အမေႏရိကန်ႏ ဒေါ်လာ

အမေႏရိကန်ႏ ဒေါ်လာ (အဲင်းကလေတ်: United States dollar) ယို ထွာ အမေႏရိကန်ႏ ခမ်းခြွောန်းဗူႏ USA(United States of America) သီး ကအွောန်ႏတရာꩻခါꩻဒါႏ ရွောန်စုဲင်ႏ(ရွဉ်) ဒျာႏသွူ။ အွောန်ႏတောင်ꩻ ယူႏလꩻအီခါꩻတွမ်ႏ $ သင်္ကေတ၊ ဟဲ့ꩻ ဒေါ်လာ တောဝ်းတဲ့ ယူအဲတ်သ ဒေါ်လာသွူ။

အမေႏရိကန်ႏရွောန် အငိုꩻ ၁ ဒေါ်လာ စေးလာႏလောင်းနောဝ်ꩻ ဇျော့ဝါဆျဉ်တန် ယောင်ꩻဆျောဝ်ႏအောဝ်ႏပါ။ ရွောန်စေးလာႏကို အငိုꩻ ၁ ဒေါ်လာ၊ အငိုꩻ ၂ ဒေါ်လာ၊ အငိုꩻ ၅ ဒေါ်လာ၊ အငိုꩻ ၁၀ ဒေါ်လာ၊ အငိုꩻ ၂၀ ဒေါ်လာ၊ အငိုꩻ ၅၀ ဒေါ်လာ၊ အငိုꩻ ၁၀၀ ဒေါ်လာဗီႏဖုံႏအောဝ်ႏ၊ အောဝ်ႏပဉ်စားစားသွူ။ ဒေါ်လာကို ရွောန်ရောင်ႏတွမ်ႏ ခမ်ꩻရောင်ႏ ရွောန်ယွဲးဗီႏ မာꩻခါꩻတွမ်ႏ ဗောႏဖုံႏ တောင်ꩻဖုံႏ ယင်း ခမ်ꩻဖုံႏတဲ့အောဝ်ႏ။ ထာꩻခြွိုင်းစီꩻဖေႏရွောန် (မန်း- ဈေးရောင်းစက်) ဖုံႏယို စီꩻဖေႏချာဒျာႏ ဝွေꩻသီးကသေနာႏဒါႏ ရွောန်တောင်ꩻဗီႏယွဲးဖုံႏ။ ကွဲးတွော့ꩻ လိုꩻဖုံႏနောဝ်ꩻ ခုမ်အာဒျာႏ ရွောန်စေးလာႏသွူ။ ၁ ဒေါ်လာယို အောဝ်ႏပါ သဲန့် (Cent) ၁၀၀။ အမေႏရိကန်ႏခမ်းကို သဲန့် တောဝ်းတဲ့ ပဲနိယို ထွာ ထာꩻအွောန်ႏထော့ခါꩻ အငိုအဆေ့ꩻသွတ်ꩻ။ သဲန့် ၅၀ ဗီႏငိုꩻ၊ သဲန့် ၂၅ ဗီႏငိုꩻ၊ သဲန့် ၁၀ ဗီႏငိုꩻ၊ သဲန့် ၅ ဗီႏငိုꩻ၊ တွမ်ႏယင်း ၁ သဲန့်ဗီႏဖုံႏအောဝ်ႏ။ ရွောန်စေးလာႏတွမ်ႏ ရွောန်ယာႏ တောင်ꩻယာႏ ဗီသား ဖဲ့ꩻငါဖဲ့ꩻနောဝ်ꩻ နျꩻဗွို့ꩻသေꩻခါꩻ အမေႏရိကန်ႏခမ်းသား လိုꩻကသေငါꩻအာသား အယောင်ꩻ(အရုက်ပုင်ႏ)။ အစောဝ်းခါနောဝ်ꩻ အမေႏရိကန်ႏ ခမ်းခြွောန်းဗူႏ ဥပဒေႏအထျꩻအခင်ကိုရိုꩻ ဗာႏရဲပ်အွောန်ခမ်းထီသား (မန်း- အစိုးရ) ယို အွောန်ႏသေꩻဟောဝ်သေꩻခါꩻဗာႏ ခမ်ꩻယာႏအငိုꩻ ကဗွိုန်ပီဒါႏ ဝွေꩻသီးကထေနျꩻထန်ႏ ရွောန်စေးလာႏဖုံႏရာ နုဲင်းနောဝ်ꩻသွူ။ ၁၉၇၁ ဗာႏနေင်ႏကို အမေႏရိကန်ႏ ဗာႏရဲပ်အွောန်ခမ်းထီသားဖုံႏ အွောန်ႏတဆွိုး ယားကုဲင်ထိုꩻ ဥပဒေႏနောဝ်ꩻဗာႏတဲင် ကအီးနျꩻထန်ႏထဲင်း ရွောန်စေးလာႏတာႏ အွောန်ႏသေꩻဟောဝ်ခါꩻ ခမ်ꩻယာႏအငိုꩻ တတျာရွောန်ငိုꩻခရာႏ လိုႏတောဝ်းဒုမ်သွူ။ ဒေါ်လာကဉ်းအာအာနောဝ်ꩻ တအောဝ်ႏတောဝ်း ဝင်ꩻကအောဝ်ႏစုဲင်ႏ ဖြေꩻယွဲးအီထာꩻသားထျꩻကို။ အောဝ်ႏဒျာႏကွို့ꩻ လိတ်တဲမ်းတောင်ꩻခါꩻစာႏရင်ꩻ(မန်း-စာရင်း)ကို။ ကောပ်စွောန်ႏ ရွောန် ၁ ဗီႏငိုꩻယို လို့အာထဲင်းက ကထေနျꩻအီဒါႏ ထာꩻဗွို့ꩻမွိုက်ထီ (မန်း- မှင်) တွမ်ႏ စေးငိုꩻနောဝ်ꩻမꩻ ဗာႏနျꩻထေ ရွောန်စေးလာႏသားဖုံႏ ထေနျꩻတောဝ်းနောဝ်ꩻသွူ။

