ကလူꩻလွꩻကလူꩻဗွာ

"ကလူꩻလွꩻ ကလူꩻဗွာရောႏဂါႏတွမ်ႏ တသီႏနယ်ꩻဖုံႏ" လိုꩻစတဲင် သꩻအဝ်ႏသတ္တဝါႏသီးနဝ်ꩻ အဆွဉ်ႏအဝ်ႏသားလဲ့အဝ်ႏ၊ အဆွဉ်ႏတအဲဉ်ထဝ်းသားလဲ့အဝ်ႏ၊ ဆွဉ်ႏကအဝ်ႏသားလဲ့ ဆွဉ်ႏဆေ့ꩻဆွဉ်ႏအာ အဝ်ႏဖျင်(၂)မျိုꩻသွူ။ ဆွဉ်ႏတအဲဉ်ထဝ်းသားနဝ်ꩻ ယဟန်ႏလဲ့ အဗေင်ႏအဝ်ႏနုဲင်းရူးဖုံႏ၊ ထပေႏဖုံႏနဝ်ꩻသွူ။ လိုꩻနဝ်ꩻ ဆွဉ်ႏအဝ်ႏဆေ့ꩻဆေ့ꩻလဲ့ တအဝ်ႏတဝ်းနမ်းတဗာႏလွုမ်း၊ အခင်ႏလမ်းအဝ်ႏမꩻအဝ်ႏသွူ။ လိုꩻနမ်းလောင်းအကို ဆွဉ်ႏကအာလွိုဝင်ꩻခင်ႏလမ်းနဝ်ꩻ တဟဲ့ꩻတဝ်း အဆွဉ်ႏတွော့ꩻ ဟဲ့ꩻဒျာႏကလူꩻသွူ။

လိုꩻကလူꩻကဲဉ်းအာအာနဝ်ꩻ အရောင်ႏဖြေင်းဒျာႏလဲ့ ကဲဉ်းဆေ့ꩻဆေ့ꩻနဝ်ꩻ အရောင်ႏဗွာ၊ အရောင်ႏတခွဉ်ႏဒျာႏသွူ။ လိုꩻကလူꩻဖြင်းနုဲင်း နီအာသျတွိုက်သားယိုနဝ်ꩻ ကလူꩻအဝ်ႏဖြေင်းဖြေင်း၊ ပေါႏလွေꩻဗွာနဝ်ꩻ အဗွေႏတကျွိုက်တဝ်းသွူ။ လိုꩻကလူꩻဖြေင်းမဉ်ႏလွေꩻဗွာနဝ်ꩻ တကျွိုက်တဝ်းတဲင် ယဟန်ႏနဝ်ꩻ ဖြေꩻတသီႏစုမ်ႏတွော့ꩻ စုမ်ႏဖြေင်းသူႏဖြေင်းချာနေးလဲ့အဝ်ႏသွူ။ လိုꩻပေႏလိုꩻယွဲ ခေတ်ယိုခါနဝ်ꩻ ကလူꩻအဝ်ႏဖြေင်းတွော့ꩻ စုမ်ႏတနျာႏ၊ စုမ်ႏတခွဉ်ႏနေးလဲ့ အဝ်ႏသွူ။ လိုꩻယဟန်ႏနဝ်ꩻ ကလူꩻတဗွာတဝ်းတွော့ꩻ ကလူꩻလွꩻ ကတောင်ကတကြန်ႏ၊ ကတူႏကြေင်းထိုꩻလဲ့အဝ်ႏသွူ။ ကလူꩻဗွာသားနဝ်ꩻ စင်းမာꩻတဝ်းနုဲင်းမုဲင်ꩻမုဲင်ꩻတွော့ꩻ အွဉ်ႏဗာႏကြေင်းကြေင်းအတွိုင်ꩻ နုဲင်းခွန်ကုဝေသီးယိုသွူ။ ကမ္ဘာႏလောင်းယိုခါနဝ်ꩻ တသီႏမျိုꩻစွုမ်ႏငါႏရိုꩻနဝ်ꩻလဲ့ ကလူꩻဗွာ ကတူႏကြေင်းသားနဝ်ꩻ ခမ်းမုဲင်ꩻတယဝ်း၊ လိုꩻမျိုꩻတွိုင်ꩻ အရန်းတွိုင်ꩻ အဝ်ႏဒျာႏတဲင် တသီႏကလူꩻဖြေင်း၊ တသီႏကလူꩻလွꩻဟဝ် မဉ်ႏအဝ်ႏလဲ့ အတနွောင်ꩻလို့တဝ်း ရိုꩻဗာႏနုဲင်းနဝ်ꩻသွူ။

