အရိယာႏသီး ထာꩻအုံအမျိုꩻတဆီ

"ဒုတိယ အရိယာဝါသသုတ် (အရိယာႏသီး ထာꩻအုံအမျိုꩻတဆီ)" ရဟန်ꩻသီးဖုံႏဟွေး- လꩻလဲဉ်းမဂ်ဖိုလ်ႏ အရိယာႏပုဂ္ဂိုလ်ႏသီး ထာꩻအုံနဝ်ꩻ အဝ်ႏတမျိုꩻတဆီ၊ အမျိုꩻတဆီကရိုꩻနဝ်ꩻ- ၁။ ပဉ္စင်္ဂဝိပ္ပဟီနော ဟောတိ- သာႏသနာႏတောႏကိုယို ရဟန်ꩻ(တပါꩻ)နဝ်ꩻ ထာꩻတထဲ့ꩻကာႏမဂွုဏ်ႏ (ကာမစ္ဆန္ဒ)ယို ပယ်ႏထိုꩻထွူလဲဉ်း၊ သꩻမဉ်ယား-သꩻလျားမျိုꩻ (ဗျာပါဒ)ယို ပယ်ႏထိုꩻထွူလဲဉ်း၊ ထာꩻလွꩻ တခေင်ꩻထာꩻ(ထိနမိဒ္ဓ)ယို ပယ်ႏထိုꩻထွူလဲဉ်း၊ သꩻလောလယ်-သံသယ (ဥဒ္ဓစ္စကုက္ကုစ္စ)ယို ပယ်ႏထိုꩻထွူလဲဉ်း၊ မွေးမဉ်ႏ-မွေးတဝ်းမဉ်ႏ ထာꩻယူႏမာႏ (ဝိစိကိစ္ဆာႏ)ယို ပယ်ႏထိုꩻထွူလဲဉ်း၊ ပယ်ႏထိုꩻထွူ တရာꩻယိုငတ်ꩻပါꩻ အုံခွꩻကဒဲ့ꩻထာꩻနောဝ်ꩻသွူ။ ၂။ ဆဠင်္ဂသမန္နာဂတော ဟောတိ- ရဟန်ꩻနဝ်ꩻနဝ်ꩻ ထီႏတွမ်ႏမဲ့တဲ့ နေးတွမ်ႏသတိꩻ သꩻရေꩻတဝ်း၊ သꩻပေႏတဝ်း၊ ဟွူန်တွမ်ႏနာႏတဲ့ယဝ်း၊ နွုမ်ꩻအလွီးတဲ့ယဝ်း၊ အံႏအရသာႏတဲ့ယဝ်း၊ ခွေါင်းရွတဲ့ယဝ်း၊ ယူႏတွမ်ႏသꩻတဲ့ယဝ်း သꩻရေꩻတဝ်း၊ သꩻပေႏတဝ်း၊ ယူႏတဝ်းနုဲင်းမုဲင်ꩻမုဲင်ꩻ အုံရိုꩻရိုꩻသာꩻသာꩻဒျာႏ နုဲင်းနောဝ်ꩻသွူ။ ၃။ သတာရက္ခေန စေတသာ၊ ဧကာရက္ခော ဟောတိ- ရဟန်ꩻနဝ်ꩻနဝ်ꩻ နေးတွမ်ႏသတိꩻတရာꩻတပါꩻ၊ အုံထာꩻထိန်ꩻဟောဝ်မွေးစွဉ်ႏ ဣန္ဒြေႏနောဝ်ꩻသွူ။ ၄။ စတုရာပဿေနော ဟောတိ- ရဟန်ꩻနဝ်ꩻနဝ်ꩻ 'ဆင်ႏချင်ႏသွုံꩻ၊ သယ်ꩻခံႏ၊ သျောင်ထိုꩻ၊ ယားထိုꩻအကုဲင်မျိုꩻ'အုံတွမ်ႏတရာꩻလစ်ꩻပါꩻနောဝ်ꩻသွူ။ ၅။ ပကုန္နပစ္စေကသစ္စော ဟောတိ- ရဟန်ꩻနဝ်ꩻနဝ်ꩻ အမွေးအမာႏ၊ သစ္စာႏခေါ်ခေါ်ဖုံႏနဝ်ꩻ ပယ်ႏထန်ႏထိုꩻထွူ အုံဗာႏစွူလဲဉ်းနောဝ်ꩻသွူ။ ၆။ သမဝယသဋ္ဌေသနော ဟောတိ- ရဟန်ꩻနဝ်ꩻနဝ်ꩻ ကထိုမ်ႏထာꩻကုဲင်မျိုꩻတဲ့ ပယ်ႏထွူလဲဉ်း၊ ကထိုမ်ႏထာꩻဟောဝ်မျိုꩻတဲ့ လꩻဗွေလဲဉ်း၊ အုံစွူဖြွိုးဗာႏလဲဉ်းနောဝ်ꩻသွူ။ ၇။ အနာဝိလသင်္ကပ္ပေါ ဟောတိ- ရဟန်ꩻနဝ်ꩻနဝ်ꩻ ခွုင်းကားတဲင် ထာꩻယူႏတဟောဝ်တဝ်းမျိုꩻဖုံႏနဝ်ꩻ ပယ်ႏထွူထိုꩻလဲဉ်း၊ အုံဗာႏလဲဉ်းသꩻခွꩻခွꩻ-အဝ်ႏဗာႏလဲဉ်း သꩻစွူစွူနောဝ်ꩻသွူ။ ၈။ ပဿဒ္ဓကာယသင်္ခါရော ဟောတိ- ရဟန်ꩻနဝ်ꩻနဝ်ꩻ (သꩻဆဲင်ႏရာꩻ) 'သꩻရေꩻ-သꩻကုဲင်' 'သꩻဒုက္ခ-သꩻချမ်ꩻသာႏ'တဲ့ အဲဉ်ထောဝ်းဒွုမ်၊ နေးတွမ်ႏသတိꩻစင်ဗွာ ဥပေက္ခာအစွန်ꩻ (အစိုန်ꩻ)တဲင် 'နမ်းငိမ်ꩻငဲ့'အုံပီပဲ့ဗာႏလဲဉ်းနောဝ်ꩻသွူ။ ၉။ သုဝိမုတ္တစိတ္တော ဟောတိ- ရဟန်ꩻနဝ်ꩻနဝ်ꩻ အသꩻနဝ်ꩻ လွစ်လꩻလဲဉ်း 'ရာဂ၊ ဒေါသ၊ မောဟ'အုံခွꩻကဒဲ့ꩻဗာႏလဲဉ်းထာꩻနဝ်ꩻသွူ။ ၁၀။ သုဝိမုတ္တပညော ဟောတိ- ရဟန်ꩻနဝ်ꩻနဝ်ꩻ လꩻအရဟတ္တမဂ်ဉာဏ်ႏတဲင် ထွာရဟန္တာႏတွော့ꩻ လွစ်ထန်ႏလဲဉ်း သံသရာႏဝွဋ်ဒုက္ခ၊ ဘဝသွတ်ꩻငိမ်ꩻလဲဉ်းနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ ဒသကနိပါတ်၊ ဒုတိယ အရိယာဝါသသုတ်)