အကျင်ꩻသွံမျိုꩻအခရာႏ
"ဗာဟိကသုတ် (ခွန်ကောသလရီ ဗွေႏအာႏနန္တာႏ အကျင်ꩻသွံမျိုꩻ-အကျောင်ꩻအခရာႏ)" အွိုးခꩻတလဲင်ႏ- နီဗွေႏဘုရာꩻအဝ်ႏအုံ သာဝတ္ထိခမ်း၊ ကျောင်ꩻဇေႏတဝွန်ႏကိုအတွင်ꩻ တွိုႏတရောဝ်ꩻ ဗွေႏအာႏနန္တာႏနဝ်ꩻ လွေꩻတွုံꩻသွမ်ꩻ ဝေင်ꩻသာဝတ္ထိကို၊ တွုံꩻသွမ်ꩻထွူ၊ သွုံꩻသွမ်ꩻထွူနဝ်ꩻ ကျွꩻလွေꩻမွိုးကျောင်ꩻဝိသာႏခါႏ ကလူႏဒါႏ ကျောင်ꩻပုဗ္ဗာႏရုံကျောင်ꩻနောဝ်ꩻသွူ။ တဖူꩻလောင်းနဝ်ꩻ- လွေꩻခွဲတွမ်ႏ ခွန်တန်ကောသလ္လ၊ ခွန်တန်ကောသလ မဉ်ရီဗွေႏဘုရာꩻခရာႏအဝ်ႏတဲင် ခွန်တန်ပင်ꩻလင်ꩻတော 'အစိရဝတီႏ-ထီခြောင်တန်'ထျꩻ၊ ပင်ꩻကျွꩻအုံခန်း သေင်ႏမွူးတမွူးဆလနဝ်ꩻသွူ။ ခွန်တန်ကောသလရီ ဗွေႏအာႏနန္တာႏနုဲင်းယို- "ဩဗွေႏ- သမဏ ဗြာဟ္မဏသီးဖုံႏ ယီးနယ်လꩻ ထောက်ပျꩻနွောင်ꩻ နမ်းကျင်ꩻကုဲင်၊ အမျိုꩻစားနဝ်ꩻနဝ်ꩻ နီဗွေႏဘုရာꩻ အဝ်ႏကံကျင်ꩻနဲ့ဗွေႏအော်" "ကံကျင်ꩻတောဝ်း တကာႏ" "ဖြောင်းအကျင်ꩻကုဲင် အမျိုꩻစားနဝ်ꩻနဝ်ꩻ နီဗွေႏဘုရာꩻ ကံကျင်ꩻနဲ့ဗွေႏအော်" "ကံကျင်ꩻတောဝ်း တကာႏ" "သꩻအကျင်ꩻကုဲင် အမျိုꩻစားနဝ်ꩻနဝ်ꩻ နီဗွေႏဘုရာꩻ ကံကျင်ꩻနဲ့ဗွေႏအော်" "ကံကျင်ꩻတောဝ်း တကာႏ" "ဩဗွေႏ- လိုꩻတလိန်ႏမာႏတဝ်း၊ လိုꩻပညာႏတအဲဉ်ထဝ်းသားနဝ်ꩻ တရီထျꩻတဝ်း တရီနာတဝ်းတဲင် အံႏစာဝင်ꩻမဉ်ꩻ၊ ယားတရေႏဝင်ꩻ၊ မာꩻထဲ့ဝင်ꩻဂွုဏ်ႏသိက္ခာႏ၊ လိုꩻစားနဝ်ꩻငေါဝ်းနဝ်ꩻ အကဲဉ်အနဲ့စ်ꩻအဲဉ်ထောဝ်း၊ နီသွဉ်းသီး တယွုမ်းတဝ်း ဝွေꩻသီးငေါဝ်း၊ လိုꩻလိန်ႏမာႏ၊ လိုꩻပညာႏသားငေါဝ်း (နုဲင်းနီဗွေႏကဖြေႏယို)နဝ်ꩻ နီသွဉ်းသီးယူးမ်ဗွေႏဩ၊ ပညာႏအဝ်ႏသားနဝ်ꩻ ဝင်ꩻရီထျꩻရီနာထွူမꩻ နေးတွမ်ႏဉာဏ်ႏပညာႏ ဆင်ႏချင်ႏတဲင် အကျိုꩻအဝ်ႏမꩻဒေါ့ꩻ၊ အကျိုꩻတအဲဉ်ထဝ်းနဝ်ꩻ ဒေါ့ꩻတဝ်း၊ ကွပ်နဝ်ꩻမꩻ လိုꩻပညာႏအဝ်ႏသားငေါဝ်းနဝ်ꩻ အကဲဉ်အနဲ့စ်ꩻအဝ်ႏတွော့ꩻ နီသွဉ်းသီးသꩻဆွော့ꩻ နီသွဉ်းသီး ယူးမ်ဗွေႏဩ" နမ်းကျင်ꩻဟောဝ်တဝ်း၊ ဖြောင်းကျင်ꩻဟောဝ်တဝ်း၊ သꩻကျင်ꩻဟောဝ်တဝ်း အဓိပ္ပါယ်ႏအချွုတ်(အချုက်)နဝ်ꩻ ဟော်ꩻနယ်ဖေႏ နီသွဉ်းသီးမွိုင်ဗွေႏဩ။ မွေးသွူတကာႏ နာႏလွသွော့ဟုဲင်း- ပေါႏမာꩻထာꩻမာꩻ အပဲ့စ်အဝ်ႏ၊ ထွာအီထာꩻဒုက္ခ၊ ဝင်ꩻသဲ့ꩻသွမ်ꩻထွိုက်နောဝ်ꩻ ထွာနမ်းကျင်ꩻဟဝ်တဝ်းနဝ်ꩻသွူ။ ပေါႏဒေါ့ꩻထာꩻဒေါ့ꩻ အပဲ့စ်အဝ်ႏ၊ ထွာအီထာꩻဒုက္ခ၊ ဝင်ꩻသဲ့ꩻသွမ်ꩻထွိုက်နဝ်ꩻ ထွာဖြောင်းကျင်ꩻဟဝ်တဝ်းနောဝ်ꩻသွူ။ ပေါႏယူႏထာꩻယူႏ အပဲ့စ်အဝ်ႏ၊ ထွာအီထာꩻဒုက္ခ၊ ကထွာအီ ထာꩻချမ်ꩻသာႏမျိုꩻ၊ ထွာသꩻကျင်ꩻဟဝ်တဝ်းနဝ်ꩻသွူ။ တကာႏခွန်တန်ဟွေး- ပေါႏမာꩻထာꩻမာꩻ အကျိုꩻကအဝ်ႏမျိုꩻ၊ ကထွာအီ ထာꩻချမ်ꩻသာႏမျိုꩻ၊ ဝင်ꩻကအံႏဖြာႏထွိုက်မျိုꩻနဝ်ꩻ ထွာနမ်းကျင်ꩻဟောဝ်။ ပေါႏဒေါ့ꩻထာꩻဒေါ့ꩻ အကျိုꩻကအဝ်ႏမျိုꩻ၊ ကထွာအီ ထာꩻချမ်ꩻသာႏမျိုꩻ၊ ဝင်ꩻကအံႏဖြာႏထွိုက်မျိုꩻနဝ်ꩻ ထွာဖြောင်းကျင်ꩻဟောဝ်။ ပေါႏယူႏထာꩻယူႏ အကျိုꩻကအဝ်ႏမျိုꩻ၊ ကထွာအီ ထာꩻချမ်ꩻသာႏမျိုꩻ၊ ဝင်ꩻကအံႏဖြာႏထွိုက်မျိုꩻနောဝ်ꩻ ထွာသꩻကျင်ꩻဟောဝ်နောဝ်ꩻသွူ။ (သုတ္တန်ႏပိဋကတ်၊ မဇ္ဈိမပဏ္ဏာသပါဠိတောႏ၊ ဗာဟိတိကသုတ်)[၁][၂]