အကျင်ꩻသွံပါꩻဗွေႏဘုရာꩻဟော်ꩻ
"အစေလကဝဂ် (အကျင်ꩻသွံပါꩻ ဗွေႏဘုရာꩻဟော်ꩻနယ်)"
ရဟန်ꩻသီးဖုံႏဟွေး- အကျင်ꩻဖုံႏနဝ်ꩻ အဝ်ႏသွံမျိုꩻ၊ သွံမျိုꩻကရိုꩻနောဝ်ꩻ- ၁။ အာဂါဠာ ပဋိပဒါ (ကာမသုခလ္လိကာနုယောဂ) ခွုမ်တဉ်ႏကာႏမဂွုဏ်ႏ အာႏရွုံႏငတ်ꩻပါꩻ (ရက်နမ်း) ၂။ နိဇ္ဈာမာ ပဋိပဒါ (အတ္တကိလမထာနုယောဂ) အကျင်ꩻမာꩻယူႏပက်ချာနမ်း (နိစ္စက်ချာနမ်း) ၃။ မဇ္ဈိမာ ပဋိပဒါ (ဒွေ အန္တေ အနုပဂတာ) ရက်လွဉ်ꩻနမ်းမွေးတဝ်း၊ နိစ္စက်နမ်းမွေးတဝ်း၊ လဲဉ်းဒျာႏအထဝ၊ မဇ္ဈိမ ပဋိပဒါ၊ အကျင်ꩻဗွာမဲဉ်ႏမွေး။ ရဟန်ꩻသီးဖုံႏဟွေး- 'အကျင်ꩻခွုမ်တဉ်ႏ ကာႏမဂွုဏ်ႏ'ကရိုꩻနဝ်ꩻ- လွောက်ꩻလောႏဘꩻအလိုႏတဲင် ခံႏစာꩻဒျာႏထာꩻတရေꩻ၊ ခံႏစာꩻဒျာႏထာꩻတလေ့၊ ခံႏစာꩻဒျာႏထာꩻနွုမ်ꩻဟွမ်၊ ခံႏစာꩻဒျာႏထာꩻအွီႏ၊ ခံႏစာꩻဒျာႏထာꩻခွေါင်းရွ၊ ခွုမ်တဉ်ႏတွော့ꩻ ယိုငတ်ꩻချက်၊ အကျင်ꩻရက်လွဉ်ꩻနမ်း၊ အကျင်ꩻတသွာႏသဲ့နောဝ်ꩻသွူ။ ရဟန်ꩻသီးဖုံႏဟွေး- 'အကျင်ꩻမာꩻယူႏပက်ချာနမ်း'(နိစ္စက်ချာနမ်း)ကရိုꩻနဝ်ꩻ- လောကကိုယို လိုꩻယင်ဟန်ႏနဝ်ꩻ ကွဉ်ကꩻတဝ်းခွမ်ꩻလာꩻ၊ (အုံတလီꩻဒျာႏထာꩻ)၊ စွဉ်ꩻခွဉ်ႏတန်ထွူနဝ်ꩻ ဒွုတ်ꩻဒျာႏတွမ်ႏအစူ (ဒွုတ်ꩻတဝ်းတွမ်ႏစေး)၊ လိုꩻမူႏအဝ်ႏနမ်းလောင်း ကလူႏဒါႏသွမ်ꩻနဝ်ꩻ ထူႏတဝ်း၊ လိုꩻမူႏနဲဉ်းသား ကလောင်ꩻဒါႏသွမ်ꩻနဝ်ꩻ ထူႏတဝ်း။ အံႏဒျာႏမီꩻ၊ အံႏဒျာႏဖိုးအေႏ၊ အုံစောင်းပေါင်ꩻဒျာႏထာꩻ၊ အုံဒင်ႏထာꩻဆူႏ၊ ဗေင်ႏဒင်ႏဒျာႏထာꩻဆူႏ၊ တနီꩻသွံလဲင်ႏ အုံစဲသော့ꩻထီ (ပသေအပဲ့စ်၊ ပသေကိလေႏသာႏ-တဲ့)စတဲင် အကျင်ꩻနုဲင်းနဝ်ꩻဖုံႏနဝ်ꩻ အကျင်ꩻယူႏပက် အကျင်ꩻနိစ္စက်ချာနမ်းဖုံႏသွူ။ ရဟန်ꩻသီးဖုံႏဟွေး- 'မဇ္ဈိမာ ပဋိပဒါ'ကရိုꩻနဝ်ꩻ- ကျိုꩻစာꩻအားထွုတ်မွေးမွေး၊ နေးသတိꩻဟောဝ်ဟောဝ်၊ အွဉ်ႏသꩻစွူစွူ၊ နေးတွမ်ႏဉာဏ်ႏ ထွားချာနမ်းခန္ဓာႏ၊ နမ်းထွာနုဲင်းမုဲင်ꩻနုဲင်းမုဲင်ꩻ၊ သꩻထွာနုဲင်းမုဲင်ꩻနုဲင်းမုဲင်ꩻ ထွားလွဉ်ꩻတိတ်ꩻတိတ်ꩻ၊ ထွေလွဉ်ꩻတိက်ꩻတိက်ꩻ၊ သေလွဉ် ခန္ဓာႏအနိစ္စ၊ ခန္ဓာႏဒုက္ခ၊ ခန္ဓာႏအနတ္တ၊ ကွဲညည ဗွိုႏအန်ꩻခန္ဓာႏ၊ ထွာရဟန္တာႏတဲင် လꩻစွဉ်ႏဒျာႏ နိဗ္ဗာန်ႏချမ်ꩻသာႏနောဝ်ꩻသွူ။ ရဟန်ꩻသီးဖုံႏဟွေး- အကျင်ꩻတသွာႏ ခံႏစာꩻဒျာႏ ကာႏမဂွုဏ်ႏနဝ်ꩻတဲ့ တလꩻနွောင်ꩻတဝ်း မဂ်ဖိုလ်ႏ၊ အကျင်ꩻယူႏပက် နိစ္စက်ချာနမ်းနဝ်ꩻတဲ့ တလꩻနွောင်ꩻတဝ်း မဂ်ဖိုလ်ႏနိဗ္ဗာန်ႏ၊ မဇ္ဈိမ ပဋိပဒါ-မဂ္ဂင်ႏသွစ်ꩻပါꩻ အကျင်ꩻတရာꩻနဝ်ꩻမꩻ လꩻနွောင်ꩻမဂ်ဖိုလ်ႏနိဗ္ဗာန်ႏ၊ ထန်ႏနွောင်ꩻဝွဋ်ဒုက္ခနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ တိကနိပါတ်၊ အစေလကဝဂ်)[၁][၂]