူ။ ထွိုင်ႏတွိုႏသဲင်ꩻလမ်း ဒေါ့ꩻရီစွော့ꩻတက်လွဝင်ꩻ ထွိုင်ႏထွူနောဝ်ꩻ ဆရာႏသိကျာꩻနောဝ်ꩻ "မောင်ႏ ပွိုင်းဝွို့တွမ်ႏ သီမွိုးရောႏဂါႏယိုတဲင် ပျုသစ္စာႏဟုဲင်း၊ ခွေအီႏလုမ်ꩻလာꩻဖေႏသွူ သီမွိုးကွေး"ဒေါ့ꩻဖေႏခန်း စက္ကနနုဲင်းနောဝ်ꩻသွူ။ တွိုႏနောဝ်ꩻတွော့ꩻ စက္ကနလဲ့ ဝုဲင်ႏထွူအမွိုးတွော့ꩻ "မွိုးဟွေး- ပိုခိုယိုနောဝ်ꩻ တယ်ႏစွဉ်ႏကသူႏသေစထာꩻကာႏ ဝင်ꩻသꩻဝင်ꩻသက်ယို တမာꩻသီဖိုဖိုတောဝ်း၊ သီႏလမယ်ꩻဒျာႏသေႏသေႏဩ၊ ပိုခိုငေါဝ်းယို မဉ်ႏမဲဉ်ႏကရိုꩻနောဝ်ꩻလဲ့ နီမွိုးရောႏဂါႏယို ယံကဟောဝ်တလဲင်ꩻချင်ႏဩ"ပျုခန်းသစ္စာႏနုဲင်းနောဝ်ꩻ၊ မောင်ႏစက္ကန ငေါဝ်းပျုသစ္စာႏ ကထွိုင်ႏသွတ်ꩻနောဝ်ꩻ အမွိုးလဲ့ သꩻဟောဝ် သꩻခြွောင်းတလဲင်ႏချင်ꩻတွော့ꩻ အောဝ်ႏဗေင်ႏထာꩻနောဝ်ꩻ ထွိုင်ႏထွူတဲင် ဖော့အပို နို့ꩻခန်းဒျာႏ အပိုစက္ကန အလဲင်ႏလဲင်ႏ အခြွိုက်ခြွိုက်နောဝ်ꩻသွူ။ ရောႏဂါႏလဲ့ ထိုꩻမားတငါလို့ခန်းဒျာႏနောဝ်ꩻသွူ။ တွိုႏနောဝ်ꩻတွော့ꩻ သိကျာꩻဖြားနောဝ်ꩻ အောဝ်ႏလိုꩻဖြားဘဝ ဖန်ဆင်ꩻချာယင်း သိကျာꩻဘဝတွော့ꩻ ကျောင်ႏထင်ႏမို့ꩻလောင်း၊ ဟော်ꩻလင်ꩻဖေႏချာ လိုꩻသီးတရာꩻနုဲင်းယိုသွူ။ "လိုꩻသီးဟွေး- ဝင်ꩻအသက်ယို အောဝ်ႏသွူစူကိုလဲ့ တမာꩻသီတောဝ်းတွော့ꩻ အွဉ်ႏလွစ်ခွိုန်ꩻချာထိုꩻ သမ္ပတ္တဝိရတီသီႏလအကျိုꩻနောဝ်ꩻ တန်ငါႏထာꩻနော၊ ကွပ်နောဝ်ꩻမꩻ ထာꩻတဟောဝ်တောဝ်း အကုသိုလ်ႏမျိုꩻယို တမာꩻတောဝ်းတွော့ꩻ သျောင်ႏသွော့ဝင်ꩻဟုဲင်း" ဟော်ꩻလင်ꩻချာသွူ တရာꩻနုဲင်းနောဝ်ꩻတဲင် ထင်ႏကီခန်းဒျာႏ သိကျာꩻခမ်းသွူ။

ဥပဒေသ

ဝင်ꩻအသက်ယို အောဝ်ႏသွူစူကိုလဲ့ တမာꩻသီတောဝ်းတွော့ꩻ အွဉ်ႏစွꩻခွိုန်ꩻချာထိုꩻ သမ္ပတ္တဝိရတီ သီႏလအကျိုꩻနောဝ်ꩻ လူꩻတနံသိကျာꩻသီး တထွားလွိုတောဝ်း၊ ကူႏညီႏမꩻစꩻဒျာႏသွူ။