နွောင်ꩻလို့တဝ်း၊ ဟဝ်လို့တဝ်းကရိုꩻနဝ်ꩻ အမျိုꩻဒျာႏ၊ တသီႏအမျိုꩻမုဲင်ꩻတယဝ်း အကျိုꩻဟော်ꩻအတွိုင်ꩻ မဉ်ႏမဲဉ်ႏနဝ်ꩻ ဟံႏလောင်းယို လိုꩻတတွမ်ႏဒွုမ်ထာꩻသွူ။ ကွပ်တသီႏတနွောင်ꩻလို့တဝ်း၊ တသီႏအကျိုꩻဟော်ꩻအတွိုင်ꩻ တမဲဉ်ႏလို့တဝ်းနဝ်ꩻမꩻ လိုꩻသီးအဝ်ႏသီတရတ်၊ သီတခြိုဗာႏထာꩻသွူ။ အဝ်ႏခံႏစာꩻဗာႏ ဇရာႏဒုက္ခ၊ ဗျာဓိဒုက္ခ၊ မရဏဒုက္ခဖုံႏသွူ။ ကလူꩻဗွာကဖြေင်းအီ၊ ကလူꩻလွꩻကဒေါ့ꩻအီယိုလဲ့ ကွပ်တသီႏအဝ်ႏနဝ်ꩻမꩻ ဝင်ꩻအဝ်ႏတဲမ်း၊ ဝင်ꩻအဝ်ႏဒင်ႏခါꩻမတ်တန်ꩻသွူ။ ကလူꩻဖြေင်းကဗွာဒါႏယိုနဝ်ꩻ လိုꩻသက်ရွယ်ႏတန်မꩻ ဗွာကဲဉ်းအာအာလဲ့ ကလူꩻကလွꩻနဝ်ꩻ လိုꩻသက်ရွယ်ႏတန်မꩻမွေးတဝ်း၊ ခိုဗင်ႏမူႏနံꩻ အရွယ်ႏလဲ့ အဝ်ႏလွꩻဒါႏနေနေသွူ။ လိုꩻခိုနဝ်ꩻတန်ႏတန်ႏ၊ လိုꩻမူႏသီးကလူꩻမဉ်ႏလွꩻနဝ်ꩻ အဗွေႏသꩻဝꩻမွေးစွဉ်ႏထာꩻသွူ။ ကလူꩻဖေႏကလွꩻပုဲင်ႏဒွုမ်၊ လွꩻလဲဉ်းသွူလဲ့ ဖေႏကဒေါ့ꩻချာနဝ်ꩻ အဗွေႏအွဉ်ႏမွေးစွဉ်ႏအရေꩻသွူ။ ဝင်ꩻရိုꩻတသီႏယိုဟဝ်၊ တသီႏနဝ်ꩻဟတ်လဲ့ နဲစ်ဖြေꩻ၊ နဲစ်ထုမ်ႏ၊ နဲစ်သူႏဖြွꩻစွဉ်ႏဒျာႏသွူ။ ရွမ်ဖြုဲင်ꩻယိုနဝ်ꩻ ပွိုင်းဝွို့တွမ်ႏ ကလူꩻဗွာ၊ ကလူꩻလွꩻတဲင် ကလူꩻဗွာကဖြေင်းချာ၊ ကလူꩻလွꩻဒေါ့ꩻခွုန်ꩻအနယ်ꩻယို မွေးတမွေးတဝ်း သေတဝ်း၊ ခွိုင်းကထီႏခွိုင်းကမော့ꩻနဝ်ꩻ တဲမ်းဒင်ႏပျꩻနယ်လွေꩻဗာႏ နုဲင်းငါယိုဖုံႏအတွိုင်ꩻသွူ။ စံꩻထွားသုံꩻထွားဒျာႏသွော့ဝင်ꩻအကျောင်ꩻ တဲက်တွန်ꩻနိုꩻဆောႏလွေꩻဗာႏသွူ။

ကလူꩻဗွာဖြေင်းချာ ကလူꩻလွꩻဒေါ့ꩻချာတသီႏနယ်ꩻဖုံႏ

