အွဉ်ႏရေꩻတခြိုꩻရေꩻတဝ်းနီမျိုꩻ

'"အွဉ်ႏရေꩻတခြိုꩻ- အွဉ်ႏရေꩻတဝ်းတခြိုꩻ အဝ်ႏနီမျိုꩻ"

နီဗွေႏဘုရာꩻဟော်ꩻဖေႏ ဗွေႏရဟန်ꩻသီဖုံႏ တရာꩻနုဲင်းယို- ၁။ အာမိသဂရု ပရိသာ နော သဒ္ဓမ္မ ဂရု - အွဉ်ႏရေꩻဒျာႏတခြိုꩻ၊ အွဉ်ႏရေꩻတဝ်းတရာꩻ။ ၂။ သဒ္ဓမ္မ ပရိသာ၊ နော အာမိသဂရု- အွဉ်ႏရေꩻဒျာႏတရာꩻ၊ အွဉ်ႏရေꩻတဝ်းတခြိုꩻ၊ ဒွေမာ ပရိသာ- ပရိသတ် အောဝ်ႏနီမျိုꩻနုဲင်းနောဝ်ꩻသွူ။ ရဟန်ꩻသီးဖုံႏဟွေး- 'အွဉ်ႏရေꩻဒျာႏတခြိုꩻ၊ အွဉ်ႏရေꩻတဝ်းတရာꩻ'ကရိုꩻနဝ်ꩻ - 'စတုပစ္စယ ဂရုကာ-သင်္ကန်ꩻ၊ သွမ်ꩻ၊ ကျောင်ꩻ၊ တသီႏ' ဖေႏနေးကလွိုင်ႏအာတဲင် ကတာႏအမျာꩻငါ လိုꩻခြာဖုံႏနဝ်ꩻ အုပ်ꩻလို့ဝင်ꩻ၊ အံႏဖြာႏလို့ဝင်ꩻနုဲင်းယို- တကာႏသီးဖုံႏဟွေး- ရဟန်ꩻကမဉ်ꩻနုဲင်းယိုနဝ်ꩻ သီႏလတဉ်ႏခွေါင်ငါႏမွော့နဝ်ꩻ၊ ရဟန်ꩻကမဉ်ꩻနုဲင်းယိုနဝ်ꩻ သမာႏဓိတဉ်ႏခွေါင်ငါႏမွော့နဝ်ႏ၊ ရဟန်ꩻကမဉ်ꩻနုဲင်းယိုနဝ်ꩻ အားထွုတ်တရာꩻ မာꩻမွေးဝိပဿနာႏ ပညာႏတဉ်ႏခွေါင်မွေးမွော့နဝ်ꩻ၊ တရာႏခွန်နင်ꩻသီးဖုံႏဟွေး- ရဟန်ꩻကမဉ်ꩻနုဲင်းယိုနဝ်ꩻ လꩻတမဂ်တဖိုလ်ႏ သောႏတာႏပန်ႏပုဂ္ဂိုလ်ႏမွော့နဝ်၊ ရဟန်ꩻကမဉ်ꩻနုဲင်းယိုနဝ်ꩻ လꩻနီမဂ်နီဖိုလ်ႏ သကဒါဂါမ်ႏပုဂ္ဂိုလ်ႏမွော့နဝ်ꩻ၊ ရဟန်ꩻကမဉ်ꩻနုဲင်းယိုနဝ်ꩻ လꩻသွံမဂ်သွံဖိုလ်ႏ အနာႏဂါမ်ႏပုဂ္ဂိုလ်ႏ မွော့နဝ်ꩻ၊ ရဟန်ꩻကမဉ်ꩻနုဲင်းယိုနဝ်ꩻ လꩻလစ်ꩻမဂ်လစ်ꩻဖိုလ်ႏ ရဟန္တာႏပုဂ္ဂိုလ်ႏမွော့နဝ်ꩻ။ တကာႏခွန်နင်ꩻသီးဖုံႏဟွေး- ရဟန်ꩻကမဉ်ꩻနုဲင်းယိုနဝ်ꩻ သꩻရင်ꩻဟောဝ်မွေးစွဉ်ႏထာꩻမွော့နဝ်ꩻ၊ ရဟန်ꩻကမဉ်ꩻနုဲင်းယိုနဝ်ꩻ စေႏတနာႏဟောဝ်မွေးစွဉ်ႏထာꩻမွော့နဝ်ꩻ၊ ရဟန်ꩻကမဉ်ꩻနုဲင်းယိုနဝ်ꩻ သဒ္ဓါႏတရာꩻဟောဝ်မွေးစွဉ်ႏထာꩻမွော့နဝ်ꩻ၊ တကာႏခွန်နင်ꩻသီး အွဉ်လို့ဝင်ꩻလူႏလွဟုဲင်း။ အံႏဖြာႏလို့ဝင်ꩻထွူခါ နိုꩻဆောႏတမာနုဲင်းနဝ်ꩻတဲင် ခိုခိုမူႏမူႏ ခွေလူႏနာꩻလူႏတွော့ꩻ သင်္ကန်ꩻအဝ်ႏကားမုဲင်ꩻစွုံႏစွုံႏ၊ ရွုံႏဗုဲင်သင်္ကန်ꩻဟောဝ်၊ အံႏဟောဝ်၊ ကျောင်ꩻဟောဝ်တွော့ꩻ လောဘတဏှာႏ သာႏယာႏဒျာႏဗော့ꩻတခြိုꩻ၊ အကျိုꩻအပဲစ် စဲစ်ဆေ့ꩻထွားဒွုမ်၊ အုံတဗွုမ်၊ သွုံꩻတဗွုမ်ဗော့ꩻနုဲင်းနဝ်ꩻ၊ တွိုႏဒါႏနကုသိုလ်ႏ၊ သီႏလကုသိုလ်ႏ၊ ဘာႏဝနာႏကုသိုလ်ႏနဝ်ꩻ သꩻဝင်ႏစာꩻတဝ်း၊ မာꩻတဝ်း၊ ယံကလꩻမဂ်ဖိုလ်ႏနိဗ္ဗာႏန်ႏ တကျံႏတကျိုꩻစာꩻတဝ်း။ ရဟန်ꩻသီးဖုံႏဟွေး- ဖေႏကလꩻအာအာတခြိုꩻ ကျိုꩻစာꩻဒျာႏလာဘ်၊ ကျိုꩻစာꩻတဝ်းတရာꩻ၊ မာꩻတဝ်းကုသိုလ်ႏ၊ ပုဂ္ဂိုလ်ႏနုဲင်းနဝ်ꩻနဝ်ꩻနဝ်ꩻ ဟဲ့ꩻဗာႏ 'အွဉ်ႏရေꩻတခြိုꩻ၊ အွဉ်ႏရေꩻတဝ်းတရာꩻ'နောဝ်ꩻသွူ။ ရဟန်ꩻသီးဖုံႏဟွေး- ကွပ်ပွိုးမဉ်လꩻအာ ပစ္စေꩻလစ်ꩻပါꩻတဲင် တပါꩻတွမ်ႏတပါꩻ အံႏဖြာႏသဲင်တခြစ်ꩻတဝ်းလို့ဝင်ꩻ၊ ဒေါ့ꩻဒျာႏအမွေး-အမွေးအတွိုင်ꩻ၊ တခြိုꩻနဝ်ꩻ အွဉ်ႏတဝ်းအရေꩻ၊ ကားကွိုꩻဝင်ꩻကလူႏ၊ ထူႏကွို့ꩻဝင်ꩻကပ်၊ အားထွုတ်ကျပ်တရာꩻ၊ မာꩻဒျာႏကုသိုလ်ႏ၊ ပုဂ္ဂိုလ်ႏနုဲင်းနဝ်ꩻနဝ်ꩻ ဟဲ့ꩻ'အွဉ်ႏရေꩻဒျာႏတရာꩻ၊ အွဉ်ႏရေꩻတဝ်းတခြိုꩻ'နဝ်ꩻသွူ။