အာဟာရတွမ်ႏဘဝ
"အာဟာာႏရတွမ်ႏဘဝ" တဲမ်းလိတ်သား ကအီႏတဲမ်းဗာႏ အာဟာႏရတွမ်ႏဘဝ ရွမ်ဖြုဲင်ꩻယိုနောဝ်ꩻ ခါးလားကတဲမ်းနောဝ်ꩻ မော့ꩻခွဲဗာႏဖိုလဲဉ်း၊ ထီႏဗာႏဖိုလဲဉ်းတွမ်ႏမဲ့၊ ဟွိုန်တဲ့ဟွိုန်ဗာႏဖိုလဲဉ်းတွမ်ႏနား၊ ကထောင်ထွားလဲ့ မော့ꩻဗာႏဖိုလဲဉ်း၊ ထီႏဟွိုန်မော့ꩻသေ ယိုလစ်ꩻမျိုꩻစွုမ်ႏလဲဉ်းတွော့ꩻ တဲမ်းထန်ႏနယ်ဗာႏ ဖူးဝေးမွိုးဖါ လိုꩻအမျာꩻသီးဖုံႏနောဝ်ꩻသွူ။ အာဟာႏရတွမ်ႏဘဝ ဆဲင်ႏထာꩻမုဲင်ꩻဟောင်း သꩻကိုမဉ်ရီလွဉ်သား မဲ့ꩻအောဝ်ႏဒါႏ၊ တသေတောဝ်းသားဖုံႏတာႏနောဝ်ꩻ ထွာအီငေါဝ်းရီသနဲ့၊ တဲမ်းလိတ်သား မဉ်ႏသျင်ꩻနယ်ဗာႏနောဝ်ꩻ ဘုရာꩻပါဠိကျမ်ꩻဂန်ႏကို အောဝ်ႏလွဉ်နုဲင်းယို "သဗ္ဗေ သတ္တာ အာဟာရဋ္ဌိတိကာ - ခွိုင်းကားတဲင် ထာꩻသꩻသားဖုံႏနောဝ်ꩻ အုံပွိုင်းအုံဒေါင် အာဟာႏရကရိုꩻဒါႏ ထာꩻအံႏဖုံႏအလောင်းလွဉ်းလွဉ်းတဲ့ရိုꩻ၊ သတ္တဝါႏသီးဖုံႏနောဝ်ꩻ အံႏအွꩻဗာႏတောဝ်း အာဟာႏရနောဝ်ꩻ သက်မွန်နွောင်ꩻညတောဝ်းနောဝ်ꩻသွူ။ ယင်းတစွိုးနောဝ်ꩻ ဗွေႏမျတ်ဘုရာꩻ ကဟော်ꩻသေꩻခါꩻ အဘိဓမ္မာႏတရာꩻတောႏကိုနောဝ်ꩻ သမ်းရိုꩻဖျင်သတ္တဝါႏသီး ခွိုင်းကားတဲင် ထာꩻသက်သားဖုံႏနောဝ်ꩻ အုံပွိုင်းအုံဒေါင်ဗာႏတွမ်ႏ (ကံႏ သꩻ ဥတု အာဟာႏရ)ယိုလစ်ꩻမျိုꩻလွဉ်းလွဉ်း၊ ကထွာလွဉ် သတ္တဝါႏယို ကင်ꩻထိုꩻတွမ်ႏ ကံႏ သꩻ ဥတု အာဟာႏရ ယိုလစ်ꩻမျိုꩻတအဲဉ်ထောဝ်း၊ အောဝ်ႏမွန်ဗန်အီဗာႏတွမ်ႏ ယိုလစ်ꩻစွိုးကိုနောဝ်ꩻ ကံႏနောဝ်ꩻ အလာပဲင်ꩻ၊ အနေင်ႏပဲင်ꩻမꩻ ဖျင်ဗာႏတလဲင်ႏလနီလဲင်ႏ၊ သꩻကရိုꩻနောဝ်ꩻတဲ့ တဖျင်ထွူတောဝ်း တလဲင်ႏချင်ꩻခန်းတဲ့ အလာပဲင်ꩻ အနေင်ႏပဲင်ꩻ အောဝ်ႏမွန်ဗန်နွောင်ꩻဒျာႏ၊ ဥတုကရိုꩻနောဝ်ꩻတဲ့ နီလာသွံလာမꩻပြောင်ꩻ၊ နီလာသွံလာမꩻ အီႏခွိုင်းလွဉ်လိုꩻသက်၊ အီႏထွာနွောင်ꩻဘေꩻ၊ အီႏထွာနွောင်ꩻ အန္တရာယ်ႏ၊ ကွပ်နောဝ်ꩻမꩻ အရေꩻတတန်ထွꩻတောဝ်း အာဟာႏရ တဲမ်းလိတ်သား မဉ်ဒေါ့ꩻခြုဲင်းနယ်ငါႏနောဝ်ꩻမꩻ တဲမ်းထန်ႏနယ်ဗာႏ ရွမ်ဖြုဲင်ꩻယိုသွူ။[၁][၂]