အောဝ်ႏလိုႏဖျင်ဟောဝ်
"အောဝ်ႏလိုႏဖျင်ဟောဝ်ငါႏလဲဉ်း နီရပ်ရာႏလုမ်းဗဉ်ႏရေꩻ" လိုꩻမျိုꩻတမျိုꩻကအောဝ်ႏအုံဒါႏ ရပ်ရာႏဒေႏသမုဲင်ꩻတရိုꩻတောဝ်း တဖွေါင်ꩻအရဲးအကမ်း မဉ်ႏအဲဉ်ထောဝ်း၊ မဉ်ႏငိမ်ꩻချံꩻခွꩻသꩻတောဝ်းနောဝ်ꩻ နီလိုꩻချင်ꩻချင်ꩻလဲ့ တဖြာꩻတွမ်ႏတဖြာꩻ တမဉ်ႏမွိုတ်တောဝ်းဝင်ꩻ၊ သꩻဗွော့ꩻတောဝ်းတင်ꩻသွူတကာႏတောဝ်း လိုꩻအုံအောဝ်ႏမုꩻ ဘဝလဲ့ထဲ့ဖွိုႏ၊ အီႏအုံမွန်းဒေါ့ꩻရီဝင်ꩻငါလဲ့ အခိန်ႏတဖေႏနွောင်ꩻတောဝ်းတဲင် အနာလွို ဒုံဆောင်ႏရပ်ရာႏ ပြုဲင်ပြင်ꩻထိုꩻဒါႏ၊ မဉ်ႏဒေါ့ꩻစွဉ်ႏစွဉ်ႏနောဝ်ꩻ ဒုံပꩻထိုꩻဒါႏနောဝ်ꩻသွူ။ ဥပမာႏပွုံႏခွိုင်ꩻ မဉ်ႏတဲက်တွိုင်ꩻနယ်ဗာႏ သွို့ꩻခြံလုဲင်းယာႏနောဝ်ꩻ နီကလုပ်ꩻဒါႏ ကွန်ႏအမျိုꩻမျိုꩻယို တဖွောင်ꩻအောဝ်ႏမꩻလꩻသွူ။ တဖွေါင်ꩻတအောဝ်ႏတောဝ်း သွို့ꩻခြံလုဲင်းယာႏဖုံႏယို ဖိုးပနားတရိုꩻတောဝ်း၊ တခွန်ꩻတရိုꩻတောဝ်း အခိန်ႏတရွေꩻတောဝ်း နွို့ယားကုဲင်လꩻထိုꩻတဲင် နီစီꩻပွါꩻရေꩻတွမ်ႏ လွိုင်ႏကွိုန်ꩻရေꩻဖုံႏ ထဲ့သွုမ်ꩻထိုꩻတွော့ꩻ နီလိုꩻမျိုꩻအုံအောဝ်ႏမုꩻဘဝ ဒုက္ခဆင်ꩻရယ်ꩻဗာႏနောဝ်ꩻသွူ။ အရေꩻတွိုႏ အရေꩻတန် ကရိုꩻဒါႏငေါဝ်းယို စီꩻပွာꩻရေꩻ၊ လိုꩻမုꩻရေꩻ၊ ခြွိုင်ႏသန်ꩻရေꩻစတဲင် အရေꩻဖုံႏယို မဉ်ႏသွုမ်ꩻထိုꩻနောဝ်ꩻ ကျံႏစယ်ႏထူႏချာလꩻစွဉ်ႏလဲ့ ကထွိုင်ႏတွိုႏ အမျိုꩻသာꩻရေꩻ၊ စွိုးခွိုꩻရေꩻ၊ ဘာႏသာႏရေꩻ မဉ်ႏထဲ့သွုမ်ꩻထိုꩻသွူနောဝ်ꩻ အီႏထူႏလꩻချာဗာႏ ယိုꩻတောဝ်းတဲင် တယ်ႏစအခိန်ႏယိုခါ အောဝ်ႏမဲ့ထွား၊ အောဝ်ႏနားနာႏ ရဲပေ့ꩻဖေႏဗာႏ နီစွိုးခွိုꩻအန္တရာယ်ႏ၊ နီရပ်ရာႏအန္တရာယ်ႏဖုံႏနောဝ်ꩻသွူ။ ပွိုးတမုဲင်ꩻ ဖေႏသတိꩻဗာႏ ခမ်းသားမွိုးဖါကရိုꩻနောဝ်ꩻ ခေတ်စခါရန်ႏသူႏတွမ်ႏ ခေတ်တသာရန်ႏသူႏနောဝ်ꩻ တဗွိုန်ပီတောဝ်းဝင်ꩻသွူ။ ခေတ်စခါရန်ႏသူႏနောဝ်ꩻ နေးတွမ်ႏအနယ်ꩻကျံꩻ စူခွုမ်လက်နက် တွိုက်ꩻသတ်နေးကဲဉ်းအာတဲင် ယိုနောဝ်ꩻသွꩻ ယိုနောဝ်ꩻရန်ႏသူႏ သေလꩻထွူတလဲင်ႏချင်ꩻ၊ ပေ့ꩻရဲနွောင်ꩻ၊ ထိုꩻလဲ့ꩻလꩻ၊ ခြေင်ႏချာနွောင်ꩻသွူးစွဉ်ႏလဲ့ တွိုႏဒျာႏခေတ်တသာရန်ႏသူႏယို ဝင်ꩻနေးတွမ်ႏအနယ်ႏပေါင်ꩻစွုမ်ႏ အောဝ်ႏနွို့လွဉ်လဲဉ်း နီရပ်ရာႏ၊ နီအီႏသေထွꩻဗာႏနောဝ်ꩻ ယိုꩻတောဝ်း၊ ဖေႏကသေထွꩻ တဖဲ့ꩻသားထာꩻကျံႏ၊ ဖေႏကသေထွꩻ ခေတ်တသာရန်ႏသူႏ ဉာဏ်ႏဟွေႏနောဝ်ꩻ နီပအိုဝ်ႏချင်ꩻချင်ꩻ လွောင်ႏဗူႏဝင်ꩻမꩻ၊ သစ္စာႏအောဝ်ႏလိုꩻမျိုꩻလောင်းမꩻ ပေါင်ꩻကွိုက်ꩻချာဒါႏဒါႏ ပါꩻလိုꩻမျိုꩻ၊ ပါꩻဘာႏသာႏမꩻ နီအီႏပေ့ꩻရဲးလꩻ နီဒုံဆောင်ႏ နီလိုꩻမျိုꩻအန္တရာယ်ႏနောဝ်ꩻသွူ။ နီပအိုဝ်ႏဒုံဆောင်ႏယိုခါ အောဝ်ႏတွမ်ႏဖြားဒုံ၊ ဒုံပွေါးသားရိုꩻကီလဲ့ ပွေါးဒုံနောဝ်ꩻ တဗွိုန်ပီတော၀်းဒွုမ် ပွိုင်းလဲင်ႏခါ၊ ခေတ်ငိမ်ꩻချံꩻလဲဉ်းရိုꩻနောဝ်ꩻတွော့ꩻ တာႏဝွန်ႏအလꩻ ပွေါးဒုံတွော့ꩻ လိုꩻဟောဝ်/လိုꩻကုဲင်ကျောင်ꩻသေတောဝ်း၊ မောင်ႏဖြေင်း/မောင်ႏဗွာကျောင်ꩻ သေတောဝ်းတဲင် ဒုံလုမ်းဗဉ်ႏရေꩻတာႏ သꩻဆွော့ꩻလꩻတောဝ်းဒွုမ်၊ အာႏကွိုꩻခရာႏထွာတောဝ်းဒွုမ် ရိုꩻဗာႏနုဲင်းနောဝ်ꩻသွူ။ ကွပ်သေထွꩻဒွုမ် လိုꩻနွို့လိုꩻထန်ႏ နုဲင်းနောဝ်ꩻတဲင် ဝင်ꩻနေးတွမ်ႏဘာႏသာႏရေꩻအလꩻလဲ့ တရိုꩻတောဝ်း၊ စီꩻပွာꩻရေꩻအလꩻလဲ့တရိုꩻတောဝ်း ပါꩻအောဝ်ႏယား၊ အောဝ်ႏကျံႏ၊ အောဝ်ႏဝွေႏဖန်ႏ နီခွိုꩻမူႏ ပါꩻအောဝ်ႏမဉ်ထူႏ နီဟံႏယာႏနောဝ်ꩻမꩻ ဒုံပွေါးသားဖုံႏ ဖြားဒုံဖုံႏ ခိုဗင်ႏတန်ဖုံႏ အွဉ်ႏသတိꩻဗာႏ၊ ထွားဟောဝ်ဟောဝ်ဗာႏ လိုꩻနွို့လိုꩻထန်ႏ၊ မာꩻသေႏချာႏဗာႏ ထဉ်ႏစာႏရင်ꩻနောဝ်ꩻမꩻ နီသေထွꩻ ခေတ်တသာရန်ႏသူႏအကျောင်ꩻအခရာႏဖုံႏနောဝ်ꩻသွူ။ ခွိုင်းယိုမာꩻငါ နီပအို၀်ႏရပ်ရာႏဒုံဆောင်ႏ ဖေႏကလွိုင်ႏကွိုန်ꩻ၊ ဖေႏကထင်ႏထိုထဲင်း၊ ဖေႏကငိမ်ꩻချံꩻထဲင်းထဲင်းနောဝ်ꩻ အောဝ်ႏမဲ့ထွား၊ အောဝ်ႏနားနာႏလွုမ်ꩻတကာႏတောဝ်း တယ်ႏစဒုံအရန်းꩻ အွိုင်ႏအရန်း ဗꩻတွိုႏစွဉ်ႏ ခမ်းထီနဲင်ႏငံႏအရန်း အောဝ်ႏလိုႏဖျင်ဆင်ငါႏလဲဉ်း နီစီꩻကန်ꩻ အောဝ်ႏလိုႏခွုမ်မာꩻခြေင်းငါႏလဲဉ်း နီလုမ်းဗဉ်ႏရေꩻ တဖြာꩻတွမ်ႏတဖြာꩻ၊ တဒုံတွမ်ႏတဒုံ၊ တစွိုꩻတွမ်ႏတစွိုꩻ အောဝ်ႏလိုႏလွောင်ႏဗူႏ ဖျင်ဆင်ငါႏလဲဉ်း နီပအိုဝ်ႏရပ်ရာႏဖုံႏအကျောင်ꩻ ဖေႏသေဗာႏခမ်းသားမွိုးဖါသီးနုဲင်းယိုသွူ။[၁][၂]