ဒေါ်လာရွဉ်စေးလာႏပုင်ႏစမ်းဖုံႏ

၁ ဒေါ်လာဗီႏ ဆငါဖဲ့ꩻနောဝ်ꩻ ဇျော့ဝါဆျဉ်တန် အောဝ်ႏ
၁ ဒေါ်လာဗီႏ ဆချာဖဲ့ꩻနောဝ်ꩻ အမေရိကန် ခမ်းခြွောန်းဗူႏသီး ထာꩻနျꩻသင်္ကေတ အောဝ်ႏ
၂ ဒေါ်လာဗီႏ ဆငါဖဲ့ꩻနောဝ်ꩻ တေားမတ်သ စဲ့ဖာသန် အောဝ်ႏ
၂ ဒေါ်လာဗီႏ ဆျာဖဲ့ꩻနောဝ်ꩻ ပွယ်ꩻ တဲမ်းစူမုဲင် လိတ်ရဲန်ႏဖေႏသေ အုံတောဝ်းခမ်းလင်စူကို အောဝ်ႏ
အေဗရာဟဲမ် လဉ်ကွန်းလ် ယောင်ꩻနောဝ်ꩻ အောဝ်ႏ ၅ ဒေါ်လာဗီႏ ဆငါဖဲ့ꩻ
ထာꩻခင်းလမ်း ယူႏလꩻအီ လဉ်ကွန်းလ်နောဝ်ꩻ အောဝ်ႏ ၅ ဒေါ်လာဗီႏ ဆချာဖဲ့ꩻ
၁၀ ဒေါ်လာဗီႏ ဆငါဖဲ့ꩻနောဝ်ꩻ အလဲက်သန္ဒား ဟာမီလ်တန် အောဝ်ႏ
၁၀ ဒေါ်လာဗီႏ ဆချာဖဲ့ꩻနောဝ်ꩻ အမေရိကန်ခမ်း ဘဏ္ဍာ ခင်ႏလမ်းတန် အောဝ်ႏ
၂၀ ဒေါ်လာဗီႏ ဆငါဖဲ့ꩻနောဝ်ꩻ အဲန်ဒရူး စဲက်သန် ယောင်ꩻဆျောဝ်ႏအောဝ်ႏ
၂၀ ဒေါ်လာဗီႏ ဆချာဖဲ့ꩻနောဝ်ꩻ လမ်းတန်ဗွာ အောဝ်ႏ
ဒေါ်လာ ၅၀ ဗီႏ ဆငါဖဲ့ꩻနောဝ်ꩻ ဦလစ်သဲ့ အောဝ်ႏ
ဒေါ်လာ ၅၀ ဗီႏ ဆချာဖဲ့ꩻနောဝ်ꩻ အမေရိကခမ်း ဝေင်ꩻကတူႏ အောဝ်ႏ
ဒေါ်လာ ၁၀၀ ဗီႏ ဆငါဖဲ့ꩻနောဝ်ꩻ ဘဲန်ဇျမဉ် ဖရန့်ကလဉ် အောဝ်ႏ
ဒေါ်လာ ၁၀၀ ဗီႏ ဆချာဖဲ့ꩻနောဝ်ꩻ လွတ်လပ်ရေးခန်းမ ဟဲ့ အုံတောဝ်းခမ်းလင်စူကို ဟော်တန် အောဝ်ႏ

အာႏကွိုꩻ