အဝ်ႏလိုႏမာꩻလဲဉ်း
"အဝ်ႏလိုႏမာꩻလဲဉ်း ခမ်းသားကမည်ထွာဒါႏ ပအိုဝ်ႏတစွိုးခွိုꩻလုမ်းညီႏလာႏခံႏ" ကလဲဉ်း အောက်တိုဘာလာ ၁၅-နီꩻကို ခမ်းပေါင်ꩻဗူႏသမ္မတ မန်းခမ်းအစိုႏရတွမ်ႏ ခုမ်လက်နက်ခမ်းရင်ꩻသားသီး ကတဲမ်းထွို့ꩻထွူစူမုဲင်ယို တညတဝ်း ခမ်းပေါင်ꩻဗူႏလွတ်တောႏကိုလဲ့ ကန်ႏကွက်သားအဝ်ႏတဝ်း အွဉ်ႏထွော့ꩻလွေꩻဖေႏလဲဉ်း တခမ်းလုမ်း အွည်ႏဆွိုးအတွိုက်ꩻအခꩻ သဘောꩻတူႏလိတ်ချုတ်အတီႏ ၂၀၁၅-ဒီဇင်ဘာလာ (၈)နီꩻနဝ်ꩻသွူ။ ယိုနဝ်ꩻ မန်းခမ်းထီတွမ်ႏ မန်းခမ်းသားအတာႏ အီႏကာႏထင်ႏလွေꩻစငိမ်ꩻချံꩻရေꩻ တဖူꩻစနစ်သွူ၊ ခမ်းကို စဲ့ꩻဘေꩻ စဲ့ꩻတံႏ၊ လိုꩻမျိုꩻတန်ႏတူႏရေꩻ၊ နဲင်ႏငံႏရေꩻဖုံႏယို ဖြေႏသျင်ꩻချာတွမ်ႏ စဲ့ꩻရေꩻစဲ့ꩻနယ်ꩻ မွေးတဝ်းဒွုမ်တဲင် ဖြေႏသျင်ꩻလွေꩻလုဲင်ႏ တွမ်ႏဒေါ့ꩻရီအုံကိုမ်နေး နဲင်ႏငံႏရေꩻငဝ်းဝဲင်ꩻနဝ်ꩻသွူ။ မဉ်ႏထွားချာယင်း ၂၀၁၀-မာꩻချာလဲ့ မန်းခမ်းကိုယို လွတ်တောႏနဲင်ႏငံႏရေꩻကရိုꩻဒါႏ နုဲင်းဟန်ႏသနီꩻယို တအဝ်ႏတဝ်း၊ အဝ်ႏသျွုတ်ဒျာႏ ခမ်းကိုစဲ့ꩻပွယ်ꩻ၊ ဖြေႏသျင်ꩻတလꩻတဝ်းနဝ်ꩻသွူ၊ ထွိုင်ႏတွိုႏဖျင် ၂၀၁၀-ဗꩻ ၂၀၁၅-အခါႏကိုယို လွတ်တောႏနဲင်ႏငံႏရေꩻ အဝ်ႏလွဉ်ရိုꩻနုဲင်းနဝ်ꩻလဲ့ ခမ်းကိုစဲ့ꩻပွယ်ꩻနဝ်ꩻ တအွဉ်ႏဆွိုးနွောင်ꩻတဝ်းဒျာႏနေနေနဝ်ꩻသွူ။ သိန်းစိန်အစိုႏရသက်တန်ꩻ ထွိုင်ႏအီႏလို့ကိုနဝ်ꩻ လက်ခံႏဆွေꩻနွေꩻလွဉ်ခန်း တွမ်ႏခုမ်လက်နက်ခမ်းရင်ꩻသားစဲ့ꩻစွိုꩻဖုံႏ တခြွိုက်ထွူတခြွိုက်တဲင် ၂၀၁၅-အောက်တိုဘာလာကိုနဝ်ꩻ တဲမ်းထွို့ꩻလꩻလွေꩻစူမုဲင်ꩻ တခမ်းလုမ်းအွဉ်ႏဆွိုးအတွိုက်ꩻအခꩻ သဘောꩻတူႏလိတ်ချွုတ်အရန်းနဝ်ꩻသွူ။ တဲမ်းထွို့ꩻစူမုဲင် တခမ်းလုမ်းအွဉ်ႏဆွိုးအတွိုက်ꩻခꩻ သဘောꩻတူႏလိတ်ချွုတ်မဉ်ႏထွူ မွူးနီꩻပေါင်ꩻ(၉၀)ကို မာꩻဗာႏဒေါ့ꩻရီအုံကိုမ် နဲင်ႏငံႏရေꩻငဝ်းဝဲင်ꩻအဝ်ႏနုဲင်းနဝ်ꩻတဲင် ယိုခါနဝ်ꩻ အစိုႏရတဲ့နဝ်ꩻ၊ နဲင်ႏငံႏရေꩻပါတီတဲ့နဝ်ꩻ၊ ခုမ်လက်နက်ခမ်းရင်ꩻသားစဲ့ꩻစွိုꩻတဲ့နဝ်ꩻ တွိုႏလွဉ်လဲဉ်း အုံကိုမ်နဲင်ႏငံႏရေꩻငဝ်းဝဲင်ꩻအရန်းနဝ်ꩻသွူ။ နဝ်ꩻမꩻ တွိုႏလွဉ်လဲဉ်း ဒေါ့ꩻရီနဲင်ႏငံႏရေꩻငဝ်းဝဲင်ꩻအရန်းတဲင် ဒေါ့ꩻရီနဲင်ႏငံႏရေꩻငဝ်းဝဲင်ꩻကရိုꩻနဝ်ꩻ အီႏမꩻလွေꩻနုဲင်းမုဲင်ꩻ၊ အီႏအုံကိုမ်ဒေါ့ꩻရီလွေꩻ အခရာႏနုဲင်းမုဲင်ꩻ၊ အီႏထွာလွဉ်နွောင်ꩻတမုဲင်ꩻ၊ ပအိုႏတစွိုးခွိုꩻလုမ်းအတာႏ အကျိုꩻအီႏအဝ်ႏနွောင်ꩻထမုဲင်ꩻဖုံႏယို သေနာႏဗော့ꩻ ကထင်ႏဆွေꩻနွေꩻသားလုမ်ꩻနဝ်ꩻ တထွာတဝ်း၊ တလꩻတဝ်းသွူ။ ကထွာဒါႏ ပအိုႏဒေႏသကို ထင်ႏလွတ်တောႏသား၊ မာꩻဒေႏသပြွူႏဖြိုရေꩻ ဒေႏသအွဉ်ငါသား၊ ကာႏတဲင်ပအိုႏလိုꩻယွဲးဖုံႏ၊ ကားတဲင်ပအိုႏခမ်းသားဖုံႏ၊ မဉ်ႏဒေါ့ꩻဗာႏ ပအိုႏလိုꩻကျောင်ꩻသီးပါဝင်ႏနွောင်ꩻတဝ်းလဲ့ အကျံႏဉာဏ်ႏဖုံႏယို အဝ်ႏလိုႏသေထွꩻလို့လို့၊ အဝ်ႏလိုႏပါဝင်ႏလို့လို့ငါႏနဝ်ꩻသွူ။ နဝ်ꩻမꩻ မဉ်ႏဒေါ့ꩻလွဉ်သွူ ပအိုႏနဲင်ႏငံႏရေꩻနဝ်ꩻ မာꩻဗော့ꩻ ပီအဲန်အိုခြေင်ခြေင်လုမ်ꩻနဝ်ꩻ တလꩻတဝ်းသွူ၊ မဉ်ႏတွိုႏဆွုမ်ႏလွဉ်သွူ လိုꩻမျိုꩻတာႏ အခွင်ꩻအရေꩻဟဝ်နုဲင်းယိုနဝ်ꩻ ပီအဲန်အိုခြေင်ခြေင်လုမ်ꩻတဲ့ မာꩻတလꩻတဝ်း၊ ပအမဖလုမ်ꩻတဲ့ မာꩻတလꩻတဝ်း၊ ပအိုႏစွိုးခွိုꩻလွစ်ထန်ႏရေꩻအစွိုꩻလုမ်ꩻတဲ့ တလꩻတဝ်း၊ ခွုင်းကားတဲင် ပအိုဝ်ႏလိုꩻမျိုꩻကို အစွိုꩻတဲ့နဝ်ꩻ၊ ခမ်းသားတဲ့နဝ်ꩻ ပါဝင်ႏဗာႏလို့လို့၊ အငဝ်းထန်ႏလို့လို့နဝ်ꩻ အရေꩻတန်ငါႏသွူ။ နဝ်ꩻမꩻ မဉ်ႏတွိုႏ ၂၀၁၆-ဇန်နဝါရီလာ ၁၂-နီꩻယိုနဝ်ꩻ အီႏစလွေꩻသွူ ဒေါ့ꩻရီနဲင်ႏငံႏရေꩻငဝ်းဝဲင်ꩻ ငိမ်ꩻချံꩻရေꩻညီႏလာႏခံႏနဝ်ꩻသွူ၊ ငိမ်ꩻချံꩻရေꩻညီႏလာႏခံႏပွယ်ꩻယို ကတဲမ်းထွို့ꩻခါꩻဒါႏ တခမ်းလုမ်း အွဉ်ႏဆွိုးအတွိုက်ꩻခꩻ မူဘောင်ကိုအတွိုင်ꩻ လစ်ꩻလာတလဲင်ႏ မာꩻလွေꩻပုံႏမဲဉ်ႏဖေႏဗာႏနဝ်ꩻသွူ။ ခမ်းပေါင်ꩻဗူႏငိမ်ꩻချံꩻရေꩻညီႏလာႏခံႏကိုယို အစိုႏရစွိုꩻ နမ်းခြောင်ꩻနဝ်ꩻ (၇၅)ဖြာꩻ၊ လွတ်တောႏနမ်းခြောင်ꩻနဝ်ꩻ (၇၅)ဖြာꩻ၊ တပ်မတောႏနမ်းခြောင်ꩻနဝ်ꩻ (၁၅၀)ဖြာꩻ၊ ခုမ်လက်နက် ခမ်းရင်ꩻသားစဲ့ꩻစွိုꩻနမ်းခြောင်ꩻနဝ်ꩻ (၁၅၀)ဖြာꩻ၊ တရာꩻဝင်ႏနဲင်ႏငံႏရေꩻပါတီဖုံႏနမ်းခြောင်ꩻနဝ်ꩻ (၁၅၀)ဖြာꩻ၊ ခမ်းရင်ꩻသားနမ်းခြောင်ꩻနဝ်ꩻ (၅၀)ဖြာꩻ တွမ်ႏပါဝင်ႏထွိုက်သင်ꩻဒါႏလိုꩻနဝ်ꩻ (၅၀)ဖြာꩻ စတဲင်ထင်ႏခွင်ꩻလꩻ လိုꩻအစွိုꩻနုဲင်းယိုဖုံႏထွူ နမ်းခြောင်ꩻလိုꩻယို(၇၀၀)ဖြာꩻနဝ်ꩻသွူ။ မဉ်ႏထွားထင်ႏခွင်ꩻလꩻအစွိုꩻကို ပအိုႏလိုꩻမျိုꩻတာႏ ထင်ႏခွင်ꩻအဝ်ႏလုမ်ꩻ ခုမ်လက်နက်နဝ်ꩻ ပအိုဝ်ႏစွိုးခွိုꩻလွစ်ထန်ႏရေꩻအစွိုꩻ၊ ပါတီနဲင်ႏငံႏရေꩻနဝ်ꩻ ပအိုႏစွိုးခွိုꩻအစွိုꩻချုတ် (ပီအဲန်အို)၊ ခမ်းပေါင်ꩻဗူႏပအိုႏစွိုးခွိုꩻအစွိုꩻချုတ် (ပအမဖ)ယိုသိုမ်စွိုꩻနဝ်ꩻသွူ။ အီႏဒေါ့ꩻရီလွေꩻတမုဲင်ꩻခရာႏဖုံႏနဝ်ꩻ ခမ်းထီ(နဲင်ႏငံႏ)ရေꩻ၊ လိုမုရေꩻ၊ စီꩻပွါꩻရေꩻ၊ လိုမ်းဗဉ်ႏရေꩻ၊ ဟံႏယာႏတွမ်ႏသဘာဝ အသောင်အရင်ꩻရေꩻခရာႏဖုံႏ တွမ်ႏအဒဝ်ႏဒဝ်ႏနဝ်ꩻသွူ၊ မဉ်ႏဖွင်ꩻအလုဲင်း နုဲင်းခမ်းထီရေꩻကိုနဝ်ꩻ လိုꩻမျိုꩻတမျိုꩻယို လꩻပဲင်ႏခွင်ꩻ အဝ်ႏတမုဲင်ꩻ၊ မာꩻပဲင်ႏခွင်ꩻ အဝ်ႏတမုဲင်ꩻ နုဲင်းယိုဖုံႏနဝ်ꩻသွူ။ အစွိုꩻစွုမ်ႏ လိုꩻမျိုꩻစွုမ်ႏ ကပါဝင်ႏ ကထင်ႏဆွေꩻနွေꩻဒါႏ နုဲင်းငံႏအုံကိုမ်ပွယ်ꩻယိုနဝ်ꩻ ထွာဒေါ့ꩻရီအုံကိုမ် ခမ်းထီပုံႏ ခမ်းထီပွိုင်ပွယ်ꩻတဲင် အဝ်ႏလုမ်ꩻညာꩻညာꩻတလဲင်ႏနဝ်ꩻသွူ။ ဝင်ꩻကဒေါ့ꩻရီ ခမ်းထီပုံႏပွိုင်ခိန်ႏကာႏလနုဲင်းယိုနဝ်ꩻ ပအိုႏလိုꩻမျိုꩻတာႏ ပအိုႏခမ်းထီ လꩻခွင်ꩻအဝ်ႏခိန်ႏတဲင် လွောင်ႏလွောင်ႏဗူႏဗူႏတွော့ꩻ အဝ်ႏလိုႏထင်ႏဒေါ့ꩻငါႏနဝ်ꩻသွူ။ ခမ်းပေါင်ꩻဗူႏငိမ်ꩻချံꩻရေꩻညီႏလာႏခံႏပွယ်ꩻကို ကထင်ႏဒေါ့ꩻရီအုံကိုမ်ဒါႏ လိုꩻမျိုꩻစွုမ်ႏ အရေꩻစွုမ်ႏအတာႏ အချက်ဖုံႏယို အီႏအွဉ်ႏထွော့တီႏလွေꩻတွမ်ႏ လိုꩻမျိုꩻစွုမ်ႏ၊ လိုꩻစွိုꩻစွုမ်ႏ ကပါဝင်ႏတဲမ်းထွို့ꩻဒါႏ ခမ်းပေါင်ꩻဗူႏလိတ်ချွုတ်နဝ်ꩻသွူ၊ အီႏထွာလွဉ် မန်းခမ်းကို ကအဝ်ႏဒါႏ ခမ်းရင်ꩻသားစွုမ်ႏ ပါဝင်ႏတဲမ်းထွို့ꩻရောင် မန်းခမ်းထီပုံႏပွိုင်တဲင် မန်းခမ်းထီပုံႏပွိုင်နဝ်ꩻ အီႏအဝ်ႏလွေꩻယင်း တွမ်ႏအမျာꩻသဘောꩻ၊ အွဉ်ႏချွုတ်တီႏယင်း တွမ်ႏခမ်းပေါင်ꩻဗူႏသဘောꩻတူႏလိတ်ချွုတ် (ပြည်ထောင်စုသဘောတူစာချုပ်)နဝ်ꩻသွူ။ နဝ်ꩻမꩻ ခမ်းပေါင်ꩻဗူႏငိမ်ꩻချံꩻရေꩻညီႏလာႏခံႏကိုယို မဉ်ႏဒေါ့ꩻရီလွေꩻ ခမ်းထီပုံႏပွိုင်တသာနဝ်ꩻ ခမ်းနယ်ႏတအဲဉ်ထဝ်းဒွုန်း ခမ်းရင်ꩻသားယို မဉ်ႏဆွေꩻနွေꩻလွေꩻ ခမ်းနယ်ႏတသာပေါႏပေါက်ရေꩻနဝ်ꩻ ပအိုႏအတာႏ ခမ်းနယ်ႏလꩻခွင်ꩻ အီႏပါနွောင်ꩻနဝ်ꩻသွူ။ အီႏထင်ႏလွေꩻငိမ်ꩻချံꩻရေꩻညီႏလာႏခံႏတာႏ နုဲင်းယိုခါနဝ်ꩻ ပအိုႏကို ထင်ႏခွင်ꩻအဝ်ႏလꩻသိုမ်စွိုꩻရိုꩻလဲ့ ညီႏလာႏခံႏကို မဉ်ႏထန်ႏဒျာႏအစွိုꩻတာႏငဝ်း၊ ထာꩻမဲဉ်လꩻတဲ့ တစွိုꩻတွမ်ႏတစွိုꩻ မဉ်ႏတဗွိုန်တဝ်းဝင်ꩻ၊ မဉ်ႏခေးချာဒျာႏလွဝင်ꩻ၊ ဒေါ့ꩻငဝ်းမဉ်ႏထန်ႏဒျာႏ တစွိုꩻတငွါငွါနုဲင်းနဝ်ꩻနဝ်ꩻ ထွာသင်ꩻတဝ်းဒွုမ်အခိန်ႏသွူ။ အခိန်ႏနုဲင်းယိုခါနဝ်ꩻ ပအိုႏအစွိုꩻချင်ꩻချင်ꩻ ရန်ႏချာဝင်ꩻ အခိန်ႏတမွေးတဝ်းဒွုမ်သွူ၊ ဖေႏကထန်ႏငဝ်းတငွါချင်ႏ ဖြွမ်းဝင်ꩻအဝ်ႏလိုႏရဲးကမ်းဒျာႏ ပအိုႏလိုꩻမျိုꩻကလꩻထွိုက် လꩻသင်ꩻဒါႏ ခမ်းထီအရေꩻ အရဲးမန်ႏသမျဖုံႏနဝ်ꩻသွူ။ နုဲင်းယိုခါ ငိမ်ꩻချံꩻရေꩻညီႏလာႏခံႏပွယ်ꩻကို ပအိုႏလိုꩻမျိုꩻတာႏ အီႏထင်ႏဒင်ႏပျꩻတမုဲင်ꩻဟောင်း၊ ထင်ႏခွင်ꩻကလꩻဒါႏယိုသိုမ်စွိုꩻလဲ့ သဘောꩻထာꩻဗွိုန်ပီလဲဉ်းလွဝင်ꩻဟောင်း၊ သဘောꩻထာꩻဖေႏကဗွိုန်ပီဝင်ꩻလဲ့ ကျိုꩻစာꩻဒေါ့ꩻရီဖိုဝင်ꩻမုဲင်ꩻခါဟောင်း၊ ပအိုႏခမ်းသား သဘောꩻထာꩻအဝ်ႏနုဲင်းမုဲင်ꩻကရိုꩻလဲ့ ရီနာႏထူႏဖိုနေဟောင်း။ အခိန်ႏနုဲင်းယိုခါ ဝင်ꩻတခမ်းလုမ်း အဝ်ႏမာꩻလွေꩻလဲဉ်းသွူ ခမ်းပေါင်ꩻဗူႏညီႏလာႏခံႏပွယ်ꩻနုဲင်းယိုနဝ်ꩻ ပအိုႏကိုအစွိုꩻချင်ꩻ တစွိုꩻတွမ်ႏတစွိုꩻ အဝ်ႏလိုႏဒေါ့ꩻရီလဲဉ်းဝင်ꩻ၊ အွဉ်ငါတွမ်ႏပအိုႏခမ်းသား အဝ်ႏလိုႏဆွေꩻနွေꩻငါႏလဲဉ်းဝင်ꩻ၊ ပအိုႏတစွိုးခွိုꩻလုမ်း သဘောꩻထာꩻ အဝ်ႏလိုႏထန်ႏငါႏလဲဉ်း၊ အဝ်ႏလိုႏမာꩻငါႏလဲဉ်း ပအိုဝ်ႏတစွိုးခွိုꩻလုမ်းညီႏလာႏခံႏကရိုꩻနဝ်ꩻ ခမ်းသားငဝ်း လိတ်သေသင်ꩻခြွူႏမွဉ်းသားစွိုꩻ တဲက်တွန်ꩻတမာလွေꩻဗာႏနဝ်ꩻသွူ။[၁][၂]