အင်္ဂါႏငတ်ꩻဗာႏ အုံချမ်ꩻသာႏ

"ယဿံ ဒိသံသုတ် (အင်္ဂါႏငတ်ꩻဗာႏ အုံချမ်ꩻသာႏ)" ရဟန်ꩻသီးဖုံႏဟွေး- အုံမုဲင်ꩻကိုတဲ့ယဝ်း ကအုံချမ်ꩻချမ်ꩻသာႏသာႏဗာႏနဝ်ꩻ အင်္ဂါႏအဝ်ႏငတ်ꩻပါꩻ၊ ငတ်ꩻပါꩻကရိုꩻနောဝ်ꩻ- ၁။ လောကကိုယို ဝင်ꩻဒင်ႏတဲင် ကထွာခွန်သားနဝ်ꩻ မွိုးဖဲ့ꩻဖါဖဲ့ꩻ နီဖဲ့ꩻဖဲ့ꩻ အမျိုꩻစဲစ်လို့ဒျာႏ၊ ဖါဖြားဖါဖြီးသီး နွုတ်ꩻဆက်တဲ့ ရော်ꩻတဝ်းမျိုꩻလင် ကြောင်းစင်စဲစ်ဒျာႏ၊ ပွိုင်းပွို့တွမ်ႏခွိုꩻနွယ်ႏတွော့ꩻ ဝင်ꩻပယ်ႏဖိုတဝ်း၊ ဝင်ꩻသဲ့ꩻသွမ်ꩻဖိုတဝ်း။ ၂။ ခြွေခြာႏချမ်ꩻသာႏဒျာႏ၊ ရွဉ်ခံꩻတခြိုꩻ အမျိုꩻမျိုꩻ အဝ်ႏဗောႏဗာႏထာꩻ။ ၃။ အမိန်းနာႏခံႏစဲ့ꩻအာႏ၊ စူခွုမ်လက်နက်အာႏ တလာတန်ဒျာႏ။ ၄။ ပညာႏဒါႏ ပိုခိုတန်ရတနာႏအဝ်ႏ၊ ရုဲင်းဟန်ဒါႏလျင်ႏ စီႏဆင်ႏအကျိုꩻစီꩻပွါꩻ ခွုမ်မာꩻနွောင်ꩻဒျာႏ။ ၅။ ခွန်တန်နမ်းတဲ့ ဘွုန်ꩻတံꩻခိုꩻတန်၊ ကျောႏဗွုက်ဗွုက်ဗွုင်းဗွုင်းႏ ခွန်တန်နဝ်ꩻတပါꩻ မဉ်ႏဗွေတွမ်ႏအင်္ဂါႏငတ်ꩻပါꩻ၊ အချက်ငတ်ꩻချက်ယိုနဝ်ꩻ အုံစွဉ်ႏအရပ်မုဲင်ꩻတဲ့ယဝ်း နန်းခရာႏအဲဉ်ထဝ်း၊ ငမ်းခရာႏလိုႏတဝ်း၊ တွမ်ႏကအုံဗာႏ နီခမ်းကိုနဝ်ꩻ ဗွန်ပီလို့ဝင်ꩻ၊ ကွပ်ပွိုးထမုဲင်ꩻနဲးတဲင် အခေႏအနေႏဟောဝ်နဝ်ꩻ တွမ်ႏနီခမ်းကို ဗွန်ပီလို့ဝင်ꩻ အုံချမ်ꩻသာႏထွိုက် အုံချမ်ꩻသာႏသင်ꩻ နုဲင်းယိုဒျာႏရင်ꩻနောဝ်ꩻသွူ။ အဗွန်ပီနုဲင်းခွန်နဝ်ꩻနေနေ၊ အင်္ဂါႏငတ်ꩻချက် ကဗွေဒါႏ ရဟန်ꩻမျတ်နဝ်ꩻ အုံအရပ်မုဲင်ꩻတဲ့ယဝ်း အုံဗာႏသꩻချမ်ꩻချမ်ꩻသာႏသာႏနောဝ်ꩻသွူ။ ရဟန်ꩻသီးဖုံႏဟွေး- ၁။ သာႏသနာႏကိုယို ရဟန်ꩻ (တပါꩻ)နဝ်ꩻ 'သီႏလအဝ်ႏ၊ အကျင်ꩻယံ'၊ ခင်ႏလမ်းအဆင်ႏပြေႏ၊ ဝွေꩻဗွေႏယိုနဝ်ꩻ တွမ်ႏခွန်ခွိုꩻနွယ်ႏကြောင်းစင်နဝ်ꩻ ဗွန်ဝင်ꩻနောဝ်ꩻသွူ။ ၂။ သာႏသနာႏကိုယို ရဟန်ꩻနဝ်ꩻ အဟွူန်အထီႏ ဗဟုသုတအာ၊ ဒါႏလိတ်၊ နာႏဗာႏအာတရာꩻ၊ ဝွေꩻဗွေႏယိုနဝ်ꩻ တွမ်ႏခွန်ခြွေ တခြိုꩻအာနဝ်ꩻ ပီဝင်ꩻနောဝ်ꩻသွူ။ ၃။ သာႏသနာႏကိုယို ရဟန်ꩻနဝ်ꩻ ပယ်ႏထိုꩻအကုသိုလ်ႏတာႏ၊ မာꩻကုသိုလ်ႏတာႏ အာႏရဲင်ꩻတလာတန်၊ ဝီရိယအာႏသန်၊ ဝွေꩻဗွေႏယိုနဝ်ꩻ တွမ်ႏခွန်စဲ့ꩻအာႏတလာနဝ်ꩻ ဗွန်ဝင်ꩻနောဝ်ꩻသွူ။ ၄။ သာႏသနာႏကိုယို ရဟန်ꩻနဝ်ꩻ ပညာႏအဝ်ႏ၊ အားထွုတ်တရာꩻဒါႏ၊ ဟော်ꩻတရာꩻဒါႏ၊ ဝွေꩻဗွေႏယိုနဝ်ꩻ တွမ်ႏခွန်ပိုခိုတန် ပညာႏသား၊ ရုဲင်းဟန်ဒါႏလျင်ႏ၊ စီႏဆင်ႏအကျိုꩻစီꩻပွါꩻ ခွုမ်မာꩻနွောင်ꩻနောဝ်ꩻ ပီဝင်ꩻနောဝ်ꩻသွူ။ ၅။ သာႏသနာႏကိုယို ရဟန်ꩻနောဝ်ꩻ တရာꩻချာနဝ်ꩻလစ်ꩻဗာႏ၊ အင်္ဂါႏနဝ်ꩻလစ်ꩻချက် တိုꩻတက်အာႏတလာ၊ ထင်ႏငါအားထွုတ် ဝိပဿနာႏ၊ ထွာစွဉ်ႏရဟန္တာႏ၊ ဘွုံꩻတံꩻခိုꩻတန်၊ ကျောႏယံတိုးတား၊ တဲဝါးဟဝ်ငါႏ၊ ဝွေꩻဗွေႏယိုနဝ်ꩻ တွမ်ႏခွန်တံꩻခိုꩻတန် ကျောႏယံထာꩻနဝ်ꩻ ဗွန်ပီလို့ဝင်ꩻနောဝ်ꩻသွူ။ အင်္ဂါႏငတ်ꩻပါꩻ ကဗွေဒါႏ ရဟန်ꩻနဝ်ꩻနဝ်ꩻ အုံမုဲင်ꩻကိုတဲ့ယဝ်း အုံဗာႏချမ်ꩻချမ်ꩻသာႏသာႏ၊ ပွိုးထမုဲင်ꩻနဲတဲင် ကအုံဗာႏချမ်ꩻချမ်ꩻသာႏသာႏနုဲင်းယိုနဝ်ꩻ အထွာထွိုက် အထွာသင်ꩻ နုဲင်းယိုဒျာႏရင်ꩻနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ ပဉ္စကနိပါတ်၊ ယဿံ ဒိသံသုတ်)