အဇာတသတ် ကပ်ဒေႏဝဒတ်
"ပဉ္စရထသတသုတ် (အဇာတသတ် လွေꩻကပ်ဒေဝဒတ်သွမ်ꩻ)"
နီဗွေႏဘုရာꩻအဝ်ႏအုံ ရာႏဇဂျိုဟ်ႏခမ်း၊ ကျောင်ꩻဝေဠုဝွန်ႏကိုအတွင်ꩻ မွူးရောဝ်ꩻခိုႏတလဲင်ႏ မွူးဟာခိုႏတလဲင်ႏ အဇာတသတ်တွမ်ႏ အလိုꩻဖုံႏနဝ်ꩻ လွေꩻဆယ်ꩻကပ် ဒေဝဒတ်နောဝ်ꩻသွူ။ "ယိုခွန်ပေႏ အဇာတသတ်- သီဖါနဝ်ꩻ သက်ပေါႏတန်ငါႏတဝ်း၊ အုံပွေါသီဖါသီမꩻ ထွာခွန်နဝ်ꩻ နာꩻတောႏတောႏ တထွာဗာႏတဝ်းခွန်၊ မာꩻသီ သီဖါနဝ်ꩻဟုဲင်း၊ နာꩻထွာမွိုင်မွိုင်ဗာႏခွန်၊ ခွေတဲ့ အီႏမာꩻသီဘုရာꩻ၊ ခွေအီႏထွာဘုရာꩻနေနေ" ခွန်ပေႏအဇာတသတ်နဝ်ꩻ မဉ်ထွာသန်ခွန်လွုမ်ꩻ၊ ဖါကေꩻဇူꩻ ထမုဲင်ꩻထမီꩻ ယူႏတဝ်း၊ နာႏဒေဝဒတ်ငေါဝ်းတဲင် အဖါနဝ်ꩻ သော့ꩻထောင်ႏ၊ ခြင်ဒဲဉ်၊ ခြင်ထီ၊ အဖါသီထိုꩻစွဉ်ႏနဝ်ꩻသွူ။ ယိုခါနဝ်ꩻ ဝွေꩻထွာဗာႏခွန်တွော့ꩻ ကေꩻဇူꩻတင်ႏ ဒေဝဒတ် လွေꩻကပ်သွမ်ꩻ၊ ပသာသွမ်ꩻစွုမ်ႏနီꩻ၊ တနီꩻနီꩻယို ဒဲဉ်အဖွိုင်ꩻပေါင်ꩻငတ်ꩻရျာꩻ၊ ဒေဝဒတ်နဝ်ꩻ လာဘ်သွင်ႏ၊ အံႏဗာႏဟောဝ်၊ ရဟန်ꩻတသူႏသေတဝ်းထာꩻ၊ ကမဉ်အံႏအွီႏ အံႏဟောဝ်သားဖုံႏနဝ်ꩻ လွေꩻအုံတေ့ꩻထိုꩻ ဒေဝဒတ်ထျꩻဖုံႏနဝ်ꩻတဲ့ အောဝ်ႏနောဝ်ꩻသွူ။ ရဟန်ꩻကသူႏသေထာꩻသားဖုံႏနဝ်ꩻ ခံႏလွေꩻတဝ်းလာꩻလာꩻ၊ အုံစွူစွူဒျာႏ ဗွေႏဘုရာꩻထျꩻနဝ်ꩻ အာတန်၊ တွိုႏတနီꩻ ဗွေႏရဟန်ꩻသီးလောဝ်း ဗွေႏစောဝ်းဘုရာꩻနုဲင်းယို- "ဗွေႏဩ- ဘုရာꩻဗွေႏဩ- ခွန်အဇာတသတ်နဝ်ꩻ အလွေꩻကပ်ဒေဝဒတ်သွမ်ꩻ စွုမ်ႏနီꩻ၊ ဒဲဉ်အဖွိုင်ꩻငတ်ꩻရျာꩻပဉ်တဲ့ ဗွေႏဩ" "ရဟန်ꩻသီးဖုံႏဟွေး- ယိုခါ ဒေဝဒတ် လꩻတကာႏ အဇာတသတ်တဲင် အလာဘ်သွင်ႏတဲ့ယဝ်း သိထင်းတန်မွုန်း၊ ပေါႏဒေဝဒတ် အဝ်ႏလꩻကလာဘ်နဝ်ꩻတဲ့ ဝွေꩻအကုသိုလ်ႏတရာꩻ အဝ်ႏပွာꩻစွုမ်ႏနီꩻ၊ ဝွေꩻကုသိုလ်ႏနဝ်ꩻ အဝ်ႏဆွုတ်ယွုတ်ယွမ်ꩻချာထိုꩻစွုမ်ႏနီꩻ၊ အမျိုꩻစီꩻပွာꩻချမ်ꩻသာႏမွေးတဝ်း၊ မဲ့ꩻအီႏမော့ꩻထာꩻဒုက္ခ၊ ထွီႏကုဲင်နေ့ꩻဖိူကိုနဝ်ꩻ ပေါႏသော့ꩻထပေႏသွုန်ႏထီတဲ့ ထွီႏယိန်းကုဲင်ကုဲင်စွဉ်ႏ၊ ယိုတဲ့ ပေါႏအဝ်ႏပသာတိတ်ꩻတိတ်ꩻလာဘ်တဲ့ ဒေဝဒတ်ယိန်းအွဉ်ႏမွေးမွေးအနမ်း၊ အသꩻကိုသူꩻနဝ်ꩻ လောဘ ဒေါသ မောဟ မာန ဒိဋ္ဌိ-အကုသိုလ်ႏတရာꩻ ကွဲအာအာ၊ ပေါႏအကုသိုလ်ႏတရာꩻ အဝ်ႏသော့ꩻအာတဲ့ ကုသိုလ်ႏတရာꩻနဝ်ꩻ ယွမ်ꩻချာထိုꩻဗာႏနောဝ်ꩻသွူ။ - ဖလံ ဟဝေ ကဒလိံ ဟန္တိ - ထထီႏရာႏနဝ်ꩻ မာꩻသီချာ ထထီႏမွူး၊ - ဖလံ ဝေဠုံ ဟန္တိ - ဝါႏရာႏနဝ်ꩻ မာꩻသီချာ ဝါႏမွူး၊ - ဖလံ နဠံ ဟန္တိ - ဖေါင်းရာႏနဝ်ꩻ မာꩻသီချာ ဖေါင်းမွူး၊ - သက္ကာရော ကာပုရိသံ ဟန္တိ- နေးတွမ်ႏထာꩻလဲဉ် ကပေါႏပြဲဉ်လွဉ်ဒါႏ လာဘ်သပ္ပကာႏ၊ ထာꩻကျောႏကျာႏဖုံႏနဝ်ꩻ အီႏမာꩻသီချာ အီႏမာꩻဒုက္ခချာ လိုꩻလိန်ႏလိုꩻလဲဉ်လိုꩻယွုတ်ဖုံႏနောဝ်ꩻသွူ။ ရဟန်ꩻသီးဖုံႏဟွေး- နေးတွမ်ႏအနယ်ꩻလိန်ႏလဲဉ် ကပေါႏပြဲဉ်လွဉ်ဒါႏ လာဘ်သပ္ပကာႏနဝ်ꩻ ကျံꩻတရံꩻတန်၊ လꩻအီမဂ်ဖိုလ်ႏ မွေးတဝ်း၊ ထွာအီဒျာႏ မဂ်ဖိုလ်ႏနိဗ္ဗာန်ႏ အန္တရာယ်ႏတန်၊ တရာꩻတောဝ်းလဲဉ်ထူႏ လာဘ်နွုမ်ꩻသူႏနဝ်ꩻ လꩻအီမဂ်ဖိုလ်ႏမွေးတဝ်း၊ ဗွေႏစောဝ်းဘုရာꩻ ရိုꩻနုဲင်းနောဝ်ꩻသွူ။ လဲဉ်ဝင်ꩻနေးထူႏ လာဘ်နွုမ်ꩻသူႏနဝ်ꩻ ပယ်ႏထိုꩻသွော့လုဲင်း၊ အုံရိုꩻရိုꩻသာꩻသာꩻဒျာႏ၊ ယူႏရိုꩻရိုꩻသာꩻသာꩻဒျာႏဟုဲင်း၊ နေးဒျာႏတွမ်ႏ ထာꩻတရာꩻရာꩻ ခွုမ်မာꩻဒေါ့ꩻဖြောဝ်ႏ၊ အုံအောဝ်ႏလွသွော့ဟုဲင်း"ဗွေႏဘုရာꩻ မိန်းစတဲင်နုဲင်းနောဝ်ꩻသွူ။ (သုတ္တန်ႏပိဋကတ်၊ နိဒါနဝဂ္ဂသံယုတ်ပါဠိ၊ ပဉ္စရထသုတ်၊ မာတုသုတ်) လိုꩻတွိုင်ꩻဖေႏနေးကသေနာႏ တဲမ်းဗာႏနုဲင်းယိုသွူ။[၁][၂]