• ၁။ ကလူꩻဗွာဖြေင်းချာ၊ ကလူꩻလွꩻဒေါ့ꩻချာ၊ ကလူꩻညမ်းဟဝ်ပိုႏ တသီႏနယ်ꩻနဝ်ꩻ တယံꩻရာႏသဲင်ယို ထောင်းဖွန်ႏထွူတဲင် တွမ်ႏနံးမန်ꩻမောက်ꩻအွန်ကွယ်ရော်ꩻညီꩻလွဝင်ꩻ ပလဲင်ꩻငွါလုဲင်းကိုတွော့ꩻ မဉ်ႏသူႏဖေႏစွုမ်ႏနီꩻနီꩻ တနီꩻ(၂)လဲင်ႏငါနဝ်ꩻ ကလူꩻဗွာဖြေင်းချာ၊ ကလူꩻလွꩻဒေါ့ꩻချာ၊ ကလူꩻညမ်းဟဝ်လွဉ်ဒျာႏသွူ။
• ၂။ လိုꩻမူႏကလူꩻတဟဝ်တဝ်း၊ ကလူꩻရောင်ႏတရေꩻတဝ်း၊ ကလူꩻရောင်ႏတနျာႏ တခွဉ်ႏထာꩻဖုံႏနဝ်ꩻ ပလဲင်ꩻ(ဗုတ်ꩻ)ငွါလုဲင်းကို၊ ဖေါက်ꩻနောက်ꩻသဲင်ဖွန်ႏတွမ်ႏနံးမန်ꩻ မောက်ꩻအွန် စဲးရော်ꩻဝင်ꩻတွော့ꩻ မဉ်ႏသူႏဖေႏနဝ်ꩻ ကလူꩻသဉ်တရေꩻချာ ရိုꩻနဝ်ꩻသွူ။
• ၃။ ကလူꩻသဉ် ကလူꩻဟဝ်အီ တသီႏနယ်ꩻ ထဲင်းတနယ်ꩻနဝ်ꩻ တလာꩻရာႏသဲင်ဖွန်ႏ-၅ိ၊ ဖေါက်နောက်ꩻလာႏသဲင်ဖွန်ႏ-၅ိ၊ ဖက်ꩻပုမ်းကောင်(ကြိတ်မှန်)လာႏသဲင်ဖွန်ႏ-၅ိ၊ နံးမန်ႏမောက်ꩻအွန်အယာႏခဉ်ႏ-၁ဝိ၊ ယို (၄)မျိုꩻစဲးကွယ်ရော်ꩻဝင်ꩻ ပလဲင်ꩻငွါလုဲင်းကိုတွော့ꩻ ဒို့ꩻခါꩻဟဝ်ဟဝ်၊ အွဉ်ႏမွူးနီꩻတဆီလွိုလွိုထွူမꩻ သူႏဖေႏ ကလူꩻတနီꩻတလဲင်ႏနီလဲင်ႏနဝ်ꩻ ကလူꩻမဉ်ႏလွꩻလဲ့ဒေါ့ꩻချာ၊ ကလူꩻရောင်ႏတဝ်းလဲ့ သဉ်ဖြေင်းတရေꩻလွဉ်သွူ။ ဖေါက်နောက်ꩻ၊ ဖက်ꩻပုမ်းနဝ်ꩻ အွဉ်ႏလိုသဲင်ပုဲင်ႏယာခိုးကို၊ အွဉ်ႏသဲင်ဒျာႏဟေ့ꩻကို၊ သုမ်တေင်လောင်းကိုသွူ။ အွဉ်ႏလိုယာခိုးနဝ်ꩻ အစွန်ꩻသတ္တိꩻယွမ်ꩻထိုꩻသွူ။
• ၄။ ကလူꩻခါးလားကဗွာ၊ ခါးလားကလွꩻ၊ ဖေႏကဗွာပုဲင်ႏ၊ ဖေႏကလွꩻမွုန်း ရဲကာႏကွယ်ႏနယ်ꩻနဝ်ꩻ မွူးရဝ်ꩻခိုႏ ဗေင်ႏထွိုင်ႏဖြားမဲ့ထွူနဝ်ꩻ တွမ်ႏစူထီစဝ်ႏ ပွစ်ဖေႏကတူႏပီ စွုမ်ႏရဝ်ꩻရဝ်ꩻနဝ်ꩻ သက်တန်နမ်းဖြားစွဉ်ႏတဲ့ ကလူꩻတောႏတောႏတဗွာတဝ်း၊ တလွꩻတဝ်းရိုꩻနဝ်ꩻသွူ။

