အနာႏဂတ်တာႏ

"အနာႏဂတ်တာႏ ကအီႏမာꩻသင်ꩻဒါႏနဝ်ꩻ အဝ်ႏလိုႏဖျင်ဆင်လဲဉ်း" ကလဲဉ်းနေင်ႏ ၂၀၁၀-ကိုနဝ်ꩻ နီမြန်မာခမ်းယို လက်ခံႏကျင်ꩻသွုံꩻလွေꩻစ ပါတီစွုမ်ႏဒီမိုကရေစီ စနစ်နဝ်ꩻ အစဲင်းစဲ့တဗာႏ တမွေးတဝ်း ပယွို့ꩻပယꩻ ရိုꩻနုဲင်းနဝ်ꩻလဲ့ သမ္မတသက်တန်ꩻတခီႏ အီႏဆွိုးချာသွူနဝ်ꩻသွူ၊ ၂၀၁၅-ဗာႏ အီႏဖျတ်ကာႏလွေꩻလဲဉ်းလꩻဖျင်သွူနဝ်ꩻသွူ။ မဉ်ႏတွိုႏနေင်ႏငါ မဉ်ႏကာလွေꩻသွူ ၂၀၁၅-တဖူꩻတထွော့ယင်းယို မြန်မာခမ်းအစိုႏရနဝ်ꩻ အီႏလက်ခံႏဗွောင်လွေꩻယင်းသွူ စီꩻပွါꩻရေꩻဆေꩻကွက်တခါꩻလာႏနဝ်ꩻသွူ၊ မဉ်ႏဗွောင်လွေꩻသွူ စီꩻပွါꩻရေꩻ ဆေꩻကွက်တခါꩻလာႏနဝ်ꩻ မြန်မာခမ်းကို တွမ်ႏခမ်ႏလောင်ႏခမ်းလင်ယို လွစ်လွစ်တခြင်ခြင် ဒင်ႏနွို့ထန်ႏပသာလွေꩻသဲင်ꩻကွန်ႏထာꩻမာꩻဖုံႏ မာꩻနွောင်ꩻလဲဉ်းတဲင် ခမ်းကိုစီꩻပွါꩻရေꩻဆေꩻကွက် ထာꩻမာꩻထင်ႏထိုဖျင်လဲဉ်း တကာနဝ်ꩻသွူ။ မြန်မာခမ်းယို မဉ်ႏကျင်ꩻသွုံꩻလွေꩻသွူ စီꩻပွါꩻရေꩻဆေꩻကွက်စနစ်နဝ်ꩻ တခမ်းလွုမ်းသားတဲ့နဝ်ꩻ၊ ပအိုဝ်ႏခမ်းသားတာႏဒျာႏတဲ့နဝ်ꩻ ကအီႏဖျော်လွဉ်ဒါႏ စီꩻပွါꩻရေꩻဆေꩻကွက်စနစ်ကို ဖေႏကတသွုန်နွောင်ꩻတွမ်ႏ၊ ဖေႏကခွုမ်မာꩻ တသွုန်ဗာႏတွမ်ႏ ဝင်ꩻခမ်းလောင်ႏလင်သားနဝ်ꩻ အီႏဖျင်ဆင်အုံထွိုင်ႏလွေꩻဗာႏနုဲင်းမုဲင်ꩻ၊ အီႏနွို့တွူႏလွေꩻဗာႏနုဲင်းနုဲင်ꩻ။ မဉ်ႏဗွောင်သွူ စီꩻပွါꩻရေꩻဆေꩻကွက်တခါꩻနဝ်ꩻ ခမ်းပေါင်ꩻစွုမ်ႏ ခမ်းလောင်ႏခမ်းလင်သား ကထွာဒါႏ ကုမ္ပဏီႏခမ်းထန်ႏသားတဲ့နဝ်ꩻ၊ ထာꩻမာꩻစူတန်သားတဲ့နဝ်ꩻ အီႏဖျော်ရုက်ရုက်ရက်ရက် ပြုံႏပြုံႏပြင်ႏပြင်ႏ၊ အီႏလွဉ်ပလို့ꩻထင်ႏ အနီꩻအရင်ꩻ၊ အီႏလွဉ်ခြပ်လင်ꩻသွူ စီꩻပွါꩻရေꩻတဖူꩻရဲဉ်ႏ မြန်မာခမ်းကိုနဝ်ꩻသွူ၊ ထာꩻမာꩻခွင်ႏဖုံႏ အဝ်ႏအာလွဉ်တဲင် ခွုမ်မာꩻခွင်ꩻထာꩻမာꩻဖုံႏလဲ့ အဝ်ႏလွိုင်ႏလွဉ်၊ ခွိုင်းဝွို့တွမ်ႏ ခွုမ်မာꩻနွောင်ꩻအထီအသွီႏယို မြန်မာ/ပအိုဝ်ႏခမ်းသးသီး မူသေꩻခါꩻ၊ ဖျင်ဆင်သေꩻခါꩻဗာႏလဲဉ်းသွူ တခွိုင်းမုဲင်ꩻဟောင်း။ မဉ်ႏထွာလွဉ်သွူနုဲင်းယိုနဝ်ꩻ မြန်မာခမ်းကိုယိုလွုမ်ꩻ တကာႏတဝ်း အာဆီယံ တဆီခမ်းစလွုမ်းယို ခွုမ်မာꩻထာꩻမာꩻ တသွုန်တူႏခွင်ꩻတဲ့နဝ်ꩻ၊ ထာꩻမာꩻတာႏ စံႏစာꩻခွင်ꩻလာတာႏတဲ့နဝ်ꩻ ဝင်ꩻချꩻအွဉ်ႏထွော့လွေꩻ တခွုန်ခွုန်ဝင်ꩻ စွုမ်ႏခမ်းခမ်း ဥပဒေႏစနစ်ဖုံႏလဲ့ အဝ်ႏလွဉ်ထွာလွဉ်ပါနဝ်ꩻသွူ။ ခွုမ်မာꩻခွင်ꩻ တွောင်းတသွုန်မုꩻဖုံႏ အီႏအဝ်ႏလွဉ်လဲဉ်းရိုꩻနုဲင်းနဝ်ꩻလဲ့ ထွိုင်ႏတွိုႏအဝ်ႏကုဲင်ဒါႏ ထာꩻမာꩻခွင်ႏတာႏ သွုံꩻနယ်ꩻပညာႏထာꩻဒါႏဖုံႏတဲ့နဝ်ꩻ၊ စာႏရင်ꩻအတွက်အချက်ဖုံႏတဲ့နဝ်ꩻ၊ ဒေါ့ꩻဖြဝ်ႏရေꩻဘာႏသာႏငဝ်းငွါ အေန်းကလေတ်ငဝ်းငွါ အဒေါ့ꩻအဖြဝ်ႏဖုံႏတဲ့နဝ်ꩻ ဝင်ꩻနဝ်ꩻ အဝ်ႏသွုံꩻအဝ်ႏခွုမ်စံႏကျင်ꩻလဲဉ်းတဲင် အထူꩻအီႏဖျင်ဆင်လွေꩻဗာႏငါႏဝင်ꩻသွူ။ တွိုႏသွူယိုခါ ထမုဲင်ꩻငါလဲ့ လꩻဖျင်ဆင်ဗာႏဒွိုန်း၊ မြန်မာ/ပအိုဝ်ႏခမ်းသားအတာႏ ကုမ္ပဏီႏကိုဖုံႏ၊ ထာꩻမာꩻခွင်ႏကိုဖုံႏတာႏ ဝင်ꩻမဉ်ႏဟဲ့ꩻလွဉ်၊ အဝ်ႏလိုႏလွဉ် လိုꩻသေလိုꩻဒါႏ လိုꩻကျင်ႏလဲပ်ဖုံႏနဝ်ꩻ ပါꩻမုဲင်ꩻဖုံႏ အီႏလꩻသော့ꩻလို့ ခွုမ်မာꩻခွင်ꩻဟောင်း၊ ဝင်ꩻမဉ်ႏအွဉ်ႏရေꩻ ဟဲ့ꩻထူႏလွေꩻဒျာႏ လိုꩻသေလိုꩻဒါႏ လိုꩻကျင်ႏလဲပ်သားနဝ်ꩻ ခမ်းကိုခမ်းယိုသားတာႏ အခွင်ꩻအရေꩻ အီႏအဝ်ႏနုဲင်းမုဲင်ꩻဟောင်း။ မြန်မာခမ်းသားတဲ့နဝ်ꩻ၊ ပအိုဝ်ႏခမ်းသားတဲ့နဝ်ꩻ စစရာႏရာႏ ကထဲ့ဆုဲင်ꩻကအဝ်ႏကုဲင်ဗာႏနုဲင်းယိုနဝ်ꩻ ကွပ်စွဉ်ႏအဝ်ႏခံယွုမ်းယွိုင်းဗာႏည စဲ့ꩻအာႏဏာႏဗွေႏစကိုဆꩻလတဲင် တွမ်ႏထာꩻသေထာꩻဒါႏကင်ꩻခွါႏလွဉ်ဗာႏနဝ်ꩻသွူ၊ စဲ့ꩻအာႏဏာႏဗွေႏဖုံႏနဝ်ꩻ မာꩻထမုဲင်ꩻမုဲင်ꩻလဲ့ အဝ်ႏထင်းဒျာႏ ဝွေꩻသီးဒါႏ၊ အဝ်ႏရိုꩻဒျာႏ ဝွေꩻသီးမာꩻထာꩻယံတဲင် အဝ်ႏမာꩻသွုပ်သွုပ်ထဲင်းနဝ်ꩻမꩻ ခမ်းထီယို ယိန်းအဝ်ႏခံသော့ꩻညညဗာႏထဲင်း ထာꩻဆင်ꩻရယ်ꩻခမ်း နုဲင်းပါနွို့မာႏဟံႏတသာႏဖြွီꩻထဲ့ တအွန်ကို၊ ယိန်းရုဲင်ꩻယိန်းဗဉ်၊ ယိန်းအင်ယိန်းပြေ့ꩻနဝ်ꩻသွူ။ ကွပ်စဲ့ꩻအာႏဏာႏဗွေႏဖုံႏ အိုပ်ဒို့ꩻတခြို့လွဉ်ညတဲင် ထာꩻသေပညာႏ ကထဲ့ဆုဲင်ꩻထိုꩻဗာႏနုဲင်းယို အခိန်ႏခါႏထွိုင်ႏကျင်ꩻသွုံꩻစွော့ꩻ ဒီမိုကရေစီစနစ်၊ ထွိုင်ႏအီႏဗွောင်စွော့ꩻ စီꩻပွါꩻရေꩻဆေꩻကွက်စနစ်နဝ်ꩻ ကထွꩻတွာတဝ်းဗာႏ တွမ်ႏဝင်ꩻလင်နဝ်ꩻ ခမ်းသားတဒါႏတဝ်း၊ တသေတဝ်းထမုဲင်ꩻမုဲင်ꩻ ခမ်းသားအမာႏနဲ့၊ ထင်းဒျာႏနမ်းဒါႏ နမ်းယံတွော့ꩻ ကအိုပ်ချုက်နွိုင်ႏလွေꩻဒါႏ စဲ့ꩻအာႏဏာႏဗွေႏသီး အမာႏနဲ့။ ၂၀၁၅-ကရိုꩻထဲင်းဒါႏ တနေင်ႏပေႏယို အခိန်ႏတပေါ့ရိုꩻတဝ်းဒွုမ်တဲင် မဉ်လꩻတဲ့ အီႏအဝ်ႏလွဉ်၊ မဉ်လꩻတဝ်းတဲ့ အီႏတွိုႏလွဉ်ဒျာႏရင်ꩻနဝ်ꩻမꩻ စီꩻပွါꩻရေꩻဆဲင်ႏရာꩻ ထာꩻမာꩻခွင်ႏကိုတာႏ ကထွာနယ်ꩻပညာႏထာꩻဒါႏ၊ ခွုမ်စာႏရင်ꩻပညာႏ၊ ကမ္ဘာႏသွုံꩻအာငဝ်းငွါဖုံႏယို မဉ်ႏအဝ်ႏလဲဉ်းတဲ့ လိုႏဖျင်ဆင်ထဲင်း၊ မဉ်ႏအဝ်ႏဒွိုန်းတဲ့ အဝ်ႏလိုႏဖျင်ဆင်စလွေꩻလဲဉ်းနဝ်ꩻသွူ။ မဉ်ႏထွားယင်း တဖဲ့ꩻကထွာနုဲင်း တနင်္သာရီတွိုင်ႏ၊ ထာဝယ်ပင်ႏလယ်ႏဖင်ႏတရွေꩻသူꩻကိုနဝ်ꩻလဲ့ အီႏမာꩻလွဉ်ထာဝယ်ပင်ႏလယ်ႏဖင်ႏ သင်္ဘောꩻဆိတ်(ထာဝယ်သင်္ဘောဆိပ်ကမ်း)နုဲင်းနဝ်ꩻတဲင် တဲက်ဆဲင်ႏတွမ်ႏအာသီဆံ တဆီခမ်းယို ကအီႏထူႏနွို့ꩻလွေꩻသဲင်ꩻဒါႏကွန်ႏနဝ်ꩻ ထွာလွဉ်စွဉ်ႏအရေꩻကီႏခြောင်ꩻ ခင်ႏလမ်းနဝ်ꩻသွူ။ အဝ်ႏထာဝယ် သင်္ဘောꩻဆိတ်နဝ်ꩻတဲင် အာဆီယံတဖူꩻတန်ယိုလဲ့ အီႏမာꩻဖြွဉ်လွေꩻသဲင်ꩻ သွုပ်ဆွိုက်တွမ်ႏ အာဆီယံတဆီခမ်းလွုမ်းနဝ်ꩻသွူ။