ကသုံꩻအံႏလွဲꩻဒါႏ

"ကသုံꩻအံႏလွဲꩻဒါႏ မာꩻပဲင်ႏခွင်ꩻအာႏဏာႏသားယို အီႏလွစ်နွောင်ꩻနေ ဥပဒေႏဟောင်း" တခုဲင်ႏညတဝ်းဒွုန်း ခမ်းသားလွတ်တောႏကို ပွိုင်းဝွို့တောမ်ႏ သိမ်ꩻဟံႏပျဿနာႏယို ခမ်းသားလွတ်တောႏဥက္ကဋ္ဌ ဦးဝင်းမြင့်နမ်းဗွေႏ ထေငေါဝ်းရီတဲင် ရီရွောင်ချာလွတ်တောႏကိုနဝ်ꩻ အဝ်ႏထီႏဗာႏနဝ်ꩻသွူ။ ပွိုင်းပွို့တောမ်ႏ အစိုႏရ ကရီးစူကိုဖုံႏနဝ်ꩻ မြန်မာခမ်းထီကိုယို ကောပ်အကျောင်ꩻခရာႏအစွိုးစွိုးတဲင် သိမ်ꩻဟံႏပျဿနာႏနဝ်ꩻ ထွာစွဉ်ႏခမ်းထီကို ခင်ႏလမ်းစွစ်ꩻစဲစ်ꩻနဝ်ꩻသွူ၊ မြန်မာခမ်းထီယိုနဝ်ꩻ ဆို့ꩻရုဲင်ရေꩻထွာအထျꩻခမ်းထီတဲင် ကထွာခမ်းသားထီသားနဝ်ꩻ ဆို့ꩻရုဲင်လိုပ်ꩻမာꩻသော့ꩻခရာႏတာႏ ဟံႏယာႏဆေ့ꩻလွဉ်ဗာႏနဝ်ꩻသွူ၊ ခမ်းသားသီးလဲ့ ကွီချာမာꩻချာနွို့လိုပ်ꩻချာတဲင် ပျဿနာႏတန်ထွာဗာႏနဝ်ꩻသွူ။ ၂၀၁၂-နေင်ႏနဝ်ꩻ ဟံႏယာႏဥပဒေႏဖုံႏ ထန်ႏလွဉ်နဝ်ꩻသွူ၊ ဟံႏဥပဒေႏထန်ႏလဲ့ လွောက်ꩻနာႏဥပဒေႏနဝ်ꩻ အာႏပေႏငါႏတဲင် သိမ်ꩻဟံႏယာႏပျဿနာႏနဝ်ꩻ တခွꩻညိမ်ꩻထိုꩻတဝ်းနဝ်ꩻသွူ၊ ကထန်ႏလွဉ်ဒါႏ ဟံႏယာႏဥပဒေႏနဝ်ꩻလဲ့ လိုပ်ꩻမာꩻသွို့ꩻခြံသားအတာႏ ကာႏကွယ်ႏရဲးကမ်းအီဖေႏ တအဝ်ႏအီတဝ်း လိုႏအပ်ချက်ဖုံႏ အဝ်ႏနေဒျာႏနဝ်ꩻသွူ။ နဝ်ꩻမꩻ ပတ်သဲစ်တောမ်ႏ ဟံႏယာႏကိစ္စယိုတဲင် နဲင်ႏငံႏတောႏအရန်း ထွို့ꩻဗူႏလွေꩻနေး ဗဟိုႏဟံႏယာႏစီႏမံႏဖန်းဖြယ်ရေꩻကောႏမတီႏ၊ ခမ်းနယ်ႏ၊ ခရဲင်ႏ၊ ဝေင်ꩻနယ်ႏ၊ ရပ်ဒုံစတဲင် ဟံႏယာႏစီႏမံႏဖန်းဖြယ်ရေꩻကောႏမတီႏ အရန်းရန်းနဝ်ꩻသွူ၊ တောမ်ႏယင်းထောင်ထွား ဟံႏယာႏရေꩻကောႏမတီႏဖုံႏတဲ့ အဝ်ႏနဝ်ꩻသွူ။ ကသိမ်ꩻဒါႏဟံႏယာႏဖုံႏယို ကောပ်အကျောင်ꩻအမျိုꩻမျိုꩻတဲင် ဖေႏချာတဲ့အဝ်ႏ တဖေႏချာတဝ်းဒွုန်းတဲ့အဝ်ႏနဝ်ꩻသွူ၊ ကဖေႏချာနဝ်ꩻ ကဲဉ်းဆေ့ꩻဆေ့ꩻ၊ တဖေႏချာတဝ်းဒွုန်းနဝ်ꩻ ကဲဉ်းအာအာနဝ်ꩻသွူ၊ ပွိုးတောမ်ႏကိစ္စယိုတဲင် လွတ်တောႏဥက္ကဋ္ဌနဝ်ꩻ ပွိုင်းဝွို့တောမ်ႏ ဟံႏယာႏတွော့ꩻ အစိုႏရစီႏမံႏကိန်ꩻတာႏတဲ့နဝ်ꩻ၊ စဲ့ꩻတပ်မတောႏတဲ့နဝ်ꩻ၊ ကုမ္ပဏီႏတာႏတဲ့နဝ်ꩻ ယိုခါခါ ထောင်ထွားတွော့ꩻ စီꩻမံႏကိန်ꩻ မိဉ်ႏတအဲဉ်ထဝ်းနဝ်ꩻ ဖေႏချာဗာႏအကျောင်ꩻ၊ သိမ်ꩻခါꩻတွော့ꩻ တွိုႏဆုဲင်ꩻချာမꩻ တွိုႏငတ်ꩻနေင်ႏမꩻ အီႏမာꩻနုဲင်းနဝ်ꩻနဝ်ꩻ တလꩻတဝ်းအကျောင်ꩻ၊ တွိုႏယိုခါမꩻ တွိုႏနဝ်ꩻခါမꩻ အီႏဖေႏချာနဝ်ꩻ တလꩻတဝ်း၊ ယိုခါခါ စီႏမံႏကိန်ꩻမိဉ်ႏတအဲဉ်ထဝ်း ဖေႏချာထွူဗာႏ ယိုနဝ်ꩻ အဝ်ႏထွူလဲဉ်းနုဲင်းယိုအကျောင်ꩻ မဲဉ်ႏမဲဉ်ႏစွို့ꩻစွို့ꩻ အီႏဖေႏချာ အဝ်ႏတအဝ်ႏတဝ်း မိဉ်သေငါႏ ဒေါ့ꩻရီရွောင်လွေꩻ အစိုႏရဝွန်ႏတန်ဌာႏနနုဲင်းနဝ်ꩻသွူ။ ပွိုင်းဝွို့တောမ်ႏ သိမ်ꩻဟံႏယာႏခရာႏယို မူကိုနဝ်ꩻ ယိုခါခါ စီႏမံႏကိန်ꩻမိဉ်ႏတအဲဉ်ထဝ်းနဝ်ꩻ ဖေႏချာထွူဗာႏ၊ စီႏမံႏကိန်ꩻနဝ်ꩻ မိဉ်ႏတွိုႏငတ်ꩻနေင်ႏမꩻ အီႏမာꩻနုဲင်းနဝ်ꩻနဝ်ꩻ တလꩻတဝ်းယို အစိုႏရတဲ့နဝ်ꩻ၊ စဲ့ꩻတပ်မတောႏတဲ့နဝ်ꩻ ကလိုႏအတွိုင်ꩻ ထူႏသုံꩻထွူ အကလွိုနဝ်ꩻ ဖေႏချာဗာႏခမ်းသားနဝ်ꩻသွူ။ ထွိုင်ႏတွိုႏပအိုဝ်ႏဒေႏသကို ကသိမ်ꩻဒါႏဟံႏယာႏဖုံႏယို