မဉ်ႏမာꩻဖေႏနုဲင်းယိုနဝ်ꩻ အလျားတအွိုထန်ႏထိုꩻ စွုမ်ႏရဝ်ꩻရဝ်ꩻတဲင် ကလူꩻနန်ꩻလွꩻ၊ ကလူꩻနန်ꩻဗွာ၊ တငါနန်ꩻအော့ꩻ၊ မဲ့နန်ꩻတမို့ရိုꩻနဝ်ꩻသွူ။ အနယ်ꩻယိုနဝ်ꩻ ခယ်ႏလိုꩻမျိုꩻအနယ်ꩻတဲင် ခယ်ႏသီးအဝ်ႏကျင်ꩻသုံꩻအာတန်သွူ။ ကွယ်ႏတွော့ꩻ ကလူꩻဆွာꩻ၊ ကလူꩻဒွုန်းသားနဝ်ꩻ အယပ်ꩻအခုဲင်ႏအဝ်ႏနေနေသွူ။

• ၅။ ကလူꩻလွꩻ ကလူꩻရွောင် ဖေႏကဟဝ်ချာအနယ်ꩻနဝ်ꩻ တမာႏလာႏသဲင်တွမ်ႏ တဆီꩻလာႏသဲင်ယို ထောင်းဖွန်ႏရော်ꩻဝင်ꩻတွော့ꩻ ကွယ်ရော်ꩻဝင်ꩻတွမ်ႏနံးမန်ꩻမောက်ꩻအွန် ပလဲင်ꩻငွါလုဲင်းကိုတဲင် သူႏဖေႏသွော့ကတူႏ၊ မဉ်ႏလꩻနားရီႏတဆီမꩻ ခြီထိုꩻချာ၊ မဉ်ႏမာꩻနုဲင်းယို တနီꩻတလဲင်ႏနဝ်ꩻ တညတဝ်း ကလူꩻဟဝ်လွဉ်၊ သဉ်လွဉ်ရိုꩻနဝ်ꩻသွူ။
• ၆။ ကလူꩻကလွꩻ ကလူꩻကရွောင် ကတောင်ကတကြန်ႏဒါႏလိုꩻနဝ်ꩻ မောက်ꩻစင်းလာႏ (သလဲရွတ်)တသဉ်ယို ထောင်းပဲစ်ꩻသော့ꩻ ဆုမ်ႏကြောင်းကြောင်းကိုတွော့ꩻ စေ့ꩻအထီ မဉ်ႏသူႏဖေႏကတူႏ တနီꩻ(၂)လဲင်ႏနဝ်ꩻ ကလူꩻဒေါ့ꩻတရေꩻချာယင်းရိုꩻနဝ်ꩻသွူ။
• ၇။ ကလူꩻလွꩻဖေႏကဒေါ့ꩻခွုန်ꩻ၊ ကလူꩻဗွာ ဖေႏကဖြေင်းချာအနယ်ꩻနဝ်ꩻ ထထီႏမွူး၊ ထထီႏပင်၊ ထထီႏရွိုꩻယို တဒွေါ့ꩻဗက်ꩻကဲင်ထွူတွော့ꩻ ကထန်ႏဒါႏအထီယို ဒွူႏခါꩻတွမ်ႏတကြောက်ꩻကြောင်းကြောင်း၊ ကလꩻဒါႏထထီႏထီယို သူႏဖေႏကတူႏပီ တနီꩻတလဲင်ႏ၊ မဉ်ႏဗွေ (၃)နီꩻမꩻ ပသွူႏထိုꩻ၊ သူႏလွေꩻယင်း တနီꩻတလဲင်ႏ၊ မဉ်ႏသူႏလွေꩻဖေႏထထီႏထီနုဲင်းယိုနဝ်ꩻ ကလူꩻလွꩻလဲ့ဒေါ့ꩻချာခွုန်ꩻ၊ ကလူꩻဗွာလဲ့ ဖြေင်းချာခွုန်ꩻရိုꩻနဝ်ꩻသွူ။ ထထီႏထီယို လꩻရာꩻအနယ်ꩻမုဲင်ꩻတယဝ်း ထူႏသူႏနွောင်ꩻဒျာႏသွူ။
