ကမာꩻဆွုတ်ယွုတ်သေက္ခပုဂ္ဂိုလ်ႏ

အဝ်ႏ ဝီခီပီးဒီးယား ကို

"ဒုတိယသေခသုတ် (ကမာꩻဆွုတ်ယွုတ်ဒါႏ သေက္ခပုဂ္ဂိုလ်ႏ တရာꩻ ၅-ပါꩻ)" အားထွုတ်ဝိပဿနာႏတရာꩻတဲင် 'လꩻတမဂ်၊ လꩻတဖိုလ်ႏ၊ လꩻနီမဂ်၊ လꩻနီဖိုလ်ႏ၊ လꩻသွံမဂ်၊ လꩻသွံဖိုလ်ႏ၊ လꩻလစ်ꩻမဂ်'ပုဂ္ဂိုလ်ႏယိုနွုတ်ꩻပါꩻနဝ်ꩻ ဟဲ့ꩻ'သေက္ခပုဂ္ဂိုလ်ႏ'၊ ဖေႏကလꩻ အရဟတ္တဖိုလ်ႏ၊ ဖေႏကထွာရဟန္တာႏပုဂ္ဂိုလ်ႏနဝ်ꩻ အဝ်ႏလိုႏကျင်ꩻနေဒွိုန်းက၊ 'ကျင်ꩻနေဒွိုန်းက-သေက္ခပုဂ္ဂိုလ်ႏ' အဝ်ႏနွုတ်ꩻပါꩻနောဝ်ꩻသွူ။ ရဟန်ꩻသီးဖုံႏဟွေး- ကမာꩻဆွုတ်ယွုတ်အီဒါႏ သေက္ခပုဂ္ဂိုလ်ႏနဝ်ꩻ အဝ်ႏငတ်ꩻမျိုꩻ၊ ငတ်ꩻမျိုꩻကရိုꩻနောဝ်ꩻ- ၁။ သာႏသနာႏကိုယို လိုႏကျင်ꩻနေက သေက္ခရဟန်ꩻနဝ်ꩻ ထာꩻမာꩻအာ၊ အုံတဝ်းတပါꩻ၊ အားထွုတ်တဝ်းတရာꩻ၊ ပဌမယိုတမျိုꩻတဲ့ မာꩻဆွုတ်ယွုတ်အီ၊ ထင်ႏကီနွောင်ꩻတောဝ်း။ ၂။ လိုႏကျင်ꩻနေက သေက္ခရဟန်ꩻနဝ်ꩻ ထာꩻမာꩻအဝ်ႏဆေ့ꩻပေႏလွုမ်ꩻတဲ့ လို့စွဉ်ႏတနီꩻ၊ အုံတဝ်းတပါꩻ၊ အားထွုတ်တဝ်းတရာꩻ၊ ဒုတိယယိုတမျိုꩻတဲ့ မာꩻဆွုတ်ယွုတ်အီ၊ ထင်ႏကီနွောင်ꩻတောဝ်း။ ၃။ သေက္ခရဟန်ꩻနဝ်ꩻ ပေါင်ꩻကွိုက်ꩻဒျာႏလိုꩻလမ်း၊ အားထွုတ်တဝ်းတရာꩻ၊ တတိယယိုတမျိုꩻတဲ့ မာꩻဆွုတ်ယွုတ်အီ၊ ထင်ႏကီနွောင်ꩻတောဝ်း။ ၄။ သေက္ခရဟန်ꩻနဝ်ꩻ အခိန်ႏအခါႏမွေးတောဝ်း လယ်ႏထာꩻဒုံကို၊ သဲင်ꩻလွိုက်ꩻ၊ ဗေင်ႏထာꩻထွိုင်ႏလေ၊ စတုတ္ထယိုတမျိုꩻတဲ့ မာꩻဆွုတ်ယွုတ်အီ၊ ထင်ႏကီနွောင်ꩻတောဝ်း။ ၅။ သေက္ခရဟန်ꩻနဝ်ꩻ ဒေါ့ꩻတဝ်းငေါဝ်းငွါ ကထွာအီကုသိုလ်ႏ၊ ဒေါ့ꩻတဝ်းငေါဝ်းဆꩻ ကလꩻအီမဂ်ဖိုလ်ႏ၊ ပဉ္စမ ယိုတမျိုꩻတဲ့ မာꩻဆွုတ်ယွုတ်အီ၊ ထင်ႏကီနွောင်ꩻတောဝ်း။ ကမာꩻဆွုတ်ယွုတ်အီ သေက္ခပုဂ္ဂိုလ်ႏနဝ်ꩻ အဝ်ႏငတ်ꩻမျိုꩻနုဲင်းနောဝ်ꩻသွူ။ ရဟန်ꩻသီးဖုံႏဟွေး- ကမာꩻတိုꩻတက်အီ သေက္ခပုဂ္ဂိုလ်ႏနဝ်ꩻ အဝ်ႏငတ်ꩻမျိုꩻ၊ ငတ်ꩻမျိုꩻကရိုꩻနောဝ်ꩻ- ၁။ သေက္ခရဟန်ꩻနဝ်ꩻ ထာꩻမာꩻအာတဝ်း၊ အုံဒျာႏတပါꩻ၊ အားထွုတ်ဒျာႏတရာꩻ၊ ပဌမယိုတမျိုꩻတဲ့ မာꩻတိုꩻတက်အီ၊ ထင်ႏကီမဂ်ဖိုလ်ႏ။ ၂။ သေက္ခရဟန်ꩻနဝ်ꩻ ထာꩻမာꩻဆေ့ꩻပေႏ၊ လို့တဝ်းတနီꩻ၊ အုံဒျာႏတပါꩻ၊ အားထွုတ်ဒျာႏတရာꩻ၊ ဒုတိယယိုတမျိုꩻတဲ့ မာꩻတိုꩻတက်အီ၊ ထင်ႏကီမဂ်ဖိုလ်ႏ။ ၃။ သေက္ခရဟန်ꩻနဝ်ꩻ ကွိုက်ꩻတဝ်းလိုꩻလမ်း၊ အုံဒျာႏတပါꩻ၊ အားထွုတ်ဒျာႏတရာꩻ၊ တတိယယိုတမျိုꩻတဲ့ မာꩻတိုꩻတက်အီ၊ ထင်ႏကီမဂ်ဖိုလ်ႏ။ ၄။ သေက္ခရဟန်ꩻနဝ်ꩻ လယ်ႏလွင်ꩻတဝ်းအွိုးဒုံ၊ အုံဒျာႏကျောင်ꩻသေႏသေႏ၊ ထွိုင်ႏစောဝ်း၊ အုံဒျာႏတပါꩻ၊ အားထွုတ်ဒျာႏတရာꩻ၊ စတုတ္ထယိုတမျိုꩻတဲ့ မာꩻတိုꩻတက်အီ၊ ထင်ႏကီမဂ်ဖိုလ်ႏ။ ၅။ သေက္ခရဟန်ꩻနဝ်ꩻ ဒေါ့ꩻဒျာႏငေါဝ်းငွါ ကထွာအီကုသိုလ်ႏ၊ ဒေါ့ꩻဒျာႏငေါဝ်းဆꩻ ကလꩻအီမဂ်ဖိုလ်ႏ၊ ပဉ္စမယိုတမျိုꩻတဲ့ မာꩻတိုꩻတက်အီ၊ ထင်ႏကီမဂ်ဖိုလ်ႏနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ ပဉ္စကနိပါတ်၊ ဒုတိယသေခသုတ်)[၁][၂]

အာႏကွိုꩻ[မွဉ်းဖျင် | မွဉ်းဖျင်အရွီးခိုႏ]

  1. ဗွေႏဗွန်-ကောဝိဒ(သီႏသဲင်ႏ)
  2. လိတ်ဗွောင်မဲ့နား(၁၉၄)