အစိုႏရစီႏမံႏကိန်ꩻတဲ့ တမွေးတဝ်း၊ အစိုႏရစဲ့ꩻတပ်မတောႏတာႏတဲ့ တမွေးတဝ်းတဲ့ တမွေးတဝ်းသွူ၊ မြန်မာခမ်းထီကို အလိုꩻမျိုꩻတောမ်ႏအလိုꩻမျိုꩻချာဒျာႏ၊ လိုꩻမျိုꩻချင်ꩻချင်ꩻ ကသိမ်ꩻချာ လိုꩻမျိုꩻခမ်းသားဟံႏယာႏနဝ်ꩻ အဝ်ႏဒျာႏပအိုဝ်ႏဒေႏသကိုလုမ်ꩻသွူ။ ခမ်းခြွဉ်းဗူႏအစိုႏရတဲ့နဝ်ꩻ၊ တွိုင်ႏဒေႏသတန်(တဝ်းလဲ့)ခမ်းနယ်ႏအစိုႏရတဲ့နဝ်ꩻ၊ နမ်းပဲင်ႏအိုပ်ချွုတ်ခွင်ꩻလတွိုင်ꩻ(တဝ်းလဲ့) နမ်းပဲင်ႏအိုပ်ချွုတ်ခွင်ꩻလꩻဒေႏအွဉ်ငါတဲ့နဝ်ꩻ ကအီႏမာꩻဗာႏခမ်းထီကို၊ ခမ်းနယ်ႏကို၊ နမ်းပဲင်ႏအိုပ်ချုပ်ခွင်ꩻလꩻဒေႏသကို ပြွူႏဖြိုရေꩻ၊ လွိုင်ႏကွုန်ꩻရေꩻနဝ်ꩻ တာႏဝွန်ႏအဝ်ႏထွူဒျာႏရင်ꩻသွူ၊ မိဉ်မာꩻတဲ့နဝ်ꩻ မိဉ်မာꩻတဝ်းတဲ့နဝ်ꩻ မာꩻဖေႏဗာႏသွူ၊ အဝ်ႏလိုႏလꩻသော့ꩻအဝ်ႏတဲ့နဝ်ꩻ၊ အဝ်ႏလိုႏလꩻသော့ꩻအဝ်ႏတဝ်းတဲ့နဝ်ꩻ မာꩻဖေႏဗာနဝ်ꩻ တာႏဝွန်ႏအဝ်ႏထွူဒျာႏသွူ၊ မာꩻဖေႏဗာႏသွူ။ ကမာꩻဖေႏခမ်းထီကို လွိုင်ႏကွုန်ꩻရေꩻအတာႏ ရွဉ်ဘဏ္ဍာႏနဝ်ꩻ နဲင်ႏငံႏတောႏရွဉ်ဘဏ္ဍာႏ၊ ခမ်းထီရွဉ်ဘဏ္ဍာႏဒျာႏသွူ၊ ခမ်းထီရွဉ်ဘဏ္ဍာႏနဝ်ꩻ အဝ်ႏဒျာႏခမ်းသားသီး လမ်းပါႏခွဉ်ႏ၊ အံႏအွꩻခွဉ်ႏကို လꩻလွဉ်နဝ်ꩻသွူ၊ အခွဉ်ႏယိုဖုံႏနဝ်ꩻ ထွာခမ်းထီရွဉ်ဘဏ္ဍာႏနဝ်ꩻသွူ၊ ကမာꩻဒါႏ ခမ်းထီကိုလွိုင်ႏကွုန်ꩻရေꩻ တဖူꩻတထာပြွူႏဖြိုရေꩻနဝ်ꩻ သုံꩻဒျာႏခမ်းထီရွဉ်ဘဏ္ဍာႏနဝ်ꩻသွူ။ ကမာꩻဒါႏ ဒုံဆောင်ႏရပ်ရာႏအတာႏ တဖူꩻတထာ၊ ထီ၊ မေႏ၊ တသီႏယုံႏ၊ သွဉ်လိတ်ကျောင်ꩻဖုံႏယိုနဝ်ꩻ အဝ်ႏပါꩻမုဲင်ꩻမုဲင်ꩻဆဲင်ꩻထုံꩻကိုထေ တမွေးတဝ်းသွူ၊ သုံꩻဒျာႏတောမ်ႏခမ်းထီရွဉ် ဘဏ္ဍာႏတွော့ꩻ နီမာꩻဖေႏသီယို နီမာꩻဖေႏသီနဝ်ꩻ နီမာꩻဖေႏသီတဖူꩻတထာ၊ တသီႏယုံႏ၊ သွဉ်လိတ်ကျောင်ꩻစတဲင် မိဉ်းဒေါ့ꩻနုဲင်းယိုစားနဝ်ꩻ ထွာဒျာႏလိန်ႏလဲဉ် ခမ်းသားသီးသွူ၊ ထွာဒျာႏလွောက်ꩻအံႏ အဂတိနဝ်ꩻသွူ။ ဆုဲင်ꩻချာယိုနဝ်ꩻ အယိန်းဟုဲင်းထဲင်း သီမိဉ်ႏဖေႏဟံႏယိုနဝ်ꩻ မဲ့ꩻမာꩻဖေႏသီဒုံကျောင်ꩻဖုံႏ မေႏဖုံႏ၊ သီမိဉ်ႏဖေႏ ထီကတူႏယို ထီကန်ႏနဝ်ꩻနဝ်ꩻ မဲ့ꩻဒါဖေႏသီတဖူꩻ၊ မဲ့ꩻဟွော့ꩻဖေႏသီတထာ စတဲင်စတဲင် ကအဝ်ႏလိုႏဖေႏယို ထွာဝွေꩻသီးတာႏဝွန်ႏဒျာႏရင်ꩻနဝ်ꩻ ထွာစွဉ်ႏအသုံꩻလွဲꩻခမ်းထီရွဉ်ဘဏ္ဍာႏ၊ သုံꩻလွဲꩻအံႏ ခမ်းသားသီးထာꩻယုမ်းအံႏမု၊ သုံꩻလွဲꩻအံႏမာꩻပဲင်ႏခွင်ꩻ အာႏဏာႏနဝ်ꩻသွူ။ ခမ်းထီအရန်း၊ ခမ်းနယ်ႏအရန်း၊ နမ်းပဲင်ႏဒေႏသအရန်း အရန်းရန်းကိုဖုံႏယို အိုပ်ချုပ်ရေꩻအစိုႏရ၊ တဲမ်းထွို့ꩻဥပဒေႏရေꩻ လွတ်တောႏ၊ စီႏရင်ႏတရာꩻရေꩻ တရာꩻသူꩻကီꩻ ယိုသိုမ်ဗူႏနဝ်ꩻ ထိန်ꩻတီချာငါဗာႏတဝင်ꩻနဝ်ꩻသွူ၊ နမ်းပဲင်ႏဒေႏသအရန်းကို ဒေႏသအွဉ်ငါ တောမ်ႏလွတ်တောႏနမ်းခြောင်ꩻတင်ယိုလဲ့ ပွေါးထွားထိန်ꩻတီချာငါဗာႏဝင်ꩻသွူ။ ပွေါးထွားယီးနယ်တဝ်းသွူတကာႏတဝ်း တဖြာꩻတောမ်ႏတဖြာꩻ မိဉ်ႏဒို့ꩻရဲးထဲင်းတဝင်ꩻအမာႏနဝ်ꩻ အဝ်ႏထွာနေ လွောက်ꩻအံႏအဂတိ၊ သုံꩻလွဲꩻအာႏဏာႏ၊ တရာꩻဥပဒေႏ ဒို့ꩻတခြို့မု တအဝ်ႏတဝ်းအကျောင်ꩻ ခမ်းသားငေါဝ်းအယ်ဒီတာစွိုꩻ တဲမ်းဖြုဲင်ꩻယီးနယ်လွေꩻဗာႏနုဲင်းယိုသွူ။