• ၈။ ကလူꩻဖေႏကသဉ်တရေꩻ၊ ဖေႏကဖြေင်းခဟဝ်နဝ်ꩻ တွမ်ႏတသာႏတဲင် အဝ်ႏလိုႏပွစ်ခင်ႏယာꩻ တနီꩻတလဲင်ႏ၊ ပွစ်ဗဲင်းအဆေ့ꩻသွတ်ꩻ (၁၅)မိနစ်ရပ်နဝ်ꩻသွူ။ တသာႏနဝ်ꩻ မာꩻဗွောင်တသိုꩻဖူꩻ၊ တအွိုဖူꩻတဲင် အလျားတအွိုထန်ႏအာ ခင်ႏယာꩻဖဲ့ꩻတွော့ꩻ အလျားထင်ႏကီဆေ့ꩻတဲင် ကလူꩻသဉ် ကလူꩻဟဝ်နုဲင်းနဝ်ꩻသွူ။ ပွစ်တသာႏခင်ႏယာꩻနဝ်ꩻ ရောႏဂါႏအလင်ဖုံႏလဲ့ ရဲးကာႏကွယ်ႏနွောင်ꩻအီအာတန်တဲင် အဝ်ႏလိုႏအွဉ်ႏရေꩻ ကျိုꩻစာꩻပွစ်လွဝင်ꩻသွူ။
• ၉။ ကလူꩻမဉ်ႏဗွာနဝ်ꩻ ကတူႏပသꩻတဲင် ယူႏပက်ငါႏသွူ။ နဝ်ꩻတွော့ꩻ ကလူꩻဗွာ ဖေႏကသက်သာႏနဝ်ꩻ မောက်ꩻဖါးထီတွမ်ႏ နံးမန်ꩻမောက်ꩻအွန်နီမျိုꩻယို ကွယ်ရော်ꩻလွဝင်ꩻတဲင် မဉ်ႏသူႏဖေႏကတူႏပီနဝ်ꩻ ကလူꩻဗွာဟဝ်သက်သာႏလွဉ်ဒျာႏသွူ။
• ၁၀။ တသီႏကလူꩻဟဝ် ကလူꩻသဉ်နယ်ꩻထဲင်းတနယ်ꩻနဝ်ꩻ ဖက်ꩻပုမ်းကောင်(ကြိတ်မှန်)လာႏသဲင်ယို ထောင်းဖွန်ႏထွူတွော့ꩻ စဲတွမ်ႏနံးမန်ꩻမောက်ꩻအွန် မဉ်ႏသူႏဖေႏစွုမ်ႏနီꩻနီꩻနဝ်ꩻ ကလူꩻသဉ်ဖြေင်း၊ ကလူꩻပနဲဉ်ႏ၊ ကလူꩻတရေꩻလွဉ်ယင်းရိုꩻနဝ်ꩻသွူ။
• ၁၁။ ကလူꩻလွꩻ ကတူႏကြေင်းဟဝ်နယ်ꩻနဝ်ꩻ ယမ်းဖြေꩻ (ရှားစောင်းလက်ပပ်) အလာႏကိုကအဝ်ႏဒါႏ အထီအောက်ꩻယုဲင်ယို မဉ်ႏသူႏဖေႏ ကလူꩻလွꩻခင်ႏလမ်း တနီꩻတလဲင်ႏငါနဝ်ꩻ ကတူႏပီခွꩻတဲင် ကလူꩻဒေါ့ꩻတရေꩻချာယင်းဒျာႏသွူ။
• ၁၂။ အခိန်ႏတမွေးတဝ်း၊ အမျိုꩻတမွေးတဝ်းတွော့ꩻ ကလူꩻမဉ်ႏလွꩻအာဒါႏနဝ်ꩻ တဝတ်ꩻထီ(တမူထီ)စဲစ်စဲစ်တွမ်ႏ နံးမန်ꩻမောက်ꩻအွန်ယို ဆေ့ꩻအာတွာတွာ ကွယ်ရောꩻဝင်ꩻတဲင် မဉ်ႏသူႏဖေႏကတူႏပီ ကလူꩻလွꩻခင်ႏလမ်းနဝ်ꩻ ဟဝ်ချာနွောင်ꩻ၊ ကလူꩻဒေါ့ꩻချာနွောင်ꩻ ရိုꩻနဝ်ꩻသွူ။
• ၁၃။ နေးတွမ်ႏ အကျောင်ꩻအမျိုꩻမုဲင်ꩻတယဝ်း ကလူꩻမဉ်ႏလွꩻငါႏနဝ်ꩻ မူႏတယဝ်း ခိုတယဝ်း တရေꩻဖုဲင်ႏထွားတဝ်းတစိꩻစိꩻသွူ။ နဝ်ꩻတွော့ꩻ ကလူꩻလွꩻဟဝ် တသီႏနယ်ꩻဒွေါင်ႏ ထဲင်းတနယ်ꩻနဝ်ꩻ မောက်ကြဲင်ႏခူꩻယို အွဉ်ႏသꩻဆွာꩻဆွာꩻ မူလုံးပဲဉ်လောင်းတွော့ꩻ သူႏဖေႏကတူႏပီ တနီꩻ(၂)လဲင်ႏငါနဝ်ꩻ ကလူꩻဒေါ့ꩻချာနွောင်ꩻရိုꩻနဝ်ꩻသွူ။
• ၁၄။ ကလူꩻဖေႏကဟဝ် ဖေႏကဖြေင်း၊ ဖေႏကသဉ် တသီႏအံႏနယ်ꩻနဝ်ꩻ ပွေ့ကဲင်ꩻဖွန်ႏအယာႏခဉ်ႏ-၅ိ၊ မောက်ꩻကြဲင်ႏအယာႏခဉ်ႏ-၅ိ၊ တသာႏသိကျာꩻ အယာႏခဉ်ႏ-၁ိ၊ တသာႏဆုမ်အယာႏခဉ်ႏ ၁-မတ်၊ သဘာဝတဝတ်ꩻထီစဲစ်စဲစ် အယာႏခဉ်ႏ-၅ိ၊ တသီႏမီႏယို ၅-မျိုꩻနဝ်ꩻ ကွယ်ရော်ꩻလွဝင်ꩻ၊ ဒွိုႏရော်ꩻလွဝင်ꩻ တွမ်ႏမေႏဝုဲင်ꩻဝုဲင်ꩻတဲင် ပေါႏရစွစ်ꩻညီႏသွူတဲ့ အွဉ်ႏခွꩻသော့ꩻခါꩻပလဲင်ꩻငွါလုဲင်းတဖြုံႏကိုတွော့ꩻ အံႏဖေႏသွော့တလဲင်ႏ တစောနေင်းထီနွိုး တနီꩻ(၂)လဲင်ႏနော။

တသီႏယိုနဝ်ꩻ မဉ်ႏအံႏပေါင်းအာလဲ့ ဟို့ꩻပနဲဉ်ႏတဲင် အုံဟဝ်ခြွိုင်ႏသန်ꩻ၊ အလျားလင်ꩻတွော့ꩻ ကလူꩻဟဝ်လွုမ်ꩻတကာႏတဝ်း မဲ့လဲ့နန်ꩻတမို့၊ တငါလဲ့ နန်ꩻအော့ꩻ၊ သွီႏယာႏတရေꩻ နန်ꩻဖြားနန်ꩻသီသွူ။

• ၁၅။ ကလူꩻလွꩻဟဝ်တသီႏနယ်ꩻ ထဲင်းတနယ်ꩻနဝ်ꩻ ဒွိုႏတသာႏထီတွော့ꩻ ပသွူႏဖေႏကတူႏ တနီꩻတလဲင်ႏနဝ်ꩻ ကလူꩻလွꩻဟဝ်သက်သာႏ၊ ကတူႏတကြန်ႏလဲဉ်းလဲ့ ကလူႏဒေါ့ꩻချာယင်းဒါႏ ရိုꩻနဝ်ꩻသွူ။

ကလူꩻဗွာဖေႏကဖြေင်းချာ၊ ကလူꩻယံတွမ်ႏလွꩻပုဲင်ႏ၊ မဉ်ႏလွꩻလဲဉ်းလဲ့ ယံကဒေါ့ꩻချာအနယ်ꩻဖုံႏနဝ်ꩻ လွိုက်အဟမ်းယိုꩻယိုꩻတွော့ꩻ တဲမ်းနယ်ဗာႏတခွိုင်းယိုသွူ။ စံꩻထွားဒျာႏသွော့ဝင်ꩻအကျောင်ꩻ-